यूहन्ना 4
4
सामरी मदीप्रे येशूजे पो
1यूहन्नादे यली येशूदे थेप् कूम स्यूस्स्यायू बन्दीन ख्यङ् मेस्ये बप्तिस्माये पीन्न ख्यङ् यब पो फरिसीयूदे तदे। 2तर येशू रङ्सेदेने दीलाबे ङूजे स्यूस्स्यायूदे बप्तिस्मा पीन ख्य। 3होर्दे येशूदे अम्ब पो था प्रेत्देबे ङू यहूदिया यब ने पोङ्देबे फेरि गालीलने ल्वाइदे।
4ङू सामरिया योङ्देबे प्र पर्दे ख्य। 5#उत्पत्ति 33:19; यहोशू 24:32मेस्ये ङू सामरियाजे सूखार यब नेने फ्योरदे। अम्ब ने याकूबदे रङ्से च योसेफने पीनब सजे ट्याने पर्दे ख्य। 6हैयाने याकूबदे बन्देब इनार ख्य। येशू प्रदेबे बेस्से थेल्लीकदेबे हम्ब इनारजे नने टून ख्य। हन्छ्वाब नो गूङ् क्यूट्ट ख्य।
7हन्छ्वाबने सामरीजे मदीत्या क्यू छ्य्वने हैयाने रदे। येशूदे ङूने यदे, “ङैने क्यू थूङ्से पीन् च।” 8हन्छ्वाब येशूजे स्यूस्स्यायू चसे कीनजे लागि सहरने गीले ख्य।
9 #
एज्रा 4:1-5; नहेम्याह 4:1,2 होर्दे सामरीजे मदीदे यदे, “न यहूदी क्यूत्देबेये ङ सामरी मदीजे लादे केरे क्यू थूङ्क्य?” (यहूदीयूदे सामरीयूप्रे चै सम्बन्धये अन्-ये।)
10येशूदे जवाफ पीन्दे, “परमेश्वरजे बर मेस्ये नैप्रे चूजो क्यू स्यब मी स्ये यलो नदे ङूप्रे क्यू स्य ख्यङ्दे होर्दे ङूदे नने जीयाजे क्यू पीन ख्यङ्दे।”
11हम्ब मदीदे ङूने यदे, “नैप्रे क्यू ह्वब तीया त्वो, क्यू कोम्पो सोरो मामो ख्यङ्। होर्दे हम्ब जीया पीनब क्यू नदे केर्दे रेक्क्य? 12ङीजे मेमे याकूब यली च न केन् औ? ङूदे ङीने अम्ब क्यू कोम्पो सोरो मामो बन्दीमीदे मेस्ये ङू रङ्सेने, ङूजे च-चीमीयूदे होर्दे ङूजे रोलायूदे अम्ब कोम्पोजे क्यू थूङ्दे।”
13येशूदे ङूने जवाफ पीन्दे, “अम्ब क्यू थूङब मीयू क्वाने फेरि क्यू फैय, 14तर ङैदे पीनब क्यू सू-सूदे थूङ्क्य हम्ब मीने फेरि कलङ्बेये क्यू फैस्ये त्वो, चेनेयलो ङैदे कम्ब क्यू ङूने थूङ्से पीन्क्य हम्ब क्यू कलङ्बेये अन्सीबब जीयाजे लागि प्ल्यानब क्यू-मुरूम् क्यूक्क्य।”
15हम्ब मदीदे ङूने यदे, “अँ होरेयलो, ङैने हम्ब क्यू पीम्मी स्व, मेस्ये ङ क्यू कलङ्बेये फैस्ये त्वो, होर्दे क्यू छ्य्वने रेन अम्पर्दी।”
