यूहन्ना 5
5
क्यू छ्वोने पछ्याघातजे नव तम् क्यूरब
1होर्देङ्येदे यहूदीयूजे दीन्बर ख्य, मेस्ये येशू यरूशलेमने गीलीदे। 2यरूशलेमने स्वान् ख्यो यब ख्यो ट्याने ठडी ङदे ख्यूर्चीतेब क्यू छ्वो ख्य, अम्बने हिब्रू केदे बेथस्दा य ख्य। 3हम्ब ठडीने कूम थर्-थर्जे, म्या अन्तङब, खोन्ड्याल्या, पक्षाघातीयू नवयू ख्य। [थमयू क्यू कन्छ्वाब ल्याङ्-ल्याङ् लीङ्क्य यदेबे रेन्न ख्य। 4चेनेयलो परमप्रभुजे दूत त्यादे कदङ् कदङ्ब मो क्यू छ्वोने रदेबे क्यू लीङ्बे ख्य, मेस्ये क्यू लीङ ङ्येदे पात्ता खूम सू क्यू नङ्ने क्योब हम्ब मी कर बीददे बेस्से नैनूलीने, तम् क्यूप्प ख्य।]#5:4: मीयूङ्जे कोइ कोइ ग्रीक पाण्डुलिपीयूने अम्ब पदयू अन्लीख्दीये ख्यङ्।
5हैयाने टूनब नबयू नङ्ने मीत्या नदेबे सूम्च्यूदे वर्ष येत् क्यूरेब ख्य। 6कन्छ्वाब येशूदे हम्बने हैयाने टूनब तङ्दे मेस्ये कूम वर्षमेस्येने स्य्वाल् क्यून्न टूङ् यब था प्रेत्देबे येशूदे ङूने यदे, “न तम् क्यूत्दीङ् र औ?”
7नवदे ङूने यदे, “अँ, प्रभु, कन्छ्वाब क्यू लीङ्क्य हन्छ्वाब क्यू छ्वोने चङ्मेजे लागि ङैने तोङ्मेब मीयू सूये त्वो, ङ प्रेनूब प्रेनूबने ङ यली खूम्ने सूजो मी क्यूने क्योब जेङ्कीय।”
8येशूदे हम्ब मीने यदे, “केत्रा मेर्, मेस्ये रङ्सेजे कपतीक तोल्देबे प्ल्ये मेस्ये प्र।” 9येरे य जेङ्कबनेला हम्ब मी तम् क्यूत्दे, मेस्ये कपतीक प्ल्येत्देबे गीलीदे।
मेस्ये हम्ब दिन आराम टूङब दिन ख्य। 10#नहेम्याह 13:19; यर्मिया 17:21“अम्ब आराम टूङब दिनख्यङ्, नदे कपतीक प्ल्येब ज्य दी।”
11हम्बदे थमयूने जवाफ पीन्दे, “सूदे ङैने तम् चीम्मीदे ङूदेने रङ्सेजे कपतीक प्ल्येत्देबे प्र, यदे।”
12थमयूदे ङूने लोत्दे, “नने कपतीक प्ल्येत्देबे प्र यब मी सू?” 13तर तम् क्यूरेब मीदे ङू सू यदेबे अन्स्ये ख्य, चेनेयलो हम्ब नेने मीजे हुल ख्यबदे येशू हैयादे गीलेजेन ख्य।
14होर्देङ्येदे येशूदे मन्दिरने ङू तूदेबे यदे, “ले, न तम् क्यूक्क ख्यङ्। फेरि पाप अन्चील्लाची, मेस्ये नने सूजो थेप् अन्ज्य अन्क्यूस्स्य।” 15हम्ब मीदे यहूदीयू ट्याने गीलीदेबे ङूने तम् चीम्मेब येशू टूङ् यदेबे येमीदे।
परमेश्वर चप्रे क्यूत्देबे प्रेब जीया
