3 Yoˇhaˬ 1
1
1Aˬ yuiꞈ aꞈ tsu pyeuꞈ-eu ngaˇ,
Ngaˇ maˇ maˇ ni gaˬ dui dui-eu Gaˬyuˇ jawˇ gaˇ sahˬ boꞈ boꞈ ahˇ laꞈ-eu ma.
2Ngaˇ gaˬ dui dui-eu cawˬ-oˇ, nawˇ-aˬ, saꞈ laˇ paw maˬ gaˇ dui dui-eu tsawˇ haˬ meh lehˇ ngaˇ siˬ nya-eu loꞈ-ehˇ, yawˬ jeˬ na luꞈ laꞈ kʼoeˇ guiˬ lahˬ baw-awˇ, yaw muiˬ jawˇ saˇ doˆ ni ngaˇ guiˬ lahˬ shaˇ-eu ma. 3Nawˇ-aˬ, aˬ myah luꞈ yaw tsaˬ yaw dawˇ jeˬ laꞈ kʼoeˇ dehꞈ-eu tsawˇ haˬ pyeuꞈ-eu loꞈ-ehˇ, aˬ yuiꞈ aˬ nyiˇ Ka li zaˬ tiˬ paˆ na deuˬ ngaˇ jawˇ gaˇ oe keuˆ-awˇ, yaw tsaˬ yaw dawˇ jeˬ-ahˇ nawˇ aˇ naˆ ni saˇ jaˇ ziꞈ-eu gaˇ kawˆ ja mehˬ nehˬ laꞈ ngeh, ngaˇ la kʼaˬ cehˇ dui dui-eu ma. 4Ngaˬ-euˬ zaˬ deuˬ yaw tsaˬ yaw dawˇ jeˬ laꞈ kʼoeˇ dehꞈ luꞈ meh lehˇ ya gaˬ-eu naˆ maˬ tseˇ, ngaˇ laˬ kʼaˬ cehˇ-eu nui jeˬ maˬ paˇ jaˆ ma.
Gaˬyuˇ-ahˇ ja ceuˬ-eu
5Ngaˇ gaˬ dui dui-eu cawˬ-oˇ, nawˇ-aˬ, Ka li zaˬ deuˬ-ahˇ mˇ nehˬ shaˇ nehˬ-eu laꞈ kʼoeˇ saˇ jaˇ ziꞈ dui dui-awˇ, maˬ siˬ maˬ mawˇ haw-euˬ Ka li zaˬ deuˬ-ahˇ keuˆ ni kʼoeˇ loꞈ-ehˇ mˇ nehˬ shaˇ nehˬ luꞈ-eu meh. 6Nawˬ-euˬ gʼoeˇ-eu gaˬ-eu jeˬ gaˇ kawˆ, heu gaˇ jawˇ-eu Ka li zaˬ aˇ muˇ-ahˇ aˬ yawꞈ maꞈ ja mehˬ nehˬ-euˬ meh. Miˬyehˇ nui ma tsaˬ-eu loꞈ-ehˇ aˬ yawꞈ maꞈ mehˬ hu paw gaˇ ma doˆ-iˇ nya ni tiˬ poˆ caw ba nehˬ-awˬ lehˇ shaˇ-eu ma. 7Aˬ jeˬ miˇ neh ehˇ naˇ, Ka li-ahˇ maˬ jah-eu tsawˇ haˬ deuˬ neh caw ba-euˬ jeˬ-ahˇ aˬ yawꞈ maꞈ maˬ ha geuꞈ ni Ka li-euˬ gʼaˇ duˬ gaˇ mˇ-eu lehˇ aˬ yawꞈ maꞈ gaˇ ma doˆ-iˇ-euˬ meh. 8Aˬ dui kʼawꞈ, aˬ yawꞈ maꞈ nehˬ-ehˇ yaw tsaˬ yaw dawˇ jeˬ gʼaˇ duˬ tiˬ kawˆ loꞈ-ehˇ caw mˇ caw shaˇ-eu jeˬ pyeuꞈ ni, aˬ dui Ka li zaˬ deuˬ aˬ yawꞈ maꞈ-ahˇ ya caw ba meh.
