1 Beˬtuˆluˆ 1
1
1Yeˬsuˇ Ka li-euˬ gʼaˬ kʼehˇ pyeuꞈ-eu ngaˇ Beˬtuˆluˆ,
Aˬ cawˬ miˇ kʼahˬ doe ni bi teh byaˆ jiˇ-awˇ, Boˬtuˆ miˇ kʼahˬ, Gaˬlaˬtiˆ miˇ kʼahˬ, Gaˬbaˬdawˇciˆ miˇ kʼahˬ, Aˬshaˆ miˇ kʼahˬ, Beˬtuˇniˇ miˇ kʼahˬ, heu deuˬ-ahˇ jawˇ byaˆ taˬ-euˬ Miˬyehˇ-euˬ tsawˇ haˬ deuˬ jawˇ gaˇ sahˬ boꞈ boꞈ ahˇ laꞈ-eu ma. 2Yeˬsuˇ Ka li-euˬ dawˬ-ahˇ naˇ haˬ geuꞈ-awˇ aˬ yawꞈ-euˬ shiˬ neh bi mˇ shawˇ-eu gʼaˇ duˬ, Aˬda Miˬyehˇ neh lehˬ hmˬ taˬ-euˬ jaˆ-eu loꞈ-ehˇ naw maꞈ-ahˇ tseˇ doˆ-awˇ, Yaw sahˇ Miˬyehˇ-ahˇ gʼoe-eu laꞈ kʼoeˇ muiˬ-eu shawˇ-eu tsawˇ haˬ bi pyeuꞈ laˇ-euˬ meh.
Dehˬ luꞈ-eu noeˬ tmˬ duˬ
3Sahˬpaˬ Yeˬsuˇ Ka li-euˬ Aˬda pyeuꞈ-eu Miˬyehˇ-euˬ guiˬ lahˬ-ahˇ ja ceuˬ kaˇ-euˇ. Aˬ yawꞈ-euˬ huiˬ dui dui-eu gʼawˬ shaˬ gaˬ-eu jeˬ baˬ da neh, Yeˬsuˇ Ka li-ahˇ shiˇ-euˬ gaˇ bi gʼoꞈ dehꞈ laˇ-eu laꞈ kʼoeˇ aˬ dui-ahˇ yaw shuiꞈ bi dehꞈ paˇ laꞈ-euˬ meh. Kʼoeˇ-aˬ, aˬ dui-euˬ laꞈ kʼoeˇ dehꞈ luꞈ-eu noeˬ tmˬ duˬ bi byah laˇ-euˬ meh. 4Kʼoeˇ baˬ da neh, Miˬyehˇ neh aˬ yawꞈ-euˬ tsawˇ haˬ deuˬ gʼaˇ duˬ bi jaˆ-euˬ muiˬ dui byah dui dui-eu guiˬ lahˬ-ahˇ za-eu yaw duˬ baw-eu ma. Maˬ buꞈ maˬ cehˇ-iˇ nya-eu, maˬ muiˬ maˬ shawˇ-eu jeˬ maˬ pyeuꞈ-iˇ nya-eu uˬ taꞈ, maˬ byoˆ maˬ laˆ-iˇ nya-eu guiˬ lahˬ kʼoeˇ, naw maꞈ gʼaˇ duˬ mˬ kʼoeˇ taˆ aˬ yawꞈ bi jaˆ-euˬ meh. 5Laꞈ sawˬ kʼoeˇ-aˬ, naw maꞈ-euˬ gʼaˇ duˬ pyeuꞈ-eu meh. Aˬ jeˬ miˇ neh ehˇ naˇ, naw maꞈ Ka li-ahˇ jah-eu tsawˇ haˬ pyeuꞈ-eu miˇ neh, aˇ saˬ saˬ-eu aˇ nah aˇ yamˬ-ahˇ pah mehˬ-eu lehˇ lehˬ hmˬ taˬ-euˬ ka kʼoꞈ-eu jeˬ-ahˇ za nya ni, Miˬyehˇ-euˬ baoˬ neh haw lahˇ taˬ-euˬ tsawˇ haˬ pyeuꞈ-eu meh.
