مَرْکُسْ 14

عَرْدِيࢡٜ طٛنْ ندَوْرَ نَنغُغٛ عِيسَى

(مَتَّ 26‏:1‏-5؛ لُکَ 22‏:1‏-2؛ يُحَنَّ 11‏:45‏-53)

1لُتِّ ࢩَلْطٜ طِطِ حَا جُولْدٜ ݠَسْکَ عٜ تَمْسٜىٰجٜ طٜ عُڢْنَاکَ وَطٜ؞ مَوْࢡٜ لِمَنْعٜنْ عٜ مٛودِࢡّٜ تَوْرٜىٰتَ طَࢡِّ نٛ ࢡٜࢨٛيْرَ عِيسَى، ࢡٜنَنغَ مٛ، ࢡٜمبَرَ مٛ#غُرْتَاکِ 12‏:1‏-27؞؞ 2ࢡٜمبِعِ‏: «تَا عٜنْ مبَطَ طُمْ وَکَّتِ جُولْدٜ، نغَمْ تَا طُمْ عُمِّنَ ڢِتِنَ شَکَ عُمَّاتٛورٜ؞»

دٜبّٛ رُڢِ نٜبَّمْ دٛوْ حٛورٜ عِيسَى

(مَتَّ 26‏:6‏-13؛ لُکَ 12‏:1‏-8)

3عِيسَى طٛنْ حَا بَيْتَنِيَ ندٜرْ سَارٜ سِمٛنْ کُتُرُوجٛ؞ سَاعِ عٛطٛنْ ࢩَامَ، دٜبّٛ ڢٜىٰرٜ وَرِ، عٛطٛنْ جٛغِ ڢَاندُ سَطْندُ حٜىٰوْندُ عُورْدِ مبِعٜتٜىٰندِ نَرْدِ، ندِ لَاࢡْندِ عٜ شَطْندِ مَسِنْ؞ عٛڢُسِ حُنْدُکٛ ڢَاندُ مَنْ، عٛرُڢِ عُورْدِ غٛ دٛوْ حٛورٜ عِيسَى#لُکَ 7‏:37‏-38؞؞ 4وٛطْࢡٜ شَکَ يِمْࢡٜ تٛنْ ࢡٜرْنِ، ࢡٜمبِعْمبِعْتِرِ‏: «کٛنِ عٛمَجِّنِ نٜبَّمْ طَعَمْ مٜىٰرٜ؟ 5تٛ عٛسٛورِّنٛ طَمْ کٛ ࢡُرِ سُلٜيْجٜ شَرْدِ تٜىٰمٜطّٜ تَتِ، عٛحٛکُّنٛ شٜىٰدٜ مَنْ حَا تَلَکَعٜنْ، ࢡُرَنّٛ نَڢُغٛ؞» ࢡٜݠٜلِمٛ بٜى شَاتَلْ؞ 6عَمَّا عِيسَى وِعِ ࢡٜ‏: «عَشّٜ مٛ‏! کٛنِ عٛنْ ݠِتِنْتَ مٛ؟ عٛحُووَنِ يَمْ کُوغَلْ بٛوطْنغَلْ؞ 7تَلَکَعٜنْ طٛنْ نغٛنْدِ بٜى مٛوطٛنْ ڢٛرٛيْ، عٛنْ مبَاوَنْ وَطَنْغٛ ࢡٜ کٛ وٛوطِ کٛو ندٜيْ عٛنْ نغِطِ ڢُو؞ عَمَّا مِنْ مِوٛنْدَتَا بٜى مٛوطٛنْ ڢٛرٛيْ#تٛوکْتَاکِ تَوْرٜىٰتَ 15‏:11؞؞ 8کَنغْکٛ عٛوَطِ کٛ عٛوَاوِ؞ دِغَ سَاعِ سِوَا عٛرُڢِ نٜبَّمْ دٛوْ ࢡَنْدُ عَمْ نغَمْ عُوٜىٰغٛ؞ 9غٛونغَ مِطٛنْ وِعَ عٛنْ‏: کٛو تٛيْ ندٜرْ دُنِيَارُ حَا نُطِّنْࢡٜ يَمْ نغَازِنْتَ لِنْجِيلَ ڢُو، ࢡٜنغٜشَّنْ بٛو کٛ دٜبّٛ عٛو وَطِ عٜ ࢡٜشِڢْتٛرَنْ مٛ؞»

