1 Yoˇhaˬ 1

Saꞈ laˇ dehꞈ-eu jeˬ biꞈ-eu dawˬ

1Aˇ dahˬ beh ngeh neh dehꞈ luꞈ jawˇ luꞈ-eu dawˬ pyeuꞈ-eu saꞈ laˇ dehꞈ-eu jeˬ biꞈ-eu dawˬ gaˇ kawˆ naw maꞈ jawˇ gaˇ nga maꞈ boꞈ ahˇ laꞈ-eu ma. Dawˬ kʼoeˇ-ahˇ nga maꞈ naˬ bawˇ ya gaˬ-awˇ, myaˆ ya mawˇ-euˬ ma. Myaˆ nuiˆ neh haw duˬ-euˬ uˬ taꞈ, aˬ laꞈ neh ya sawˆ duˬ-euˬ ma. 2Saˬ laˇ dehꞈ-eu jeˬ kʼoeˇ-ahˇ mawˇ nya ni pah mehˬ nehˬ laꞈ ngeh, nga maꞈ ya mawˇ duˬ-euˬ ma. Kʼoeˇ miˇ neh, gaˇ kawˆ kʼoeˇ nga maꞈ ja-awˇ, yaw beh Aˬda Miˬyehˇ nehˬ-ehˇ jawˇ-euˬ mˬ maˬ maˬ byaˆ zaˇ ziˇ dehꞈ-eu saꞈ laˇ kʼoeˇ nymˬ-mˇ aˬ dui-ahˇ bi siˬ bi mawˇ le-euˬ gaˇ kawˆ naw maꞈ-ahˇ ja mehˬ-eu ma. 3Naw maꞈ kʼawꞈ, nga maꞈ nehˬ-ehˇ tiˬ kawˆ loꞈ-ehˇ Aˬda Miˬyehˇ hawˇ-eu aˬ yawꞈ-euˬ Zaˬmaˇ Yeˬsuˇ Ka li-ahˇ cawˬ cawˬ taꞈ nya laˇ ni, nga maꞈ neh kʼaˇ ya gaˬ kʼaˇ ya mawˇ-euˬ jeˬ naw maꞈ-ahˇ dzawˇ nehˬ-eu ma. 4Nga maꞈ#1.4 Aˇhu-euˬ Heˬlaˬsaˇ Jaˇliꞈ laꞈ kʼoeˇ, ‘Nga maꞈ’ lehˇ ehˇ-eu heu tsahˇ-ahˇ, ‘Naw maꞈ’ lehˇ ehˇ taˬ-euˬ meh. laˬ kʼaˬ cehˇ-eu jeˬ byah laˇ ni, sahˬ boꞈ heu taꞈ naw maꞈ-ahˇ boꞈ nehˬ-eu jeˬ pyeuꞈ-eu ma.

Miˬyehˇ yaw shehꞈ pyeuꞈ-eu

5Zaˬmaˇ-euˬ guiˬ lahˬ dawˬ nga maꞈ ya gaˬ-awˇ naw maꞈ-ahˇ ja mehˬ-eu-aˬ, heu loꞈ-ehˇ ma. Miˬyehˇ-aˬ, yaw shehꞈ pyeuꞈ-awˇ, aˬ yawꞈ-euˬ laꞈ kʼoeˇ yaw zahˇ tiˬ pawꞈ-iˬ maˬ ahˇ-a. 6Aˬ dui aˬ yawꞈ nehˬ-ehˇ cawˬ cawˬ luꞈ-eu ma lehˇ ehˇ-awˇ, yaw zahˇ laꞈ kʼoeˇ jawˇ luꞈ-eu ngeuˇ naˇ, aˬ dui ngehˬ-eu tmˇ-eu laꞈ kʼoeˇ maˬ ehˇ, mˇ-eu shaˇ-eu laꞈ kʼoeˇ maˬ ehˇ, aˬ yawꞈ-ahˇ jaˬ myawꞈ myawꞈ luꞈ gaˇ duˇ-eu meh. 7Ehˇ kʼawꞈ, aˬ yawꞈ yaw shehꞈ laꞈ kʼoeˇ jawˇ-eu loꞈ-ehˇ, aˬ dui kʼawꞈ yaw shehꞈ laꞈ kʼoeˇ jawˇ naˇ, aˬ dui tiˬ gʼaˬ tiˇ gʼaˬ cawˬ cawˬ taꞈ-awˇ, Zaˬmaˇ Yeˬsuˇ-euˬ shiˬ aˬ dui-euˬ iˬ baˇ dawˬ tawˆ luꞈ-ahˇ tsiˬ shawˇ nehˬ laꞈ tehꞈ-a.

8Aˬ dui iˬ baˇ maˬ ahˇ lehˇ ehˇ naˇ, yawˬ haˇ yawˬ ha jaˬ myawꞈ myawꞈ-eu jeˬ pyeuꞈ-awˇ, aˬ dui-euˬ laꞈ kʼoeˇ yaw tsaˬ yaw dawˇ jeˬ maˬ ahˇ-a. 9Ehˇ kʼawꞈ, aˬ dui iˬ baˇ ahˇ-eu ngeuˇ ma lehˇ Miˬyehˇ-ahˇ ja doˆ nehˬ naˇ, aˬ yawꞈ neh saˇ jaˇ dzaˬ taˬ-euˬ dawˬ-ahˇ ziꞈ-awˇ yaw tsaˬ yaw dawˇ dawˇ-ehˇ mˇ-eu laꞈ kʼoeˇ, aˬ dui-ahˇ iˬ baˇ pyehˬ nehˬ laꞈ-awˇ, mˇ lehˬ mˇ ca taˬ-euˬ dawˬ tawˆ luꞈ-ahˇ tsiˬ shawˇ dzeh nehˬ laꞈ tehꞈ-a. 10Aˬ dui iˬ baˇ maˬ mˇ-aˬ lehˇ ehˇ naˇ, Miˬyehˇ jaˬ myawꞈ myawꞈ-eu meh lehˇ aˬ dui ehˇ gaˇ duˇ-awˇ, aˬ yawꞈ-euˬ dawˬ aˬ dui-euˬ laꞈ kʼoeˇ maˬ ahˇ-a.

Currently Selected:

1 Yoˇhaˬ 1: AHK

Highlight

Copy