6Lawˬ haw-eu gʼawˬ mya jeˬ-ahˇ ya daˬ-eu baˬ da neh nymˬ-mˇ tiˬ kʼehˬ laꞈ kʼoeˇ naw maꞈ ya noeˬ shaˬ kʼawꞈ, Miˬyehˇ neh lehˬ hmˬ taˬ-euˬ kʼoeˇ-ahˇ laˬ kʼaˬ cehˇ-awˬ. 7Lawˬ haw-eu kʼoeˇ-aˬ, naw maꞈ-euˬ jah-eu jeˬ maˇ jawˆ ni gʼeh-eu gaˇ kawˆ bi siˬ duˬ laˇ-eu gʼaˇ duˬ meh. Laˆ piˬ laˆ byoˆ nya-eu jeˬ pyeuꞈ-eu shuiˇ-ahˇ kʼawꞈ miˬ dzaˬ neh ya lawˬ haw-eu-aˬ, shuiˇ naˆ maˬ tseˇ poeˬ dui lawˬ dui dui-eu naw maꞈ-euˬ jah-eu jeˬ-ahˇ kʼawꞈ ya bi lawˬ haw tehꞈ-a. Kʼoeˇ naˇ, Yeˬsuˇ Ka li-ahˇ bya cehˆ ni ya mawˇ ngeh nah Miˬyehˇ naw maꞈ-ahˇ ja ceuˬ nehˬ laꞈ-awˇ, yaw shehꞈ kʼahˬ sehˇ bi za-eu uˬ taꞈ, ciˬ huiˬ ciˬ mahˇ nehˬ laꞈ tehꞈ-a. 8Aˬ yawꞈ-ahˇ naw maꞈ maˬ mawˇ haw-euˬ kʼawꞈ, naw maꞈ aˬ yawꞈ-ahˇ gaˬ-awˇ, nymˬ-mˇ aˬ yawꞈ-ahˇ naw maꞈ maˬ ya mawˇ kʼawꞈ, naw maꞈ aˬ yawꞈ-ahˇ jah-eu meh. Kʼoeˇ miˇ neh, maˬ ehˇ jiˇ coeˇ gaˇ keuˆ ni laˬ kʼaˬ cehˇ-awˬ. 9Aˬ jeˬ miˇ neh ehˇ naˇ, aˬ yawꞈ-ahˇ jah-eu laꞈ kʼoeˇ noeˬ tmˬ taˬ-euˬ jeˬ pyeuꞈ-eu saꞈ laˇ ka kʼoꞈ-eu jeˬ-ahˇ naw maꞈ za luꞈ-eu meh.
10Miˬyehˇ gʼaˇ duˬ ngehˬ dah-eu deuˬ neh ka kʼoꞈ-eu jeˬ heu-ahˇ yaw muiˬ paˬ-ehˇ pyehˆ tseˇ duˬ-awˇ, Miˬyehˇ naw maꞈ-ahˇ biꞈ-eu lehˇ gʼeh-eu laꞈ sawˬ heu-euˬ gaˇ kawˆ ngehˬ dah yaꞈ-euˬ meh. 11Ka kʼoꞈ-eu jeˬ heu aˬ geu ngeh yamˬ-ahˇ keuˆ le-awˇ, aˬ joˆ-ehˇ keuˆ le-eu gaˇ kawˆ aˬ yawꞈ maꞈ poˆ tseˇ-euˬ meh. Ka li ya daˬ-euˬ shaˬ zahˬ hawˇ-eu, kʼoeˇ sawˇ miˇ tsa yaw shehꞈ kʼahˬ sehˇ doˆ laˇ-euˬ gaˇ kawˆ, aˇ hu ba neh ngehˬ dah taˬ-euˬ jaˆ-eu meh. Kʼoeˇ loꞈ-ehˇ ngehˬ dah ngeh, Ka liˬ-euˬ Yaw sahˇ neh aˬ yawꞈ maꞈ-euˬ laꞈ kʼoeˇ jawˇ-awˇ toeˬ mehˬ nehˬ-euˬ aˇ nah aˇ yamˬ kʼoeˇ-aˬ, aˇ nah aˇ yamˬ heu yamˬ meh. 12Aˇ hu Miˬyehˇ gʼaˇ duˬ ngeh dah-eu kʼoeˇ deuˬ neh mˇ-euˬ gaˇ-aˬ, aˬ yawꞈ maꞈ-euˬ gʼaˇ duˬ maˬ ngeuˇ-ehˇ, naw maꞈ-euˬ gʼaˇ duˬ pyeuꞈ-eu gaˇ kawˆ aˬ yawꞈ maꞈ-ahˇ Miˬyehˇ pah mehˬ nehˬ-euˬ meh. Aˇ hu aˬ yawꞈ maꞈ neh ngehˬ dah-euˬ gaˇ kawˆ kʼoeˇ deuˬ-aˬ, nymˬ-mˇ mˬ kʼoeˇ taˆ neh bi oe-euˬ Muiˬ-eu Shawˇ-eu Yaw sahˇ Miˬyehˇ-euˬ baoˬ-ahˇ gʼoe-awˇ Laˬ kʼaˬ cehˇ-eu Guiˬ lahˬ dawˬ mehˬ-eu deuˬ mehˬ luꞈ-eu, naw maꞈ ya gaˬ luꞈ-eu gaˇ kawˆ heu deuˬ meh. Gaˇ kawˆ heu-aˬ, mˬ taˆ gʼaˬ kʼehˇ deuˬ-ahˇ keuˆ ni siˬ mawꞈ dui dui-eu gaˇ kawˆ meh.
