مَتّیٰ 20

اوزومچیلیک میثالی

1‏«‏آسمانینگ پادیشاهلیغی اوزومچیلیگینده ایشلَر یالی، ایر اِرتیر بیلِن گونلوکچی توتماغا گیدِن یِر اِیه‌سینه مِنگزِیَندیر.‏ 2اُل گونلوکچیلِر بیلِن بیر گونلوک ایش حاقینی بیر کوموش سِکَّه راضیلاشیپ، اُلاری اُز اوزومچیلیگینه یُلّایار.‏ 3ایر ساغات دُقوزلاردا داشاری چیقان واقتی، اُل بازاردا باشغالارینگ بُش دورانینی گُریَر.‏ 4اُلارا-دا:‏ ‏”‏سیز هِم اوزومچیلیگه گیدینگ، حاقینگیزینگ هِمّه‌سینی بِرِرین“‏ دییَّر.‏ اُلار هِم گیدیَرلِر.‏ 5گونُرتان و اُیلَن ساغات اوچلِرده یِنه داشاری چیقیپ، یِنه شِیله اِدیَر.‏ 6اُیلَن ساغات بَشلِرده آیلانماغا چیقان واقتی، باشغا بُش دورانلاری گُروپ، اُلاردان:‏ ‏”‏نَمه اوچین گونوزین بو یِرده بُش دورسونگیز؟“‏ دییّپ سُرایار.‏ 7اُلار هِم:‏ ‏”‏بیزی هیچ کیم ایشینه توتمادی“‏ دییّپ جُغاپ بِریَرلِر.‏ اُلارا:‏ ‏”‏سیز-ده اوزومچیلیگه گیدینگ“‏ دییَّر.‏

8‏«‏آغشام دوشِن واقتی، اوزومچیلیگینگ اِیه‌سی اُز ایش دُلاندیریجیسینا:‏ ‏”‏گونلوکچیلِری چاغیر-دا، اینگ آخیرقیلاردان باشلاپ، اَوَّلکیلِره چِنلی حاقلارینی بِر“‏ دییَّر.‏ 9شِیلِلیکده، اُیلَن ساغات بَشلِرده گِلِنلِرینگ هِر بیری بیر کوموش سِکّه آلیار.‏ 10اَوَّلکی گِلِنلِر کَن آلاریس دییّپ تاما اِدیَرلِر، اِمّا اُلارینگ-دا هِر بیری بیر کوموش سِکّه آلیار.‏ 11مونی آلان واقتلاری اُلار یِر اِیه‌سینه زِیرِنیشیپ:‏ 12‏”‏بو اینگ سُنگقی گِلِنلِر دینگه بیر ساغات ایشلِدیلِر، بیز بُلسا، تُمسونگ قیزقیندا گونوزین آغیر زَحمِت چِکدیک.‏ مونگا باقمازدان سِن بیزینگ زَحمِتیمیزی اُلارینگقی بیلِن دِنگ اِتدینگ“‏ دییَّرلِر.‏ 13یِر اِیه‌سی اُلارینگ بیرینه شِیله جُغاپ بِریَر:‏ ‏”‏اِی دُست!‏ مِن سانگا عادالاتسیزلیق اِدِمُق.‏ سِن مِنینگ بیلِن بیر کوموش سِکَّه راضیلاشمادینگمی نَمه؟ 14اُز حاقینگی آل-دا، گیدیبِر.‏ مِن بو اینگ آخیرقا-دا سانگا بِرِنیمی بِرمِک ایسلِیَرین.‏ 15اُز مالیما ایسلَنیمی اِتمَگه ایختییاریم یُقمی؟ یا-دا سِن مِنینگ ساخیلیغیما باخیلچیلیق اِدیَرسینگمی؟“‏ 16شِیلِلیکده، اینگ آخیرقیلار اَوَّلکیلِر، اَوَّلکیلِر هِم اینگ آخیرقیلار بُلار.‏»‏

عیسی اُزونینگ اُلوپ دیرِلجِگینی یِنه آیدیار

مَرقُس ۱۰‏:۳۲‏-۳۴؛ لوقا ۱۸‏:۳۱‏-۳۴

17عیسی اورشلیمه باریارقا، یُلدا اُن ایکی شَگیردینی بیر چِته چِکیپ، اُلارا:‏ 18‏«‏اینه، اورشلیمه باریاریس.‏ اینسان اُغلی یُلباشچی کاهینلارینگ و دین عُلَمالارینگ اِلینه بِریلِر، اُلار هِم اُنی اُلومه مَحکوم اِدِرلِر.‏ 19ماسغارا اِتسینلِر، قامچیلاسینلار و صلیبه چویلِسینلِر دییّپ، اُنی بیگانه میلِّتلِرینگ اِلینه بِرِرلِر، اِمّا اُل اوچولِنجی گون دیرِلِر»‏ دییدی.‏

