Mark 14

Orang Bepekat Ngelaban Jesus

(Matthew 26.1-5; Luke 22.1-2; John 11.45-53)

1 # P-sut 12.1-27. Dua hari sebedau Gawai Paska enggau Gawai Roti Ti Enda Beragi nyadi, sida tuai imam, enggau sida pengajar Adat ngiga jalai nangkap Jesus#14.1 Jesus; Gerika: Iya ngena chara belalai lalu munuh Iya, 2laban ku sida, “Ukai lebuh maya gawai, enggai ke orang begau.”

Jesus Ditata Di Betani

(Matthew 26.6-13; Luke 7.37-38; John 12.1-8)

3Lebuh Jesus benung makai dalam rumah Simon ke udah sakit lan di Betani, siku indu datai mai sebutul minyak wangi ti berega, mechahka butul nya, lalu nuang minyak wangi nya ba pala Jesus. 4Tang sekeda orang ke bisi dia pedis ati meda nya, lalu bejaku enggau pangan diri, “Nama kebuah masau minyak wangi nya? 5Laban minyak wangi nya tau dijual ngena rega lebih tiga ratus singkap duit pirak#14.5 duit pirak; Peda 6.37. lalu duit nya diberi ngagai orang ke seranta!” Sida lalu nganu indu nya.

6Tang ku Jesus bejaku, “Anang ngachau iya! Nama kebuah kita ngiruh iya? Iya udah ngereja utai ti manah ke Aku. 7#U-dat 15.11. Laban kita deka seruran bisi orang ke seranta enggau kita, lalu kita tau ngayanka penyiru kita ke sida sebarang maya kita deka. Tang Aku enda seruran bisi enggau kita. 8#Jhn 19.40. Iya udah ngereja utai ti ulih dikereja iya. Iya udah nata tubuh Aku kena nyendiaka Aku dikubur. 9Enggau bendar Aku madah ngagai kita, di sebarang endur Berita Manah#14.9 Berita Manah; Tauka: Injil tu ditusui di serata dunya, utai ti udah dikereja iya deka ditusui kena ngingatka iya.”

Judas Besetuju Deka Nyual Jesus

(Matthew 26.14-16; Luke 22.3-6)

10Udah nya Judas Iskariot, siku ari sida ke dua belas, mansang ngagai sida tuai imam, deka nyual Jesus ngagai sida. 11Lebuh sida ninga nya, sida gaga amat lalu besemaya deka meri iya duit. Nya alai Judas lalu belabuh begigaka peluang nyual Jesus.

Pemakai Tuhan

(Matthew 26.17-25; Luke 22.7-14, 21-23; John 13.21-30)

12Ba hari ti keterubah ke Gawai Roti Ti Enda Beragi, lebuh maya nyayat anak domba, sida murid bejaku enggau Iya, “Dini alai Nuan ngasuh kami nyendiaka pemakai Gawai Paska ke Nuan?”

13Iya lalu ngasuh dua iku murid Iya. Ku Iya bejaku ngagai seduai iya, “Alai seduai mansang ngagai nengeri. Siku lelaki ke mai tempayan#14.13 Sekeda Iban nyebut: tepayan ai deka betemu enggau seduai. Titihka iya, 14lalu tama ngagai rumah ti alai iya tama, lalu sebut ngagai orang ke bempu rumah nya, ‘Pengajar nanya, Dini alai bilik temuai alai Aku makai pemakai Gawai Paska enggau murid Aku?’ 15Iya deka madah ngagai seduai siti bilik ti besai di sadau, ti udah dikemas sereta disikap. Sediaka pemakai Gawai Paska ke kitai dia.”

16Nya alai murid dua iku nya lalu mupuk ngagai nengeri nya, lalu nemu semua utai munyi ti udah dipadahka Jesus ngagai seduai iya. Seduai iya lalu nyendiaka pemakai Gawai Paska.

17 # Mat 26.20-25; Luk 22.14, 21-23; Jhn 13.21-30; Mas 41.9. Lebuh hari nyau lemai, Jesus lalu datai enggau sida ke dua belas. 18Lalu lebuh sida benung duduk makai, Jesus bejaku, “Enggau bendar Aku madah ngagai kita, siku ari bala kita deka nyual Aku, iya ke sama makai enggau Aku.”

19Sida murid lalu belabuh tusah ati, lalu nanya Iya, udah siku, siku, “Ukai patut aku?”

20Ku Iya bejaku ngagai sida, “Siku ari kita ke dua belas, iya ke nyepuhka roti#14.20 Gerika nadai nyebut: roti ngagai pinggai#14.20 Sekeda salin: ngagai pinggai siti nya nyereta Aku. 21Laban Anak Mensia deka mupuk munyi ti ditulis pasal Iya. Tang naka meh penusah orang ke nyual Anak Mensia! Manah agi enti iya enda ada!”

