यूहन्ना 20
20
थैन्देन् खङ्स
मत्ती २८:१-८; मर्कूस १६:१-८; लूका २४:१-१२
1सतजे पात्ता खूम्ब दिनजे नप्मून्दे मरियम मग्दलिनी खङ्सने रदे, मेस्ये ङूदे खङ्सजे लने पूतेब लूङ् केन् यम्ब खैदे चीतेब तङ्दे। 2अम्ब तङ्देबे ङू सिमोन पत्रुस मेस्ये येशूदे माया चेब सूजो स्यूस्स्या ट्याने ग्येइदे, मेस्ये थमयूने यदे, “प्रभुने खङ्सदे फीने थमयूदे योङ्को, मेस्ये ङू केने हीत्दे, हम्ब ङीदे था अम्प्रे।”
3होर्दे पत्रुस मेस्ये सूजोब स्यूस्स्या खात्याने खङ्सतेले गीलीदे। 4थम ङ्ही प्रे-प्रे ग्येइदे, तर हम्ब सूजोब स्यूस्स्या पत्रुसयली खूम् ग्येइदेबे खङ्सने फ्योइदे। 5खङ्स नङ्ने कूत्तू क्यूत्देबे लेप्प ङूदे मूरू तोलेब सूतीजे कोलायू त्यामे होने तङ्दे, तर ङू नङ्ने अन्क्योइ।
6सिमोन पत्रुस ङू ङ्ये-ङ्ये रदे मेस्ये खङ्स नङ्ने क्योइदे, होर्दे ङूदेये येशूने तोलेब मल्मल्जे कोलायूत्यामे हैयाने तङ्दे। 7ङूजे टने तोलेब कोला हम्ब मल्मल्जे कोलायूप्रे नेत्याने त्व ख्य, तर सूजो नेत्याने तप्-तप् चीत्देबे हीते ख्य। 8होर्दे खङ्सने खूम् फ्योरब सूजो त्याब स्यूस्स्याये नङ्ने क्योइदे, मेस्ये हम्ब तङ्देबे ङूदे विश्वास चीत्दे। 9चेनेयलो थमयूदे येशू सीबदेये फेरि सोम्बो क्यूत्देबे लङ पर्दे ख्यङ्, यब धर्मशास्त्रजे वचन हन्छ्वा सेमेने अन्क्व ख्य।
येशू मरियाम मग्दलिनी ट्याने तङ्रब
मत्ती २८:९-१०; मर्कूस १६:९-११
10होर्दे ङ्येदे हम्ब स्यूस्स्यायू रङ्से कीम्ने ल्वाइदे। 11तर मरियम खङ्सजे फीने ङूये ङूये मेर्न ख्य। ङूदे ङूये ङूये खङ्सतेले कूत्तू क्यूत्देबे लेत्दे, 12मेस्ये येशूजे सीयेब ङ्व कने ये ख्य, हैयाने कर कोला होतेब स्वर्ग दूत ङ्ही, त्या ट तेले मेस्ये त्याब मो तोप् तेले टूनब ङूदे तङ्दे।
13स्वर्गदूतयूदे ङूने यदे, “ओ मो, चेने ङून?”
ङूदे थमयूने यदे, “थमयूदे ङैजे प्रभुने कूत्यो, मेस्ये ङू केने येत्दे यब ङैने था त्वो।” 14अम्ब पो यदेबे ङू ङ्यलम्तेले ल्वादे, होर्दे ङूदे येशूने मेर्नब तङ्दे, तर येशूने टूङ् यदेबे अन्स्ये।
15येशूदे ङूने यदे, “मो न चेने ङून?” सूने मेल?”
ङूदे ङूने बगैँचाने काम फरब माली मन्देबे यदे, “नदे ङूने यैयादे कूते ख्यङ् यलो, केने हीदे ख्यङ् ङैने येमी, मेस्ये ङ ङूने कूबीय।”
16येशूदे ङूने यदे, “मरियम!”