13Kʼoeˇ miˇ neh, naw maꞈ-euˬ nui ma lehˬ hmˬ dah taˬ-awˬ. Yaw beuˇ beuˇ-ehˇ dehꞈ-awˇ, Yeˬsuˇ Ka li-ahˇ bya cehˆ ni ya mawˇ ngeh nah naw maꞈ-ahˇ biꞈ-eu lehˇ lehˬ hmˬ taˬ-euˬ guiˬ lahˬ yaw dzahˇ-ahˇ tehꞈ-ehˇ noeˬ tsoˆ taˬ-awˬ. 14Miˬyehˇ-euˬ dawˬ-ahˇ naˇ haˬ geuꞈ-awˬ. Aˇ hu naw maꞈ Miˬyehˇ-ahˇ maˬ siˬ nya ngeh yawˬ ha-euˬ nui noeˬ nui loˆ geuꞈ-euˬ loꞈ-ehˇ taˬ gʼeh. 15Naw maꞈ-ahˇ kuˇ-eu gʼaˬ pyeuꞈ-eu Miˬyehˇ muiˬ-eu shawˇ-eu loꞈ-ehˇ, naw maꞈ kʼaˇ mˇ kʼaˇ shaˇ-eu jeˬ bi muiˬ bi shawˇ-awˬ. 16“Ngaˇ yaw muiˬ yaw shawˇ miˇ neh, naw maꞈ kʼawꞈ ya bi muiˬ ya bi shawˇ meh” lehˇ, Jaˇliꞈ laꞈ kʼoeˇ ehˇ taˬ-euˬ meh.
17Tsawˇ haˬ dawˬ tawˆ luꞈ-ahˇ myaˆ pyawˬ huiˬ nyiˇ maˬ tseˇ ni, aˬ yawꞈ gʼaˬ yawꞈ neh kʼaˇ mˇ kʼaˇ shaˇ taˬ-euˬ gaˇ haw-awˇ yaˇ kʼaˬ daˇ-eu gʼaˬ pyeuꞈ-eu Miˬyehˇ-ahˇ naw maꞈ guiˬ lahˬ shaˇ ngeh, ‘Aˬda-oˇ’ lehˇ kuˇ-awˇ shaˇ-eu meh. Kʼoeˇ miˇ neh, naw maꞈ miˇ tsaˬ heu kʼoeˇ taˆ ya dehꞈ ya jawˇ daˆ leꞈ-eu aˇ nah aˇ yamˬ dawˬ tawˆ luꞈ, aˬ yawꞈ-ahˇ yaw zeu baw-awˇ dehꞈ-awˬ. 18Aˬ jeˬ miˇ neh ehˇ naˇ, naw maꞈ-euˬ aˬ poeˬ aˬ bawˇ deuˬ-euˬ ziˇ-ahˇ neh dehꞈ ka leꞈ-euˬ poeˬ sawˇ lawˬ maˬ baw-eu yaw dehꞈ dehꞈ-eu jeˬ laꞈ kʼoeˇ naw maꞈ-ahˇ bi buˬ bi law-iˇ-eu gʼaˇ duˬ, aˬ geu jeˬ aˇ poeˬ biꞈ-awˇ zeuˇ kʼoꞈ taˬ-euˬ naw maꞈ siˬ nya meh. Pyuˇ hawˇ-eu shuiˇ loꞈ-ehˇ gʼeh-eu piˬ-iˇ byoˆ-iˇ nya-eu jeˬ biꞈ-awˇ zeuˇ kʼoꞈ taˬ-euˬ maˬ ngeuˇ-a. 19Maˇ byawꞈ maˇ naˇ tiˬ pawꞈ-iˬ maˬ baw-eu yawˇ zaˬ-ahˇ duˇ-eu Ka li aˬ yawꞈ-euˬ shiˬ lawˇ dah-euˬ miˇ neh, aˇ poeˬ kʼaˆ dui dui-eu jeˬ neh