1 Beˬtuˆluˆ 2
2
Dehꞈ luꞈ-eu kʼaˬ lo hawˇ-eu muiˬ-eu shawˇ-eu tsawˇ haˬ
1Kʼoeˇ miˇ neh, yaw haiˬ jeˬ dawˬ tawˆ luꞈ-ahˇ byehˇ dzeh-awˬ. Jaˬ myawꞈ myawꞈ-eu maˬ ehˇ, awꞈ-aꞈ tahˬ kʼoˬ#2.1 ‘Awꞈ-aꞈ tahˬ kʼoˬ’ lehˇ ehˇ-eu dawˬ tsuiꞈ, Maꞈtehˬ 6.2-ahˇ haw-awˬ. loꞈ-ehˇ yaw muiˬ jahˇ geuꞈ-eu maˬ ehˇ, aˬ cawˬ-ahˇ myaˆ naˆ-eu maˬ ehˇ, aˬ cawˬ-ahˇ ja bu ja doeˇ-eu maˬ ehˇ, taˬ paˇ mˇ. 2Zaˬ nahˬ aˬ coeˇ mehꞈ-eu loꞈ-ehˇ, aˬ myah luꞈ maˇ jawˆ ni gʼeh-eu saꞈ laˇ aˬ coeˇ mehꞈ-awˬ. Aˬ coeˇ kʼoeˇ dawˇ-eu ba da neh naw maꞈ saꞈ laˇ paw huiˬ laˇ mahˇ laˇ-awˇ, ka kʼoꞈ-eu jeˬ za tehꞈ-a. 3Jaˇliꞈ laꞈ kʼoeˇ ehˇ taˬ-euˬ loꞈ-ehˇ, “Sahˬpaˬ Miˬyehˇ aˇ naˆ ni gʼawˬ shaˬ gaˬ nya-eu gaˇ kawˆ naw maꞈ siˬ duˬ mawˇ duˬ gʼaˬ-euˬ meh.”
4Tsawˇ haˬ zaˬ neh maˬ poeˬ maˬ lawˬ-a lehˇ sawˇ-awˇ baꞈ dzeh-euˬ kʼawꞈ, Miˬyehˇ neh poeˬ dui lawˬ dui dui meh lehˇ sawˇ-awˇ tseˇ doˆ taˬ-euˬ dehꞈ luꞈ-eu kʼaˬ lo pyeuꞈ-eu Sahˬpaˬ Yeˬsuˇ jawˇ gaˇ laˇ-awˬ. 5Naw maꞈ kʼawꞈ, dehꞈ luꞈ-eu kʼaˬ lo loꞈ-ehˇ laˇ-awˇ, saꞈ laˇ uˬ duˬ tahˬ nymˇ tsoˆ gaˇ bi zmˬ-awˬ. Uˬ duˬ tahˬ nymˇ kʼoeˇ-euˬ laꞈ kʼoeˇ naw maꞈ muiˬ-eu shawˇ-eu piˇ ma ya geuꞈ-awˇ, Yeˬsuˇ ka li-ahˇ gʼoe-eu laꞈ kʼoeˇ Miˬyehˇ ha geuꞈ nehˬ laꞈ nya-eu saꞈ laˇ paw taꞈ leˇ-eu lawˇ-eu jeˬ ya lawˇ tehꞈ-a. 6Aˬ jeˬ miˇ neh ehˇ naˇ,Jaˇliꞈ laꞈ kʼoeˇ heu loꞈ-ehˇ ehˇ taˬ-euˬ meh.
“Poeˬ-eu kʼaˬ lo ngaˇ tseˇ doˆ-awˇ,
Ziˇoˬ meuˬ-ahˇ gawˬ-eu laꞈ kʼoeˇ,
laꞈ coeˇ lo ziꞈ#2.6 ʼLaꞈ coeˇ lo ziꞈʼ lehˇ ehˇ-eu dawˬ tsuiꞈ Maꞈtehꞈ21.42-ahˇ haw-awˬ. bi geuꞈ-euˬ ma.
Aˬ yawꞈ-ahˇ kʼaˇ jah-eu tsawˇ haˬ,
daˬ ga-awˇ maˬ ya shaꞈ dawˇ-aˇ.”
7Kʼaˬ lo heu-aˬ, jah-eu tsawˇ haˬ deuˬ pyeuꞈ-eu naw maꞈ gʼaˇ duˬ poeˬ dui lawˬ dui dui-eu meh. Ehˇ kʼawꞈ, maˬ jah-eu tsawˇ haˬ deuˬ gʼaˇ duˬ-aˬ, heu loꞈ-ehˇ ehˇ taˬ-euˬ meh.