Pemakai Tuhan

(Matthew 26.26-30; Mark 6.41; 8.6; Luke 22.14-20; 24.30; 1 Korint 11.23-25)

22Lebuh sida benung makai, Iya ngambi roti, lalu lebuh Iya udah merekat roti nya Iya lalu mechahka roti nya, meri roti nya ngagai sida murid Iya, lalu bejaku, “Empa; tu tubuh Aku.”

23 # 1 Kor 10.16. Udah nya Iya ngambi mangkuk, lalu lebuh Iya udah meri terima kasih, Iya lalu nyuaka mangkuk nya ngagai sida, lalu semua sida bela ngirup ari mangkuk nya. 24#P-sut 24.8; Jer 31.31-34. Ku Iya bejaku ngagai sida, “Tu darah Aku, darah sempekat, ti dituang ke orang mayuh. 25Enggau bendar Aku madah ngagai kita, Aku enda agi ngirup wain tu nyentuk ngagai hari Aku ngirup iya baru dalam Perintah Allah Taala.”

26Lebuh sida udah belagu siti pantun, sida lalu mupuk ngagai Bukit Kana.

Jesus Madahka Peter Deka Besangkalka Iya

(Matthew 26.31-35; Luke 22.31-34; John 13.36-38)

27 # Sek 13.7; Jhn 16.32. Jesus lalu bejaku ngagai sida, “Semua kita deka ninggalka Aku, laban endang udah ditulis,

‘Aku deka munuh pengibun bedus,

lalu raban bedus deka pambar.’

28 # Mat 28.16; Mrk 16.7. Tang lebuh Aku udah diangkatka idup baru, Aku deka mupuk ngagai Galili dulu ari kita.”

29Peter lalu bejaku ngagai Iya, “Enti sema semua sida ninggalka Nuan, aku meh enda.”

30 # Mrk 14.66-72; Jhn 13.36-38; 18.17-18, 25-27. Jesus lalu bejaku ngagai iya, “Enggau bendar Aku madah ngagai nuan, sehari tu, malam tu, sebedau manuk mengkukuk kedua kali, nuan udah besangkalka Aku tiga kali.”

31Tang Peter bejaku bebendar agi, ku iya, “Enti sema aku enda tau enda mati enggau Nuan, enda meh aku besangkalka Nuan!”

Semua murid ti bukai bela bejaku munyi nya magang.

Jesus Besampi Di Getsemani

(Matthew 26.36-46; Luke 22.39-46; Hebrew 5.7-8)

32Sida datai ba endur siti ti dikumbai Getsemani, lalu ku Iya bejaku ngagai sida murid Iya, “Duduk ditu. Aku deka besampi.” 33Iya lalu mai Peter, James enggau John, lalu belabuh tusah amat ati sereta teguran, 34#Jhn 12.27. lalu ku Iya bejaku ngagai sida, “Ati Aku balat tusah, asai ke deka mati. Tinggal ditu lalu anang tinduk.”#14.34 anang tinduk; Tauka: bejaga

35Iya bejalai jauh mimit, nyungkurka Diri ke tanah lalu besampi minta Diri, enti ulih, enda ibuh natka pemerinsa nya. 36#Rom 8.15; Gal 4.6; Mrk 10.38; Jhn 18.11. Ku Iya besampi, “Abba,#14.36 Abba; Jaku orang bansa Aram: reti nya, Apai Apai, ba Nuan semua utai ulih magang. Ambi mangkuk tu ari Aku, tang ukai nitihka peneka Aku, tang nitihka peneka Nuan.”

37Udah nya Iya pulai baru ngagai sida murid, lalu nemu sida tinduk, lalu ku Iya bejaku ngagai Peter, “Simon, kati nuan tinduk? Kati nuan enda ulih bejaga sejam? 38#Mat 6.13; Luk 11.4. Bejaga sereta besampi, ngambika kita enda kena laban penguji. Ati amat deka, tang tubuh lemi.”

39Iya mupuk baru lalu besampi munyi ti dulu. 40Udah nya Iya pulai baru lalu nemu sida tinduk, laban sida nyau kelalu deka tinduk. Lalu sida enda nemu chara madah ngagai Iya.

41Lebuh Iya pulai baru ketiga kali, Iya bejaku ngagai sida, “Kati kita agi tinduk sereta belelak? Umbas meh nya! Maya udah datai. Diatu Anak Mensia deka dijual ngagai orang ke bedosa. 42Angkat. Aram kitai mupuk. Peda kita, orang ke nyual Aku udah datai!”

Jesus Ditangkap

(Matthew 26.47-56; Luke 22.47-53; John 18.3-12)

43Kemaya nya, lebuh Jesus agi benung bejaku, Judas, siku ari sida ke dua belas, lalu datai, mai bala orang ke betangkinka pedang enggau bebaika pemalu, ari sida tuai imam, ari sida pengajar Adat, enggau ari sida tuai bansa. 44Nyadi orang ke nyual Iya, udah meri sida siti tanda. Ku iya, “Orang ke disium aku, nya meh Iya. Tangkap Iya, bai Iya lalu jaga Iya.”