يَحُودَ زَمْبِ عِيسَى

(مَتَّ 26‏:14‏-16؛ لُکَ 22‏:3‏-6)

10ندٜنْ يَحُودَ عِسْکَرِيٛتْ، غٛوتٛ ندٜرْ ݠُکَرَعٜنْ سَݠّٛ عٜ طِطٛ، دِلِّ حَا مَوْࢡٜ لِمَنْعٜنْ نغَمْ عٛحٛکَّ عِيسَى حَا جُوطٜ مَࢡّٜ؞ 11ندٜ ࢡٜنَنِ حَالَ مَاکٛ، ࢡٜشٜيِ؞ ࢡٜعِينَنِمٛ شٜىٰدٜ؞ ندٜنْ يَحُودَ طَࢡِّتِ وَکَّتِيرٜ ࢡُرْندٜ ڢٛتُّغٛ نغَمْ عٛحٛکَّ عِيسَى حَا جُوطٜ مَࢡّٜ؞

عِيسَى ࢩَامْدِ کِيرْتَارِ ݠَسْکَ بٜى ݠُکَرَعٜنْ مُوطُمْ

(مَتَّ 26‏:17‏-25؛ لُکَ 22‏:7‏-23؛ يُحَنَّ 13‏:21‏-30)

12ࢩَلَادٜ عَرَنْدٜ حَا جُولْدٜ تَمْسٜىٰجٜ طٜ عُڢْنَاکَ، ندٜ ࢡٜکِرْسَتَ جَوْغٜلْ ݠَسْکَ، ݠُکَرَعٜنْ ࢨَمِ عِيسَى‏: «تٛيْ عَيِطِ مِنْ نجَحَ، مِنْ تَاسْکِتِنَ کِيرْتَارِ ݠَسْکَ نغَمْ مَاطَ؟» 13ندٜنْ عِيسَى نٜلِ ݠُکَرَعٜنْ مُوطُمْ طِطٛ، وِعِ ࢡٜ‏: «نَسْتٜ ندٜرْ بٜرْنِوٛلْ، عٛنْ ݠٛتَّنْ بٜى غٛطّٛ دٛونْدِيطٛ مبُلْکُ ندِيَمْ، تٛکّٜ مٛ؞ 14حَا سَارٜ ندٜ عٛنَسْتَتَ، مبِعٜ جَوْمُ سَارٜ مَنْ‏: مٛودِبّٛ وِعِ‏: تٛيْ سُودُ حَا مِࢩَامَ کِيرْتَارِ ݠَسْکَ بٜى ݠُکَرَعٜنْ عَمْ؟ 15عٛحٛلَّنْ عٛنْ سُودُ مَوْندُ، دٛوْرُ، مٛعِّتِنَاندُ، تَاسْکِتِنَاندُ، عٛنْ تَاسْکِتِنَ کُوجٜ ڢُو نغَمْ مٜىٰطٜنْ تٛنْ؞» 16ݠُکَرَعٜنْ غٛ ندِلِّ، نَسْتِ بٜرْنِوٛلْ، ࢡٜتَوِ کٛو طُمٜ ڢُو بَنَ عٛوِعِ ࢡٜ، ࢡٜتَاسْکِتِنِ کِيرْتَارِ ݠَسْکَ؞

