مَرْکُسْ 5

عِيسَى يَمْطِتِنِ غٛطّٛ مٛ رُوحُ شٛࢡْنغُ تٛرِّ

(مَتَّ 8‏:28‏-34؛ لُکَ 8‏:26‏-39)

1عِيسَى عٜ ݠُکَرَعٜنْ مُوطُمْ نجٛتِّ غَلِيلِ ندٜرْ لٜسْدِ غٜرَسٜنِعٜنْ غَطَ وٜىٰندُ؞ 2ندٜ عِيسَى وُرْتِ کٛومْبٛوَلْ#5‏:2 کٛومْبٛوَلْ مَلَّ لَانَوَلْ؞، لَوْ غٛطّٛ وُرْتِ شَکَ غٜنَالٜ، عٛطٛنْ وَرَ حَا عٛڢٛتَّ بٜى مَاکٛ؞ غٛطّٛ عٛو عٛ مَرْطٛ رُوحُ شٛࢡْنغُ؞ 3عٛطٛنّٛ يٜىٰطَ شَکَ غٜنَالٜ؞ وَلَا بَاوْطٛ حَࢡُّغٛ مٛ، کٛو بٜى شَلَّلُّ؞ 4ندٜ طُوطُّمْ يِمْࢡٜ کَࢡُّنٛ مٛ بٜى غٜعٜلّٜ عٜ شَلَّلُّوجِ، عَمَّا عٛتَعِ شَلَّلُّوجِ حَا جُوطٜ مَاکٛ، عٛيٜوِ غٜعٜلّٜ حَا کٛسْطٜ مَاکٛ؞ سٜمْبٜ مَاکٛ سَلٛرِ عٜلْتَنْطٛ مٛ ڢُو؞ 5تُمْ جٜمَّ عٜ نَانغٜ ڢُو عٛطٛنْ شَکَ غٜنَالٜ عٜ ندٜرْ کٛوسٜىٰجٜ، عٛطٛنْ حٛولَ، عٛطٛنْ نغَاسَ ࢡَنْدُ مَاکٛ بٜى کَاعٜ؞

6عَمَّا ندٜ عٛعٜىٰوِ عِيسَى، عٛدٛغِّ، عٛوَرِ، عٛتُغِّ کٛݠِّ حَا يٜىٰسٛ مُوطُمْ، 7ندٜنْ عٛوٛوکِ، عٛوِعِ‏: «عَنْ عِيسَى، ࢡِطّٛ اَللَّه ࢡَنغِيطٛ، طُمٜ نغِطَّ حَا عَمْ؟ مِتٛرِ مَ بٜى عِنْدٜ اَللَّه، تَا يَنغِتَمْ‏!» 8عٛوِعِ طُمْ نغَمْ عِيسَى وِعْنٛ مٛ‏: «عَنْ رُوحُ شٛࢡْنغُ، وُرْتَ دِغَ غٛرْکٛ عٛو‏!» 9ندٜنْ عِيسَى ࢨَمِمٛ‏: «نٛيْ عِنْدٜ مَ؟» عٛجَابِ‏: «عِنْدٜ عَمْ مٛوࢡْرٜ، نغَمْ مِنْ طُوطِ؞» 10عٛتٛرِ عِيسَى طُوطُّمْ، تَا عٛرِيوَ طِ دَايِيطُمْ دِغَ لٜسْدِ مَنْ؞

11وٛودِ تٛکّٜرٜ غَدُوجِ طُوطِّ تٛنْ، طِ طٛنْ ندُرَ بَنغٜ کٛوسٜىٰجٜ؞ 12رُوحُوجِ شٛࢡْطِ غٛ تٛرِ عِيسَى‏: «نٜلْ مِنْ حَا غَدُوجِ طِ نغَمْ مِنْ نَسْتَ ندٜرْ مَاجِ؞» 13عِيسَى دُنغَنِ طِ؞ طِ نغُرْتِ دِغَ غٛطّٛ عٛو، طِ نَسْتِ ندٜرْ غَدُوجِ؞ غَدُوجِ مَنْ شَامْنِ، ندٛعِّ دِغَ دٛوْ ڢٛمٛوندٜ تٛوْندٜ ندٜرْ وٜىٰندُ؞ طِ ڢُو طِ کَلْکِ، طِ ندِلَّنِ عُجِنٜ طِطِ؞

