مَرْکُسْ 13

عِيسَى طٛنْ عَنْدِنَ غِبِّنْکِ حَيْکَلِيرُ

(مَتَّ 24‏:1‏-2؛ لُکَ 21‏:5‏-6)

1ندٜ عِيسَى وُرْتِ حَيْکَلِيرُ، غٛوتٛ حَا ݠُکَرَعٜنْ مَاکٛ وِعِمٛ‏: «مٛودِبّٛ، لَارْ نٛ کَاعٜ عٜ ࢩِࢡْلٜ طٜعٜ مبٛوطِرِ‏!» 2عِيسَى جَابِمٛ‏: «عَطٛنْ يِعَ ࢩِࢡْلٜ مَوْطٜ طٜعٜ نَ؟ ڢَکَتْ، حَيْرٜ لُتَّتَا دٛوْ حَيْرٜ، ࢡٜنغِبِّنَنْ کٛو طُمٜ ڢُو؞»

ࢡِلَّاجٜ عٜ تٛوࢩَانغٜىٰجِ

(مَتَّ 24‏:3‏-14؛ لُکَ 21‏:7‏-19)

3عِيسَى طٛنْ جٛوطِ دٛوْ حٛوسٜىٰرٜ جَيْتُنْجٜ حَا حُوشِتِرْدٜ حَيْکَلِيرُ؞ ݠِيٜرْ عٜ يَاکُبَ عٜ يُحَنَّ عٜ عَندِرٜ ڢٜىٰرٜ مَࢡّٜ ࢨَمِمٛ‏: 4«يٜشُّ مِنْ ندٜيْ کُوجٜ طٜعٜ لَاتٛتٛ عٜ عَلَامَ کَيٜ وَنغِنْتَ سَاعِيرٜ تِمّٛودٜ کُوجٜ طٜعٜ ڢُو؟»

5ندٜنْ عِيسَى ڢُطِّ وِعُغٛ ࢡٜ‏: «کَکِّلٜ، نغَمْ تَا غٛطّٛ مَجِّنَ عٛنْ؞ 6طُوطْࢡٜ نغَرَنْ بٜى عِنْدٜ عَمْ، ࢡٜمبِعَنْ‏: مِنْ وٛنِ اَلْمَسِيحُ، ࢡٜمَجِّنَنْ يِمْࢡٜ طُوطْࢡٜ؞ 7تٛ عٛنْ نَنِ حَبَرُ کٛنُوجِ ࢡَدِيطِ عٜ دَايِيطِ، تَا کُلْتٛرٜ، دٛولٜ طُمْ لَاتٛ، عَمَّا نَا طُمْ تِمّٛودٜ تَوٛنْ؞ 8عُمَّاتٛورٜ حَࢡَنْ بٜى عُمَّاتٛورٜ وٛطْندٜ، لَامُ عُمَّنْتٛ لَامُ ڢٜىٰرٜ؞ دِمْبَنْطٜ لٜسْدِ مبَطَنْ حَا نٛکُّوجٜ ڢٜىٰرٜ ڢٜىٰرٜ، نٛنْ بٛو وٜىٰلٛ؞ طُمْ لَاتٛتٛ بَنَ ڢُطَّمْ لُووٜ دَࢩُغٛ؞

