1 Beˬtuˆluˆ 3

Miˬ zaˬ yo zaˬ yaw kaˬ mˇ paˬ-ehˇ gʼeh-eu deuˬ

1Kʼoeˇ loꞈ-ehˇ duˇ ni, miˬ zaˬ deuˬ kʼawꞈ, yawˬ ha-euˬ kʼaˬ dzeˇ zaˬ ehˇ dawˬ naˇ haˬ-awˬ. Kʼoeˇ loꞈ-ehˇ naˇ haˬ naˇ, kʼaˬ dzeˇ zaˬ gʼaˬ Miˬyehˇ dawˬ kawˬ-ahˇ maˬ jah-eu kʼawꞈ, naw maꞈ dehꞈ gaˇ jawˇ gaˇ haw-awˇ jah laˇ tehꞈ-a. Aˬ yawꞈ maꞈ jah laˇ ni naw maꞈ kʼaˬ meh mehˬ boeˬ neh ja mehˬ-eu maˬ loˬ-aˇ. 2Naw maꞈ-euˬ nui ma aˇ naˆ ni shawˇ-awˇ kʼaˬ dzeˇ zaˬ-ahˇ yaw zeu aˇ naˆ ni baw-eu gaˇ kawˆ, aˬ yawꞈ maꞈ ya mawˇ tehꞈ-a. 3Uˬ duˬ tsehˇ kahˇ aˇ dzehˬ dzeuˇ ni laˆ muiˬ-eu laꞈ kʼoeˇ maˬ ehˇ, shuiˇ laꞈ duꞈ duꞈ, shuiˇ lahˇ dah dah-eu laꞈ kʼoeˇ maˬ ehˇ, mehˬ tsoeˬ yaw poeˬ dm-eu laꞈ kʼoeˇ maˬ ehˇ, laꞈ nyiˇ gʼawˇ mawˇ aˇ gʼehˇ laˆ muiˬ-eu maˬ tsaˬ-a. 4Kʼoeˇ loꞈ-ehˇ maˬ ngeuˇ ni, naw maꞈ aˇ gʼehˇ muiˬ-eu jeˬ-aˬ, laꞈ kʼoeˇ gʼawˇ mawˇ pyeuꞈ-eu nui ma aˇ gʼehˇ muiˬ-eu jeˬ ya bi ahˇ meh. Miˬyehˇ mehˬ shi dawˬ tawˆ luꞈ naˆ maˬ tseˇ poeˬ-eu aˇ gʼehˇ muiˬ-eu jeˬ-aˬ, nui ma nahˬ yu ni taˬ-awˇ ciˬ cuˇ ni dehꞈ-eu jeˬ pyeuꞈ-eu meh. Kʼoeˇ-aˬ, tiˬ ziˇ jiˇ tiˬ yehˆ juˬ ni maˬ poˆ maˬ paˇ laˇ nya-eu aˇ gʼehˇ muiˬ-eu jeˬ pyeuꞈ-eu meh. 5Aˬ jeˬ miˇ neh ehˇ naˇ, aˇ hu ba Miˬyehˇ-ahˇ noeˬ tmˬ-awˇ dehꞈ yaꞈ-euˬ muiˬ-eu shawˇ-eu zaˬ miˬ zaˬ deuˬ-aˬ, yawˬ ha-euˬ kʼaˬ dzeˇ zaˬ ehˇ dawˬ naˇ haˬ geuꞈ-eu jeˬ neh aˇ gʼehˇ bi muiˬ-euˬ meh. 6Saˬlaˇ kʼawꞈ, kʼoeˇ loꞈ-ehˇ dehꞈ yaꞈ-euˬ meh. Aˬ yawꞈ Aˬhyaˬhaˬ-euˬ ehˇ dawˬ naˇ haˬ-awˇ, Aˬbyaˬhaˬ-ahˇ sahˬ paˬ lehˇ kuˇ-euˬ meh. Naw maꞈ kʼawꞈ, yaw muiˬ jeˬ-ahˇ mˇ-awˇ guˆ-eu nui ma maˬ ahˇ naˇ, Saˬlaˇ-euˬ aˬ buˇ deuˬ pyeuꞈ-eu meh.