17ندٜ کِيکِيطٜ وَطِ، عِيسَى وَرْدِ بٜى ݠُکَرَعٜنْ مُوطُمْ سَݠّٛ عٜ طِطٛ؞ 18سَاعِ ࢡٜنجٛوطِ ࢡٜطٛنْ ࢩَامَ، عِيسَى وِعِ‏: «غٛونغَ مبِعَنْمِ عٛنْ، غٛوتٛ مٛوطٛنْ مٛ طٛنْ ࢩَامْدَ بٜى عَمْ، زَمْبٛتٛ يَمْ#جَبُورَ 41‏:10؞؞» 19طُمْ نَاوِ ࢡٜرْطٜ ݠُکَرَعٜنْ، کٛو مٛيْ مَࢡّٜ ڢُطِّ ࢨَمُغٛ مٛ‏: «نَا طُمْ مِنْ سِکَ؟»

20عِيسَى جَابِ ࢡٜ‏: «طُمْ غٛوتٛ حَا سَݠّٛ عٜ طِطٛ مٛوطٛنْ، مٛ طٛنْ سُووَ لٛنغٜرٜ مُمْ بٜى عَمْ ندٜرْ لٜعَلْ؞ 21غٛونغَ ࢡِي-نٜطّٛ مَايَنْ بَنَ کٛ وِنْدَ دٛوْ مَاکٛ؞ عَمَّا بٛنٜ لَاتَنْتٛ غٛطّٛ مٛ زَمْبٛتٛ ࢡِي-نٜطّٛ؞ تٛ عٛدَࢩَاکَنٛ، ࢡُرَنَنّٛ مٛ؞»

کِيرْتَارِ شٜنِيندِ

(مَتَّ 26‏:26‏-30؛ لُکَ 22‏:15‏-20؛ 1 کٛرِنْتُعٜنْ 11‏:23‏-25)

22ندٜ ࢡٜطٛنْ ࢩَامَ، عِيسَى حٛوعِ تَمْسٜىٰرٜ، وَطِ يٜتّٛورٜ، يٜوِ تَمْسٜىٰرٜ مَنْ، حٛکِّ ࢡٜ، وِعِ‏: «کٛوعٜ، طُمْ ࢡَنْدُ عَمْ؞» 23ࢡَاوٛ مَاجُمْ عٛحٛوعِ جَرْدُغٜلْ، عٛيٜتِّ اَللَّه، عٛحٛکِّ ࢡٜ، ࢡٜ ڢُو ࢡٜنجَرِ ندٜرْ مَاغٜلْ؞ 24عٛوِعِ ࢡٜ‏: «طُمْ ࢨِيࢨَمْ عَمْ ندُڢَاطَمْ نغَمْ طُوطْࢡٜ، بٜى مَاجَمْ اَللَّه تَبِتِنِرِ عَلْکَوَلْ مُوطُمْ#غُرْتَاکِ 24‏:8؛ يٜرٜمِيَ 31‏:31‏-34؞؞ 25غٛونغَ مِطٛنْ وِعَ عٛنْ‏: مِمٜىٰتَتَا يَرُغٛ عِنَبٛوجَمْ طَمْ حَا ࢩَلَادٜ مِيَرَتَ کٜسَمْ ندٜرْ لَامُ اَللَّه؞» 26ندٜنْ ࢡٜنغِمِ غِمٜ مَنغْتٛوجٜ، ࢡٜندِلِّ حَا حٛوسٜىٰرٜ جَيْتُنْجٜ؞

عِيسَى وَنغِنِ نٛ ݠِيٜرْ يٜدَّنْ مٛ

(مَتَّ 26‏:31‏-35؛ لُکَ 22‏:31‏-34؛ يُحَنَّ 13‏:36‏-38)

