यूहन्ना 6
6
येशूदे हजार ङ मीयूने चसे पीनब
मत्ती १४:१३-२१; मर्कूस ६:३०-४४; लूका ९:१०-१७
1होर्देङ्येदे येशू गालीलजे समुद्र थेत्देबे तीप्ल्या गीलीदे। हम्ब समुद्रने तिबेरियासजे समुद्र यीय। 2होर्दे मी हुल केन्त्या ङूजे ङ्येङ्ये रदे, चेनेयलो ङूदे नवयूने चीम्मेब हार्मन्देब च्यूनूयू थमयूदे तङ ख्य। 3येशू गङ्फ्याने गीलीदे, मेस्ये हैयाने रङ्से स्यूस्स्यायूप्रे टूङ्दे। 4यहूदीयूजे निस्तार दीन्बर ट्याने रमे ख्य।
5होर्दे येशूदे तीछो लेप्प मी हुलत्या ङूतेले रेनब तङ्देबे ङूदे फिलिपने यदे, “अम्ब मीयूने पीनब चसे ङीनदे केर्दे रे?” 6येशूदे फिलिपजे ख्वाजे बात् प्रेने ल्वे ख्य। चेनेयलो ङूदे च चेमे यब पो ङू रङ्सेने था ख्य।
7फिलिपदे येशूने जवाफ पीन्दे, “यैयाने ख्यब खोत्तानेने क्यङ् छीत्या छीत्या पीन्लीने सै ङ्ही चाँदीजे मन्द्रामूलीदेये लङ्स्ये त्वो।”
8येशूजे सूजो स्यूस्स्यायू त्या सिमोन पत्रुसजे च्योन् अन्द्रियासदे, 9“यैयाने स्योर्ब त्या ख्यङ्, हम्बप्रे जूकूजे क्यङ् ङ मेस्ये ङ ङ्ही ख्यङ्। तर अर्फत्या कूम मीजे लागि अन्छ्वात्यादे च लङ्क्य?”
10येशूदे यदे, “मीयूने टूङ्स्ये पीन।” हैयाने कूम रेम ख्यब चूउर ख्य। होर्दे हैयाने हजार ङलाप्र पती चयू टूङ्दे। 11येशूदे हम्ब क्यङ् ङ लाने टेल्देबे परमेश्वरने धन्यवाद पीन्दे, मेस्ये टूनब मीयूने चस्ये पीन यदेबे स्यूस्स्यायूने कोस्से पीन्दे। होरप्रने ङ ये कोस्से पीन्दे। मीयूदे लङ्लाबे चदे।
12होर्दे थमयूदे ख्वाजे फ्यालाबे चदे, ङूदे रङ्से स्यूस्स्यायूने यदे, “लम रब ठून्याठूनीयू रूप् पूइ, मेस्ये छीत्याये खेर अम्प्रस्य।” 13चदेबे लम रब हम्ब जूकूजे क्यङ् ङजे ठून्याठूनीयू रूप् पूप्प बाह्र टोलो फ्यादे।
14येरेक्यूत्देबे येशूदे चेब अम्ब च्यूनू तङ्देबे हम्ब मीयूदे यदे, “संसारने रीय यब अगमवक्ता तम्दम्ने ङूने टोङ्।” 15थमयू रदेबे ङूने जबरजस्ती कूबदेबे मूरूम् बन्दे मे ख्यङ् यब पो था प्रेत्देबे येशू फेरि ङू त्याने आलाक्के गङ्ने गीलीदे।
येशू क्यू फ्याने प्रेनब
मत्ती १४:२२-२३; मर्कूस ६:४५-५२