16होरेक्यूत्देबे यहूदीयूदे येशूने सतनम् चेमेदे, चेनेयलो ङूदे अम्ब काम यहूदीयूजे आराम टूङब दिनने चीक्क ख्य। 17होर्दे येशूदे थमयूने यदे, “ङैजे पदे चूजोसेमेने काम फर्न ख्यङ्, होर्दे ङैये काम फर्न ख्यङ्।” 18येरेक्यूत्देबे यहूदीयूदे येशूने सेने थेप् बोङ् चीत्दे, चेनेयलो ङूदे यहूदीयूजे आराम टूङब दिनजे नियम अम्मन्देब कामत्या दी, तर रङ्सेने परमेश्वर ताकी मन्देबे ङूदे परमेश्वरने रङ्से प य ख्यङ्।
19येशूदे थमयूने यदे, “तम्दम्ने ङ नमयूने यीय, च रङ्सेदेने चैये चे अन्खू, तर पदे च चेब तङ्क्य हम्बत्यामे चीक्क्य, चेनेयलो पदे च चीक्क्य, चदेये होरप्रने चीक्क्य। 20चेनेयलो पदे चने माया चे ख्यङ्, होर्दे रङ्सेदे चीन्नब साप्ता काम चने तम्मीय, अम्ब यली सोरो केन्केन् कामयू ङूदे चने चीस्ये पीन्क्य, मेस्ये नमयू हार्मन्दीय। 21चेनेयलो केर्बे पदे सीयेब मीयूने लङ्क्य मेस्ये थमयूने जीया पीन्क्य, होरप्रने चदेये सूने इच्छा चीक्क्य, हम्बने जीया पीन्क्य। 22चेनेयलो पदे सूजेये न्याय अन्ची, तर न्याय चेब साप्ता काम चने पीने ख्यङ्, 23केर्बे थमयूदे पजे गेसेन् चीक्क्य, होरप्रने खोत्तादेने चने गेसेन् चीस्स्य, चेनेयलो चने गेसेन् अन्चेबदे ङूने कूल्बेब पनेये गेसेन् अन्ची।
24तम्दम्ने ङ नमयूने यीय, सूदे ङैजे वचन ङ्यीन्क्य मेस्ये ङैने कूल्बेब फ्याने विश्वास चीक्क्य, हम्बप्रे कलङ्बेये अन्सीबब जीया क्यूक्क्य। ङूने दोष अन्लैदी, तर ङूदे सीब अम्-पर्देब जीया प्रेक्क्य। 25तम्दम्ने ङ नमयूने यीय, हम्ब सेमे रेन ख्यङ् मेस्ये हम्ब सेमे चूजोने ख्यङ्, कन्छ्वाब सीयेब मीयूदे परमेश्वरजे चजे के तैय मेस्ये के तबयू बच्दीय या सोम्बो क्यूक्क्य। 26चेनेयलो जीयाजे मूल प परमेश्वर ख्यङ्, मेस्ये होरप्रने ङूदे जीयाजे मूल क्यूरब हक रङ्से चने पीन्क ख्यङ्, 27होर्दे ङूदे चने न्याय चेब हक पीन्क ख्यङ्, चेनेयलो ङू मीजे च ख्यङ्।
28“अम्ब पोने हार्मन्दीन अम्पर्दी, चेनेयलो बील रेन ख्यङ्, कन्छ्वाब खङ्स नङ्ने ख्यब मीयू क्वादेने ङूजे के तैय, 29#दानिएल 12:2मेस्ये फीने योङ्रीय: ज्य काम चेब मीयू जे लागि लङ्क्य यलो अन्ज्य काम चेब मीयू कलङ्बेये अन्जेनब दण्डजे लागि लङ्क्य।
30“ङ रङ्सेदे चैये चे अन्खू। ङैदे कर तैय, होरने न्याय चीक्क्य, मेस्ये ङैजे न्याय ज्य ठर्तीय, चेनेयलो ङ रङ्सेजे इच्छा अम्मल्, तर ङैने कूल्बेबजे इच्छा च ख्य हम्ब मेल्क्य।