27عِيسَى وِعِ ݠُکَرَعٜنْ مُوطُمْ‏: «عٛنْ ڢُو عٛنْ عَشَّتَمْ عٛنْ ندٛغَّنْ، بَنَ کٛ وِنْدَ ندٜرْ دٜڢْتٜرٜ‏: مِمبَرَنْ غَيْنَاکٛ، بَالِ شَنغْکِتِتّٛ#جٜکَرِيَ 13‏:7؞؞ 28عَمَّا تٛ مِعُمِّتَکٜ، مِعَارْتَنْ عٛنْ يَحُغٛ لٜسْدِ غَلِيلِ#مَتَّ 28‏:16؞؞» 29ݠِيٜرْ وِعِمٛ‏: «کٛو تٛ يِمْࢡٜ ڢُو عَشِّ مَ، مِنْ کَمْ مِعَشَّتَا مَ؞» 30ندٜنْ عِيسَى وِعِمٛ‏: «غٛونغَ مبِعَنْمَامِ‏: جٜمَّارٜ ندٜعٜ، حِدّٜکٛ عَسْغُمْرِ#14‏:30 عَسْغُمْرِ مَلَّ عَغُغُمْرِ؞ عُعَ ندٜ طِطِ، عَنْ عَوِعَنْ ندٜ تَتِ عَعَنْدَا يَمْ؞» 31عَمَّا ݠِيٜرْ تَبِتِنِ کٛ عٛوِعِ بٜى سَوْتُ‏: «مِمٜىٰطَتَا وِعْغٛ مِعَنْدَا مَ، کٛو تٛ دٛولٜ مِمَايْدَ بٜى مَاطَ؞» ݠُکَرَعٜنْ لُتُّࢡٜ ڢُو نجَابِ بَنَ نٛنْ؞

دٛعَ عِيسَى حَا غٜشٜمَنٜ

(مَتَّ 26‏:36‏-46؛ لُکَ 22‏:39‏-46)

32ندٜ ࢡٜنجٛتِّ نٛکُّورٜ وِعٜتٜىٰندٜ غٜشٜمَنٜ، عِيسَى وِعِ ݠُکَرَعٜنْ مُوطُمْ‏: «نجٛوطٜ حَا طٛ، حَا مِوَطٛيَ دٛعَ؞» 33ندٜنْ عٛيَحْدِ بٜى ݠِيٜرْ عٜ يَاکُبَ عٜ يُحَنَّ؞ کُلٛلْ عٜ سَکْلٜرٜ عُکَّنِمٛ؞ 34عٛوِعِ ࢡٜ‏: «تٛرَّ ࢡٜرْندٜ عَمْ يِطِ مبَرُغٛ يَمْ؞ تٛکّٜ جٛوطَاغٛ حَا طٛ، عَيْنٜ؞» 35عٛيٜحِ يٜىٰسٛ سٜطَّ، عٛدٛعِّ حَا لٜسْدِ، عٛتٛرِ حَا سَاعِيرٜ تٛرَّ ندٜعٜ سَالٛ عَشَّ مٛ، تٛ حٜࢡٛتٛ؞ 36عٛوِعِ‏: «يَا بَابِرَاوٛ عَمْ، عَنْ عَوَاوِ وَطُغٛ کٛو طُمٜ ڢُو؞ عِتَّنَمْ جَرْدُغٜلْ تٛرَّ نغٜعٜلْ؞ عَمَّا وَطْ کٛ نغِطَّ، نَا کٛ نغِطْمِ؞»

37ندٜنْ عٛلٛرِ، عٛتَوْتِ ݠُکَرَعٜنْ تَتٛ غٛ، ࢡٜطٛنْ طَانِ؞ عٛوِعِ ݠِيٜرْ‏: «سِمٛنْ، عَطٛنْ طَانِ نَ؟ عَوَاوَايْ عَيْنُغٛ کٛو سَاعَ نغٛوتَ نَ؟ 38عَيْنٜ، تٛرٜ اَللَّه نغَمْ تَا عٛنْ نَسْتَ جَرِّبٜىٰکِ؞ کٛ رُوحُ نٜطّٛ يِطِ، ࢡَنْدُ مُوطُمْ وَاوَتَا وَطُغٛ طُمْ، نغَمْ ندُ تَمْݠُندُ؞»

39ڢَحِنْ عٛيٜحِ، عٛوَطِ دٛعَ بَنَ عٛوَطْنٛ نَانٜ؞ 40ندٜ عٛلٛرْتِ، عٛتَوْتِ ࢡٜ ࢡٜ طٛنْ طَانِ ڢَحِنْ، نغَمْ غِتٜ مَࢡّٜ تٜدِّ؞ ࢡٜعَنْدَا کٛ ࢡٜنجَابٛتٛ مٛ؞