“Nymˇ tsoˆ-eu deuˬ maˬ geuꞈ nahˇ-ehˇ,
byehˇ dzeh taˬ-euˬ kʼaˬ lo kʼoeˇ siˬ,
dawˬ tawˆ luꞈ naˆ maˬ tseˇ poeˬ-eu,
laˬ coeˇ lo ziꞈ pyeuꞈ laˇ-euˬ meh.”
8Jaˇliꞈ laꞈ kʼoeˇ heu loꞈ-ehˇ paˇ ehˇ taˬ-euˬ jaˆ-eu meh.
“Tsawˇ haˬ zaˬ sahˬ tiꞈ bi tiꞈ-awˇ,
bi coˬ dzeh-iˇ-eu kʼaˬ lo meh.”
Miˬyehˇ dawˬ kawˬ-ahˇ aˬ yawꞈ maꞈ maˬ jah-eu baˬ da neh, aˬ yawꞈ maꞈ sahˬ tiˬ tiꞈ-eu meh. A yawꞈ maꞈ sahˬ tiˬ tiꞈ-eu kʼoeˇ-aˬ, Miˬyehˇ aˇ hu ba neh lehˬ hmˬ taˬ-euˬ jeˬ pyeuꞈ-eu meh.
9Ehˇ kʼawꞈ, naw maꞈ-aˬ, tseˇ doˆ-euˬ tsawˇ haˬ pyeuꞈ-awˇ, Sahˬpaˬ-euˬ piˇ ma deuˬ pyeuꞈ-eu meh. Muiˬ-eu shawˇ-eu tsawˇ haˬ pyeuꞈ-awˇ, Miˬyehˇ-euˬ tsawˇ haˬ pyeuꞈ-eu meh. Miˬyehˇ neh mˇ-euˬ zahˬ leˇ paˬ-ehˇ gʼeh-eu gaˇ deuˬ aˬ cawˬ-ahˇ bi ja meh-eu gʼaˇ duˬ, naw maꞈ-ahˇ Miˬyehˇ tseˇ doˆ-euˬ meh. Aˬ yawꞈ-aˬ, yaw zahˇ laꞈ kʼoeˇ naw maꞈ-ahˇ kuˇ doˆ-awˇ, zahˬ leˇ paˬ-ehˇ gʼeh-eu aˬ yawꞈ-euˬ yaw shehꞈ laꞈ kʼoeˇ sheuˬ uˇ nehˬ laꞈ-euˬ meh. 10Yaw beh-aˬ, naw maꞈ Miˬyehˇ-euˬ tsawˇ haˬ maˬ ngeuˇ-a. Ehˇ kʼawꞈ, nymˬ-mˇ aˬ yawꞈ-euˬ tsawˇ haˬ pyeuꞈ laˇ-euˬ meh. Yaw beh Miˬyehˇ gʼawˬ shaˬ gaˬ-eu jeˬ-ahˇ naw maꞈ maˬ siˬ nya-aˬ. Ehˇ kʼawꞈ, nymˬ-mˇ aˬ yawꞈ-euˬ gʼawˬ shaˬ gaˬ-eu jeˬ-ahˇ naw maꞈ za-euˬ meh.
11Gaˬ-eu aˬ yuiꞈ aˬ nyiˇ Ka li zaˬ deuˬ-oˇ, yawˬ kʼahˬ yawˬ miˇ yawˬ-ahˇ cehˆ byaˆ taˬ-euˬ naw maꞈ-ahˇ ngaˇ heu loꞈ-ehˇ shaˇ-eu ma. Shiˬ shaˬ jiˇ-euˬ nui kʼahˇ naw maꞈ-ahˇ taˬ bi gʼaˬ leˇ. Shiˬ shaˬ jiˇ-euˬ nui kʼahˇ kʼoeˇ-aˬ, aˬ myah luꞈ saꞈ laˇ-ahˇ deuˆ ceh ceh luꞈ-eu jeˬ pyeuꞈ-eu meh. 12Miˬyehˇ-ahˇ maˬ jah-eu tsawˇ haˬ deuˬ-euˬ mehˬ shi naw maꞈ dehꞈ-eu jawˇ-eu gaˇ kawˆ muiˬ dui bi dui-awˬ. Kʼoeˇ loꞈ-ehˇ dehꞈ naˇ, naw maꞈ-ahˇ yaw haiˬ jeˬ mˇ-eu tsawˇ haˬ lehˇ aˬ yawꞈ maꞈ ja doeˇ kʼawꞈ, naw maꞈ yaw muiˬ jeˬ mˇ-euˬ meh lehˇ aˬ yawꞈ maꞈ ya ha geuꞈ-awˇ, Miˬyehˇ yaˇ kʼaˬ daˇ le ngeh Nah, aˬ yawꞈ maꞈ Miˬyehˇ-ahˇ ja ceuˬ tehꞈ-a.
