यूहन्ना 9
9
जन्मीदीबने म्या अन्तङब मीने म्या तङ्ला चीम्मेब
1हैयादे प्रेनूब येशूदे जन्मीदीबने म्या अन्तङब मीने तङ्दे। 2ङूजे स्यूस्स्यायूदे ङूने लोत्दे, “गुरु, सूदे चीक्कब पापदे अम्ब मी जन्मीदीबने म्या अन्तङ क्यूत्दे? ङूजे प-मजे पापदे यी ङूजे रङ्सेजे पापदे?”
3येशूदे जवाफ पीन्दे, “ङूजे रङ्से पापदेये दी, मेस्ये ङूजे प-मजे पापदे चीत्देबेये दी, तर परमेश्वरजे काम अम्ब मीजे जीयाने तङ्स्य यदेबे ङू म्या अन्तङ् क्यूर ख्यङ्। 4नोजे ओथ्याङ् ख्यङ्बने ङैने कूल्बेबजे कामयू ङीनदे चे पर्दीय। मून्दूङ् क्यूप्पमेस्ये सूदेये काम चे अन्खू। 5#मत्ती 5:14; यूहन्ना 8:12ङ संसारने ख्यङ्दा, ङ संसारजे ओथ्याङ् ख्यङ्।”
6अम्ब पो यदेबे ङूदे सने छ्योम पूत्दे, मेस्ये छ्योमने स च्योप्देबे ह्योलो बन्दीदेबे हम्बजे म्याने छेल्मीदे। 7होर्दे येशूदे हम्बने यदे, “प्र, सिलोआमजे (अम्बजे अर्थ ‘कूल्बेब’ ख्यङ्) क्यू छ्वोने प्रदेबे स्येल्।” ङू गीलीदे स्येल्दे, मेस्ये म्या तङ ख्व क्यूत्देबे ल्वारदे।
8ङूजे खीम्चेयू मेस्ये ङू स्य्वान तङब मीयूदे यदे, “टूङ्देबे स्य्वानब मी अम्बने ते?”
9कोइ मीयूदे यदे, “अम्ब ङू ख्यङ्।” तर सूजोयूदे यदे, “दी, ङूप्रने तङ ख्यङ्” हम्ब मी।
रङ्सेदेने यदे, “अँ, ङ हम्ब मीने न।”
10होर्दे थमयूदे ङूने लोत्दे, “नैजे म्या केरे तङ ख्व क्यूत्दे?”
11ङूदे जवाफ पीन्दे, “येशू यब मीत्यादे सजे ह्योलो बन्दीदे ङैजे म्याने छेल्मीदेबे यदे, ‘सिलोआमने प्रदेबे स्येल्।’ होर्दे गीलीदेबे ङैदे स्येल्दे, मेस्ये तङ ख्व क्यूत्दे।”
12थमयूदे ङूने यदे, “ङू केने ख्यङ्?” ङूदे यदे, “खै ङैने था त्वो।”
फरिसीयूदे मलब
13तरखूम्जे म्या अन्तङ ख्यब मीने थमयूदे फरिसीयू ट्याने रेत्दे। 14येशूदे सजे ह्योलो बन्दीदेबे कम्ब दिनने हम्ब मीजे म्या तङ ख्वब चीम्मीदे हम्ब यहूदीयूजे आराम टूङब दिन पर्तेब ख्य। 15फरिसीयूदे हम्बने लोत्दे, “न केरे तङ ख्व क्यूत्दे?” हम्बदे थमयूने यदे, “ङूदे ङैने सजे ह्योलो म्याने छेल्मीदे, होर्दे ङैदे क्यूदे स्येल्पीदे मेस्ये तङ खूदे।”
16त्या ङ्ही फरिसीयूदे यदे, अम्ब मी परमेश्वरतेलेदे रब दी, चेनेयलो ङूदे यहूदीयूजे आराम टूङब दिन अम्मन्दी।”
तर सूजोयूदे यदे, “पापी मीदे येर च्यूनूयू केरे चे खूदे?” मेस्ये थमयू त्यात्याने अन्थून क्यूरी।
17थमयूदे हम्ब म्या अन्तङब मीने फेरि लोत्दे, “ङूदे नैजे म्या तङ्ला चीम्मे ख्यङ्, जेम्से ङूजे बारेने न च यीय?”
हम्बदे जवाफ पीन्दे, “ङू अगमवक्ता ख्यङ्।”
18म्या तङब मीजे प-मने कोदेबे अन्लोदासेमे यहूदीयूदे हम्ब तम्दम्ने म्या अन्तङ ख्य मेस्ये तङ ख्वा क्यूत्दे यब पो अम्पत्ती। 19होर्दे थमयूदे ङूजे प-मने लोत्दे, “अम्ब नमयूजे च औ, ङू जन्मीदीबने म्या अन्तङ औ? अम्ब चूजो केरे म्या तङ ख्वा क्यूत्दे?”
