1 Yoˇhaˬ 2

Ka li aˬ dui-ahˇ caw ba-eu gʼaˬ pyeuꞈ-eu

1Ngaˇ gaˬ dui dui-eu zaˬ deuˬ-oˇ, naw maꞈ iˬ baˇ maˬ bi mˇ-eu gʼaˇ duˬ, gaˇ kawˆ heu deuˬ naw maꞈ jawˇ gaˇ ngaˇ boꞈ ahˇ laꞈ-eu jeˬ pyeuꞈ-eu ma. Ehˇ kʼawꞈ, tsawˇ haˬ tiˬ gʼaˬ na iˬ baˇ mˇ lawˬ naˇ, aˬ dui-euˬ dah zaˇ Aˬda Miˬyehˇ-ahˇ tahˬ shaˇ leˇ-eu gʼaˬ jawˇ ma. Kʼoeˇ-aˬ, yaw tsaˬ yaw dawˇ tsawˇ haˬ pyeuꞈ-eu Yeˬsuˇ Ka li meh. 2Aˬ dui-ahˇ iˬ baˇ pyehˬ nehˬ laꞈ-euˬ kʼoeˇ-aˬ, Ka li baˬ da neh meh. Aˬ dui-euˬ iˬ baˇ tehꞈ-ehˇ maˬ ngeuˇ-ehˇ, tsawˇ haˬ yawˬ gʼaˬ na luꞈ-euˬ i baˇ pyehˬ nehˬ laꞈ-euˬ meh.

3Miˬyehˇ neh biꞈ taˬ-euˬ dawˬ deuˬ-ahˇ aˬ dui naˇ haˬ geuꞈ naˇ, aˬ dui aˬ yawꞈ-ahˇ siˬ nya-eu yaw duˬ baw meh. 4Tsawˇ haˬ tiˬ gʼaˬ na aˬ yawꞈ-ahˇ siˬ nya ma lehˇ ehˇ-eu kʼawꞈ, aˬ yawꞈ neh biꞈ taˬ-euˬ dawˬ deuˬ-ahˇ maˬ naˇ haˬ geuꞈ naˇ, jaˬ myawꞈ myawꞈ-eu tsawˇ haˬ pyeuꞈ-awˇ, aˬ yawꞈ-euˬ laꞈ kʼoeˇ yaw tsaˬ yaw dawˇ jeˬ maˬ ahˇ-a. 5Ehˇ kʼawꞈ, Miˬyehˇ-euˬ ehˇ dawˬ kʼaˇ naˇ haˬ geuꞈ-eu tsawˇ haˬ-aˬ, aˬ yawꞈ-euˬ laꞈ kʼoeˇ Miˬyehˇ-ahˇ gaˬ-eu jeˬ byah laˇ gʼaˬ-euˬ meh. Kʼoeˇ loꞈ-ehˇ naˇ haˬ geuꞈ-eu laꞈ kʼoeˇ, aˬ dui aˬ yawꞈ laꞈ kʼoeˇ jawˇ-eu tsawˇ haˬ pyeuꞈ-eu gaˇ kawˆ yaw duˬ yaw ciˇ baw-eu meh. 6Miˬyehˇ laꞈ kʼoeˇ jawˇ luꞈ ma lehˇ ehˇ-eu tsawˇ haˬ aˬ geu gʼaˬ maˬ kaˬ, Yeˬsuˇ Ka li dehꞈ-eu loꞈ-ehˇ dehꞈ-eu tsaˬ meh.

Dawˬ yaw shuiꞈ

7Ngaˇ gaˬ dui dui-eu cawˬ deuˬ-oˇ, ngaˇ naw maꞈ-ahˇ boꞈ ahˇ laꞈ-euˬ dawˬ heu deuˬ-aˬ, yaw shuiꞈ maˬ ngeuˇ. Aˇ dahˬ beh ngeh neh naw maꞈ-ahˇ biꞈ-euˬ dawˬ yaw oeˇ kʼoeˇ ma. Dawˬ yaw oeˇ kʼoeˇ-aˬ, naw maꞈ-ahˇ mehˬ nehˬ-euˬ guiˬ lahˬ dawˬ kʼoeˇ meh. 8Ehˇ kʼawꞈ, nymˬ-mˇ ngaˇ naw maꞈ jawˇ gaˇ boꞈ ahˇ laꞈ-euˬ dawˬ heu-aˬ, yaw shuiꞈ lehˇ ehˇ nya ma. Aˬ jeˬ miˇ neh ehˇ naˇ, dawˬ heu-euˬ yaw tsaˬ yaw dawˇ jeˬ-ahˇ Ka li-euˬ laꞈ kʼoeˇ ya mawˇ-awˇ, naw maꞈ-euˬ laꞈ kʼoeˇ kʼawꞈ ya mawˇ-eu meh. Aˬ jeˬ miˇ neh ehˇ naˇ, yaw zahˇ byoˆ-iˇ luꞈ-awˇ, maˇ jawˆ ni gʼeh-eu yaw shehꞈ nymˬ-mˇ bya doˆ le-euˬ meh.

