Penemu-Dalam Solomon 18
18
Penampak Manchar Ba Orang Israel
1Nyadi lebuh nya penampak ti terang amat manchar ba nembiak Nuan ti kudus. Munsuh sida ninga nyawa sida, tang enda ulih meda sida. Sida ngining berekat nembiak Nuan nya ke enda merinsa. 2Bala munsuh patut beterima kasih laban orang ke disalah sida enda malas ngelaban sida diatu, nya alai sida dipinta angkat.
3Nya baru Nuan ngiring bala nembiak Nuan lebuh sida bejalai nengah menua ti enda temu sida. Nuan ngiring sida enggau tiang api. Api nya baka mata panas ti enda medis sida serantau-rantau jalai ti bemulia nya. 4Tang bala munsuh sida ke enda diasuh meda penampak ke patut dikurung dalam pemetang, laban sida udah ngurung nembiak Nuan. Nengah nembiak Nuan penampak Adat ti meruan belama-lama deka diberi ngagai dunya.
Pemati Anak Tuai Ti Lelaki Orang Ejip
5Lebuh munsuh Nuan ngaga atur deka munuh bala anak lelaki nembiak Nuan ti kudus, dia bisi siku anak ke dibuai tang udah nya diselamat. Udah nya Nuan ngukum munsuh Nuan enggau jalai ti munuh mayuh amat anak sida. Bisi sekali Nuan ngelemaska semua bala soldadu sida ba ai ti bealun-alun. 6Tang bala aki ini kami udah dulu dipadah pasal utai ti deka nyadi malam nya. Nya alai sida gaga ati sereta diperansang laban sida arap ke semaya ti diberi Nuan ngagai sida. 7Nembiak Nuan endang nemu Nuan deka ngelepaska bansa ti lurus, lalu ngerusak munsuh sida. 8Enggau kereja ti sebaka Nuan ngukum munsuh kami, lalu ngangauka kami nyadi nembiak Nuan, lalu meri kami basa ti besai.
9Sekumbang maya nya orang ti angkunka Allah Taala ari bansa ti lurus tu belalai meri korban. Sida lalu besemaya enggau pangan diri deka ngasika Adat Allah Taala. Lalu sida mega besemaya deka bekunsika berekat enggau penusah enggau pangan diri. Sida endang udah dulu belagu ngena lagu lama. 10Tang sabak tusah ati bala munsuh sida didinga di semua endur, laban sida ngulitka pemarai bala anak sida. 11Tuan enggau ulun sida, raja enggau semua rayat sama nerima ukum ti sebaka. 12Dia bisi tekelalu mayuh bangkai ti enda alah tiap. Enda mayuh orang ke agi idup nguburka semua bangkai. Dalam sekejap mata bala anak ti dikesayauka sida parai magang; semua pemarai sida nya sebaka magang. 13Orang nya enda pedulika jaku tangkan, tang bepangai ba kuasa orang ti tau engkeramat. Tang lebuh anak sida ti tuai lelaki dibunuh, nya baru sida nemu orang Israel nya anak Allah Taala.
14Tengah malam nya, semua utai sunyi magang sereta nadai engkeretik. 15Kemaya nya, enggau ngenyit pengawa Nuan dipejalaika! Jaku ti bekuasa pasal ukum datai jampat ari penuduk raja Nuan di serega, terus ke baruh nuju menua ti dirusak nya. Iya datai baka soldadu ti balat nyerang, 16ngereja pengawa nundaka asuh Nuan ngena senyata ti balat ngenakut, enggau kaki berindik ba tanah, lalu pala negu langit, ngisi menua nya enggau pemati. 17Maya nya sida ke deka parai balat remban. 18Di seluruh menua nya sida gali setengah mati, lalu madahka kebuah sida deka mati. 19Sida nemu kebuah sida deka mati, laban mimpi ti udu ngenakut madah ngagai sida.
Sembiang Aron Nyelamatka Orang Israel Ari Pemati
20Pemati bisi mega nuntung bansa ti lurus, ketegal mayuh sida kena penyakit ti bejangkit di padang pasir ba menua puang, tang pengeringat Nuan enda lama aja. 21Dia bisi siku orang ke manah ke jampat ngaga pengawa kena nyaga sida. Ketegal Aron mangku pengawa nyadi imam dia iya lalu besembiang, nunu menyan lebuh minta ampun ke dosa. Ngena sembiang enggau menyan ke senyata iya, Aron ulih nerima pengeringat Nuan lalu ngemaduka penusah nya. Ngena jalai nya iya mandangka diri imam Nuan. 22Iya ulih ngalahka pengemar nya, tang ukai ngena pengering iya empu tauka kuasa soldadu. Iya semina ngena sembiang nagang ukum nya nyadi; iya minta Nuan ngingatka semaya Nuan enggau aki ini kami. 23Mayuh bangkai udah ditugung, tang iya lalu nagang pengeringat Nuan lalu enda ngasuh ngerusak sida ke agi idup. 24Iya ngena baju panjai ti dilagu enggau tanda langit enggau tanah. Ba dada iya bisi empat iti rintai batu berega ti diukir kena masa aki ini kami, lalu labung iya dilagu ngena marik nyadi ke tanda kuasa raja Nuan. 25Melikat Pemati takut ke utai tu lalu ngetu. Pengeringat Nuan mimit aja udah diasaika sida, tang nya pen udah chukup.
Currently Selected:
Penemu-Dalam Solomon 18: BK
Highlight
Share
Copy
Want to have your highlights saved across all your devices? Sign up or sign in
Hakcipta © 2011, The Bible Society of Malaysia
Copyright © 2011, The Bible Society of Malaysia