7Kʼoeˇ loꞈ-ehˇ duˇ ni, kʼaˬ dzeˇ zaˬ deuˬ kʼawꞈ, zaˬ miˬ zaˬ-aˬ kʼaˬ dzeˇ zaˬ naˆ maˬ tseˇ gʼaˬ baˬ-eu meh lehˇ siˬ nya-eu laꞈ kʼoeˇ, yawˬ ha-euˬ miˬ zaˬ nehˬ-ehˇ dehꞈ-awˬ. Aˬ yawꞈ maꞈ-ahˇ yaw zeu baw-awˬ. Aˬ jeˬ miˇ neh ehˇ naˇ, aˬ yawꞈ maꞈ gʼeh naw maꞈ nehˬ-ehˇ tiˬ kawˆ loꞈ-ehˇ Miˬyehˇ neh biꞈ laꞈ-euˬ yaw dehꞈ dehꞈ-eu guiˬ lahˬ yaw dzahˇ jeˬ biˇ za tehꞈ-a. Kʼoeˇ loꞈ-ehˇ yaw zeu baw naˇ, naw maꞈ guiˬ lahˬ shaˇ gaˇ laˆ tsoeˬ-eu tiˬ jeˬ-iˬ ma jaˆ-aˇ.

Yaw muiˬ jeˬ mˇ-eu miˇ neh kʼehˬ-eu kʼaˆ-eu jeˬ-ahˇ ya daˬ-eu

8Aˇ saˬ saˬ-eu dawˬ-aˬ, heu loꞈ-ehˇ ma. Naw maꞈ nui noeˬ taꞈ-awˇ, nui ma gm-awˬ. Ti gʼaˬ tiˇ gʼaˬ aˬ yuiꞈ aˬ nyiˇ loꞈ-ehˇ gaˬ-awˬ. Tiˬ gʼaˬ tiˇ gʼaˬ gʼawˬ shaˬ gaˬ-awˇ nui nahˬ nui yu ahˇ-awˬ. 9Aˬ cawˬ yaw doeˇ jahˇ laˇ gaˇ yaw doeˇ taˬ jahˇ kʼoꞈ nehˬ. Aˬ cawˬ yaˬ kʼehˇ yaˬ laˇ gaˇ yaˬ kʼehˇ maˬ yaˬ kʼoꞈ nehˬ-ehˇ, Miˬyehˇ guiˬ lahˬ biꞈ nehˬ ni dawˬ ngehˬ gʼeh nehˬ-awˬ. Aˬ jeˬ miˇ neh ehˇ naˇ, Miˬyehˇ naw maꞈ-ahˇ kuˇ ngeh, guiˬ lahˬ biꞈ ma lehˇ saˇ jaˬ dzaˬ-awˇ kuˇ-euˬ meh. 10Jaˇ liꞈ laꞈ kʼoeˇ heu loꞈ-ehˇ ehˇ taˬ-euˬ meh.

“Yaw dehꞈ dehꞈ-eu jeˬ-ahˇ mawꞈ-awˇ,

nah muiˬ nah saˇ poˆ-eu tsawˇ haˬ,

mehˬ laˇ dawˬ doeˇ maˬ ya ngehˬ-ehˇ,

mehˬ luˬ jaˬ myawꞈ maˬ ya myawꞈ-a.

11Yaw haiˬ jeˬ mˇ-eu byehˇ dzeh-awˇ,

yaw muiˬ jeˬ ya mˇ daˆ leꞈ meh.

Aˬ cawˬ-ahˇ tsaˬ leˇ dzoeˇ leˇ ni,

nui ma keuˆ-awˇ ya leh jeh meh.