9Tsawˇ haˬ tiˬ gʼaˬ na yaw shehꞈ laꞈ kʼoeˇ jawˇ luꞈ ma lehˇ ehˇ kʼawꞈ, Ka li zaˬ cawˬ cawˬ bye naˇ, yaw zahˇ laꞈ kʼoeˇ jawˇ luꞈ-a siˬ. 10Yawˬ ha-euˬ tsawˇ haˬ pyeuꞈ-eu Ka li zaˬ deuˬ-ahˇ gaˬ-eu gʼoeˇ-eu tsawˇ haˬ-aˬ, yaw shehꞈ laꞈ kʼoeˇ jawˇ luꞈ-awˇ, aˬ yawꞈ baˬ da neh aˬ cawˬ iˬ baˇ mˇ-eu jeˬ maˬ jaˆ-a. 11Ehˇ kʼawꞈ, yawˬ ha-euˬ cawˬ Ka li zaˬ deuˬ-ahˇ bye-eu tsawˇ haˬ-aˬ, yaw zahˇ laꞈ kʼoeˇ jawˇ luꞈ-eu meh. Yaw zahˇ laꞈ kʼoeˇ cah luꞈ-awˇ, yawˬ ha aˬ gaˇ iˇ luꞈ-eu gaˇ kawˆ maˬ siˬ nya-a. Aˬ jeˬ miˇ neh ehˇ naˇ, yaw zahˇ kʼoeˇ aˬ yawꞈ-ahˇ myaˆ behꞈ bi behꞈ-iˇ-euˬ meh.

12Ngaˇ gaˬ dui dui-eu zaˬ deuˬ-oˇ, Yeˬsuˇ Ka li baˬ da neh naw maꞈ-ahˇ iˬ baˇ pyehˬ nehˬ gʼaˬ-euˬ miˇ neh, ngaˇ naw maꞈ-ahˇ sahˬ boꞈ boꞈ ahˇ laꞈ-eu ma. 13Aˬ da deuˬ-oˇ, mˬ beh miˇ beh ngeh neh dehꞈ luꞈ-eu gʼaˬ-ahˇ naw maꞈ siˬ nya-eu miˇ neh, ngaˇ naw maꞈ-ahˇ sahˬ boꞈ boꞈ ahˇ laꞈ-eu ma. Zaˬ guˬ deuˬ-oˇ, Haiˬ dui dui-eu Gʼaˬ-ahˇ naw maꞈ gʼaˬ leˇ-euˬ miˇ neh, ngaˇ naw maꞈ-ahˇ sahˬ boꞈ boꞈ ahˇ laꞈ-eu ma.

14Ngaˇ gaˬ dui dui-eu zaˬ deuˬ-oˇ, Aˬ da Miˬyehˇ-ahˇ naw maꞈ siˬ nya-eu miˇ neh, ngaˇ naw maꞈ-ahˇ sahˬ boꞈ boꞈ ahˇ laꞈ-eu ma. Aˬ da deuˬ-oˇ, mˬ beh miˇ beh ngeh neh dehꞈ luꞈ jawˇ luꞈ-eu gʼaˬ-ahˇ naw maꞈ siˬ nya-eu miˇ neh, ngaˇ naw maꞈ-ahˇ sahˬ boꞈ boꞈ ahˇ laꞈ-eu ma. Zaˬ guˬ deuˬ-oˇ, naw maꞈ nui ma gʼaˬ kʼaˆ-eu miˇ neh, ngaˇ naw maꞈ-ahˇ sahˬ boꞈ boꞈ ahˇ laꞈ-eu ma. Miˬyehˇ-euˬ dawˬ naw maꞈ laꞈ kʼoeˇ ahˇ-awˇ, Haiˬ dui dui-eu Gʼaˬ-ahˇ naw maꞈ gʼaˬ leˇ-euˬ meh.

