Penemu-Dalam Solomon 15
15
Allah Taala Ti Amat Meri Pengidup Meruan Belama Iya
1Tang Nuan, Allah Taala kami, sigi manah, amat, sereta liat ati. Nuan megai dunya enggau pengasih. 2Taja kami bedosa, kami nemu kuasa Nuan, lalu agi enggi Nuan. Tang laban kami nemu diri endang enggi Nuan, kami deka badu bedosa. 3Nadai utai lebih lurus ari ti nemu Nuan, lalu ngelala kuasa Nuan nyadika pun pengidup belama iya. 4Kami enda kala dibai limpang ulih pengawa ti jai ari pengelandik mensia, ulih utai ti nadai guna dichat tukang lukis, tauka ulih engkeramba ti dichat ngena mayuh macham chura. 5Gamal utai ti baka nya ngangkatka ati orang ke beli, lalu ngasuh sida inginka gamal utai ti nadai seput. 6Sebarang sapa orang ke ngaga utai nya, tauka inginka iya, tauka nyembah iya, endang rinduka utai ti jai, lalu deka nerima ukum ti patut diterima iya ketegal iya manggaika pengandal iya ba utai nya.
Pemeli Pengawa Nyembah Engkeramba Digaga ari Tanah
7Tukang periuk bejimat ngaga utai ari tanah ladu ngambika tau diguna kitai. Sekeda utai nya ti digaga iya dikena kitai enggau manah, sekeda enda, tang iya ngaga semua utai nya ari tanah ngena jalai ti sebaka. Tukang periuk nya empu milih utai ti deka digaga iya nitihka guna utai nya. 8Iya empu endang mensia ti digaga ari tanah dulu mimit ari tu, lalu enda lama udah nya iya mesti mulaika semengat ti dijali ngagai iya, lalu iya nyadi tanah baru. Iya endang mensia, tang iya masau tulang iya ngaga patung petara ti nadai guna, ti sama digaga ari tanah ti dikena ngaga periuk. 9Umur iya pandak, lalu enda lama da iya deka parai, tang iya enda pedulika utai nya. Iya deka mekit orang ke ngaga utai ari mas, pirak enggau temaga, lalu ngaga utai baka sida nya. Iya temegahka utai ti digaga iya, tang utai nya tiru. 10Ati iya digaga ari abus. Pengandal iya murah agi ari debu. Seput iya kurang agi berega ari tanah ladu, 11laban iya enda kala nemu Allah Taala ti ngaga iya, ti ngesuhka seput ngagai semengat ti regas enggau roh ti idup. 12Iya ngira pengidup mensia baka ke bemain aja, baka kedai endur ngiga untung. Iya arapka ngiga duit naka pemayuh ti ulih iya, taja jalai iya salah. 13Orang ke ngaga engkeramba enggau periuk ti mudah pechah ari tanah nya, endang nemu lebih agi ari orang bukai iya empu bedosa.
Ukum Orang Ejip
14Tang orang ke pengabis beli ari semua orang, mandangka diri kurang mereti ari anak mit, lalu sida nya munsuh ke nekanka nembiak Nuan, O Tuhan. 15Sida ngumbai semua engkeramba ti disembah sida ti kapil nya petara, taja engkeramba nya enda ulih meda enggau mata sida, enda ulih enseput ari idung sida, enda ulih ninga enggau pending sida, enda ulih ngasai enggau tunjuk sida, lalu enda ulih bejalai enggau kaki sida. 16Semua engkeramba nya digaga mensia ti bisi roh dijali ngagai sida. Nadai siku orang ulih ngaga siku petara ti sebaka enggau mensia. 17Lama laun genap iku orang sigi tetap mati, tang sebarang utai ti digaga enggau jari iya ti jai nya sigi mati ari pun. Indah iya empu deh lebih manah agi ari utai ti disembah iya. Sekurang-kurang iya, orang nya enseput, tang utai ti disembah iya enda nemu enseput, lalu endang enda kala enseput. 18Orang ke baka nya nyembah jelu ti dikenggaika, nyengkaum iya ti jelu ti nadai penemu. 19Indah jelu nya enda chukup manah ngasuh orang rinduka sida. Allah Taala empu semina mansa sida aja lebuh Iya muji lalu merekat utai bukai ti digaga Iya.
Currently Selected:
Penemu-Dalam Solomon 15: BK
Highlight
Share
Copy
Want to have your highlights saved across all your devices? Sign up or sign in
Hakcipta © 2011, The Bible Society of Malaysia
Copyright © 2011, The Bible Society of Malaysia