16येशूदे हम्ब मदीने यदे, “प्र नैजे प्ल्यङ् कोदेबे अने सीक।”
17हम्ब मदीदे यदे, “ङैजे प्ल्यङ्ने त्वो।”
येशूदे ङूने यदे, “नैजे प्ल्यङ्ने त्वो यदेबे नदे ज्यने यदे, 18चेनेयलो नैजे प्ल्यङ् मी ङ क्यूरीक ख्यङ्, मेस्ये चूजो नेप्रे ख्यबये नैजे प्ल्यङ् दी। नदे यब पो तम्दम्ने ख्यङ्।”
19हम्ब मदीदे येशूने यदे, “प्रभु न अगमवक्ता टूङ् यदेबे ङैदे था प्रेत्दे। 20ङीजे मेमेयूदे अम्ब गङ् फ्याने परमेश्वरने पूस्तीदे, होर्दे नम यहूदीयूदे परमेश्वरने पूस्तेब ने यरूशलेम ख्यङ् यदेबे य ख्यङ्।”
21येशूदे ङूने यदे, “या मो, ङैने विश्वास ची, हम्ब सेमे रेन ख्यङ्, हन्छ्वाब नमयूदे प परमेश्वरने अम्ब गङ्नेये मेस्ये यरूशलेमनेये जै-जै चीस्स्ये त्वो। 22नम सामरीयू च पूस्तीन ख्यङ् हम्ब थाने त्वो। ङी च पूस्तीन ख्यङ् हम्ब ङीने था ख्यङ्, चेनेयलो मुक्तिब यहूदीयू-ट्यादे रीय। 23तर सेमे रेन ख्यङ्, मेस्ये चूजो हम्ब सेमे ख्यङ्, जेम्से ज्य सेम्दे पूस्तेब मीयूदे पने आत्मा मेस्ये सत्य रूप्दे पूस्तीय चेनेयलो येरे पूस्तेब मीयूने प परमेश्वरदे मेल्क्य। 24परमेश्वर आत्मा ख्यङ्, मेस्ये ङूने पूस्तेबयूदे आत्मा प्रे सत्यने पूस्ते पर्दीय।”
25हम्ब मदीदे ङूने यदे, “ङैने था ख्यङ्, मसीह रीय (ङूने ख्रीष्ट यीय), मेस्ये कन्छ्वाब ङू रीय, हन्छ्वाब ङूदे ङीने पोयू साप्ताने स्योक्क्य।”
26येशूदे ङूने यदे, “नैप्रे क्यम्नब ङ ङूने ख्यङ्।”
27हन्छ्वाबने येशूजे स्यूस्स्यायूये रदे, मेस्ये ङू मदीत्याप्रे बात् सेन्नब तङ्देबे हार्मन्दीकदे, तर “न च चेमे?” या “न हम्ब मदीप्रे चेने बात् सेन्न?” यदेबे सूदेये अन्ल्वे।
28हन्छ्वाब हम्ब मदीदे रङ्सेजे क्यू गाग्री पोङ्गीदेबे सहरतेले गीलीदे, मेस्ये मीयूने यदे, 29“ख, ले, मीत्याने, ङैदे चीक्कब साप्ता काम ङूदे ङैने स्योक्को। कादेये ङू ख्रीष्ट यी च?” 30होर्दे थमयू सहरदे योङ्रदेबे येशू ट्याने गीलीदे।
31हन्छ्वाबने स्यूस्स्यायूदे ङूने, “गुरुज्यू चसे च।” यदेबे बिन्ती चीत्दे।
32तर ङूदे थमयूने यदे, “ङैप्रे चसे ख्यङ्, अम्ब पो नमयूने था त्वो।”
33येरेक्यूत्देबे स्यूस्स्यायू त्यादे-त्याने यदे, “कोइदे ङूने चसे रेम्मीक यी च?”
