یوحنا 11

ایلعازارینگ اُلومی

1بِیت‌عَنیا اُباسیندا ایلعازار آدلی بیر آدام مِریضلَپ یاتیردی.‏ اُنونگ قیز دُغانلاری مریم بیلِن مارتا هِم شُل اُبادا یاشایاردیلار.‏ 2عیسانی عاطیر یاغ قویوپ و آیاغینی ساچی بیلِن سوپورِن آیال شُل مریمدی.‏ هاووا، مِریض یاتان ایلعازار مریمینگ دُغانیدی.‏ 3شِیلِلیکده، قیز دُغانلار:‏ ‏«‏اِی آقام، سِنینگ قاوی گُریَن آدامینگ مِریض یاتیر»‏ دییّپ، عیسی خابار یُلّادیلار.‏ 4عیسی مونی اِشیدیپ:‏ ‏«‏بو مِریض اُنونگ اُلمِگی اوچین دَل-ده، خودایینگ بِییکلِنیپ، بو بیلِن خودایینگ اُغلونینگ بِییکلیک قازانماغی اوچیندیر.‏»‏ 5عیسی مارتانی، اُنونگ قیز دُغانسینی و ایلعازاری قاوی گُریَردی.‏ 6اِمّا ایلعازارینگ مِریض یاتاندیغینی بیلسه-ده، عیسی بُلیان یِرینده یِنه ایکی گون قالدی.‏

7موندان سُنگ عیسی شَگیرتلِرینه:‏ ‏«‏یهودیَه قایدایلینگ»‏ دییدی.‏ 8شَگیرتلِری اُنگا:‏ ‏«‏اِی اُستاد، یَهودی باشلیغلارینینگ سِنی داشلاجاق بُلانلاری یانگی دَلمیدی؟ سِن یِنه-ده شُل یِره گیتجِک بُلیارسینگمی؟»‏ دییدیلِر.‏ 9عیسی اُلارا:‏ ‏«‏گوندیز اُن ایکی ساغاتدان عیبارات دَلمی؟ کیم گوندیز یُریسه بودریمِز، سِبَبی اُل بو دونیَه‌نینگ نورینی گُریَندیر.‏ 10اِمّا گیجه یُرییَن آدام بودرَر، سِبَبی اُندا نور یُقدور»‏ دییّپ جُغاپ بِردی.‏ 11سُنگرا عیسی اُلارا یِنه-ده:‏ ‏«‏دُستومیز ایلعازار اوقلاپ یاتیر.‏ مِن شُنی اُیارماق اوچین گیدیَرین»‏ دییدی.‏ 12شَگیرتلِری اُنگا:‏ ‏«‏اِی آقا، اوقلاپ یاتان بُلسا شِفا تاپار»‏ دییدیلِر.‏ 13عیسی اُنونگ اُلِندیگی حاقدا آیدیاردی، یُنه اُلار ماقصادی اوقی حاقدا آیدیاندیر گومَن اِتدیلِر.‏ 14شِیلِلیکده، عیسی اُلارا آچیغینی آیتدی:‏ ‏«‏ایلعازار اُلوپدیر.‏ 15ایمان گِتیرمِگینگیز اوچین، مِن سیزینگ خاطیرانگیزا اُل یِرده بُلماندیغیما بِگِنیَرین.‏ ایندی بُلسا، یُرینگ، اُنونگ یانینا گیدِلینگ.‏»‏ 16شُندا اِکیز لاقابلی توما دییِن شَگیرت بِیلِکی شَگیرتلِره:‏ ‏«‏یُرینگ، بیز هِم گیدِلینگ-ده، عیسی بیلِن بیله اُلِیلینگ»‏ دییدی.‏

عیسی، دیرِلیش و یاشاییش

17عیسی بِیت‌عَنیا گِلِنده، ایلعازارینگ جایلانانینا اِییَم دُرت گون بُلان میشدیق.‏ 18بِیت‌عَنیا اورشلیمدِن باری-یُغی اوچ کیلومِتر داشلیقدا یِرلِشیَردی.‏ 19مارتا بیلِن مریمه گُوونلیک بِرمَگه کَن یَهودیلِر ایلعازارینگ آیادینا گِلیپدیلِر.‏

