प्रस्थान 40
40
पवित्र पालको तयारी र अर्पण
1परमप्रभुले मोशालाई भन्नुभयो, 2“पहिलो महिनाको पहिलो दिन परमप्रभुको पवित्र पाल बसाल्नू। 3त्यसमा दश आज्ञाहरू राखिएको करारको सन्दुक राख्नू र त्यसको अघिल्तिर पर्दा लाउनू। 4टेबिल पनि भित्र राख्नू र त्यसका सर-सामानहरू त्योमाथि राख्नू। सामदान पनि त्यसभित्र राख्नू र त्यसमा पानसहरू राख्नू। 5करारको सन्दुकको अघिल्तिर धूप बाल्ने सुनको वेदी राख्नू र पवित्र पालको ढोकामा पर्दा लाउनू। 6पवित्र पालको सामने होमबलि गर्ने वेदी राख्नू। 7पवित्र पाल र वेदीको बीचमा पानी हाल्ने बाटा राख्नू र त्यसमा पानी भर्नू। 8बाहिरी घेरा लाउनू र घेराको ढोकामा पर्दा लाउनू।
9“त्यसपछि पवित्र तेलले अभिषेक गरेर पवित्र पाल र त्यसका सारा सर-सामान अर्पण गर्नू र त्यो पवित्र हुनेछ। 10त्यसपछि अभिषेक गरेर वेदी र त्यसका सारा सर-सामान अर्पण गर्नू र त्यो पूरा पवित्र हुनेछ। 11त्यस्तै प्रकारले पानी हाल्ने बाटा र त्यसको आसन अर्पण गर्नू।
12“हारून र त्यसका छोराहरूलाई पवित्र पालको ढोकामा ल्याउनू र त्यहाँ रीतिअनुसार स्नान गर्न लाउनू। 13हारूनलाई पूजाहारीको पोशाक लाइदिनू र अभिषेक गर्नू अनि त्यसरी अर्पण गर्नू र त्यसले पूजाहारी भई मेरो सेवा गर्न सक्नेछ। 14त्यसका छोराहरूलाई ल्याएर लबेदा लाइदिनू। 15तब बुबालाई अभिषेक गरेझैँ, तिनीहरूलाई अभिषेक गर्नू र तिनीहरूले पनि पूजाहारी भई मेरो सेवा गर्न सक्नेछन्। यस अभिषेकद्वारा तिनीहरू सदाको निम्ति मेरा पूजाहारी बन्नेछन्।”
16मोशाले परमप्रभुको आज्ञाअनुसार सबै काम गरे। 17तिनीहरूले मिश्र छोडेको दोस्रो वर्षको पहिलो महिनाको पहिलो दिन परमप्रभुको पवित्र पाल खडा गरे। 18मोशाले त्यसका आसन र फल्याकहरू तेर्साए, तेर्सा बारहरू लाए र खम्बाहरू गाडे। 19परमप्रभुले आज्ञा गर्नुभएअनुसार पवित्र पालमाथि भित्री र बाहिरी पर्दाले छोपे। 20तब तिनले दुईवटा ढुङ्गाका पाटीहरू करारका सन्दुकमा हाले। सन्दुकको कुण्डलभित्र डन्डाहरू छिराए र त्यसमाथि कृपा-आसन लाए। 21तब तिनले सन्दुक पालभित्र राखे र त्यसलाई छेल्ने गरी पर्दा झुन्ड्याए। यसरी परमप्रभुले आज्ञा गर्नुभएअनुसार करारको सन्दुकको रक्षा भयो।
22पवित्र पालभित्र परमप्रभुले आज्ञा गर्नुभएअनुसार तिनले पर्दा बाहिर उत्तरपट्टि टेबिलमा राखे र 23त्यसमाथि परमप्रभुलाई चढाएको रोटी राखे। 24टेबिलको सामुन्ने दक्षिणमा सामदान राखे र 25त्यहाँ परमप्रभुको अघि उहाँले आज्ञा गर्नुभएअनुसार पानसहरू बाले। 26पर्दाको अघिल्तिर डेराभित्र सुनको वेदी राखे र 27परमप्रभुले आज्ञा गर्नुभएअनुसार मीठो बास्ना दिने धूप बाले। 28तिनले पवित्र पालको ढोकामा पर्दा टाँगे र 29त्यहाँ पर्दाको अघिल्तिर होमबलि चढाउने वेदी राखे। परमप्रभुले आज्ञा गर्नुभएअनुसार तिनले वेदीमा होमबलि र अन्नबलि चढाए। 30पवित्र पाल र वेदीको बीचमा तिनले पानी हाल्ने बाटा राखे र त्यसमा पानी भरे। 31-32परमप्रभुले आज्ञा गर्नुभएअनुसार मोशा, हारून र तिनका छोराहरूले पवित्र पालभित्र वा वेदीमा जाँदा आ-आफ्ना हात-खुट्टा धुन्थे। 33मोशाले पवित्र पाल र वेदीका चारैपट्टि घेरा लाए र घेराका ढोकामा पर्दा टाँगे। यसरी तिनले सबै काम सिध्याए।
पवित्र पालमाथि बादल
(गन्ती ९:१५-२३)
34 #
१ राजा 8:10,11; यशैया 6:4; इजकिएल 43:4,5; प्रकाश 15:8 तब बादलले पवित्र पाललाई ढाक्यो र परमप्रभुको उपस्थितिको चम्किलो ज्योतिले पाल भरियो। 35त्यसले गर्दा मोशा पवित्र पालभित्र जान सकेनन्। 36पवित्र पालबाट हट्दा मात्र इस्राएलीहरू अर्को ठाउँमा सर्थे। 37बादल पवित्र पालमाथि रहुञ्जेल तिनीहरू ठाउँ सर्दैनथे। 38तिनीहरूले जहिलेसम्म यात्रा गरे, त्यतिञ्जेल तिनीहरूले दिउँसो पवित्र पालमाथि परमप्रभु उपस्थित हुनुभएको जनाउने बादल र राती त्यसमाथि आगो बलेको देख्थे।
Currently Selected:
प्रस्थान 40: सरल नेपाली
Highlight
Share
Copy
Want to have your highlights saved across all your devices? Sign up or sign in
Simple Nepali Holy Bible © Nepal Bible Society, 2008.