41ندٜ عٛوَرِ حَا مَࢡّٜ تَتَࢡْرٜ، عٛوِعِ ࢡٜ‏: «عٛنْ طٛنْ طَانِ حَا جٛنْتَ نَ؟ عٛنْ طٛنْ شِوْتٛ نَ؟ حٜعِ کَدِ، سَاعِ وَطِ‏! جٛنْتَ ࢡٜندٛکَّنْ ࢡِي-نٜطّٛ حَا جُوطٜ حَکّٜعٜنْ؞ 42عُمّٜ، ندِلّٜنْ‏! ندَا زَمْبٛتٛوطٛ يَمْ ࢡَدِتَکٜ؞»

نَنغٜىٰکِ عِيسَى

(مَتَّ 26‏:47‏-56؛ لُکَ 22‏:47‏-53؛ يُحَنَّ 18‏:3‏-12)

43دِغَ عِيسَى تِمِّنَايْ وٛلْوُغٛ تَوٛنْ، يَحُودَ، غٛوتٛ ندٜرْ ݠُکَرَعٜنْ مَاکٛ سَݠّٛ عٜ طِطٛ غٛ وَرِ؞ مٛوࢡْرٜ طُوطْندٜ وَرْدِ بٜى مَاکٛ بٜى کَاڢَاجٜ عٜ شَبِّ، مَوْࢡٜ لِمَنْعٜنْ عٜ مٛودِࢡّٜ تَوْرٜىٰتَ عٜ ندٛتِّعٜنْ دَوْرٛوࢡٜ نٜلِ ࢡٜ؞ 44يَحُودَ زَمْبٛتٛوطٛ عِيسَى حٛکُّنٛ ࢡٜ عَلَامَ، وِعِ‏: «مٛ مِحٜبَّتَ، طُمْ کَنغْکٛ؞ نَنغٜ مٛ، ندِلِّرٜ مٛ، عَيْنٜ مٛ بٛوطُّمْ؞» 45ندٜ عٛيٛتِّ، عٛࢡَدِتِ عِيسَى، عٛوِعِمٛ‏: «مٛودِبّٛ؞» ندٜنْ عٛحٜبِّمٛ؞ 46ندٜنْ وٛطْࢡٜ بٛو عُکِّ دٛوْ عِيسَى، نَنغِمٛ؞ 47عَمَّا غٛوتٛ حَا دَرِيࢡٜ تٛنْ لٛسِ کَاڢَحِ مُوطُمْ، ڢٜعِّ مَشُّطٛ حٛورٜىٰجٛ لِمَنْعٜنْ، تَعِمٛ نٛڢْرُ؞ 48عِيسَى وِعِ ࢡٜ‏: «کٛنِ عٛنْ نغَرِ بٜى کَاڢَاجٜ عٜ شَبِّ نغَمْ نَنغُغٛ يَمْ بَنَ مِ ݠَسٛووٛ؟ 49ࢩَلْطٜ ڢُو مِ طٛنّٛ وٛنْدِ بٜى مٛوطٛنْ ندٜرْ حَيْکَلِيرُ، مِطٛنْ عٜکِّتِنَ عٛنْ، عٛنْ نَنغَايْ يَمْ؞ عَمَّا طُمْ وَطِ نغَمْ غٛونغْطِنْغٛ کٛ وِنْدَ ندٜرْ دٜڢْتٜرٜ سٜنِيندٜ#لُکَ 19‏:47؛ 21‏:37؞؞» 50ندٜنْ ݠُکَرَعٜنْ ڢُو ندٛغِّ عَشِّمٛ؞

51سُکَ ڢٜىٰرٜ تٛکِّ عِيسَى، عٛطٛنْ وَکِّ سُدَّارٜ تَنْ دٛوْ ࢡَنْدُ مَاکٛ؞ ࢡٜنَنغِمٛ، 52عَمَّا عٛتٜىٰتِ، عٛوُدِنِ سُدَّارٜ، عٛدٛغِّ عٛتٜمْبٛ، عٛدَطِ؞