20مارتا عیسانینگ گِلیَنینی اِشیدیپ، اُنی قارشیلاماغا چیقدی.‏ مریم بُلسا اُیده قالدی.‏ 21مارتا عیسی:‏ ‏«‏اِی آقام، سِن شو یِرده بُلان بُلسادینگ، دُغانیم اُلمِزدی.‏ 22حَضیر هِم خودایدان نَمه دیلِسِنگ، سِنینگ دیلِگینگی بیتیرجِگینی بیلیَرین»‏ دییدی.‏ 23عیسی اُنگا:‏ ‏«‏دُغانینگ دیرِلِر»‏ دییدی.‏ 24مارتا بُلسا:‏ ‏«‏مِن آخیرات گون، یَعنی قیامات گونونده اُنونگ دیرِلجِگینی بیلیَرین»‏ دییدی.‏ 25عیسی اُنگا:‏ ‏«‏دیرِلیشِم و یاشاییشام مِندیرین، مانگا ایمان گِتیرِن اُلسه-ده یاشار.‏ 26کیم مانگا ایمان گِتیریپ یاشایان بُلسا، اُل آصلا اُلمِز.‏ سِن شونگا اینانیارسینگمی؟»‏ دییدی.‏ 27اُل عیسی:‏ ‏«‏هاووا، آقام.‏ مِن سِنینگ شو دونیَه گِلمِلی خودایینگ اُغلی مسیحدیگینگه اینانیارین»‏ دییدی.‏

28مارتا شِیله دییِنسُنگ، قیز دُغانی مریمی چاغیرماغا گیتدی.‏ اُنی بیر چِته چِکیپ:‏ ‏«‏اُستاد شو یِرده.‏ اُل سِنی چاغیریار»‏ دییدی.‏ 29مریم مونی اِشیدِن واقتینا یِریندِن توروپ، عیسانینگ یانینا گیتدی.‏ 30عیسی هِنیز اُبا گیرمَندی، اُل هِنیز هِم مارتانینگ قارشیلان یِریندِدی.‏ 31اُیده مریمینگ یانیندا بُلوپ، اُنگا گُوونلیک بِریَن یَهودیلِر اُنونگ هاولوقماچ چیقیپ گیدِنینی گُردولِر.‏ اُل آغلاماق اوچین قابرا طاراف باریاندیر دییّپ گومَن اِدیپ، اُلار اُنونگ ایزیندان گیتدیلِر.‏ 32مریم عیسانینگ دوران یِرینه گِلدی.‏ اُنی گُروپ، آیاقلارینا ییقیلدی-دا:‏ ‏«‏اِی آقام، سِن شو یِرده بُلان بُلسادینگ، دُغانیم اُلمِزدی»‏ دییدی.‏ 33مریمینگ و اُنونگ بیلِن بیله گِلِن یَهودیلِرینگ آغلایانینی گُرِنده، عیسانینگ قالبینی قاتی قینانچ قاپلاپ، یورِگی قییّلدی.‏ 34اُل:‏ ‏«‏اُنی نیرِده جایلادینگیز؟»‏ دییّپ سُرادی.‏ اُنگا:‏ ‏«‏اِی آقام، گِل، گُر»‏ دییدیلِر.‏ 35عیسانینگ گُزلِریندِن دوومه-دوومه یاش آقدی.‏ 36شُندا یَهودیلِر:‏ ‏«‏سِراِدینگ، اُل اُنی نَهیلی قاوی گُریَن میشدیق!‏»‏ دییّشدیلِر.‏ 37کَبیرلِری بُلسا:‏ ‏«‏کُرونگ گُزونی آچان آدام ایلعازاری-دا اُلومدِن آلیپ قالیپ بیلمِزمیدی؟»‏ دییّشدیلِر.‏

عیسی ایلعازاری دیرِلدیَر

38شُل واقت عیسانینگ یورِگی دیلیم-دیلیم بُلوپ، قابرینگ یانینا باردی.‏ قابر بیر داغینگ اولی دِشیگیندِدی، اُنونگ آغزینا بُلسا داش قُیوپدیلار.‏ 39عیسی:‏ ‏«‏داشی آیرینگ»‏ دییدی.‏ مِرحومینگ قیز دُغانی مارتا اُنگا:‏ ‏«‏اِی آقام، اُل اِییَم پُرساندیر، اُنی جایلانیمیزا دُرت گون بُلدی آخیری»‏ دییدی.‏ 40عیسی اُنگا:‏ ‏«‏اِگِر ایمان گِتیرسِنگ، خودایینگ بِییکلیگینی گُرِرسینگ دییمَنمیدیمّی؟»‏ دییدی.‏

