2 Yoˇhaˬ 1
1
1Tsawˇ mawˬ tsawˇ kʼaˆ pyeuꞈ-eu ngaˇ,
Ngaˇ maˇ maˇ ni gaˬ dui dui-eu Miˬyehˇ neh tseˇ doˆ-euˬ zaˬ miˬ zaˬ hawˇ-eu aˬ yawꞈ-euˬ zaˬ deuˬ jawˇ gaˇ sahˬ boꞈ heu taꞈ boꞈ ahˇ laꞈ-eu ma. Ngaˇ tehꞈ-ehˇ maˬ ngeuˇ ni, yaw tsaˬ yaw dawˇ jeˬ-ahˇ kʼaˇ siˬ nya-eu tsawˇ haˬ dawˬ tawˆ luꞈ naw maꞈ-ahˇ gaˬ-eu meh. 2Aˬ jeˬ miˇ neh ehˇ naˇ, yaw tsaˬ yaw dawˇ jeˬ aˬ dui-euˬ laꞈ kʼoeˇ ahˇ-awˇ, mˬ maˬ maˬ byaˆ zaˇ ziˇ aˬ dui jawˇ gaˇ jaˆ tehꞈ-a.
3Aˬda Miˬyehˇ hawˇ-eu Aˬda Miˬyehˇ-euˬ Zaˬmaˇ Yeˬsuˇ Ka li neh biꞈ leꞈ-euˬ guiˬ lahˬ yaw dzahˇ maˬ ehˇ, gʼawˬ shaˬ gaˬ nehˬ laꞈ-eu jeˬ maˬ ehˇ, nui saˇ oꞈ-eu jeˬ maˬ ehˇ, aˬ dui kʼoeˇ taˆ jaˆ-awˇ, kʼoeˇ smˇ jeˬ luꞈ, yaw tsaˬ yaw dawˇ jeˬ hawˇ-eu gʼoeˇ-eu gaˬ-eu jeˬ laꞈ kʼoeˇ aˬ dui-ahˇ oꞈ luꞈ-uˇ.
Yaw tsaˬ yaw dawˇ jeˬ hawˇ-eu gʼoeˇ-eu gaˬ-eu jeˬ
4Aˬda Miˬyehˇ neh dawˬ kʼaˇ biꞈ taˬ-euˬ loꞈ-ehˇ, nawˬ-euˬ zaˬ tiˬ paˆ na deuˬ yaw tsaˬ yaw dawˇ jeˬ laꞈ kʼoeˇ jawˇ luꞈ gaˇ ya siˬ ya mawˇ-euˬ miˇ neh ngaˇ laˬ kʼaˬ cehˇ dui dui-eu ma. 5Ngaˇ gaˬ dui dui-eu zaˬ miˬ zaˬ-oˇ, nawˬ-ahˇ ngaˇ heu loꞈ-ehˇ shaˇ-eu ma. Aˬ dui tiˬ gʼaˬ tiˇ gʼaˬ gaˬ kaˇ-euˇ. Ngaˇ nawˬ-ahˇ dawˬ yaw shuiꞈ boꞈ ahˇ laꞈ-euˬ maˬ ngeuˇ. Aˇ dahˬ beh ngeh neh aˬ dui-ahˇ biꞈ laꞈ-euˬ dawˬ kʼoeˇ dawˬ boꞈ ahˇ laꞈ-eu ma. 6Gʼoeˇ-eu gaˬ-eu jeˬ lehˇ ngaˇ ehˇ luꞈ-eu heu-aˬ, Miˬyehˇ-euˬ dawˬ-ahˇ naˇ haˬ geuꞈ gaˇ ehˇ mawꞈ-eu ma. Naw maꞈ dawˬ tawˆ luꞈ aˇ dahˬ beh ngeh neh ya gaˬ taˬ-euˬ dawˬ heu dawˬ-aˬ, naw maꞈ dawˬ tawˆ luꞈ gʼoeˇ-eu gaˬ-eu jeˬ laꞈ kʼoeˇ ya dehꞈ meh lehˇ ehˇ-eu kʼoeˇ meh.