13Sahˬpaˬ Yeˬsuˇ-euˬ myaˆ pyawˬ-ahˇ haw-awˇ, miˇ kʼahˬ sahˬpaˬ sahˬ ma dawˬ tawˆ luꞈ-euˬ laꞈ oˆ dehꞈ-awˬ. Miˇ kʼahˬ sahˬ paˬ dawˬ tawˆ luꞈ kʼoeˇ taˆ huiˬ dzehˬ-eu gʼaˬ pyeuꞈ-eu Gehˇsaˬ sahˬ paˬ-euˬ ehˇ dawˬ-ahˇ maˬ ehˇ, 14yaw haiˬ jeˬ mˇ-eu tsawˇ ha deuˬ-ahˇ kʼehˬ nehˬ kʼaˆ nehˬ-awˇ yaw muiˬ jeˬ mˇ-eu tsawˇ haˬ deuˬ-ahˇ ja ceuˬ nehˬ-eu gʼaˇ duˬ Gehˇsaˬ sahˬ paˬ neh kʼehˇ-awˇ bi uˆ lahˇ luꞈ-eu sahˬ paˬ sahˬ ma deuˬ-euˬ ehˇ dawˬ-ahˇ maˬ ehˇ, naˇ haˬ geuꞈ-awˬ. 15Aˬ jeˬ miˇ neh ehˇ naˇ, naw maꞈ neh mˇ-euˬ yaw muiˬ jeˬ baˬ da neh, aˬ dzawˬ aˇ gah deuˬ maˬ siˬ nya-ehˇ ngehˬ luꞈ-eu gaˇ dahˇ maˬ tsoeˬ-eu dawˬ deuˬ ciˬ cuˇ ni bi pyeuꞈ-iˇ-eu gʼaˇ duˬ, Miˬyehˇ mawꞈ-eu meh. 16Zaˬ kʼaˆ maˬ paˇ ya geuꞈ ni buˬ-iˇ-euˬ tsawˇ haˬ loꞈ-ehˇ dehꞈ-awˬ. Ehˇ kʼawꞈ, kʼoeˇ loꞈ-ehˇ ya buˬ-iˇ-euˬ miˇ neh, yaw haiˬ jeˬ-ahˇ aˇ dzehˬ taˬ paˇ mˇ. Miˬyehˇ-euˬ zaˬ kʼaˆ loꞈ-ehˇ dehꞈ-awˬ. 17Yawˬ gʼaˬ na luꞈ-ahˇ yaw zeu baw-awˬ. Ka li-ahˇ jah-eu tsawˇ haˬ cawˬ cawˬ gaˬ-awˬ gʼoeˇ-awˬ. Miˬyehˇ-ahˇ taˬ huiˬ taˬ mahˇ-awˬ. Gehˇsaˬ sahˬ paˬ-ahˇ yaw zeu baw-awˬ.