15Miˇ tsaˬ heu hawˇ-eu miˇ tsaˬ kʼoeˇ taˆ jaˆ-eu jeˬ-ahˇ gaˬ-eu nui ma taˬ bi ahˇ. miˇ tsaˬ heu-ahˇ gaˬ-eu tsawˇ haˬ-aˬ, Aˬda Miˬyehˇ-ahˇ maˬ gaˬ nya-a. 16Miˇ tsaˬ heu kʼoeˇ taˆ jaˆ-eu jeˬ pyeuꞈ-eu, shiˬ shaˬ jiˇ nui kʼahˇ, myaˆ nuiˆ-euˬ nui kʼahˇ, huiˬ mawꞈ mahˇ mawꞈ-eu nui ma, heu deuˬ dawˬ tawˆ luꞈ Aˬda Miˬyehˇ jawˇ gaˇ neh doˆ le-euˬ jeˬ maˬ ngeuˇ-a. Miˇ tsaˬ heu kʼoeˇ taˆ jaˆ-eu jeˬ pyeuꞈ-eu meh. 17Miˇ tsaˬ heu hawˇ-eu miˇ tsaˬ heu kʼoeˇ taˆ tsawˇ haˬ zaˬ nui kʼahˇ kʼaˇ jaˆ-eu jeˬ dawˬ tawˆ luꞈ ya byoˆ-iˇ jiˇ tehꞈ-a. Ehˇ kʼawꞈ, Miˬyehˇ-euˬ nui kʼahˇ mˇ-eu tsawˇ haˬ-aˬ, mˬ maˬ maˬ byaˆ zaˇ ziˇ ya dehꞈ tehꞈ-a.

Ka li-ahˇ Muiˇ-eu Gʼaˬ

18Ngaˇ gaˬ dui dui-eu zaˬ deuˬ-oˇ, aˇ saˬ saˬ-eu aˇ yamˬ peh le-euˬ meh. Ka li-ahˇ Muiˇ-eu Gʼaˬ oe luꞈ meh lehˇ ehˇ-eu naw maꞈ ya gaˬ taˬ-euˬ meh. Ka li-ahˇ muiˇ-eu gʼawˬ mya gʼaˬ nymˬ-mˇ doˆ le gʼaˬ-euˬ meh. Kʼoeˇ miˇ neh, aˇ saˬ saˬ-eu aˇ yamˬ keuˆ le-euˬ gaˇ kawˆ aˬ dui siˬ nya-eu ma. 19Tsawˇ haˬ heu deuˬ-aˬ, aˬ dui-euˬ aˇ maꞈ aˇ muˇ-ahˇ maˇ maˇ ni taꞈ-eu deuˬ maˬ ngeuˇ-a. Kʼoeˇ miˇ neh, aˬ yawꞈ maꞈ aˬ dui-ahˇ gʼawˬ-iˇ-eu meh. Aˬ yawꞈ maꞈ aˬ dui-euˬ aˇ maꞈ aˇ muˇ-ahˇ taꞈ law nmˇ-aˬ, aˬ dui-ahˇ maˬ gʼawˬ-iˇ ni jawˇ tehꞈ-a. Aˬ yawꞈ maꞈ aˬ dui-ahˇ maˬ taꞈ-eu gaˇ kawˆ bi siˬ duˬ laˇ-eu gʼaˇ duˬ, aˬ dui-ahˇ gʼawˬ-iˇ-euˬ jeˬ pyeuꞈ-eu meh.

20Ehˇ kʼawꞈ, Ka li neh naw maꞈ kʼoeˇ taˆ Muiˬ-eu shawˇ-eu Yaw sahˇ Miˬyehˇ shehˆ daˆ nehˬ gʼaˬ-euˬ miˇ neh, naw maꞈ dawˬ tawˆ luꞈ yaw tsaˬ yaw dawˇ jeˬ-ahˇ siˬ nya meh. 21Naw maꞈ yaw tsaˬ yaw dawˇ jeˬ-ahˇ maˬ siˬ nya-eu baˬ da neh, ngaˇ naw maꞈ-ahˇ sahˬ bo boꞈ ahˇ laꞈ-eu maˬ ngeuˇ. Yaw tsaˬ yaw dawˇ kʼoeˇ-ahˇ naw maꞈ siˬnya-eu uˬ taꞈ, kʼoeˇ-euˬ laꞈ kʼoeˇ jaˬ myawꞈ myawꞈ-eu jeˬ maˬ doˆ laˇ-a lehˇ naw maꞈ siˬ nya-eu baˬ da neh, ngaˇ naw maꞈ-ahˇ sahˬ boꞈ boꞈ ahˇ laꞈ-eu jeˬ pyeuꞈ-eu ma.