7Yeˬsuˇ Ka li tsawˇ haˬ zaˬ-euˬ shiˬ shaˬ jiˇ pi-awˇ oe-euˬ meh lehˇ maˬ ha geuꞈ-eu jaˬ myawꞈ mehˇ shuiˇ shuiˇ-eu tsawˇ haˬ deuˬ gʼawˬ mya ni miˇ tsaˬ kʼoeˇ taˆ iˇ byah taˬ-euˬ meh. Kʼoeˇ loꞈ-ehˇ ehˇ-eu tsawˇ haˬ-aˬ, jaˬ myawꞈ mehˇ shuiˇ pyeuꞈ-awˇ, Ka li-ahˇ Muiˇ-eu tsawˇ haˬ meh. 8Kʼoeˇ miˇ neh, naw maꞈ neh yawˬ ha gʼaˇ duˬ mˇ-euˬ shaˇ-euˬ jeˬ yawꞈ ngehꞈ-ehˇ maˬ bi pyeuꞈ-iˇ-ehˇ, Miˬyehˇ neh naw maꞈ-ahˇ biꞈ-eu lehˇ lehˬ hmˬ taˬ-euˬ jeˬ tiˬ byah tiˬ loꞈ za nya ni yaw kʼaˆ kʼaˆ-ehˇ yahˇ-awˬ.
9Ka li neh mehˬ nehˬ tsoˆ nehˬ taˬ-euˬ jeˬ-euˬ laꞈ kʼoeˇ paw maˬ jawˇ ni aˇ dzeuˇ iˇ dzeuˇ-eu tsawˇ haˬ deuˬ-aˬ, Miˬyehˇ-ahˇ maˬ za-a. Mehˬ nehˬ tsoˆ nehˬ taˬ-euˬ laꞈ kʼoeˇ kʼaˇ jawˇ-eu tsawˇ haˬ-aˬ, Aˬda Miˬyehˇ-ahˇ maˬ ehˇ, Zaˬ maˇ Miˬyehˇ-ahˇ maˬ ehˇ, za-eu meh. 10Kʼoeˇ miˇ neh, Ka li neh mehˬ-euˬ tsoˆ-euˬ jeˬ maˬ yuˇ laꞈ ni naw maꞈ jawˇ gaˇ kʼaˇ laˇ-eu tsawˇ haˬ deuˬ-ahˇ iˇ kahˇ laꞈ kʼoeˇ taˬ ha ahˇ. Dawˬ cawˬ kʼawꞈ taˬ puˬ nehˬ. 11Aˬ jeˬ miˇ neh ehˇ naˇ, kʼoeˇ loꞈ-ehˇ gʼeh-eu tsawˇ haˬ-ahˇ dawˬ cawˬ kʼaˇ puˬ nehˬ-eu tsawˇ haˬ-aˬ, aˬ yawꞈ yaw haiˬ jeˬ mˇ gaˇ gʼaˬ baꞈ baꞈ gaˇ duˇ-eu meh.
Aˇ saˬ saˬ-eu dawˬ
12Ngaˇ naw maꞈ-ahˇ ehˇ nehˬ mawꞈ-eu gʼawˬ mya ni jaˆ-eu ma. Ehˇ kʼawꞈ, sahˬ gʼaˬ hawˇ-eu sahˬ uiˇ neh boꞈ-awˇ maˬ paˇ ehˇ ma. Ngaˬ-euˬ mawˇ do naw maꞈ jawˇ gaˇ laˇ-awˇ, myaˆ pyawˬ tahˬ dzoeˇ-awˇ ehˇ nehˬ ma lehˇ noeˬ tmˬ taˬ-euˬ ma. Kʼoeˇ Loꞈ-ehˇ ngeuˇ naˇ, aˬ dui laˬ kʼaˬ cehˇ-eu jeˬ byah dzehˬ tehꞈ-a.
13Nawˇ gaˬ dui dui-eu nawˬ-euˬ dmˇ ma-euˬ zaˬ deuˬ#1.13 “Nawˇ gaˬ dui dui-eu nawˬ-euˬ dmˇ ma-euˬ zaˬ deuˬ” lehˇ ehˇ-eu-aˬ, Yoˇhaˬ aˬ yawꞈ-euˬ Ka li zaˬ aˇ muˇ hawˇ-eu, Ka li zaˬ aˇ muˇ kʼoeˇ muˇ laꞈ kʼoeˇ jawˇ-eu Ka li zaˬ deuˬ-ahˇ ehˇ mawꞈ gaˇ duˇ-eu meh. nawˬ-ahˇ dawˬ cawˬ puˬ ahˇ laꞈ-euˬ meh.
Currently Selected:
2 Yoˇhaˬ 1: AHK
Highlight
Share
Copy
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.