31“कादेये ङैदेने ङैजे बारेने गवाही पीन्दे यलो ङैजे गवाही तम्दम् ठर्दीस्ये त्वो। 32ङैजे बारेने गवाही पीनब प परमेश्वर ख्यङ् मेस्ये ङूदे ङैजे बारेने च यीय, हम्ब क्वाने तम्दम् क्यूक्क्य यब ङैने था ख्यङ्।
33 #
यूहन्ना 1:19-27; 3:27-30 “नमयूदे यूहन्ना ट्याने ल्वेने कूल्बीदे, होर्दे ङूदे तम्दम्जे गवाही पीन्दे। 34ङैजे लागि मीजे गवाही क्यूरने पर्दीय यदेबे दी, तर नमयूने बच्दीमेने ङैदे अम्ब पो य ख्यङ्। 35यूहन्ना प्ल्याङ्नब मेस्ये ओथ्याङ् बत्तीप्र ख्य, मेस्ये नमयू ङूजे ओथ्याङ्ने तेदिन आनन्द चेने सूग्दे।
36“तर यूहन्नादे पीनब गवाही यलीने थेप् केन् गवाही ङैजे पक्षने ख्यङ्। चेनेयलो पदे ङैने चीस्ये पीनब कामयू पूरा चीस्ये पीन ख्य, हम्ब काम ङैदे चीन्न ख्यङ्। मेस्ये ङैजे बारेने गवाही हम्ब कामदेने ङ पदे कूल्बे यदेबे तन्क्य। 37#मत्ती 3:17; मर्कूस 1:11; लूका 3:22ङैने कूल्बेब प रङ्सेदेने ङैजे बारेने गवाही पीन्क ख्यङ्। नमयूदे ङूजे के कलङ्बेये अन्त ख्यङ्, होर्दे ङूजे त्वा कलङ्बेये अन्तङ ख्यङ्। 38ङूजे वचन नमयूजे सेम् नङ्ने अन्टोङ्, चेनेयलो नमयू ङूदे कूल्बेब मीने विश्वास अन्ची। 39धर्मशास्त्रने कलङ्बेये अन्सीबब जीया प्रेक्क्य यदेबे नमयू मल्क्य, तर धर्मशास्त्रदे ङैजे बारेने गवाही त्या पीन्क्य। 40होरेक्यूल्ली नमयू जीया प्रेजे लागि ङैट्याने रतीङ् अन्ड।
41“ङैने मीयूदे केन् चीस्स्य यदेबे ङैदे मलदी, 42तर ङैने था ख्यङ् नमयूजे सेम्ने परमेश्वरजे माया त्वो। 43ङ ङैजे पजे मीन्ने रदे, तर नमयूदे ङैने ग्रहण अन्ची। सूजो कोइ रङ्सेजे मीन्नेनेरदे यलो ङूने ग्रहण चीक्क्य।
44नमयू केरे विश्वास चे खूइय, नमयू त्यादे त्याप्रे गेसेन् मे ख्यङ्, होर्दे हम्ब गेसेन् प्रेब अम्मेल, हम्ब गेसेन् तीत्यात्या परमेश्वर ट्यादे रीय?
45“पजे खूम्ने ङ नमयूने दोष चीक्क्य यदेबे, अम्मन्लाची। नमयूने दोष चेब मोशा ख्यङ् नमयूदे रङ्सेजे आशा ङू फ्याने चे ख्यङ्।
46कादेये नमयूदे मोशाने विश्वास चे यलो ङैनेयेये विश्वास चे ख्यङ्दे, चेनेयलो ङूदे ङैजे बारेने लिख्दीये ख्यङ्। 47तर ङूदे लिख्दीयेब पोयूने नमयूदे विश्वास अन्ची यलो, ङैजे पोने केरे विश्वास चीक्क्य?”
Currently Selected:
यूहन्ना 5: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