عِيسَى يٜىٰسٛ مَوْࢡٜ لِمَنْعٜنْ عٜ ندٛتِّعٜنْ عٜ مٛودِࢡّٜ تَوْرٜىٰتَ

(مَتَّ 26‏:57‏-68؛ لُکَ 22‏:54‏-55‏،63‏-71؛ يُحَنَّ 18‏:13‏-14‏،19‏-24)

53ࢡٜنجَحْرِ عِيسَى حَا حٛورٜىٰجٛ لِمَنْعٜنْ؞ مَوْࢡٜ لِمَنْعٜنْ عٜ ندٛتِّعٜنْ عٜ مٛودِࢡّٜ تَوْرٜىٰتَ ڢُو طٛنْ مٛوࢡْتِ تٛنْ؞ 54ݠِيٜرْ تٛکِّ دَايِيطُمْ، عٛنَسْتِ سَارٜ حٛورٜىٰجٛ لِمَنْعٜنْ؞ عٛجٛوطٛدِ بٜى عَيْنٛوࢡٜ، عٛطٛنْ عَيْتِنٛ يِيتٜ؞ 55مَوْࢡٜ لِمَنْعٜنْ عٜ حِيتٛوࢡٜ ندٜرْ دَوْرِيندٜ ڢُو طَࢡِّ وُلَّاندُ دٛوْ عِيسَى حَا ࢡٜندٛعَّ مٛ کِيتَ مَايْدٜ، عَمَّا ࢡٜکٜࢡَايْ؞ 56سٜىٰدٛوࢡٜ طُوطْࢡٜ شٜىٰدِ ݠٜوٜ دٛوْ مَاکٛ، عَمَّا بٛلّٜ مَࢡّٜ لُوتِندِرِ؞ 57ندٜنْ وٛطْࢡٜ مَࢡّٜ عُمِّ شٜىٰدِ ڢٜوْرٜ ندٜعٜ دٛوْ مَاکٛ، ࢡٜمبِعِ‏: 58«مِنْ نَنِ بٜى نٛݠِّ عَمِنْ عٛوِعِ‏: مِيِبِّنَنْ حَيْکَلِيرُ ندُ يِمْࢡٜ مَحِ عٜ مِمَحِتَنْ ندُ ندٜرْ ࢩَلْطٜ تَتِ، نَا بٜى جُوطٜ يِمْࢡٜ#يُحَنَّ 2‏:19؞؞» 59عَمَّا کَمْࢡٜ بٛو، سٜىٰدَمْکُوجِ مَࢡّٜ نجَحْدَايْ؞

60حٛورٜىٰجٛ لِمَنْعٜنْ عُمِّ، دَرِ شَکَ يِمْࢡٜ، ࢨَمِ عِيسَى‏: «عَجَابَتَاکٛ کٛو طُمٜ دٛوْ غُلَّالِ وُلِّيࢡٜ ࢡٜعٜ نَ؟» 61عَمَّا عِيسَى جٜىٰطِ، جَابَاکِ سَمْ؞ ڢَحِنْ حٛورٜىٰجٛ لِمَنْعٜنْ ࢨَمِمٛ‏: «عَنْ عَ اَلْمَسِيحُ، ࢡِطّٛ اَللَّه تٜدُّطٛ نَ؟» 62عِيسَى وِعِ‏: «عٛوحٛ، مِنْ وٛنِ کَنغْکٛ، عٛنٛنْ بٛو عٛنْ نغِعَنْ ࢡِي-نٜطّٛ طٛنْ جٛوطِ حَا ࢩَامٛ اَللَّه بَاوْطٛ، عٛوَرَنْ ندٜرْ دُولٜ عَسَمَ#دَنِيٜلْ 7‏:13؞؞» 63حٛورٜىٰجٛ لِمَنْعٜنْ سٜىٰکِ لِمْشٜ مُمْ، وِعِ‏: «وَلَا حَاجٜ عٜنْ طَࢡِّتَ سٜىٰدٛوࢡٜ ڢٜىٰرٜ؞ 64عٛنْ نَنِ کَلُّکَ مَاکٛ دٛوْ اَللَّه؞ طُمٜ عٛنْ مبِعَتَ دٛوْ مَاجُمْ؟» ࢡٜ ڢُو ࢡٜنجَابِ عٛ عَيْبُطٛ، ࢡٜکِيتِمٛ کِيتَ مبَرٜىٰغٛ#ڢَرِلَّاجِ لٜوِعٜنْ 24‏:16؞؞

65وٛطْࢡٜ مَࢡّٜ تُوتِ تُوطٜ دٛوْ عِيسَى؞ ࢡٜشُدِّ غِتٜ مَاکٛ، ࢡٜلُکِّمٛ، ندٜنْ ࢡٜمبِعِمٛ‏: «عَنْدِتُ، مٛيْ وَطِ مَ طُمْ؟» عَيْنٛوࢡٜ بٛو کٛوعِمٛ، مَارِمٛ؞

ݠِيٜرْ وِعِ عٛعَنْدَا عِيسَى

(مَتَّ 26‏:69‏-75؛ لُکَ 22‏:56‏-62؛ يُحَنَّ 18‏:15‏-18‏،25‏-27)

66ندٜ ݠِيٜرْ طٛنّٛ حَا لٜسْ، حَا دَلْدَلْ سَارٜ تَوٛنْ، غٛوتٛ حَا حٛرْࢡٜ حٛورٜىٰجٛ لِمَنْعٜنْ وَرِ؞ 67ندٜ عٛيِعِ ݠِيٜرْ طٛنْ عَيْتِنٛ يِيتٜ، عٛلَارِمٛ، عٛوِعِ‏: «عَنْ بٛو عَطٛنّٛ وٛنْدِ بٜى عِيسَى نَسَرَتُوجٛ؞» 68عَمَّا ݠِيٜرْ يٜدِّ، وِعِ‏: «مِعَنْدَا، مِڢَامَايْ کٛ عَوِعِ؞» ندٜنْ عٛدِلِّ حَا زَوْلٜىٰرُ؞ سَاعِ مَاجُمْ عَسْغُمْرِ#14‏:68 عَسْغُمْرِ مَلَّ عَغُغُمْرِ؞ عُعِ؞ 69کٛرْطٛ غٛ يِعِمٛ، وِعِ دَرِيࢡٜ تٛنْ ڢَحِنْ‏: «عٛو طٛ، عٛ غٛوتٛ مَࢡّٜ؞» 70عَمَّا ڢَحِنْ ݠِيٜرْ يٜدِّ؞ ࢡَاوٛ مَاجُمْ سٜطَّ دَرِيࢡٜ تٛنْ مبِعِ ݠِيٜرْ‏: «ڢَکَتْ عَ غٛوتٛ مَࢡّٜ، نغَمْ عَنْ بٛو عَ غٛطّٛ غَلِيلِ؞» 71ݠِيٜرْ ڢُطِّ حُنَاغٛ‏: «اَللَّه حِيتٛ يَمْ تٛ مِڢٜوِ‏! مِعَنْدَا غٛرْکٛ مٛ عٛنْ مبٛلْوَنْتَ طٛ؞» 72سَاعِ مَاجُمْ عَسْغُمْرِ عُعِ طِطَوْرٜ؞ ݠِيٜرْ سِڢْتٛرِ وٛلْدٜ ندٜ عِيسَى وِعْنٛ مٛ‏: «حِدّٜکٛ عَسْغُمْرِ عُعَ ندٜ طِطِ، عَنْ عَوِعَنْ ندٜ تَتِ عَعَنْدَا يَمْ؞» ندٜنْ عٛوَيْلِتِ عٛڢُطِّ وٛيُغٛ؞

Currently Selected:

مَرْکُسْ 14: داَ

Highlight

Copy