20ङूजे प-मदे थमयूने यदे, “अँ अम्ब ङीजे च न मेस्ये जन्मीदीबने म्या अन्तङ ख्य, 21तर ङूदे केरे तङ ख्व क्यूत्दे ङीदे अन्स्ये, या अम्बजे म्या सूदे तङ ख्व चीम्मीदे हम्बये ङीदे था त्वो। ङू मीसा ठ्वाये ख्यङ्, ङूने नमयूदेने ल्वे, ङू रङ्सेदेने य खूइय।” 22ङूजे प-मदे अम्ब पो यदे, येर्बे थमयू यहूदीयू तङ्देबे फ ख्य। चेनेयलो ख्रीष्ट यदेबे सूदे ङूने मन्दीय, हम्बने सभा-कीम्दे योम्बे पर्दीय यदेबे यहूदीयूदे खूम्ने मोतो चे ख्य। 23होरेक्यूत्देबे ङूजे प-मदे यदे, “ङू मीसा ठ्वाये ख्यङ्, ङूनेने ल्वे।”
24हन्छ्वामेस्ये हम्ब खूम् म्या अन्तङ ख्यब मीने थमयूदे फेरि कोदेबे यदे, “परमेश्वरने महिमा पीन्। ङीने था ख्यङ् हम्ब मी पक्कने पापी ख्यङ्।”
25ङूदे जवाफ पीन्दे, “ङू पापी ख्य यी त्वो, ङैने था त्वो। पो तीत्यात्या ङैदे स्ये ख्यङ्, यी ङ म्या अन्तङ ख्य, तर जेम्से तङख्यङ्।”
26हन्छ्वाब थमयूदे ङूने यदे, “ङूदे नने च चीम्मीदे? ङूदे नैजे म्या केरे पूक्मीदे?”
27हम्बदे थमयूने जवाफ पीन्दे, “ङैदे तर खूम्ने नमयूने यदे, तर नमयूदे अन्ङ्यीन्। जेम्से फेरि चेने ङ्यीनमे? नमयूये ङूजे स्यूस्स्या क्यूर मैयीर?”
28थमयूदे ङूने फ्राचीदे मेस्ये यदे, “न म ङूजे स्यूस्स्या क्यूत्दे, तर ङीब मोशाजे स्यूस्स्या ख्यङ्। 29परमेश्वरदे मोशाप्रे पो क्यमब ङीने था ख्य, तर हम्ब मी कनेजे यदेबे ङीने था त्वो।”
30हम्ब मीदे जवाफ पीन्देबे थमयूने यदे, “चै नोङ्ल्या पो! ङू केर्दे र ख्यङ् यदेबे नमयूदे था त्वटोङ्, तर ङैजे म्या ङूदेने पूक्मीदे। 31परमेश्वरदे पापीयूजे प्रार्थना अन्ङ्यीन् यब पो ङीन क्वानेने था ख्यङ्, तर परमेश्वरने फब मेस्ये ङूजे इच्छा अनुसार काम चेब मीजे प्रार्थनात्या ङ्यीन्क्य। 32संसारजे सुरु क्यूरमेस्येने येर जन्मेदीबने म्या अन्तङब मीजे म्या पूक्मेब पो कलङ्बेये अन्त। 33कादेये अम्ब मी परमेश्वरदे कूल्बेब दीयलो ङूदे चैये चे अङ्ख्व ख्यङ्दे।”
34थमयूदे ङूने जवाफ पीन्दे मेस्ये यदे, “नब च्याप्पाने पापने प्रेक्कब मीदे ङीने लोम्मे मै औ?” मेस्ये थमयूदे हम्बने हैयादे फीने योम्बीदे।
आत्माजे म्यादे अन्तङब
35थमयूदे ङू फीने योम्बीदे यब पो येशूदे तदे, मेस्ये येशूदे हम्बने तूदेबे यदे, “नदे ङ मीजे च फ्याने विश्वास चीक्क्या?”
36ङूदे जवाफ पीन्देबे यदे, “प्रभु, ङू सू? ङैने येमी मेस्ये ङ विश्वास चीक्क्य।”
37येशूदे ङूने यदे, “नदे ङूने तङ्न ख्यङ्, ङू चूजो नैप्रे बात् सेन्न ख्यङ्।”
38होर्दे ङूदे यदे, “प्रभु ङ विश्वास चीक्क्य” मेस्ये ङूदे ङूने स्यूव पीन्दे।
39होर्दे येशूदे यदे, “ङ न्यायजे लागि अम्ब संसारने रदे, अन्तङब मीयूदे तङ्स्य मेस्ये तङ ख्यङ् यब मीयू अन्तङ क्यूप्पस्य।”
40येर पो तदेबे येशूजे ट्याने ख्यब फरिसीयू अन्द्रदे त्या ङ्ही मीयूदे ङूने यदे, “च ङीननेये म्या अन्तङब यऔ?”
41येशूदे थमयूने यदे, “बूरू नमयू म्या अन्तङ यलो पापजे दोष अन्लादे ख्यङ्दे, तर नमयू ङीदे तङ ख्यङ् यदेबे य ख्यङ्, येरेक्यूत्देबे नमयूजे पाप टूनीय।”
Currently Selected:
यूहन्ना 9: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
