यूहन्ना 19
19
क्रूसने खील् ठोक्दीदे पीलब दण्डजे आज्ञा येशूने
मत्ती २७:१५-३१; मर्कूस १५:६-२०; लूका २३:१३-२५
1होर्दे पिलातसदे येशूने कोर्रादे खान्दीस्ये पीन्दे। 2मेस्ये सिपाईयूदे च्वोजे मुकुट तादेबे ङूजे टने कूमीदे, होर्दे बैजनी रङ्जे कोला ङूने होम्मीदे, 3ङूजे ट्याने रदेबे यदे, “यहूदीयूजे मूरुम्जे जै-जै क्यूस्स्य।” होर्दे थमयूदे ङूने ला तैपदे ठरीदे।
4फेरि पिलातसदे फीने योङ्रदेबे थमयूने यदे, “लौ, ङैदे अम्ब मी नमयू ट्याने फीने रे ख्यङ्, मेस्ये नमयूने था क्यूस्स्य यदेबे यीय, ङूने चै दोषये अम्प्रे।” 5होर्दे च्वोजे मुकुट तादेबे क्वब मेस्ये बैजनी रङ्जे कोला होतेब येशू फीने रदे, मेस्ये पिलातसदे थमयूने यदे, “ले, अम्ब मी!”
6कन्छ्वाब पूस्र्या केन्यू मेस्ये सीन्त्रीयूदे ङूने तङ्दे, हन्छ्वाब थमयूदे येरे यदेबे बोङ्बे पारा पूत्दे, “क्रूसने खील् ठोक्दीदे हम्बने पील्पी, क्रूसने खील् ठोक्दीदे हम्बने पील्पी!”
पिलातसदे थमयूने यदे, “अम्बने कूबदेबे नमयूदेने क्रूसने खील् ठोक्दीदेबे पील्, चेनेयलो ङूने चै दोषये अन्तू।
7यहूदीयूदे ङूने जवाफ पीन्दे, “ङीजे धर्मजे नियमत्या ख्यङ्, मेस्ये हम्ब नियम अनुसार अम्ब मी सेने पर्दीय, चेनेयलो ङूदे रङ्सेने ङ परमेश्वरजे च ख्यङ् यदेबे य ख्यङ्।”
8अम्ब पो तदेबे पिलातस सोरो फैगदे। 9पिलातस फेरि दरबार नङ्ने क्योइदे होर्दे येशूने लोत्दे, “न केनेजे?” तर येशूदे ङूने चै जवाफये अम्पीन्। 10होरेक्यूत्देबे पिलातसदे ङूने यदे, “च न ङैप्रे अन्क्यम? नने क्याबेब हक ङैप्रे ख्यङ्, मेस्ये खील् ठोक्दीदे क्रूसने पीलब हकये ङैने ख्यङ् यदेबे नने था त्वा?”
11येशूदे जवाफ पीन्दे, “नने परमेश्वरदे अम्पीन्लो ङै फ्याने नैजे चै हकये अन्लादे ख्यङ्दे। येरेक्यूत्देबे ङैने नैजे लाने सूम्दीबेब मीदे अझ थेप् पापजे दोष प्रेक्क्य।”
12अम्ब तदेबे पिलातसदे येशूने क्याबेने बोङ् चीत्दे, तर यहूदीयू येरे यदेबे पारा पूत्दे, “कादेये नदे अम्ब मीने क्यापीदे यलो न कैसरजे ख्योन् अन्क्यूर्। सूदे रङ्सेने मूरुम् यीय हम्ब मीदे कैसरजे विरुद्ध चेब क्यूक्क्य।”
13अम्ब पोयू तदेबे पिलातसदे येशूने दरबारदे फीने लूङ्-तीक्केब य्वेने रेत्दे, हम्बने हिब्रू केने गब्बथा यीय। हैयाने पिलातस न्याय चेने टूङ्दे। 14हन्छ्वाब निस्तार दीन्बरजे लागि तयार चेब दिन ख्य। नो-गूङ्लाप्र क्यूट्ट ख्य पिलातसदे यहूदीयूने यदे, “ले ले, नमयूजे मूरुम्!”
15तर थमयू येरे यदेबे बोङ्बे पारा पूत्दे, “ङूने से-पर्दीय, सेपर्दीय, क्रूसने खील् ठोक्दीदे पील्पी।”
पिलातसदे थमयूने लोत्दे, “तम्दम्ने नमयूजे मूरुम् क्रूसने पील्पी य औ?”