45Nya alai lebuh Judas datai, iya lalu tekala nya mansang ngagai Jesus, lalu bejaku, “Pengajar!” lalu nyium Iya. 46Sida megai lalu nangkap Jesus. 47Tang siku ari orang ke bediri semak dia nyintak pedang iya, lalu mantap ulun imam besai, mutuska pending iya. 48Jesus lalu bejaku ngagai sida, “Kati kita betangkinka pedang enggau bebaika pemalu mansang nangkap Aku, baka ke nangkap perumpak? 49#Luk 19.47; 21.37; Jhn 18.19-21. Tiap hari Aku begulai enggau kita lebuh Aku ngajar dalam Rumah Sembiang, lalu kita enda nangkap Aku. Tang awakka Bup Kudus dikamatka.”

50Semua murid ninggalka Iya, lalu rari.

51Siku orang bujang, ke beserayung semina ngena kain linin, nitihka Jesus. Sida nangkap iya, 52tang iya rari telanjai-lanjai, ninggalka serayung iya.

Jesus Dibai Ngagai Kunsil

(Matthew 26.57-68; Luke 22.54-55, 63-71; John 18.13-14, 19-24)

53Sida lalu mai Jesus ngagai imam besai. Semua sida tuai imam, sida tuai bansa enggau sida pengajar Adat lalu begempuru. 54Peter udah nitihka Jesus ari jauh, nyentuk ngagai tengah laman imam besai, lalu iya duduk bekindu enggau sida jejaga. 55Nyadi sida tuai imam enggau semua raban Kunsil ngiga saksi ngelaban Jesus, ngambika Iya diukum bunuh. Tang sida nadai tetemuka saksi. 56Laban mayuh orang besaksi bula ngelaban Iya, tang saksi sida enda besetuju enggau saksi pangan diri.

57Sekeda orang bediri lalu besaksi bula ngelaban Iya. Ku sida, 58#Mrk 13.2; 15.29; Jhn 2.19; SKR 6.14. “Kami udah ninga Iya nyebut, ‘Aku deka ngerusak Rumah Sembiang tu ti digaga mensia, lalu dalam tiga hari Aku deka nirika sebuah ti ukai digaga mensia.’ ” 59Tang indah ba senentang tu deh saksi sida mengkang enda besetuju enggau saksi pangan diri.

60Imam besai lalu bediri di mua sida, lalu nanya Jesus, “Kati Nuan nadai saut ngagai nya? Nama utai tu ti disebut sida ngelaban Nuan?”

61Tang Jesus enda bemunyi, lalu enda nyaut. Imam besai lalu nanya Iya baru, “Kati Nuan tu Kristus,#14.61 Kristus; Tauka: Messiah Anak Iya ti Beberekat?”

62 # Dan 7.13; Mrk 9.1; 13.26. Jesus lalu bejaku, “Aku meh nya, lalu

‘kita deka meda Anak Mensia

duduk muak ari kanan Iya ti Bekuasa,’

lalu ‘datai dalam remang ari serega!’ ”

63 # P-pau 14.6; SKR 14.14. Imam besai lalu nyarikka baju panjai iya empu, lalu bejaku, “Nama kebuah kitai begunaka saksi bukai? 64#Lew 24.16. Kita udah ninga Iya bejaku busung. Nnama pemutus penemu kita?”

Semua sida bela madahka Iya patut diukum bunuh.

65Sekeda sida lalu belabuh ngeludah Iya, mampul mata Iya lalu nampar Iya. Ku sida, “Uji Nuan benabi!” Bala jejaga mega enggau ngambi peluang, lalu malu Iya.

Peter Besangkalka Jesus

(Matthew 26.69-75; Mark 14.30; Luke 22.56-62; John 18.15-18, 25-27)

66Lebuh Peter agi benung di baruh ba tengah laman, siku kuli indu ke bekereja ke imam besai mansa. 67Lebuh iya meda Peter bekindu, iya merening ngagai Peter, lalu bejaku, “Nuan pen udah meh enggau Jesus orang Nasaret.”

68Tang Peter besangkalka nya. Ku iya, “Nadai aku nemu tauka meretika utai ti ku nuan.” Iya lalu pansut ngagai mua pintu penama. Manuk lalu mengkukuk.#14.68 Sekeda salin nadai: Manuk lalu mengkukuk.

69Lebuh indu kuli nya meda Peter, iya lalu belabuh baru madah ngagai orang ke bediri dia, “Iya tu siku ari bala sida!” 70Tang Peter besangkal baru.

Enda lama udah nya, lebuh orang ke bediri dia bejaku ngagai Peter baru, “Nuan tetap raban sida, laban nuan tu orang Galili.”

71Tang Peter lalu belabuh nyumpah, ku iya, “Nadai aku nemu orang ti ku kita!”

72Lebuh maya nya manuk mengkukuk kedua kali. Nya baru Peter ingatka utai ti udah disebut Jesus ngagai iya, “Sebedau manuk mengkukuk kedua kali, nuan udah besangkalka Aku tiga kali.” Peter lalu nyabak.

Currently Selected:

Mark 14: BK

Highlight

Copy