34येशूदे थमयूने यदे, “ङैने कूल्बेबजे इच्छा अनुसार मेस्ये ङूजे काम पूरा चेबने ङैजे चसे ख्यङ्। 35च नमयूदे अन्-य, ‘अझ ल स्यीला बाँकी ख्यङ्, होर्दे बली तोल सेमे रीय?’ ङ नमयूने यीय, रङ्से म्या पूक्देबे रङ्तेले ले, बली तोलजे लागि से ता ख्यङ्। 36सूदे बली थोय ङूदे मीला प्रेक्क्य, होर्दे कलङ्बेये अन्सीबब जीयाजे लागि बली तोल्क्य मेस्ये लू थरब होर्दे बली थ्वब ङ्हीने प्रे-प्रे सूग्क्य। 37चेनेयलो त्यादे लू थर्क्य, सूजोदे बली तोल्क्य, यब वचन अम्बने सत्य क्यूक्क्य। 38हैयाने ङैदे नमयूने बली तोलने कूल्बीदे, होने नमयूदे कामने अम्फर ख्यङ्। सूजोयूदे काम फर ख्यङ् मेस्ये थमयूदे छेम्प्रे चीतेब कामजे फल नमयूदे प्रे ख्यङ्।”
39“ङैदे चेब साप्ता काम ङूदे ङैने स्योत्दे” हम्ब मदीजे गवाहीदे सामरी सहरजे कूम मीयूदे येशू फ्याने विश्वास चीत्दे। 40येरेक्यूत्देबे कन्छ्वाब सामरीयजे मीयू ङू ट्याने रदे, हन्छ्वाब थमयूदे ङूने थमयूप्रे टूङने बिन्ती चीत्दे, मेस्ये ङू ङ्हीयासेमे हैयाने टूङ्दे। 41होर्दे ङूजे शिक्षादे कूम मीयूदे ङू फ्याने विश्वास चीत्दे।
42थमयूदे हम्ब मदीने यदे, “अम्ब नदे यब पोदे चीत्देबे ङीदे विश्वास चे दी, तर ङी रङ्सेदेने तब कारणदे तम्दम्ने ङू संसारजे मीयूने मुक्ति पीनब मी यदेबे ङीदे स्येदे।”
पात्ता केन् हुकुम चेब मीजे च तम् चीक्कब
43ङ्हीया ङ्येदे हैयादे योङ्देबे ङू गालील यब नेने गीलीदे। 44#मत्ती 13:57; मर्कूस 6:4; लूका 4:24येशू रङ्सेदेने गवाही पीन्दे, रङ्सेजे देशने अगमवक्ताने सूमीदेये गेसेन् अन्ची। 45#यूहन्ना 2:23कन्छ्वाब गालील यब नेने ङू फ्योरदे, हन्छ्वाब ङूदे दीन्बरजे बीलने यरूशलेमने चच चे ख्य हम्ब साप्ता काम तङ्देबे गालीलीजे मीयूदे ङूने स्वागत चीत्दे, चेनेयलो थमयूये दीन्बरने गीले ख्य।
46 #
यूहन्ना 2:1-11
होर्दे ङ्येदे फेरि गालीलजे काना सहरने ङू फ्योरदे, हैयाने ङूदे क्यूदे ची बन्दे ख्य। कफर्नहुमने सरकारजे मी केन् त्या ख्य, ङूजे च न ख्य। 47येशू यहूदियादे गालीलने रेक ख्यङ् यब तदेबे ङू येशू ट्याने गीलीदे, होर्दे ङूजे च ट्याने रदेबे तम् चीम्मीस्य यदेबे येशूने बिन्ती चीत्दे, चेनेयलो ङूजे च सीब मेल्न ख्य।
48येशूदे ङूने यदे, “नमयूदे च्यूनू मेस्ये हार्मन्देब कामयू अन्तङ्दासेमे कलङ्बेये विश्वास चीस्सेत्वो।”
49हम्ब सरकारजे हुकुम चेब मी केन्दे ङूने यदे, “प्रभु, ङैजे च सीब यली खूम् ख।”
50येशूदे ङूने यदे, “प्र, नैजे च बच्दीय।” हम्ब मीदे येशूजे वचनने विश्वास चीत्दे, मेस्ये ल्वाइदे।
51होर्दे लम्ने प्रेनूब ङूजे त्वोयूदे ङूने तूदेबे ङूजे च बच्दीदे यदेबे ङूने स्योत्दे। 52कन्छ्वामेस्ये ङू तम् क्यूट्टदे यदेबे ङूदे थमयूने लोप्प, थमयूदे यदे, “मूरू नोजे त्या तप्रब मेस्ये खङ्सीङ् अन्र क्यूरी।” 53येशूदे ङूने, “नैजे च बच्दीय” यदेबे यब बीलमेस्येने टूङ् यदेबे पदे था प्रेत्दे। होर्दे ङू रङ्से मेस्ये ङूजे कीम् म्हीतीदेने विश्वास चीत्दे।
54यहूदियादे गालीलने रदेबे येशूदे चेब ङ्हीफे पोलोजे च्यूनू अम्ब ख्य।
Currently Selected:
यूहन्ना 4: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