पूस्र्या केन्यूदे जवाफ पीन्दे, “रोमजे मूरुम्त्यामे ङीजे मूरुम् ख्यङ् सूजो सूये त्वो।”
16होर्दे ङूदे येशूने क्रूसने खील् ठोक्दीदे पीलने थमयूजे लाने सूम्दीपीदे। होरेक्यूत्देबे सिपाईयूदे येशूजे जिम्मा कीन्दे।
येशू क्रूसने
मत्ती २७:३२-४४; मर्कूस १५:२१-३२; लूका २३:२६-४३
17येशू रङ्सेजे क्रूस प्लेत्देबे ट खोका यब नेने फ्योइदे, हिब्रू केदे अम्बने गलगथा यीय। 18हैयाने थमयूदे येशू क्रूसने खील् ठोक्दीदेबे पील्दे मेस्ये ङूप्रे सूजो मी ङ्हीनेये पील्दे, मीत्याब नेत्यादे योर मेस्ये सूजोब पार्त्यादेयोर् पील्पीदे, होर्दे येशू थमयूजे अन्द्रदे पील्पीदे।
19पिलातसदे दोषजे पो लिख्दीदेबे क्रूसने ख्यसे पीन्दे। हम्बने येर लिख्दीये ख्य, “नासरतजे येशू, यहूदीयूजे मूरुम्।” 20मेस्ये कूम यहूदीयूदे अम्ब लिख्दीयेब पो छ्योत्दे, चेनेयलो येशू क्रूसने खील् ठोक्दीदे पील्बेब ने सहरजे ट्याने ख्य। अम्ब पो हिब्रू, ल्याटीन् मेस्ये ग्रीक केने लिख्दीये ख्य। 21यहूदीयूजे पूस्र्या केन्यूदे पिलातसने यदे, “ ‘यहूदीयूजे मूरुम्’ यदेबे अन्लीख्दीलाची, तर ‘ङूदे ङ यहूदीयूजे मूरुम् य ख्यङ्’ यदेबे लिख्दी।”
22पिलातसदे जवाफ पीन्दे, “ङैदे च लिख्दीकदे, लिख्दीकदे।”
23कन्छ्वाब येशूने सिपाईयूदे क्रूसने खील् ठोक्दीदे पील्दे, होर्दे थमयूदे ङूदे होतेब कोला टेल्देबे सिपाईयू क्वानेने त्या त्या थोप्लाबे भा स्यी कोत्दे। ङूजे ह्वेब फीजे कोला टेल्दे, तर हम्ब कोला अन्रोप्येब मेस्ये पूरा सालाकै टदेमो तोप्सेमे तायेब कोला ख्य।
24 #
भजनसंग्रह 22:18
होरेक्यूत्देबे थमयू त्यादे त्याने यदे, “अम्ब कोला अम्-प्र्याङ्ला चीदे, तर अम्ब सूजे क्यूक्क्य यदेबे चीट्ठा थाये।” धर्मशास्त्रने लिख्दीयेब पो पूरा क्यूरने अम्ब क्यूर ख्य:
थमयूदे ङैजे कोला रङ्से रङ्सेने कोत्दे, मेस्ये ह्वेब फीजे कोलाजे लागि चीट्ठा थादे।”
25येर्बे सिपाईयूदे अम्ब काम चीत्दे।
होर्दे येशू पीलेब क्रूसजे ट्याने ङूजे म, ङूजे मजे च्योन्, क्लोपासजे मज मरियम मेस्ये मरियम मग्दलिनी मेर्न ख्य। 26कन्छ्वाब येशूदे हैयाने रङ्से म मेस्ये ङूदे कूम छेब स्यूस्स्या ट्याने मेर्नब तङ्दे, हन्छ्वाब ङूदे रङ्से मने यदे, “ओ माइ! ले, नैजे च।” 27होर्दे येशूदे हम्ब स्यूस्स्याने यदे, “ले, नैजे म।” हम्ब दिनमेस्ये येशूजे म हम्ब स्यूस्स्यादे रङ्से कीम्ने स्योल्गीदे।
येशूदे दीयो प्वेब
मत्ती २७:४५-५६; मर्कूस १५:३३-४१; लूका २३:४४-४९
28 #