41شِیلِلیکده، داشی آییردیلار.‏ عیسی گُزونی آسمانا تیکیپ:‏ ‏«‏اِی آتا، مِنی اِشیدِنینگ اوچین سانگا شوکور اِدیَرین.‏ 42سِن مِنی هِمیشه-ده اِشیدیَندیگینگی بیلیَرین.‏ اِمّا بو سُزلِری شو یِرده دوران خالق اوچین، مِنی سِنینگ ایبِرِندیگینگه ایمان گِتیرسینلِر دییّپ آیتدیم»‏ دییدی.‏ 43شو سُزلِردِن سُنگ اُل قاتی سِس بیلِن:‏ ‏«‏ایلعازار، داشاری چیق!‏»‏ دییّپ قیغیردی.‏ 44اِل‍لِری، آیاقلاری کِفِنه دُلانان، یوزی یالیق بیلِن ساریلان مِرحوم قابردان چیقدی.‏ عیسی اُلارا:‏ ‏«‏اُنونگ کِفِنینی آیرینگ، دِگمه، گیتسین»‏ دییدی.‏

عیسانی اُلدورمِک باراداقی دیلبیرلِشیک

مَتّیٰ ۲۶‏:۱‏-۵؛ مَرقُس ۱۴‏:۱‏-۲؛ لوقا ۲۲‏:۱‏-۲

45شِیلِلیکده، مریمینگ یانینا گِلِن یَهودیلِرینگ کَنسی عیسانینگ اِدِن ایشینی گُروپ، اُنگا ایمان گِتیردیلِر.‏ 46بیرنَچه‌سی بُلسا باریپ، عیسانینگ اِدِن ایشلِرینی فَریسی‌لِره گورّونگ بِردیلِر.‏ 47اُنسُنگ یُلباشچی کاهینلار بیلِن فَریسی‌لِر مِجلِس قوروپ:‏ ‏«‏نَمه اِتمِلی؟ بو آدام کَن عالاماتلار گُرکِزیَر.‏ 48اُنگا یُل بِرسِک، اُندا هِمّه‌لِر اُنگا ایمان گِتیرِر.‏ رومیلار هِم گِلیپ، عیباداتخانامیزی و خالقیمیزی یُق اِدِرلِر»‏ دییدیلِر.‏ 49اُلارینگ آراسیندا شُل ییل باش کاهین بُلان قیافا-دا باردی.‏ قیافا اُلارا:‏ ‏«‏سیز هیچ زادی بیلمِیَرسینگیز.‏ 50هِمّه خالقینگ هِلَک بُلانیندان، بیر آدامینگ خالق اوچین اُلمِگی سیزه خاص پِیدالیدیر.‏ سیز نَمه مونگا دوشونِنگیزُقمی؟»‏ دییدی.‏ 51اُل مونی اُز-اُزوندِن آیتمادی.‏ شُل ییلینگ باش کاهینی بُلماق بیلِن اُل عیسانینگ یَهودی میلِّتی اوچین اُلجِگینی اُووندِن بیلیپ آیتدی.‏ 52اُل دینگه بیر شُل میلِّت اوچین دَل-ده، شُندا خودایینگ پیتیران فِرزِنتلِرینی بیر یِره ییغناپ بیرلِشدیرمِک اوچین هِم اُلمِلیدی.‏ 53شِیلِلیکده، شُل گوندِن باشلاپ، عیسانی اُلدورمِک اوچین دیل بیریکدیردیلِر.‏ 54شُندان سُنگ عیسی یَهودیلِرینگ آراسیندا اَشکَر گِزمِدی.‏ اُل بیابانینگ قُلایینداقی اِفرایم شَهرینه گیدیپ، شَگیرتلِری بیلِن شُل یِرده قالدی.‏

55یَهودیلِرینگ پِسَح بایرامی یاقینلاپدی.‏ یوردونگ هِمّه بورچلاریندان گِلِن کَن آداملار پِسَحدان اُنگ پَکلِنیش سونِّتلِرینی بِرجای اِتمِک اوچین اورشلیمه گِلیپدیلِر.‏ 56اُلار عیسانی گُزلِیَردیلِر، عیباداتخانادا دورقالار، بیری-بیرلِرینه:‏ ‏«‏نَهیلی فیکر اِدیَرسینگیز؟ اُل بایراما گِلِرمی یا-دا گِلمِز؟»‏ دییّشیَردیلِر.‏ 57یُلباشچی کاهینلار بیلِن فَریسی‌لِر بُلسا عیسانی توتماق اوچین، اُنونگ نیرِدِدیگینی کیم بیلیَن بُلسا، خابار بِرمِکلِرینی تابشیریپدیلار.‏

Currently Selected:

یوحنا 11: TUKIR

Highlight

Copy