यूहन्ना 21
21
येशू स्यूस्स्यायू ङ्यी-ट्याने तङ्रब
1होर्दे ङ्येदे येशू फेरि तिबेरियास समुद्रजे नने स्यूस्स्यायू ट्याने तङ्रदे। ङूदे रङ्सेने येरे तम्मीदे: 2सिमोन पत्रुस, जूम्ल्या यब थोमा, गालीलजे काना सहरने नथानेल, जब्दियाजे च ङ्ही होर्दे येशूजे सूजो स्यूस्स्या ङ्ही फूङ् क्यूर ख्य। 3#लूका 5:5सिमोन पत्रुसदे थमयूने यदे, “ङ समुद्रने ङ सेने प्रेन ख्यङ्।” थमयूदे ङूने यदे, “ङीयूये नैप्रे रीय।” थमयू गीलीदेबे डुङ्गाने टदे, तर हम्ब मून् थमयूदे चैत्याये चूङ अन्खू।
4नप् क्यूट्टमे ख्य, येशू समुद्र नने मेर्रदे। तर स्यूस्स्यायूदे येशू यदेबे स्येने अन्खू। 5येशूदे थमयूने यदे, “च्योन्यू, नमयूदे ङ-तेते ङ्येप्ता स्व?”
थमयूदे ङूने जवाफ पीन्दे, “त्वो।”
6 #
लूका 5:6
येशूदे थमयूने यदे, “डुङ्गाजे स्येत्देयोर्दे जाल छा, होर्दे ङ चूङ खूइय।” होर्दे थमयूदे जाल छादे, मेस्ये ङ बेस्से कूम क्यूत्देबे थमयूदे जाल थेनने अन्खू।
7येशूदे प्रेम चेब स्यूस्स्यादे पत्रुसने यदे, “ङू प्रभु टूङ्।” “ङू प्रभुटोङ्” यब तदेबे सिमोन पत्रुसदे रङ्सेजे ङ्वजे फीने ह्वेब कोला ढप्ने यूर् पूत्दे चेनेयलो ङूदे कोला प्यङ्ये ख्य, मेस्ये समुद्रने थे नेनी। 8सूजो स्यूस्स्यायू डूङ्गने टूङ्देबे जाल थेने थेने रदे। थमयू समुद्र नदे सोरो चीन्तङ् त्व ख्य सै मिटर लात्या चीन्तङ् ख्य। 9कन्छ्वाब थमयू समुद्र नने फ्योर्दे, हन्छ्वाब थमयूदे डोर्याजे मी ह्व-ह्व भोप्रोने ङ हीतेब मेस्ये क्यङ् तङ्दे।
10येशूदे थमयूने यदे, “नमयूदे चूजोके ङ्येबब ङ छीत्या सीक।”
11होर्दे सिमोन् पत्रुसदे डुङ्गाने टदेबे सैत्या ङ्यील्लङ्दे तेह्रला केन्-केन् ङ फ्यानब जाल पखने थेन्देबे रेत्दे, तर हन्छ्वा कूम ख्यङ्लीने जाल अम्-प्र्याङ्गी। 12येशूदे थमयूने यदे, “च ख।” स्यूस्स्यायू नङ्ने सूदेये, “न सू ख्यङ्?” यदेबे ल्वेब आँट अन्ची, चेनेयलो थमयूदे ङू प्रभु ख्यङ् यदेबे स्येल्क ख्य। 13येशू रदे मेस्ये क्यङ् टेल्देबे थमयूने पीन्दे, मेस्ये होरप्रने ङये पीन्दे। 14येशू सीइदेबे फेरि सोम्बो क्यूर ङ्येदे स्यूस्स्यायू ट्याने तङ्रब अम्ब सोम्खेप् क्यूर ख्य।
येशू मेस्ये पत्रुस
15कन्छ्वाब थमयूदे च जेन्दे, हन्छ्वाब येशूदे सिमोन पत्रुसने यदे, “यूहन्नाजे च सिमोन, नदे ङैने थमयूदे यली थेप् माया चीक्क्या?”