14دُرٛوࢡٜ غَدُوجِ ندٛغِّ، نغٜشِّ حَالَ مَاجُمْ ندٜرْ وُرٛ عٜ حَا کَوْيٜىٰجِ؞ يِمْࢡٜ نغُرْتِ نغَمْ ࢡٜندَارَ کٛ وَطِ؞ 15ࢡٜنغَرِ حَا عِيسَى، ࢡٜنغِعِ مَرْنٛوطٛ مٛوࢡْرٜ غِنَّاجِ غٛ طٛنْ جٛوطِ، طٛنْ ࢡٛرْنِ، حَکِّيلٛ مَاکٛ بٛو دٜعِّتِ؞ ࢡٜکُلْتٛرِ؞ 16يِعْࢡٜ طُمْ ڢُو نغٜشِّ يِمْࢡٜ کٛ وَطِ مَرْطٛنٛ غِنَّاجِ غٛ عٜ کٛ ڢٜعَّنِ غَدُوجِ؞ 17ندٜنْ يِمْࢡٜ ݠُطِّ تٛرَاغٛ عِيسَى، ࢡٜمبِعِمٛ‏: وُرْتَ، دَايَ لٜسْدِ عَمِنْ؞

18يَاکٜ عِيسَى طٛنْ نَسْتَ کٛومْبٛوَلْ، غُرْتِنَاطٛ رُوحُوجِ شٛࢡْطِ غٛ تٛرِمٛ، وِعِ‏: «عَشُّ مِجٛوطٛدٛ بٜى مَ؞» 19عِيسَى دُنغَنَاکِمٛ، عَمَّا عٛوِعِمٛ‏: «حٛوتُ حَا يِمْࢡٜ مَ، يٜشُّ ࢡٜ کٛ جَوْمِرَاوٛ وَطَنِ مَ ندٜرْ عٜنْطَمْ مُوطُمْ ڢُو؞» 20غٛطّٛ عٛو دِلِّ، عٛڢُطِّ عَنْدِنْغٛ يِمْࢡٜ حَا جِحَاجِ بِعٜتٜىٰطِ بٜرْنِيجِ-سَݠّٛ کٛ عِيسَى حُووَنِمٛ ڢُو، حَا يِمْࢡٜ ڢُو کَيْطِنِ؞

عُمِّتِنٜىٰکِ ࢡِنغٜلْ جَيْرُسْ دٜيٜلْ عٜ جَمْطِتِنْکِ دٜبّٛ مٜىٰمْطٛ لِمْشٜ عِيسَى

(مَتَّ 9‏:18‏-26؛ لُکَ 8‏:40‏-56)

21عِيسَى عٜىٰرْتِ وٜىٰندُ بٜى کٛومْبٛوَلْ، وَرْتِ غَاعٜ؞ مٛوࢡْرٜ طُوطْندٜ مٛوࢡْتِ حَا مَاکٛ بَنغٜ وٜىٰندُ؞ 22غٛوتٛ حَا عَرْدِيࢡٜ سُودُ دٜوَلْ يَحُودُعٜنْ مٛ عِنْدٜ مُوطُمْ جَيْرُسْ وَرِ حَا مَاکٛ؞ ندٜ عٛيِعِ عِيسَى، عٛتُغِّ کٛݠِّ يٜىٰسٛ مَاکٛ، 23عٛتٛرِمٛ طُوطُّمْ، عٛوِعِ‏: «ࢡِنغٜلْ عَمْ دٜيٜلْ ࢩَوِ حَا نغٜلْ ࢡَدَکٜ مَايُغٛ؞ عُسٜنِ وَرْ، وَلِّنْ جُوطٜ مَ دٛوْ مَاغٜلْ حَا نغٜلْ حِسَ، نغٜلْ يٜىٰطَ؞»

24عِيسَى دِلِّدِ بٜى مَاکٛ؞ مٛوࢡْرٜ طُوطْندٜ يَحْدِ بٜى مَاکٛ، ندٜ طٛنْ ࢡِطَّ مٛ؞ 25وٛودِ بٛو دٜبّٛ ڢٜىٰرٜ تٛنْ؞ دُوࢡِ سَݠّٛ عٜ طِطِ، عٛࢩَوِ ࢩَوُ عِلُغٛ ࢨِيࢨَمْ؞ 26عٛيٜحِ حَا حُرْغٛوࢡٜ طُوطْࢡٜ، عٛمَجِّنِ جَوْدِ مَاکٛ ڢُو؞ عَمَّا ࢩَوُ مَاکٛ وَطَايْ دَامَ سَمْ، سٜيْ تُلِّتِتْغٛ؞ 27ندٜ عٛنَنِ حَبَرُ عِيسَى، عٛوَرِ ندٜرْ مٛوࢡْرٜ ࢡَاوٛ مَاکٛ، عٛمٜىٰمِ لِمْشٜ مَاکٛ؞ 28نغَمْ عٛنُمْنٛ‏: «تٛ مِحٜࢡِ مِمٜىٰمِ کٛو لِمْشٜ مَاکٛ تَنْ، مِيَمْطِتَنْ؞» 29ندٜ عٛمٜىٰمِ لِمْشٜ عِيسَى، لَوْ عِلُغٛ ࢨِيࢨَمْ مَاکٛ تَعِ، عٛمَاتِ ندٜرْ ࢡَنْدُ مَاکٛ عٛيَمْطِتِ دِغَ ࢩَوُ مَاکٛ؞ 30وَکَّتِ مَنْ عِيسَى عَنْدِ سٜمْبٜ وُرْتِ حَا مُوطُمْ؞ عٛوَيْلِتِ شَکَ مٛوࢡْرٜ، عٛࢨَمِ‏: «مٛيْ مٜىٰمِ لِمْشٜ عَمْ؟» 31ݠُکَرَعٜنْ مَاکٛ نجَابِ‏: «عَطٛنْ يِعَ مٛوࢡْرٜ طٛنْ ࢡِطّٜ؞ نٛيْ ࢨَمْرَتَ‏: مٛيْ مٜىٰمِ يَمْ؟»