16नूस्यूङ्लाबे ङूजे स्यूस्स्यायू समुद्रतेले गीलीदे। 17मेस्ये डुङ्गाने टदेबे समुद्र तीप्ल्या कफर्नहुम तेले प्रने सुरु चीत्दे। हन्छ्वाब मून्दूङ् क्यूरे ख्य, मेस्ये हन्छ्वासेमेने येशू थमयू ट्याने अम्फ्योर ख्य। 18उन्दू सोरो अन्ज्य चील्लीदेबे समुद्रजे छल लङ्रदे। 19स्यूस्स्यायू डुङ्गा चील्लीदेबे ङला-र्वाला किलोमिटर गीले चेन ख्य। हन्छ्वाब थमयूदे येशू क्यूफ्याने थमयूतेले रेनब तङ्देबे सोरो फैगदे। 20तर ङूदे थमयूने यदे, “ङ न, अम्फलाची।” 21थमयूदे ङूने सूग्देबे डुङ्गाने हीत्दे, मेस्ये थमयू प्रेनब नेने डुङ्गा छ्योट्टो फ्योर्दे।
22समुद्र तीप्ल्याने ख्यब मी हुलदे हैयाने नैदेरेदे तीत्यात्या डुङ्गा तङ्दे, थमयूने था ख्य, यी येशू रङ्से स्यूस्स्यायूप्रे डुङ्गाने अन्टेये ख्य, तर ङूजे स्यूस्स्यायूत्या गीले ख्य। 23होर्दे तिबेरियासदे सूजो डुङ्गायू हम्ब ने ट्याने रदे, हैयाने प्रभुदे धन्यवाद पीन्देबे थमयूदे क्यङ् च ख्य। 24येशू मेस्ये ङूजे स्यूस्स्यायू हैयाने त्वब था प्रेत्देबे हम्ब मीयू डुङ्गाने टदेबे कफर्नहुम सहरतेले ङूने मलने गीलीदे।
जीया पीनब क्यङ्
25थमयूदे समुद्र तीप्ल्याने ङू तूदेबे लोत्दे, “गुरुज्यू, न अन्-याने कलङ् रदे?”
26येशूदे थमयूने जवाफ पीन्दे, “तम्दम्ने ङ नमयूने यीय, ङैदे तनब च्यूनूयू तङ्देबे दी, तर क्यङ् कलाबे च प्रेत्देबे ङैने मल ख्यङ्। 27नाश क्यूप्पब चसेजे लागि कूम छेम्प्रे अन्चील्लाची, तर कलङ्बेये अन्सीबब जीयासेमे टूङब चसेजे लागि छेम्प्रे ची ‘मीजे चदे’ नमयूने अम्ब पीन्क्य। चेनेयलो परमेश्वर पदे ङू फ्याने रङ्सेजे छाप पूदे ख्यङ्।”
28थमयूदे ङूने यदे, “परमेश्वरदे सेम् पर्देब काम चेने ङीदे च चेपर्दीय?”
29येशूदे थमयूने यदे, “परमेश्वरदे कूल्बेबने विश्वास चे पर्दीय, अम्बने परमेश्वरदे सेम्पर्देब काम ख्यङ्।”
30थमयूदे ङूने यदे, “नदे हार्मन्देब च्यूनू ङीने च तम्मीय स्व, ङी हम्ब च्यूनू लेत्देबे नने विश्वास चे खूइय? नदे कर काम तम्मीय? 31#प्रस्थान 16:4,15; भजनसंग्रह 78:24ङीजे मेमेदे मी अन्टोङब चनमन नेने मन्न यब चसे चदे, होरप्रने लिख्दीये ख्यङ्, ‘ङूदे थमयूने चजे लागि स्वर्गदे क्यङ् पीन्दे’।”
32येशूदे थमयूने यदे, “ङ नमयूने तम्दम्ने यीय, नमयूने स्वर्गदे क्यङ् पीनब मोशा दी, तर स्वर्गदे नमयूने तम्दम्जे क्यङ् पीनब ङैजे प ख्यङ्। 33चेनेयलो परमेश्वरजे क्यङ् हम्ब ख्यङ्, यी हम्बब स्वर्गदे रीय, मेस्ये हम्बदे संसारजे मीयूने जीया पीन्क्य।”
34थमयूदे ङूने यदे, “प्रभु, अम्ब क्यङ् ङीने येतार्ने पीम्मी।”