पत्रुसदे यदे, चीक्क्य प्रभु, ङैदे नने माया चीक्क्य, यब नने था ख्यङ्।”
येशूदे ङूने यदे, “ङैजे स्वान्यूने चेलाबे छ।”
16येशूदे फेरि दोस्रो पलोने ङूने यदे, “यूहन्नाजे च सिमोन, न ङैने प्रेम चीक्क्या?”
पत्रुसदे यदे, चीक्क्य प्रभु, ङैदे नने प्रेम चीक्क्य, यब नने था ख्यङ्।”
येशूदे ङूने यदे, “ङैजे स्वान्यूने चेलाबे ले।”
17ङूदे सोम्खेप् पलोने यदे, “यूहन्नाजे च सिमोन, न ङैने प्रेम चीक्क्या?”
पत्रुस सेम् नदे, चेनेयलो येशूदे सोम्खेप् सेमे ङूने “न ङैने प्रेम चीक्क्य? यदेबे लोत्दे। ङूदे येशूने यदे, “प्रभु नदे साप्ता पोने स्ये ख्यङ्। ङैदे नने प्रेम चीक्क्य यदेबे नने था ख्यङ्। येशूदे ङूने यदे, “ङैजे स्वान्यूने चेलाबे छ। 18तम्दम्ने, ङ नने यीय, कन्छ्वाब न स्योर्ब ख्य, न रङ्सेदे रङ्सेजे कूच्यू ख्या ख्य, मेस्ये केने प्रदीरीको होनेने प्र ख्य। तर कन्छ्वाब न गान्गून् क्यूप्पीय, हन्छ्वाब नदे रङ्सेजे ला तान्तीय, मेस्ये सूजोयूदे नैजे कूच्यू ख्यामीय, होर्दे केने न प्रतीङ् अन्ड होनेने कूबीय।” 19परमेश्वरजे महिमा चेने पत्रुस केरे सीब पर्दे यब पोजे यप् चीत्देबे येशूदे य ख्य। होर्दे ङ्येदे ङूदे पत्रुसने यदे, “ङैजे ङ्ये-ङ्ये ख।”
येशू मेस्ये ङूजे सोरो छेब स्यूस्स्या
20 #
यूहन्ना 13:25
पत्रुसदे ङ्येलम् ल्वादेबे लेप्प येशूदे प्रेम चेब स्यूस्स्या ङ्ये-ङ्ये रेनब तङ्दे। अम्ब स्यूस्स्यादे नूस्यूङ्दे कङ् चब बीलने येशूजे गूने ङूजे ट हीकेन्देबे “प्रभु, नने, ङ्येप्से पीनब सू ख्यङ्?” यदेबे ल्वे ख्य। 21ङूने तङ्देबे पत्रुसदे येशूने यदे, “प्रभु, अम्ब मीजे बारेने च क्यूक्क्य?”
22येशूदे पत्रुसने यदे, “ङ अन्ल्वारदासेमे ङू सोम्बो क्यून्नूस्य मन्लीने नने च क्यूत्दे स्व? न ङैजे ङ्ये-ङ्ये ख।” 23येरेक्यूत्देबे हम्ब स्यूस्स्या अन्सीब यब पो सूजो स्यूस्स्यायूजे अन्द्रदे ड्वाङ्गे क्यूरी। येशूदे हम्ब स्यूस्स्या अन्सीब यदेबे य दी, तर “ङ अन्रदासेमे ङू सोम्बो क्यून्नूस्य मन्लीने नने च क्यूत्दे स्व?” यदेबे य ख्य।
24ङू हम्ब स्यूस्स्या ख्यङ् ङूदे अम्ब पोजे बारेने गवाही पीन ख्यङ्, मेस्ये अम्ब पो लिख्दीये ख्यङ्, होर्दे ङीनदे था प्रेत्दे ङूदे पीनब गवाही तम्दम् ख्यङ्।
25येशूदे सूजो कूम कामयू चीत्दे। हम्ब कामयू नङ्ने त्या त्या चीत्देबे लिख्दीदे यलो, ङैजे सेम्ने येर मन ख्यङ्, ङूजे बारेने लिख्दीयेब किताबयू संसार भरीनेये यूक्स्ये त्वो।
Currently Selected:
यूहन्ना 21: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