22Toˆ-ehˇ ngeuˇ naˇ, jaˬ myawꞈ myawꞈ-eu aˬ suˇ gʼaˬ-a. Yeˬsuˇ-ahˇ Ka li maˬ ngeuˇ-a lehˇ pyehˇ-eu gʼaˬ-aˬ, jaˬ myawꞈ myawꞈ-eu gʼaˬ meh. Kʼoeˇ loꞈ-ehˇ pyehˇ-eu tsawˇ haˬ-aˬ, Aˬda Miˬyehˇ-ahˇ maˬ ehˇ, Zaˬmaˇ-ahˇ maˬ ehˇ, byehˇ dzeh-euˬ tsawˇ haˬ meh. 23A jeˬ miˇ neh ehˇ naˇ, Zaˬmaˇ-ahˇ kʼaˇ byehˇ dzeh-eu tsawˇ haˬ-aˬ, Aˬda Miˬyehˇ-ahˇ byehˇ dzeh gaˇ duˇ-awˇ, Zaˬmaˬ-ahˇ kʼaˇ ha geuꞈ-eu tsawˇ haˬ-aˬ, Aˬda Miˬyehˇ-ahˇ ha geuꞈ gaˇ duˇ-eu meh.

24Kʼoeˇ miˇ neh, aˇ dahˬ beh ngeh neh naw maꞈ ya gaˬ taˬ-euˬ guiˬ lahˬ dawˬ-ahˇ nui ma laꞈ kʼoeˇ ziꞈ dah ni tuˆ tehˬ taˬ-awˬ. Guiˬ lahˬ dawˬ kʼoeˇ-ahˇ naw maꞈ tuˆ tehˬ taˬ naˇ, Zaˬmaˇ hawˇ-eu Aˬda Miˬyehˇ laꞈ kʼoeˇ naw maꞈ aˬ myah luꞈ jawˇ tehꞈ-a. 25Mˬ maˬ maˬ byaˆ zaˇ ziˇ dehꞈ-eu jeˬ aˬ dui-ahˇ biꞈ nehˬ laꞈ-eu gʼaˇ duˬ, Ka li neh saˇ jaˇ dzaˬ taˬ-euˬ jaˆ-eu meh.

26Naw maꞈ-ahˇ mehˇ shuiˇ shuiˇ geuꞈ-eu lehˇ leh jeh luꞈ-eu tsawˇ haˬ deuˬ gaˇ kawˆ ngaˇ naw maꞈ-ahˇ boꞈ ahˇ laꞈ-eu jeˬ pyeuꞈ-eu ma. 27Ehˇ kʼawꞈ, Ka li neh naw maꞈ-euˬ kʼoeˇ taˆ aˬ yawꞈ-euˬ Yaw sahˇ shehˆ daˆ nehˬ gʼaˬ-euˬ meh. Aˬ yawꞈ-euˬ Yaw sahˇ kʼoeˇ naw maꞈ laꞈ kʼoeˇ kʼaˇ jawˇ kʼoeˇ keuˆ ni, aˬ cawˬ naw maꞈ-ahˇ mehˬ nehˬ tsoˆ nehˬ-eu maˬ paˇ loˬ meh. Aˬ jeˬ miˇ neh ehˇ naˇ, aˬ yawꞈ-euˬ Yaw sahˇ kʼoeˇ naw maꞈ-ahˇ yawˬ jeˬ na luꞈ mehˬ nehˬ tsoˆ nehˬ laꞈ tehꞈ-a. Aˬ yawꞈ-euˬ Yaw sahˇ kʼaˇ mehˬ kʼaˇ tsoˆ-eu jeˬ dawˬ tawˆ luꞈ, tsaˬ dui dui-eu meh. Tiˬ pawꞈ-iˬ maˬ lehˬ-a. Yaw sahˇ kʼoeˇ neh mehˬ nehˬ tsoˆ nehˬ laꞈ-euˬ jeˬ-ahˇ naˇ haˬ geuꞈ-awˇ, Ka li-euˬ laꞈ kʼoeˇ jawˇ-awˬ.

28Ngaˇ gaˬ dui dui-eu zaˬ deuˬ-oˇ, Ka li zaꞈ le-eu Aˇ nah keuˆ le-awˇ, aˬ yawꞈ-ahˇ bya cehˆ ni ya mawˇ ngeh, aˬ dui-euˬ nui ma maˬ ya baˬ-ehˇ, aˬ yawꞈ-ahˇ shaꞈ dawˇ-eu baˬ da neh cehˆ zaꞈ cehˆ zaꞈ-ehˇ maˬ ya shaˬ ni, nymˬ-mˇ naw maꞈ aˬ yawꞈ-euˬ laꞈ kʼoeˇ jawˇ-awˬ. 29Ka li yaw tsaˬ yaw dawˇ meh lehˇ naw maꞈ siˬ nya luꞈ-eu-aˬ, yaw tsaˬ yaw dawˇ jeˬ kʼaˇ mˇ-eu tsawˇ haˬ yawˬ gʼaˬ na luꞈ Miˬyehˇ-euˬ zaˬ meh lehˇ naw maꞈ siˬ nya-eu tsaˬ meh.

Currently Selected:

1 Yoˇhaˬ 2: AHK

Highlight

Copy