35येशूदे थमयूने यदे, “जीया पीनब क्यङ् ङ ख्यङ्। ङै ट्याने सू रीय ङू ठीस्ये त्वो, मेस्ये ङै फ्याने विश्वास चेब कलङ्बेये क्यू फैस्ये त्वो। 36तर ङैदे नमयूने येक ख्यङ्, नमयूदे ङैने तङ्देबेये विश्वास अन्ची। 37पदे ङैने पीनब जती क्वाने ङै ट्याने रीय, मेस्ये ङै ट्याने रब जतीने ङैदे केरेनेयलीने अन्ल्वाबी। 38रङ्से इच्छा पूरा चेने ङ स्वर्गदे रदी, तर ङैने कूल्बेबजे इच्छा पूरा चेने र ख्यङ्। 39मेस्ये ङैने कूल्बेबजे इच्छा अम्ब ख्यङ्, ङूदे ङैने पीनबयू नङ्ने सूये मल्ब अम्प्रेस्स्य, तर थमयूने संसारजे आखिरीजे दिनने सोम्बो चीम्मीस्य। 40चेनेयलो ङैजे पजे इच्छा अम्ब ख्यङ्, “रङ्से चने लेब मेस्ये ङू फ्याने विश्वास चेब क्वादेने कलङ्बेये अन्सीबब जीया प्रेस्स्य, मेस्ये ङ आखिरीजे दिनने हम्बने सोम्बो चीक्क्य।”
41यहूदीयूदे ङूजे विरुद्धने गन्गन् चीत्दे, चेनेयलो ङूदे यदे, “स्वर्गदे तल्लब क्यङ् ङ ख्यङ्।” 42थमयूदे यदे, “अम्ब योसेफजे च, येशू तेया? अम्बजे प प्रे मने ङीनदे स्येतेया? होर्दे अम्बदे केरे ‘ङ स्वर्गदे तल्लब ख्यङ्’ यदेबे यीय?”
43“नमयू रङ्से रङ्सेने गन्गन् अन्चील्लाची यदेबे येशूदे थमयूने जवाफ पीन्दे। 44ङैने कूल्बेब पदे ङै ट्याने रब सेम् अम्पीन्लो सूये ङै ट्याने र अन्खू, मेस्ये ङ हम्बने आखिरीजे दिनने सोम्बो चीक्क्य। 45#यशैया 54:13‘धर्मशास्त्रने अगमवक्तायूदे येर्बे लिख्दीये ख्यङ्, ‘परमेश्वरदे मीयू क्वानेने लोम्मीय।’ येर्बे परमेश्वर पजे शिक्षा ङ्यीनब मेस्ये लोमब क्वाने ङैट्याने रीय। 46सूमीदेये पने अन्तङ ख्यङ्, परमेश्वर पदे कूल्बेबदे त्यामे ङूने तङ ख्यङ्। 47तम्दम्ने ङ नमयूने यीय, सूदे ङैने विश्वास चीक्क्य ङूप्रे कलङ्बेये अन्सीबब जीया ख्यङ्। 48ङ, जीया पीनब क्यङ् ख्यङ्। 49नमयूजे मेमेयूदे मी अन्टोङब चनमन नेने मन्न यब चसे चलीने थमयू सीइ। 50स्वर्गदे तल्लब क्यङ् अम्ब ख्यङ्, सूदे अम्ब चीय ङू सीबस्ये त्वो। 51स्वर्गदे रब जीया पीनब क्यङ् ङने ख्यङ्। अम्ब क्यङ् चब मीदे येतार्ने जीया प्रेन्नीय। ङैदे पीनब हम्ब क्यङ्ब ङैजे ङ्व ख्यङ्। संसारजे मीयूदे जीया प्रेस्स्य यदेबे ङ ङैजे ङ्व पीन्क्य।”
52होर्दे यहूदीयू रङ्से रङ्सेने स्वाल्-जवाफ चीत्दे, “अम्ब मीदे रङ्से ङ्व ङीनने केर्बे चसे पीन खूइय?”