9«عَمَّا عٛنٛنْ، کَکِّلَنٜ کٛعٜ مٛوطٛنْ، نغَمْ ࢡٜنَنغَنْ عٛنْ، ࢡٜنجَحْرَنْ عٛنْ يٜىٰسٛ حِيتٛوࢡٜ؞ ࢡٜݠِيَنْ عٛنْ ندٜرْ شُوطِ دٜوَلْ يَحُودُعٜنْ؞ عٛنْ ندَرٛتٛ يٜىٰسٛ مَوْࢡٜ عٜ لَامِيࢡٜ نغَمْ دَلِيلَ عَمْ، حَا عٛنْ مبَطَ سٜىٰدَمْکُ مٛوطٛنْ يٜىٰسٛ مَࢡّٜ؞ 10سٜيْ عُمَّاتٛوجٜ ڢُو نَنَ وَازُ لِنْجِيلَ تَوٛنْ؞ 11تٛ ࢡٜنَنغِ عٛنْ، ࢡٜنجَحْرِ عٛنْ يٜىٰسٛ حِيتٛوࢡٜ، تَا شُکْلَنٜ کٛ مبِعٛتٛنْ؞ عَمَّا تٛ وَکَّتِ مَنْ وَرِ، مبٛلْوٜ بٛلّٜ طٜ عٛنْ کٜࢡَتَ؞ کَنْجٜ طٜ عِوَتَا حَا مٛوطٛنْ، عَمَّا حَا رُوحُ شٜنِيطٛ#مَتَّ 10‏:17‏-20؛ لُکَ 12‏:11‏-12؞؞ 12يِمْࢡٜ ندٛکَّنْ دٜىٰرْطِرَاࢡٜ مُوطُمْعٜنْ نغَمْ مبَرٜىٰغٛ، بَابِرَاࢡٜ مبَطَنْ ࢡِکّٛيْ مُوطُمْعٜنْ بَنَ نٛنْ، ࢡِکّٛيْ عُمَّنْتٛ سَارٛعٜنْ مُوطُمْعٜنْ عٜ کٛيْ مبَرَنْ ࢡٜ؞ 13کٛو مٛيْ ڢُو وَࢩَنْ عٛنْ دَلِيلَ عِنْدٜ عَمْ؞ عَمَّا مٛ مُࢩِ حَا تِمّٛودٜ، عٛحِسَنْ#مَتَّ 10‏:22؞؞»

ࢩِدُّطُمْ نَتِّنٛوجُمْ

(مَتَّ 24‏:15‏-28؛ لُکَ 21‏:20‏-24)

14عِيسَى وِعِ بٛو‏: «عٛنْ نغِعَنْ کٛ وِعٜتٜ ࢩِدُّطُمْ نَتِّنٛوجُمْ طٛنْ دَرِ حَا ݠٜلّٜلْ نغٜلْ حَانَايْ طُمْ دَرٛ؞ مٛ جَنغِ طُمْ، سٜيْ ڢَامَ بٛوطُّمْ‏! ندٜنْ کَمْ سٜيْ وٛنْࢡٜ لٜسْدِ يَحُدِيَ ندٛغَّ حَا کٛوسٜىٰجٜ#دَنِيٜلْ 9‏:27؛ 11‏:31؛ 12‏:11؞؞ 15مٛ طٛنْ دٛوْ سٛورٛوٛلْ، تَا جِݠّٛ نغَمْ حٛوشُغٛ کٛو طُمٜ ندٜرْ مَاغٛلْ؞ 16مٛ طٛنْ حَا نغٜسَ، تَا حٛوتَ سَارٜ نغَمْ حٛوعُغٛ لِمْشٜ مُمْ#لُکَ 17‏:31؞؞ 17کَيْتٛ‏! بٛنٜ لَاتَنْتٛ رٜىٰدُعٜنْ عٜ مُسِنِنَنْࢡٜ ندٜرْ ࢩَلْطٜ مَنْ‏! 18تٛرٜ اَللَّه نغَمْ تَا طُمْ لَاتٛ سَاعِ دُومٛلْ؞ 19نغَمْ ندٜرْ ࢩَلْطٜ مَاجُمْ ࢡِلَّارٜ نَاوْندٜ وَطَنْ، بَنَ مَارٜ مٜىٰطَايْ وَطٜىٰغٛ دِغَ ڢُطّٛودٜ دُنِيَارُ حَا وَرْغٛ حَنْدٜ، ندٜ مٜىٰتَتَا وَطُغٛ بٛو#دَنِيٜلْ 12‏:1؛ وَحَيُ يُحَنَّ 7‏:14؞؞ 20تٛ اَللَّه عُسْتَايْنٛ لِمْغَلْ ࢩَلْطٜ مَنْ، وَلَا کٛو غٛوتٛ حِسَنّٛ؞ عَمَّا عٛعُسْتِ طٜ نغَمْ دَلِيلَ يِمْࢡٜ مَاکٛ ࢡٜ عٛ سُࢡِ؞