ङूदे येशूतेले ल्वादेबे हिब्रू केने यदे, “रब्बोनी!” यदे, अम्बजे अर्थ “गुरुज्यू” ख्यङ्।
17येशूदे ङूने यदे, “ङैने अन्छूल्लाची, चेनेयलो ङ चूजोसेमे प ट्याने अङ्गीले ख्यङ्। तर ङैजे च्योन्यू ट्याने प्रदेबे थमयूने स्योम्मी, ‘ङैजे प मेस्ये नमयूजे प, होर्दे ङैजे परमेश्वर मेस्ये नमयूजे परमेश्वर ट्याने ङ प्रेन ख्यङ्’।”
18मरियम मग्दलिनी गीलीदे, मेस्ये स्यूस्स्यायूने स्योत्दे, “ङैदे प्रभुने तङ्दे।” होर्दे येशूदे यब पो ङूदे थमयूने येमीदे।
येशू स्यूस्स्यायू ट्याने तङ्रदे।
मत्ती २८:१६-२०; मर्कूस १६:१४-१८; लूका २४:३६-४९
19हम्ब दिन, या सतजे पात्ता खूम्ब दिनजे नूस्यूङ्, कन्छ्वाब स्यूस्स्यायू यहूदीयूने फदेबे ख्योयू थादेबे नङ्ने टून ख्य, हन्छ्वाब येशू रदेबे थमयूजे अन्द्रने मेर्देबे थमयूने यदे, “नमयूने शान्ति क्यूस्स्य!” 20अन्छ्वा यदेबे येशूदे थमयूने रङ्सेजे ला प्रे खैजेये तम्मीदे। प्रभुने तङ्देबे स्यूस्स्यायू बेस्से सूग्दे।
21होर्दे फेरि येशूदे थमयूने यदे, “नमयूने शान्ति क्यूस्स्य! पदे ङैने केर्बे कूल्बीदे, होरप्रने ङैदेये नमयूने कूल्बीय।” 22होर्दे अन्छ्वा य चेनमेस्ये येशूदे थमयू फ्याने स भूत्देबे यदे, “पवित्र आत्मा कीन्। 23#मत्ती 16:19; 18:18सूजे पाप नमयूदे क्षमा चीक्क्य, थमयूने क्षमा क्यूक्क्य, मेस्ये सूजे पापने नमयूदे क्षमा अम्पीन् थमयूदे क्षमा प्रेस्स्ये त्वो।
येशू थोमा ट्याने तङ्रब
24येशू रबबेलने बाह्र जना स्यूस्स्यायू नङ्ने जूम्ल्या यब थोमा थमयूप्रे त्व ख्य। 25येरे क्यूप्प सूजो स्यूस्स्यायूदे थोमाने यदे, “ङीदे प्रभुने तङ्दे।”
तर ङूदे थमयूने यदे, कन्छ्वासेमे ङैदे येशूजे लाने खील्यूजे घ अन्तङ्दा मेस्ये खील्यूजे घने ङैजे ला ट अन्चङ्दा, मेस्ये ङूजे खैजेने भालादे चीक्कब घने ङैजे ला ये अम्प्रेत्दासेमे, ङ विश्वास अन्ची।”
26सात्या ङ्येदे ङूजे स्यूस्स्यायू फेरि कीम् नङ्ने ख्य। थोमाये थमयूप्रे ख्य। ख्योयू थाये ख्य, तर येशू नङ्ने क्योरदे, मेस्ये अन्द्रदे मेर्देबे यदे, “नमयूने शान्ति क्यूस्स्य!” 27होर्दे येशूदे थोमाने यदे, “नैजे ला ट अने पूइ, मेस्ये ङैजे लायू ले। नैजे ला ङैजे खैजेने पूक्ख। शङ्का अन्चील्लाची, तर विश्वास ची।”
28थोमादे येशूने यदे, “ङैजे प्रभु, मेस्ये ङैजे परमेश्वर।”
29येशूदे ङूने यदे, “नदे ङैने तङ्देबे विश्वास चे औ? सूदे अन्तङ्लीने ङैने विश्वास चे ख्यङ्, थमयूदे कूम असी प्रेक्क्य।”
अम्ब किताबदे य मेब पो
30येशूदे सूजो कूम हार्मन्देब च्यूनूयू रङ्से स्यूस्स्यायूदे तङ्लाबे चीत्दे, हम्ब अम्ब किताबने अन्लीख्दीये ख्यङ्। 31तर येर लिख्दीये ख्यङ्, यी नमयूदे येशू परमेश्वरजे च मुक्ति पीनब ख्रीष्ट ख्यङ् यदेबे विश्वास ची, मेस्ये विश्वास चेबदे ङूजे मीन्ने नमयूदे जीया प्रेस्स्य।
Currently Selected:
यूहन्ना 20: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