naw maꞈ-ahˇ zeuˇ kʼoꞈ taˬ-euˬ jeˬ pyeuꞈ-eu meh. 20Miˇ tsaˬ tahˬ kʼawˇ heu maˬ beh mi naˆ-ehˇ Miˬyehˇ neh aˬ yawꞈ-ahˇ tseˇ doˆ taˬ-awˇ, aˇ nah aˇ yamˬ heu laꞈ kʼoeˇ naw maꞈ-euˬ gʼaˇ duˬ aˬ yawꞈ-ahˇ Miˬyehˇ bi doˆ le-euˬ meh. 21Aˬ yawꞈ-ahˇ shiˇ-euˬ gaˇ bi gʼoꞈ dehꞈ laˇ-awˇ yaw shehꞈ kʼahˬ sehˇ biꞈ nehˬ-euˬ gʼaˬ pyeuꞈ-eu Miˬyehˇ-ahˇ, aˬ yawꞈ baˬ da neh naw maꞈ jah laˇ-euˬ meh. Kʼoeˇ miˇ neh, naw maꞈ jah-awˇ noeˬ tmˬ-eu jeˬ-aˬ, Miˬyehˇ tiˬ gʼaˬ tehꞈ meh.
22Nymˬ-mˇ naw maꞈ yaw tsaˬ yaw dawˇ dawˬ-ahˇ naˇ haˬ geuꞈ-eu laꞈ kʼoeˇ yawˬ haˇ yawˬ ha bi muiˬ bi shawˇ laˇ-awˇ, Ka li-ahˇ jah-eu tsawˇ haˬ cawˬ cawˬ gʼoeˇ nya gaˬ nya-eu aˇ tiˆ-ahˇ dehꞈ keuˆ laꞈ-euˬ-aˬ, tiˬ gʼaˬ tiˇ gʼaˬ nui ma laꞈ kʼoeˇ keuˆ ni ziꞈ dah ni gaˬ-awˬ. 23Aˬ jeˬ miˇ neh ehˇ naˇ, naw maꞈ-aˬ, mˬ maˬ maˬ byaˆ zaˇ ziˇ ziꞈ-eu dehꞈ luꞈ-eu Miˬyehˇ-euˬ dawˬ kawˬ baˬ da neh tiˬ jawˇ-iˬ maˬ shiˇ ni dehꞈ-eu gʼaˬ-euˬ zaˬ pyeuꞈ laˇ-euˬ meh. Shiˇ nya-eu tsawˇ haˬ-euˬ zaˬ pyeuꞈ laˇ-euˬ maˬ ngeuˇ-a. 24Jaˇ liꞈ laꞈ kʼoeˇ ehˇ taˬ-euˬ,
“Tsawˇ haˬ dawˬ tawˆ yaˇ moˬ pyeuꞈ-awˇ,
aˬ yawꞈ maꞈ-euˬ yaw shehꞈ kʼahˬ sehˇ,
bawˇ tsahˬ aˇ yehˆ loꞈ-ehˇ tehꞈ meh.
Yaˇ moꞈ nyoeˬ-iˇ koˆ-iˇ jiˇ-awˇ,
aˇ yehˆ juˬ-iˇ ga-iˇ-eu meh.
25Ehˇ kʼawꞈ, Sahˬpaˬ Miˬyehˇ-euˬ dawˬ,
mˬ maˬ maˬ byaˆ zaˇ ziˇ ziꞈ meh.”
Sahˬpaˬ Miˬyehˇ-euˬ dawˬ lehˇ ehˇ-eu kʼoeˇ-aˬ, naw maꞈ-ahˇ mehˬ laˇ-euˬ Laˬ kʼaˬ cehˇ-eu Guiˬ lahˬ dawˬ-ahˇ ehˇ-eu meh.
Currently Selected:
1 Beˬtuˆluˆ 1: AHK
Highlight
Share
Copy
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