Daˬyawˇdaˬlaˇ hawˇ-eu Deˬmeˬdeˬliˇ
9Naw maꞈ-euˬ Ka li zaˬ aˇ muˇ-ahˇ, ngaˇ sahˬ boꞈ yaw nymˇ nymˇ-ehˇ boꞈ ahˇ nehˬ-euˬ ma. Ehˇ kʼawꞈ, Ka li zaˬ aˇ muˇ kʼoeˇ taˆ aˬ yuiꞈ geuꞈ mawꞈ-eu Daˬyawˇdaˬlaˇ kʼoeˇ gʼaˬ ngaˬ-euˬ dawˬ-ahˇ tiˬ pawꞈ-iˬ maˬ naˇ haˬ nehˬ laꞈ-a. 10Teu miˇ neh ngaˇ laˇ naˇ, aˬ yawꞈ neh kʼaˇ mˇ kʼaˇ shaˇ-euˬ jeˬ-ahˇ ehˇ ma. Nga maꞈ-euˬ gaˇ kawˆ ja bu ja doeˇ-euˬ jeˬ hawˇ-eu aˬ yawꞈ neh jaˬ myawꞈ kʼaˇ myawꞈ-euˬ jeˬ dawˬ tawˆ luꞈ ehˇ ma. Kʼoeˇ naˆ tehꞈ maˬ ngeuˇ-a siˬ. Aˬ yuiꞈ a nyiˇ Ka li zaˬ deuˬ laˇ ngeh aˬ yawꞈ maˬ ha geuꞈ-euˬ uˬ taꞈ, kʼaˇ ha geuꞈ mawꞈ-eu tsawˇ haˬ deuˬ-ahˇ kʼawꞈ laˆ tsoeˬ-awˇ, Ka li zaˬ aˇ muˇ laꞈ kʼoeˇ neh teh doˆ-eu lehˇ leh jeh-eu meh. 11Ngaˇ gaˬ dui dui-eu cawˬ-oˇ, maˬ muiˬ-eu jeˬ-ahˇ maˬ dzaw geuꞈ ni, yaw muiˬ jeˬ-ahˇ tehꞈ-ehˇ dzaw geuꞈ-awˬ. Yaw muiˬ jeˬ kʼaˇ mˇ-eu tsawˇ haˬ-aˬ, Miˬyehˇ-ahˇ taꞈ-eu tsawˇ haˬ pyeuꞈ-awˇ, maˬ muiˬ-eu jeˬ kʼaˇ mˇ-eu tsawˇ haˬ-aˬ, Miˬyehˇ-ahˇ maˬ siˬ maˬ mawˇ haw-euˬ tsawˇ haˬ pyeuꞈ-eu meh.
12Tsawˇ haˬ yawˬ gʼaˬ na luꞈ, Deˬmeˬdeˬliˇ-euˬ gaˇ kawˆ yaw muiˬ jeˬ ja luꞈmeh. Yaw tsaˬ yaw dawˇ jeˬ kʼawꞈ, aˬ yawꞈ-ahˇ yaw muiˬ meh lehˇ ehˇ-eu meh. Nga maꞈ kʼawꞈ, kʼoeˇ loꞈ-ehˇ saˇ kiˇ kamˬ-eu ma. Nga maꞈ ehˇ-eu heu tsaˬ meh lehˇ nawˇ kʼawꞈ siˬ nya luꞈ meh.
Aˇ saˬ saˬ-eu dawˬ
13Ngaˇ nawˬ-ahˇ ehˇ nehˬ mawꞈ-eu gʼawˬ mya ni jaˆ-eu ma. Ehˇ kʼawꞈ, sahˬ gʼaˬ hawˇ-eu sahˬ uiˇ neh boꞈ-awˇ maˬ paˇ ehˇ ma. 14Gʼawˬ myahˇ maˬ gʼeh-ehˇ nawˬ-ahˇ ngaˇ ya tahˬ dzoeˇ-awˇ, nawˬ nehˬ-ehˇ ya ja cawˬ tehꞈ-a lehˇ ngaˇ noeˬ tmˬ-eu ma.
15Nui saˇ oꞈ luꞈ-uˇ.
Nawˬ-euˬ cawˬ deuˬ dawˬ tawˆ luꞈ nawˬ-ahˇ dawˬ cawˬ puˬ ahˇ laꞈ-euˬ meh. Aˇ nyaꞈ-euˬ cawˬ yawˬ gʼaˬ na luꞈ-ahˇ ngaˇ dawˬ cawˬ puˬ ahˇ laꞈ-euˬ meh lehˇ tiˬ poˆ tsaꞈ gaˬ nehˬ-awˬ.
Currently Selected:
3 Yoˇhaˬ 1: AHK
Highlight
Share
Copy
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.