53मेस्ये येशूदे थमयूने यदे, “तम्दम्ने ङ नमयूने यीय, नमयूदे मीजे चजे ङ्व अन्चलो, होर्दे ङूजे का अन्थूङ्लो नमयूदे जीया प्रेस्स्ये त्वो। 54ङैजे ङ्व चब मेस्ये ङैजे का थूङबप्रे कलङ्बेये अन्सीबब जीया ख्यङ्, मेस्ये आखिरीजे दिनने ङूने ङ सोम्बो चीक्क्य। 55चेनेयलो ङैजे ङ्व तम्दम्जे चसे ख्यङ्, मेस्ये ङैजे का तम्दम्जे थूङ से ख्यङ्। 56ङैजे ङ्व चब मेस्ये ङैजे का थूङब ङैप्रे क्यूक्क्य, होर्दे ङ ङूप्रे क्यूक्क्य।
57केर्बे सोम्बो पदे ङैने कूल्पीदे, मेस्ये ङ प प्रेने सोम्बो क्यूर ख्यङ्, होरप्रने ङैने चबये ङैजे कारणदे सोम्बो क्यूक्क्य। 58स्वर्गदे रब क्यङ् अम्ब ख्यङ्, अम्ब नमयूजे मेमेयूदे चब क्यङ्प्र दी। थमयूदे हम्ब चदे होर्दे सीइदे। तर ङैदे पीनब क्यङ् चब मी कलङ्बेये अन्सीब।” 59येशूदे अम्ब पो कफर्नहुमजे सभा-कीम्ने लोम्मीब य ख्य।
कूम स्यूस्स्यायूदे येशूने पोङ्येब
60अम्ब पोयू तदेबे येशूजे स्यूस्स्यायू नङ्ने कूमदे यदे, “अम्ब शिक्षा सोरो गरो ख्यङ्, अम्ब सूदे ङ्यीन खूइय?”
61तर ङूजे स्यूस्स्यायूदे अम्बजे बारेने गन्गन् चीन्न ख्यङ् यब थाप्रेत्देबे येशूदे थमयूने यदे, “अम्ब पोदे नमयूजे सेम् नैन औ? 62होरेयलो मीजे चने खूम् रङ्से ख्यब नेने तो ल्वाबीनब तङ्दे यलो च-चीक्क्य? 63जीया पीनब परमेश्वरजे आत्मा ख्यङ्। अम्ब काम मीजे बोङ्दे चेने अङ्ख्वब पो ख्यङ्। ङैदे नमयूने यब वचनयू आत्मा मेस्ये जीया ख्यङ्। 64तर नमयू नङ्ने कोइ मीदे ङूने विश्वासने अन्ची।” चेनेयलो विश्वास अन्चेयू सू-सू ख्यङ् मेस्ये ङूने धोका पीनब सू क्यूक्क्य यदेबे येशूदे खूम्ने था ख्य। 65होर्दे फेरि ङूदे यदे, “येरेक्यूत्देबे ङैदे नमयूने य ख्यङ् ‘कादेये पदे ङै ट्याने रब सेम् अम्पीन्दासेमे सूमीये ङै ट्याने र अन्खू।”
66हन्छ्वाब ङूजे स्यूस्स्यायू कूमदे ङूने पङ्गीदे। मेस्ये ङू प्रे अम्प्र क्यूरी।
67येशूदे बाह्र स्यूस्स्यायूने लोत्दे, “नमयूये ङैने पङ्देबे प्रमे औ?”
68 #
मत्ती 16:16; मर्कूस 8:29; लूका 9:20 सिमोन पत्रुसदे जवाफ पीन्दे, “प्रभु, ङी सू त्याने प्र? कलङ्बेये अन्सीबब जीयाजे वचन नैप्रे ख्यङ्, 69मेस्ये परमेश्वरदे कूल्बेब पवित्र मी नने ख्यङ् यदेबे ङीदे विश्वास चे ख्यङ् मेस्ये स्ये ख्यङ्।”
70येशूदे थमयूने जवाफ पीन्दे, “ङैदेने नमयू बाह्र जनाने सेल तेया? मेस्ये नमयू नङ्ने त्याब शैतान ख्यङ्।” 71अम्ब पो ङूदे सिमोन इस्करियोतजे च यहूदाजे बारेने य ख्य, चेनेयलो बाह्र स्यूस्स्यायू नङ्ने ङू त्या क्यूल्लीने ङूदे येशूने धोका पीन मै ख्य।
Currently Selected:
यूहन्ना 6: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