12Aˬ jeˬ miˇ neh ehˇnaˇ,

yaw tsaˬ yaw dawˇ tsawˇ haˬ deuˬ-ahˇ,

Sahˬpaˬ Miyehˇ haw piˇ nehˬ-awˇ,

shaˇ dawˬ naˇ haˬ geuꞈ nehˬ-eu meh.

Ehˇ kʼawꞈ yaw haiˬ mˇ-eu deuˬ-ahˇ,

aˬ yawꞈ myaˆ haw maˬ cawˬ nahˇ-a.”

13Naw maꞈ yaw muiˬ jeˬ mˇ gaˇ leh jeh naˇ, naw maꞈ-ahˇ laˆ coeˬ laˆ ciˆ laˇ-eu aˬ suˇ gʼaˬ jawˇ nmˇ. 14Ehˇ kʼawꞈ, yaw muiˬ jeˬ mˇ-eu baˬ da neh kʼehˬ-eu kʼaˆ-eu jeˬ-ahˇ naw maꞈ ya daˬ-eu ngeuˇ naˇ, guiˬ lahˬ aˇ naˆ ni huiˬ-eu nga. Naw maꞈ-ahˇ kʼehˬ laˇ kʼaˆ laˇ-eu tsawˇ haˬ deuˬ-ahˇ taˬ guˆ. Taˬ noeˬ shaˬ. 15Ehˇ kʼawꞈ, naw maꞈ-euˬ nui ma laꞈ kʼoeˇ Ka li-ahˇ yaw zeu baw-awˇ, aˬ yawꞈ-ahˇ Sahˬpaˬ loꞈ-ehˇ taˬ huiˬ taˬ mahˇ-awˬ. Naw maꞈ-euˬ laꞈ kʼoeˇ ahˇ-eu noeˬ tmˬ taˬ-euˬ gaˇ kawˆ kʼaˇ naˇ haˬ laˇ-eu tsawˇ haˬ-ahˇ yaw muiˬ paˬ-ehˇ ja mehˬ nehˬ nya ni, aˬ myah luꞈ lehˬ hmˬ taˬ-awˬ. 16Ehˇ kʼawꞈ, kʼoeˇ loꞈ-ehˇ ja mehˬ nehˬ ngeh, nui ma nahˬ yu ni taˬ-awˇ yaw zeu baw-eu laꞈ kʼoeˇ ja mehˬ nehˬ-awˬ. Aˬ cawˬ yehˬ bawˬ sehˇ lu-ehˇ ehˇ laˇ gaˇ naw maꞈ ya daˬ ngeh, Ka li laꞈ kʼoeˇ naw maꞈ yaw muiˬ jeˬ mˇ luꞈ gaˇ ja doeˇ-eu tsawˇ haˬ deuˬ yawˬ ha-euˬ dawˬ-ahˇ yawˬ ha ya shaꞈ dawˇ-iˇ ni, naw maꞈ-euˬ siˬ nya-eu nui ma shawˇ jehˆ ni taˬ-awˬ. 17Kʼehˬ-eu kʼaˆ-eu jeˬ-ahˇ naw maꞈ ya daˬ-eu-aˬ, Miˬyehˇ nui ma tsaˬ-eu jeˬ pyeuꞈ-eu ngeuˇ naˇ, maˬ muiˬ-eu jeˬ mˇ-awˇ ya daˬ-eu naˆ maˬ tseˇ, yaw muiˬ jeˬ mˇ-awˇ yaˬ daˬ-eu tsaˬ dzehˬ meh. 18Tsawˇ haˬ zaˬ-euˬ iˬ baˇ gʼaˇ duˬ Ka li tiˬ poˆ tehꞈ-ehˇ kamˇ shiˇ-euˬ meh. Aˬ yawꞈ kamˇ shiˇ-euˬ kʼoeˇ-aˬ, iˬ baˇ zaˬ deuˬ-ahˇ Miˬyehˇ jawˇ gaˇ sheuˬ gʼeh-eu gʼaˇ duˬ, iˬ baˇ maˬ ahˇ-eu tsawˇ haˬ tiˬ gʼaˬ iˬ baˇ zaˬ deuˬ-euˬ dah zaˇ kamˇ shiˇ-euˬ jeˬ pyeuꞈ-awˇ, mˬ maˬ maˬ byaˆ zaˇ ziˇ gʼaˇ duˬ tiˬ poˆ tehꞈ-ehˇ kamˇ shiˇ-euˬ jeˬ pyeuꞈ-eu meh. Shiˬ shaˬ jiˇ paw taꞈ leˇ-awˇ aˬ yawꞈ-ahˇ sehꞈ-euˬ kʼawꞈ, saꞈ laˇ paw taꞈ leˇ-awˇ Miˬyehˇ neh aˬ yawꞈ-ahˇ bi dehꞈ-euˬ meh. 19Saꞈ laˇ laꞈ kʼoeˇ aˬ yawꞈ iˇ-awˇ, bi ka lahˇ taˬ-euˬ saꞈ laˇ deuˬ-ahˇ dawˬ mehˬ mehˬ-iˇ-euˬ meh. 20Bi ka lahˇ taˬ-euˬ saꞈ laˇ kʼoeˇ deuˬ-aˬ, Noˇaˬ saˇ baoˬ jahˇ-euˬ ziˇ kʼoeˇ ziˇ-ahˇ Miˬyehˇ nui ma gʼawˬ mahˇ ni taˬ-awˇ dawˬ-euˬ kʼawꞈ, Miˬyehˇ-euˬ ehˇ dawˬ maˬ naˇ haˬ-euˬ tsawˇ haˬ kʼoeˇ deuˬ-euˬ saꞈ laˇ deuˬ meh. Saˇ baoˬ laꞈ kʼoeˇ uˇ leˇ-euˬ tsawˇ haˬ yehꞈ gʼaˬ tehꞈ-ehˇ Miˬyehˇ neh iˇ cuꞈ-ahˇ bi buˬ-iˇ-euˬ meh. 21Iˇ cuꞈ-ahˇ bi buˬ-iˇ-euˬ gaˇ kawˆ kʼoeˇ-aˬ, nymˬ-mˇ naw maꞈ ka kʼoꞈ-eu jeˬ za nya ni iˇ cuꞈ shawˇ-euˬ gaˇ kawˆ-ahˇ taꞈ leˇ-eu meh. Iˇ cuꞈ shawˇ-eu kʼoeˇ-aˬ, gʼawˇ mawˇ yaw yehˆ dzuiꞈ shawˇ-eu jeˬ maˬ ngeuˇ-a. Siˬ nya-eu nui ma laꞈ kʼoeˇ Miˬyehˇ-ahˇ saˇ jaˇ dzaˬ-eu jeˬ pyeuꞈ-eu meh. Iˇ cuꞈ shawˇ-eu koeˇ-aˬ, Yeˬsuˇ Ka li-ahˇ Miˬyehˇ neh bi gʼoꞈ dehꞈ laˇ-euˬ gaˇ gʼoe-awˇ naw maꞈ-ahˇ ka kʼoꞈ-eu jeˬ pyeuꞈ-eu meh. 22Gʼoꞈ dehꞈ laˇ-euˬ Ka li-aˬ, mˬ kʼoeˇ taˆ daˆ gʼoꞈ leˇ-awˇ Miˬyehˇ-euˬ aˇ maˇ paw nuiˇ-eu laꞈ kʼoeˇ, mˬ taˆ gʼaˬ kʼehˇ dawˬ tawˆ luꞈ kʼoeˇ taˆ maˬ ehˇ, mˬ taˆ-euˬ sahˬ paˬ sahˬ ma deuˬ hawˇ-eu baoˬ ahˇ-eu deuˬ dawˬ tawˆ luꞈ kʼoeˇ taˆ maˬ ehˇ, uˆ lahˇ luꞈ-eu meh.

Currently Selected:

1 Beˬtuˆluˆ 3: AHK

Highlight

Copy