32عَمَّا عِيسَى لَارِ تَارِيࢡٜ مٛ حَا عٛيِعَ دٜبّٛ مٜىٰمْطٛ مٛ؞ 33دٜبّٛ عٛو دِوْنِ نغَمْ کُلٛلْ نغَمْ عٛعَنْدِ کٛ وَطِمٛ، ندٜنْ عٛوَرِ، عٛتُغِّ کٛݠِّ لٜسْ کٛسْطٜ عِيسَى، عٛيٜشِّمٛ غٛونغَ مَنْ ڢُو؞ 34عِيسَى وِعِمٛ‏: «ࢡِنغٜلْ عَمْ، نُطِّنْکِ مَاطَ يَمْطِتِنِ مَ؞ يَحْ جَمْ، عَرِمْطِ عٜ بٛنٜ مَ؞»

35دِغَ عِيسَى تِمِّنَايْ وٛلْوُغٛ تَوٛنْ، عَرْدِيࢡٜ سَارٜ جَيْرُسْ نغَرِ، مبِعِمٛ‏: «ࢡِنغٜلْ مَ مَايِ؞ نغَمْ طُمٜ عَطٛنْ ࢡِلَّ مٛودِبّٛ ڢَحِنْ؟» 36عَمَّا عِيسَى ڢَالَايْ بٛلّٜ مَࢡّٜ؞ عٛوِعِ جَيْرُسْ‏: «تَا حُلْ، نُطِّنْ تَنْ‏!» 37ندٜنْ عٛدُنغَنَايْ کٛو غٛوتٛ يَحْدَ بٜى مَاکٛ، سٜيْ ݠِيٜرْ عٜ يَاکُبَ عٜ يُحَنَّ، دٜىٰرْطِرَاوٛ يَاکُبَ؞ 38ندٜ ࢡٜنجٛتِّ سَارٜ جَيْرُسْ عَرْدِيطٛ سُودُ دٜوَلْ يَحُودُعٜنْ، عِيسَى لَارِ يِمْࢡٜ طٛنْ کٛولَ، طٛنْ مبٛيَ، طٛنْ نجٛويْنَ طُوطُّمْ تٛنْ؞ 39عٛنَسْتِ سَارٜ، عٛوِعِ ࢡٜ‏: «کٛنِ عٛنْ کٛولَتَ بَنَ نِي؟ کٛنِ عٛنْ مبٛيَتَ؟ ࢡِنغٜلْ مَايَايْ، نغٜلْ طَانِ نٛنْ؞» 40ࢡٜنجَنْشِمٛ؞ ندٜنْ عٛوُرْتِنِ ࢡٜ ڢُو؞ عٛلُتِّدِ بٜى بَابَ ࢡِنغٜلْ عٜ دَادَ مَاغٜلْ عٜ ݠُکَرَعٜنْ مَاکٛ تَتٛ غٛ، ࢡٜنَسْتِ سُودُ ندُ ࢡِنغٜلْ وٛنِ؞ 41عٛنَنغِ جُنغٛ مَاغٜلْ، عٛوِعِ نغٜلْ‏: «تَلِتَ کُمِ»، بَنَ وِعْغٛ‏: «ࢡِنغٜلْ، مِطٛنْ وِعٜ‏: عُمَّ‏!» 42لَوْ ࢡِنغٜلْ دٜيٜلْ عُمِّ، ڢُطِّ يَحُغٛ؞ نغٜلْ طٛنْ مَرِ دُوࢡِ سَݠّٛ عٜ طِطِ؞ ندٜ يِمْࢡٜ نغِعِ طُمْ، ࢡٜکَيْطِنِ مَسِنْ؞ 43عَمَّا عِيسَى بَرِّ ࢡٜ بٜى شَاتَلْ، تَا ࢡٜعَنْدِنَ طُمْ کٛو مٛيٜ؞ ندٜنْ عٛوِعِ‏: «ندٛکّٜ نغٜلْ ࢩَامْدُ؞»

Currently Selected:

مَرْکُسْ 5: داَ

Highlight

Copy