भजनसंग्रह 69:21; 22:15 होर्देङ्येदे येशूदे साप्ता पो जेम्से जेङ्कब था प्रेत्देबे धर्मशास्त्रने लिख्दीयेब पो पूरा क्यूस्से पीनने यदे “ङ क्यू फै क्यूरी।” 29हैयाने क्यूङ् अङ्गुरजे चीदे सेम् चीतेब तीया त्या हीते ख्य। हिसपजे हाँगाने कोला टलो तोल्देबे हम्ब अङ्गुरजे क्यूङ् चीने य्वादेबे येशूजे ङूर्ने थमयूदे तूम्मीदे। 30कन्छ्वाब येशूदे हम्ब अङ्गुरजे क्यूङ् ची म्यङ्दे हन्छ्वाब ङूदे यदे, “जेम्से जेङ्कदे”, मेस्ये ट कूत्तू चीत्देबे दीयो पूत्दे।
31हम्ब दिन तयारजे दिन ख्य, मेस्ये नैदेरेदेब यहूदीयूजे आराम टूङब दिन ख्य। आराम टूङब दिनने सीयेब ङ्व क्रूसने अन्क्यूस्स्य यदेबे छ्योटो सीबस्य यदेबे अन्सीइलो थमयूजे तोप् क्योत्देबे क्रूसदे मो तलने यहूदीयूदे पिलातसने बिन्ती चीत्दे।” 32होर्दे सिपाईयू रदेबे येशूप्रे क्रूसने पीलेब मी ङ्हीजे तोप् क्योत्दे, खूम् त्याजे होर्दे सूजोबजे। 33कन्छ्वाब थमयू येशू ट्याने रदे हन्छ्वाब थमयूदे येशू तरखूम्ने सीये तङ्दे, मेस्ये येशूजे तोप् अन्क्य्वे। 34तर सिपाईयू नङ्ने त्यादे ङूजे खैसेने भल्दे स्यूल्दे, मेस्ये का प्रे क्यू योङ्रदे। 35नमयूदेये विश्वास चीस्य यदेबे अम्ब घटनायू रङ्सेजे म्यादेने तङ्ब मीदे गवाही पीने ख्यङ् मेस्ये ङूजे गवाही तम्दम् ख्यङ् यदेबे ङूने था ख्यङ्। 36#प्रस्थान 12:46; गन्ती 9:12; भजनसंग्रह 34:20“ङूजे नोङ्र्यायू कम्बये अन्क्य्वे” यब धर्मशास्त्रजे वचन पूरा क्यूस्स्य यदेबे येरे क्यूत्दे। 37#जकरिया 12:10; प्रकाश 1:7होर्दे धर्मशास्त्रजे सूजो ने त्याने येरे लिख्दीये ख्यङ्, “थमयूदे सूने स्यूल ख्यङ्, थमयूदे ङूने लेक्क्य।”
खङ्सने येशू येब
मत्ती २७:५७-६१; मर्कूस १५:४२-४७; लूका २३:५०-५६
38होर्देङ्येदे अरिमाथियाजे योसेफ यब मी, ङू यहूदीयूने फदेबे नङ्सूने येशूजे स्यूस्स्या क्यूर ख्य, ङूदे येशूजे सीयेब ङ्व कूपीय यदेबे पिलातसने बिन्ती चीत्दे। ङूदे कूप यदे। होर्दे ङू रदेबे येशूजे सीयेब ङ्व टेल्कीदे। 39#यूहन्ना 3:1,2होर्दे खूम् येशूट्याने मून्दे रब निकोदेमसये सूम्च्यूदे किलो सोम्लाप्र मग्मग् बस्न रब अत्तर मेस्ये येलवा यब से च्यूम्देबे बन्देब मूर्कू टेल्देबे हैयाने रदे। 40येर्बेने थमयूदे यहूदीयूजे पे अनुसार येशूजे ङ्वने पोबजे लागि मग्मग् बस्न रब मूर्कू पूत्देबे सूतीजे कोलादे फूर्दे। 41येशू क्रूसने खील् ठोक्दीदे पीलेब नेने बगैँचा त्या ख्य। हम्ब बगैँचाने कलङ्बेये सूये अन्हेक्कब सर् खङ्स त्या ख्य। 42यहूदीयूजे तयार चेब दिन ख्य, होरेक्यूत्देबे हम्ब ट्याने ख्यब खङ्सने थमयूदे येशूजे ङ्व हीत्दे।
Currently Selected:
यूहन्ना 19: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
