यूहन्ना 3
3
निकोदेमसने येशूदे लोम्मेब पो
1फरिसीयू नङ्ने निकोदेमस मीन् चेब मीत्या ख्य। ङू यहूदीयूजे पात्ता केन् सभाजे मूख्या ख्य। 2ङू मून्दे येशू ट्याने रदे मेस्ये यदे, “गुरु, ङीने था ख्यङ् न परमेश्वरदे ङीने लोम्मेने कूल्बेब गुरु ख्यङ्, चेनेयलो परमेश्वरदेने अन्तोङ्मीलो नदे चेब अम्ब च्यूनूयूप्र सूदेये चे अन्खू।”
3येशूदे ङूने जवाफ पीन्दे, “तम्दम्ने ङ नने यीय, फेरि सर् क्यूत्देबे अन्जन्मीदीदे यलो सूदेये परमेश्वरजे राज्य तङ प्रेस्स्ये त्वो।”
4निकोदेमसदे ङूने यदे, “कम्ब क्यूरेब मी फेरि केरे जन्मेदे खूइया? ङू मजे ख्वाजेने प्रेत्देबे ङ्ही खेप् जन्मेदे खूइया?”
5येशूदे जवाफ पीन्दे, “तम्दम्ने ङ नने यीय, क्यू मेस्ये आत्मादे अन्जन्मीदीतासेमे सूत्याये परमेश्वरजे राज्यने क्योब प्रेस्से त्वो। 6ङ्वदे जन्मेदेब ङ्व क्यूक्क्य, मेस्ये पवित्र आत्मादे जन्मेदेब आत्मा क्यूक्क्य। 7नमयू सर् क्यूत्देबे जन्मीदे पर्दीय यब पो तदेबे हार्अम्मन्दीलाची। 8उन्दू केर्दे प्रतीङ्रीको होर्देने प्रीय। नदे उन्दू रब आवाजब तैय, तर हम्ब केर्दे रीय मेस्ये कने प्रीय, हम्ब ब स्येसे त्वो। आत्मादे जन्मेदेब मी क्वाने येरप्रने क्यूक्क्य।”
9निकोदेमसदे ङूने लोत्दे, ‘अम्ब केर्बे क्यूर खूइय?”
10येशूदे ङूने जवाफ पीन्दे, “न इस्राएलजे गुरु क्यूत्देबेये अम्ब पो क्व अन्ख्व? 11तम्दम्ने, ङ नने यीय, ङीदे च स्ये ख्यङ् हम्ब यीय, मेस्ये ङीदे च तङ ख्यङ् हम्बजे गवाही पीन्क्य, तर नमयू ङीजे गवाही अम्पत्ती। 12ङैदे अम्ब संसारने ख्यब पोजे बारेने यब नमयूदे अम्पत्ती यलो, झन् स्वर्गजे बारेने यदे यलो केर्बे पत्तीय? 13स्वर्गदे रब मीजे च-त्यामे सूजो सूये स्वर्ग अङ्गीली। 14#गन्ती 21:9इस्राएलजे मीयू मी अन्टोङब चनमन नेने ख्यङ्ब, मोशादे पितलजे र्वे बन्दीदेबे स्यङ्ने लङ्देबे येप्र मीजे चये लङपर्दीय। 15येर्बे ङू फ्याने विश्वास चेब क्वादेने कलङ्बेये अन्सीबब जीया प्रेक्क्य।
16“चेनेयलो परमेश्वरदे संसारने येर प्रेम चीत्दे, यी ङूदे रङ्सेजे तीत्यात्या ख्यब चये पीन्दे, ङू फ्याने विश्वास चेब सूये नाश अन्क्यूप्पस्य, तर हम्बदे कलङ्बेये अन्सीबब जीया प्रेस्स्य। 17परमेश्वरदे रङ्से तीत्या चने संसारजे मीयूने दोष लैदेने दी, तर थमयूने बच्दीमेने कूल्बे ख्यङ्। 18ङू फ्याने सूदे विश्वास चीक्क्य, हम्बने दोष अन्लैदी, तर विश्वास अन्चेबयू खूम्ने दोष लैदीक ख्यङ्, चेनेयलो ङूदे परमेश्वरजे तीत्यात्या चजे मीन्ने विश्वास अन्ची। 19दोष येर लादीय: ओथ्याङ् संसारने फ्योर जङ्क ख्यङ् होर्दे मीयूजे काम अन्ज्य क्यूरबदे थमयूदे ओथ्याङ् यली बूरू मून्दूङ् छेय। 20चेनेयलो अन्ज्य काम चेबयू क्वादेने ओथ्याङ्ने अन्ज्य चीक्क्य। ओथ्याङ्ने थमयूदे चेब कामयू तङ्क्य यदेबे फ ख्यङ् मेस्ये थमयू ओथ्याङ्ने अन्र। 21तर सत्य पो मन्दे मीब ओथ्याङ्ने रीय मेस्ये येर्बे ङूजे काम परमेश्वरने चेब ख्यङ् यब पो छाङ्लाङ्गे तङ्क्य।
