Penemu-Dalam Solomon 19
19
Pemeli Orang Ejip ke Munuh Diri
1Tang orang ke nadai pengarap majak ngasaika pengeringat Nuan ti nadai pengasaih datai ke ujung. Nuan nemu utai ti deka dikereja sida sebedau sida ngereja nya. 2Nuan nemu taja sida muru nembiak Nuan lalu ngasuh sida jampat angkat, sida deka berubah runding lalu ngagai sida. 3-4Lebuh orang Ejip agi ngulit ba pendam sida ke parai, sida enda ingatka kebuah utai nya nyadi, lalu sida beli amat ngumbai bala orang ke dipinta sida angkat endang amat rari. Nya alai, sida ngagai orang Israel. Sida diumpan baka nya laban nya siti ari ukum ti patut diterima sida ngambika sida deka nembuka pemerinsa ti deka diterima sida. 5Sida nya deka tetemuka pemati ti nyelai, lalu maya nya nembiak Nuan majak bejalai enggau kuasa ajih ari Nuan.
Allah Taala Ngiring Sereta Ngibun Nembiak Iya
6Semua kuasa dunya di bap langit diubah nitihka pengasuh Nuan ngambika nembiak Nuan enda kena pemedis. 7Sida meda remang atas sida ke belangkau enggau tanah rangkai ti udah endur ai. Dia bisi tanah landai ti berumput entara gelumbang ai ba sepiak-sepiak Tasik Mirah ngambika sida nyamai bejalai nengah nya ke seberai. 8Semua nembiak Nuan ke dijaga Nuan meda utai ti nyelai amat nya lalu bejalai ke seberai. 9Sida jengkak-jengkak baka kuda ti dibai makai rumput; sida merejuk baka bedus, lalu muji Nuan, Tuhan, laban Nuan nyelamat sida. 10Sida agi ingat gaya pengidup sida lebuh agi nyadi ulun - baka ni tanah mansutka keringit, ukai bala jelu chapi, baka ni sungai mansutka pama, ukai ikan. 11-12Udah nya, lebuh sida balat inginka pemakai ti manah, burung datai ari tasik ti mantupka pengelapar sida. Tu bansa burung ti enda kala dipeda sida.
Ukum Orang Ejip
13Tang nitar ti balat meri tangkan pasal ukum ti deka datai ba sida ke bepenyalah nya. Sida merinsa nyepi ukum ti patut diterima sida ketegal pemalat penyai sida. Nadai bansa kala begedi amat ke orang kampar. 14Bisi orang kala ditemu enggai nerima kampar ke datai ngagai sida, tang sida tu ngaga temuai ke manah enggau sida nyadi ulun. 15Genap bansa deka diukum enti sida enggai nerima orang menua bukai, 16tang orang tu ke dulu suba nerima orang menua bukai enggau pengerami lalu ngaga orang nya sebaka enggau sida, udah nya sida udu merinsaka orang. 17Orang tu ke kena laban buta, baka orang lelaki menua Sodom ke datai ngagai pintu rumah orang ke lurus siku benama Lot. Sida nyau ngasaika diri empu buta lalu genap iku sida gama-gama ngiga pintu rumah diri empu.
Kuasa Ajih Allah Taala
18Ba belikan genap tali iya bisi peninggi bunyi nyawa, tang tiap bunyi siti tali begulai ngaga bunyi lagu ti enda sebaka. Baka nya gaya utai lebuh nya suba, maya genap iti utai begulai nyadi utai ti baru. Peratika utai ti nyadi! 19Jelu darat turun ke ai, lalu utai ti nyemerai niki ke pantai. 20Api idup ba ai ti enda ulih madamka iya. 21Lalu daun api enda meh ulih nunu isi jelu ti bejalai dalam api, lalu enda ngelelaka pemakai ari serega ti patut lela baka ambun.
22Tuhan Nuan udah ngaga nembiak Nuan beberita - tebilang dalam semua utai. Nuan enda kala ninggalka sida. Nuan udah meri sida tulung, selalu-lalu, dini-dini endur.
Currently Selected:
Penemu-Dalam Solomon 19: BK
Highlight
Share
Copy
Want to have your highlights saved across all your devices? Sign up or sign in
Hakcipta © 2011, The Bible Society of Malaysia
Copyright © 2011, The Bible Society of Malaysia