بیر اِنَه‌نینگ خاییشی

مَرقُس ۱۰‏:۳۵‏-۴۵

20سُنگرا زِبِدینینگ اُغول‍لارینینگ اِنه‌سی اُز اُغول‍لاری بیلِن عیسانینگ یانینا گِلدی.‏ اُل عیسادان بیر زاتلار دیلِمِک اوچین دیزینا چُکدی.‏ 21عیسی آیالدان:‏ ‏«‏نَمه ایسلِیَرسینگ؟»‏ دییّپ سُرادی.‏ آیال عیسی یوزلِنیپ:‏ ‏«‏اُز شاهلیغینگدا مِنینگ بیر اُغلومینگ سِنینگ ساغینگدا، بِیلِکیسینینگ بُلسا سُلونگدا اُتورماغینی اِجازا بِر»‏ دییدی.‏ 22اِمّا عیسی:‏ ‏«‏سیز نَمه دیلِیَنینگیزی بیلمِیَرسینگیز.‏ سیز مِنینگ ایچجِک دِردلی کَسَمدِن ایچیپ بیلِرسینگیزمی؟»‏ دییدی.‏ اُلار عیسی:‏ ‏«‏مونی ایچیپ بیلِریس»‏ دییّپ جُغاپ بِردیلِر.‏ 23عیسی اُلارا:‏ ‏«‏سیز مِنینگ ایچجِک کَسَمدِن ایچِرسینگیز، اِمّا سیزه ساغیمدا یا سُلومدا اُتورماغا اِجازا بِرمِک مِنینگ اِلیمده دَل.‏ بو جایلاری آتام کیملِر اوچین تاییارلان بُلسا، شُلار اوچیندیر»‏ دییدی.‏

24بِیلِکی اُن شَگیرت مونی اِشیدیپ، یانگقی ایکی دُغانا قاهارلاندیلار.‏ 25عیسی اُلاری یانینا چاغیریپ:‏ ‏«‏اُزونگیز بیلیَرسینگیز، بیگانه میلِّتلِرینگ آراسیندا باشلیقلار اُلارا حُکومدارلیق اِدیَرلِر، اولولاری-دا اُلارا آقالیق اِدیَرلِر.‏ 26سیزینگ آرانگیزدا بِیله بُلماسین.‏ آرانگیزدا کیم اولی بُلماق ایسلِیَن بُلسا، بِیلِکیلِرینگ خیدماتکَری بُلسون.‏ 27آرانگیزدا کیم اَوَّلکی بُلماق ایسلِیَن بُلسا، بِیلِکیلِرینگ قولی بُلسون.‏ 28اینسان اُغلی-دا اُزونه خیدمات اِدیلمِگی اوچین دَل-ده، اُندان باشغا بِیلِکیلِره خیدمات اِتمَگه و جانینی فِدا اِدیپ، هِمّه‌لِری آزاد اِتمَگه گِلِندیر»‏ دییدی.‏

ایکی کُرونگ گُزی آچیلیار

مَرقُس ۱۰‏:۴۶‏-۵۲؛ لوقا ۱۸‏:۳۵‏-۴۳

29عیسی بیلِن شَگیرتلِری اَریحادان چیقانلاریندا، اولی جِماغات عیسانینگ ایزینا دوشوپ گیتدی.‏ 30یُلونگ قیراسیندا اُتوران ایکی سانی کُر آدام عیسانینگ گِچیپ باریانینی اِشیدیپ:‏ ‏«‏آقام، اِی داوود اُغلی، بیزه رِحم اِت!‏»‏ دییّپ قیغیردیلار.‏ 31سِسلِرینی چیقارماز یالی، کَن آداملار اُلارا کَیِدیلِر، اِمّا اُلار اُنگکودِن هِم قاتی سِس بیلِن:‏ ‏«‏آقام!‏ اِی داوود اُغلی!‏ بیزه رِحم اِت!‏»‏ دییّپ قیغیردیلار.‏ 32عیسی دوردی و اُلاری چاغیریپ:‏ ‏«‏سیزینگ اوچین نَمه اِتمِگیمی ایسلِیَرسینگیز؟»‏ دییّپ سُرادی.‏ 33اُلار اُنگا:‏ ‏«‏آقام، گُزومیز آچیلسین»‏ دییدیلِر.‏ 34عیسی اُلارا یورِگی آویپ، گُزلِرینه اِلینی دِگیردی و شو واقتدا اُلارینگ گُزلِری آچیلدی.‏ اُلار هِم عیسانینگ ایزینا دوشوپ گیدیبِردیلِر.‏

Currently Selected:

مَتّیٰ 20: TUKIR

Highlight

Copy