Penemu-Dalam Solomon 16
16
1Nya alai patut amat orang tu diukum lalu diperinsaka jelu ti mayuh nya.
2Tang Nuan, O Tuhan, enda ngukum nembiak Nuan baka nya; Nuan mandang ngagai sida pementas Nuan. Nuan ngirumka burung ke diempa sida, pemakai ti jarang diempa sereta nyamai amat kena ngemuaska sida ti lapar. 3Nuan ngereja semua utai tu ngambika semua orang ke nyembah engkeramba, benung sida lapar, enda meh ulih makai laban jelu ti kamah ti dikirumka Nuan ngagai sida. Tang bala nembiak Nuan semina merinsa lapar enda lama aja, lalu udah nya sida makai pemakai ti pengambis manah. 4Endang patut sida ti nekanka nembiak Nuan nyepi pemerinsa, lalu maya nya nembiak Nuan meda munsuh sida kena perinsa.
5Lebuh ular ti jai sereta mangah ngelaban nembiak Nuan sereta munuh sida enggau rachun, Nuan enda majak ringat belama. 6Penusah tu semina bisi enda lama aja ti nyadika tangkan. Udah nya Nuan meri sida tanda kena nyuman, iya nya, ular digaga ari temega, ngambika sida ingatka Adat Nuan patut dititih. 7Enti orang malik ngagai tanda nya, iya lalu gerai ari abi gigit ular - ukai ari utai ti dipeda iya, tang ari Nuan ti pengelepas semua mensia. 8Enggau pengawa ti baka nya, Nuan ngasuh munsuh kami arap endang siku Nuan aja ti ngelepaska orang ari semua penyai. 9Munsuh kami parai ari gigit buntak enggau tutu lalat; nadai jalai nyumanka sida, laban sida endang patut diukum indu utai nya. 10Indah ular ti bisa enda meh ulih ngalahka nembiak Nuan, laban Nuan bisi pengasih, nulung sida sereta ngeraika sida.
11Sida digigit ngambika sida ingatka Pengasuh Nuan, tang sida jampat dilepas enggaika sida tetap enda ngingatka Nuan, lalu enda bulih pementas Nuan. 12Nadai ubat tauka minyak nyumanka sida. Sida bulih pengerai ari jaku Nuan, O Tuhan; jaku nya ti ngeraika semua mensia. 13Nuan bisi kuasa atas pengidup enggau pemati; Nuan ulih ngasuh orang mati sereta ngidupka iya baru. 14Sida ke jai deka munuh orang, tang enda ulih ngidupka iya baru, tauka ngelepaska semengat ari dunya pemati.
Ribut Kudi Mangka Menua Ejip
15Nadai siku orang ulih ngerarika diri ari Nuan. 16Peda sida ke nadai pengarap: sida enggai ngelala Nuan ti Allah Taala, nya alai Nuan ngukum sida enggau kuasa Nuan ti besai amat. Sida dialahka hari kudi, ujan batu enggau api. 17Utai ti nyelai amat, iya nya, api balat agi mau ba ai ti endang dikena madamka api. Semua kuasa dunya besaup nyaga orang ke lurus. 18Bisi sekali api nya padam ngambika enda ngerusak bala indu utai ti dikirum kena ngukum orang ke nadai pengarap. Sida nya patut belajar pasal sida ti dialah ketegal ukum Nuan. 19Tang bisi sekali, lebuh sida dikelinggi ai, daun api lebih balat agi mau ari selama, lalu ngerusak semua utai ti ditanam ba tanah endur orang ke jai diau.
Orang Israel Nerima Manna
20Tang pengerusak nya enda ningganng nembiak Nuan. Tang kelimpah ari nya, Nuan meri sida pemakai melikat. Nuan ngirumka roti ti endang udah disedia deka diempa, lalu sida nadai kiruh nyediaka iya dulu. Pemakai ti diberi Nuan ngelantangka ati semua orang, nadai ngira pengasai sida. 21Semua pengawa tu mandangka pemalat pengerindu Nuan ngibun bala nembiak Nuan. Pemakai nya ngemuaska genap iku orang ke makai iya; pemakai nya betukar nitihka nyawa siku-siku. 22Selalu iya, pemakai bansa nya tau lela baka seleju tauka ai batu, tang diatu, ba api enda meh iya lela. Tu kena ngajar nembiak Nuan pasal api nya tadi ti ngerusak utai ditanam munsuh sida lebuh ujan lebat begulai enggau ujan batu. 23Kuasa api nya ditagang, ngambika nembiak Nuan ke lurus bisi pemakai.
24Nuan ngaga utai di bap langit; utai nya nitihka asuh Nuan aja. Semua utai ti digaga Nuan ngena kuasa iya ngukum orang jai, tang iya kurang balat sereta nelap ngagai orang ke arap ke Nuan. 25Semua utai ti digaga nya tau nyadi mayuh macham ti diberi Nuan enggau gerah jari ngagai semua orang ke besembiang minta ngagai Nuan. 26Utai tu nyadi ngambika bansa ke dikerinduka Nuan, O Tuhan, tau mereti pasal sida ukai ditupi enggau utai ti ditanam sida. Semina jaku Nuan aja ti ngenanka orang ke manggaika pengarap sida ba Nuan. 27Pemakai ti enda rusak laban api mupuk lela lebuh mata panas niki. 28Tu kena ngajar kami ngambika kami mesti angkat dani sebedau hari tawas lalu meri terima kasih ngagai Nuan, lalu besembiang lebuh mata hari nyau niki. 29Tang pengandal orang ke enda nemu beterima kasih nyau lela baka ai ambun, lalu lenyau baka ai ti enda dikena.
Currently Selected:
Penemu-Dalam Solomon 16: BK
Highlight
Share
Copy
Want to have your highlights saved across all your devices? Sign up or sign in
Hakcipta © 2011, The Bible Society of Malaysia
Copyright © 2011, The Bible Society of Malaysia