बप्तिस्मा पीनब यूहन्नाजे ङ्येजे गवाही
22होर्देङ्येदे येशू मेस्ये ङूजे स्यूस्स्यायू यहूदिया देशने गीलीदे, मेस्य हैयाने थमयूप्रे तेदिन टूङ्दे, मेस्ये बप्तिस्मा पीन्दे। 23यूहन्नादेये सालीमजे न एनोनने बप्तिस्मा पीन ख्य, चेनेयलो होने क्यू मोक्तो ख्य। हैयाने मीयू रदेबे बप्तिस्मा कीन ख्य। 24#मत्ती 14:3; मर्कूस 6:17; लूका 3:19,20हम्ब बीलसेमे यूहन्ना झ्यालखानने अम्पर्दीक ख्य।
25हम्ब बीलने यूहन्नाजे स्यूस्स्यायूजे यहूदी मीत्याप्रे शुद्ध क्यूरब छ्यप्जे बारेने स्वाल्-जवाफ चीत्दे। 26यूहन्नाजे स्यूस्स्यायू ङू ट्याने रदेबे लोत्दे, “गुरुज्यू, यर्दन होङ्जे तीप्ल्या नैप्रे सू ख्य, हम्ब मीजे बारेने नदे गवाही पीन्दे, ले, हम्ब मीदे बप्तिस्मा पीन्न ख्यङ्, मेस्ये मी क्वाने ङू ट्याने प्रेन ख्यङ्।”
27यूहन्नादे जवाफ पीन्दे, “परमेश्वरदे अम्पीन्दासेमे मीदे चैसेये प्रे अन्खू। 28#यूहन्ना 1:20‘ङ ख्रीष्ट दी, तर ङू यली ङ खूम् कूल्बेब ख्यङ्’ यदेबे ङैदे यब गवाही नमयू रङ्सेदेने तख्यङ्। 29पीर्म सूप्रे ख्यङ्, दूल हम्बने क्यूक्क्य। सू दूलाप्रे मेरक्य हम्ब दूलजे ख्योन् क्यूक्क्य, दूलजे के तदेबे ङू सूग्क्य। येरेक्यूत्देबे ङैजे अम्ब आनन्द पूरा क्यूरे ख्यङ्। 30ङू तो-तो क्यूप्प पर्दे ख्यङ्, तर ङ मो-मो क्यूप्प पर्दे ख्यङ्।
31“तो-फ्यादे रब पात्ता नङ्ने केन् क्यूक्क्य। पृथ्वीने प्रेब मीयू पृथ्वीजेने क्यूक्क्य, मेस्ये पृथ्वीजे पो क्यम्क्य, स्वर्गदे रब ब पात्ता नङ्ने केन् क्यूक्क्य। 32ङूदे रङ्सेदे तङब मेस्ये तब गवाही यीय, होरेयलीने ङूदे यब गवाही सूदेये अम्पत्ती। 33ङूजे गवाही पत्तेब मीदे परमेश्वर सत्य ख्यङ् यब पोजे गवाही पीन्क्य। 34परमेश्वरदे कूल्बेब मीदे परमेश्वरजे पोने क्यम्क्य चेनेयलो परमेश्वरदे रङ्सेजे आत्मा पुरा रूप्दे पीन्क्य। 35#मत्ती 11:27; लूका 10:22पदे रङ्से चने माया चे ख्यङ्, होर्दे साप्ता थोकने ङूजे लाने पीङ्क ख्यङ्। 36परमेश्वरजे च फ्याने विश्वास चेब मीप्रे कलङ्बेये अन्सीबब जीया ख्यङ्, तर चजे आज्ञा अम्मन्देब मीदे कलङ्बेये अन्सीबब जीया प्रेस्स्ये त्वो। तर परमेश्वरजे छी ङूफ्याने पर्दीनीय।
Currently Selected:
यूहन्ना 3: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