Ka li ya shaˬ ya zahˬ-euˬ gaˇ dzaw geuꞈ-awˬ
18Zaˬ kʼaˆ deuˬ-oˇ, yawˬ ha-euˬ baw leˬ ehˇ dawˬ naˇ haˬ-awˇ yaw zeu baw nehˬ-awˬ. Gʼawˬ shaˬ gaˬ-eu siˬ nya-awˇ naw maꞈ shaˇ noeˬ nehˬ laꞈ nya-eu baw leˬ deuˬ-ahˇ tehꞈ-ehˇ maˬ ngeuˇ ni, gʼawˬ shaˬ gaˬ-eu maˬ siˬ nya-eu baw leˬ deuˬ-ahˇ kʼawꞈ yaw zeu baw-awˬ. 19Naw maꞈ Miˬyehˇ-euˬ nui kʼahˇ siˬ nya-eu laꞈ kʼoeˇ maˬ ngeuˇ gaˇ keuˆ ni kʼehˬ nehˬ kʼaˆ nehˬ laꞈ gaˇ daˬ dzeuˇ oˇ dzeuˇ naˇ, kʼoeˇ-euˬ gʼaˇ duˬ Miˬyehˇ naw maꞈ-ahˇ guiˬ lahˬ biꞈ laꞈ tehꞈ-a. 20Naw maꞈ yaw lehˬ mˇ-euˬ baˬ da neh aˬ cawˬ diˬ laˇ gaˇ ya daˬ-eu kʼoeˇ-aˬ, aˬ jeˬ guiˬ lah baw nmˇ. Ehˇ kʼawꞈ, naw maꞈ tsaˬ-eu jeˬ-ahˇ mˇ-euˬ baˬ da neh aˬ cawˬ kʼehˬ laˇ kʼaˆ laˇ gaˇ daˬ dzeuˇ oˇ dzeuˇ naˇ, naw maꞈ-ahˇ Miˬyehˇ guiˬ lahˬ biꞈ laꞈ tehꞈ-a. 21Naw maꞈ kʼoeˇ loꞈ-ehˇ dehꞈ-eu gʼaˇ duˬ Miˬyehˇ naw maꞈ-ahˇ kuˇ-euˬ meh. Aˬ jeˬ miˇ neh ehˇ naˇ, naw maꞈ Ka li-euˬ pehˬ zaˇ-ahˇ caw teh nya ni, aˬ yawꞈ-ahˇ bi dzaw geuꞈ-eu lehˇ, naw maꞈ gʼaˇ duˬ aˬ yawꞈ daˬ dzeuˇ yaꞈ-euˬ meh. 22Aˬ yawꞈ iˬ baˇ tiˬ pawꞈ-iˬ maˬ mˇ haw-aˬ. Aˬ yawꞈ-euˬ kʼaˬ meh-ahˇ jaꞈ myawꞈ myawꞈ-eu dawˬ tiˬ dawˬ-iˬ ma ngehˬ doˆ leꞈ haw-aˬ. 23Aˬ cawˬ aˬ yawꞈ-ahˇ dawˬ doeˇ ngehˬ daˆ nehˬ-euˬ kʼawꞈ, aˬ yawꞈ yaw doeˇ maˬ ehˇ kʼoꞈ nehˬ haw-aˬ. Aˬ cawˬ kʼehˬ nehˬ kʼaˆ nehˬ gaˇ aˬ yawꞈ ya daˬ ngeh, aˬ cawˬ-ahˇ guˆ tsiˬ nyehꞈ-eu dawˬ aˬ yawꞈ maˬ ngehˬ-ehˇ, dawˇ coe ni yaˇ kʼaˬ daˇ-eu gʼaˬ pyeuꞈ-eu Miˬyehˇ-euˬ aˬ laꞈ laꞈ kʼoeˇ aˬ yawꞈ-euˬ gʼawˇ mawˇ a nehˬ-euˬ meh. 24Iˬ baˇ laꞈ kʼoeˇ aˬ dui maˬ paˇ dehꞈ ni shiˇ tsehˆ yaꞈ-awˇ, yaw tsaˬ yaw dawˇ jeˬ gʼaˇ duˬ yaw dehˬ dehꞈ nya ni aˬ dui-euˬ iˬ baˇ-ahˇ Ka li aˬ yawꞈ-euˬ gʼawˇ mawˇ laꞈ kʼoeˇ pi-awˇ, laꞈ yaꞈ kʼoeˇ taˆ kamˇ shiˇ-euˬ meh. Aˬ yawꞈ ya daˬ-euˬ maˇ kʼehˬ maˇ naˇ baˬ da neh naw maꞈ-euˬ naˇ gawˇ taˬ leˇ-euˬ meh. 25Yaw beh, naw maꞈ-aˬ, gaˇ ma byoˆ-iˇ-awˇ shaˬ luꞈ-eu yawˇ deuˬ-ahˇ duˇ-eu meh. Ehˇ kʼawꞈ, nymˬ-mˇ-aˬ, naw maꞈ-ahˇ Bo saˆ haw piˇ-eu gʼaˬ pyeuꞈ-eu Yawˇ bo-eu yaw sahˇ-euˬ mehˬ nah bi caw teh-eu gʼaˇ duˬ, naw maꞈ-ahˇ sheuˬ kʼoꞈ doˆ nehˬ laꞈ-euˬ meh.
Currently Selected:
1 Beˬtuˆluˆ 2: AHK
Highlight
Share
Copy
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