21«وَکَّتِ مَنْ، تٛ غٛطّٛ وِعِ عٛنْ‏: ندَا اَلْمَسِيحُ حَا طٛ مَلَّ‏: ندَا مٛ حَا تٛ، تَا نجَࢡٜ؞ 22نغَمْ ڢٜوٛوࢡٜ وِعَنْࢡٜ ࢡٜعَلْمَسِيحُعٜنْ مَلَّ ࢡٜعَنَّبِعٜنْ مبَنغَنْ، ࢡٜمبَطَنْ عَلَامَاجِ عٜ کَايٜىٰڢِيجِ نغَمْ ࢡٜمَجِّنَ کٛو سُࢡَاࢡٜ بٛو، تٛ طُمْ حٜࢡٛتٛ؞ 23عٛنٛنْ، کَکِّلٜ‏! مِيٜشِّ عٛنْ طُمْ ڢُو دِغَ عَرَنْ؞»

لٛرَاکِ ࢡِي-نٜطّٛ

(مَتَّ 24‏:29‏-35؛ لُکَ 21‏:25‏-33)

24ندٜرْ ࢩَلْطٜ ࢡَاوٛ ࢡِلَّارٜ ندٜعٜ، نَانغٜ ࢩِࢡَّنْ، لٜوْرُ عَشَّنْ يَيْنُغٛ#عٜسَايَ 13‏:10؛ عٜزٜکِيٜلْ 32‏:7؛ يٛوعٜلْ 2‏:10؛ 3‏:4؛ 4‏:15؛ وَحَيُ يُحَنَّ 6‏:12؞، 25کٛودٜ عَسَمَ نجَنَنْ، بَاوْطٜىٰجِ عَسَمَ بٛو ندِمْبٛتٛ#عٜسَايَ 13‏:10؛ يٛوعٜلْ 2‏:10؛ وَحَيُ يُحَنَّ 6‏:13؞؞ 26ندٜنْ ࢡِي-نٜطّٛ وَنغَنْ غِتٜ يِمْࢡٜ، عٛوَرَنْ ندٜرْ دُولٜ بٜى تٜدُّنغَلْ عٜ بَاوْطٜ مَوْطٜ#دَنِيٜلْ 7‏:13؛ وَحَيُ يُحَنَّ 1‏:7؞؞ 27عٛنٜلَنْ مَلَاعِکَعٜنْ حَا عَلْکِبِلَاجِ نَيِ نغَمْ مٛوࢡْتُغٛ سُࢡَاࢡٜ مَاکٛ دِغَ کٜىٰرٛلْ دُنِيَارُ نغٛعٛلْ حَا نغٛلَ؞

28ݠَامٜ کٛ عِبِّ عَنْدِنْتَ عٛنْ‏: تٛ لِشٜ مَاکِ کٜسْطِتِ، حَاکٛوجِ مَاکِ بٛو مبِلِتِ، عٛنْ عَنْدِ دُومٛلْ ࢡَدَکٜ؞ 29بَنَ نٛنْ عٛنٛنْ بٛو، تٛ عٛنْ نغِعِ کُوجٜ طٜعٜ طٛنْ لَاتٛ، عَنْدٜ عٛࢡَدَکٜ وَرْغٛ؞ 30غٛونغَ مبِعَنْمِ عٛنْ‏: کُوجٜ طٜعٜ ڢُو لَاتٛتٛ حِدّٜکٛ يِمْࢡٜ زَمَنُورُ ندُعُ ڢُو مَايْدَ؞ 31عَسَمَ عٜ لٜسْدِ نجِنَّنْ، عَمَّا بٛلّٜ عَمْ نجِنَّتَا سَمْ؞

اَللَّه تَنْ عَنْدِ ࢩَلَادٜ دَرْنغَلْ

(مَتَّ 24‏:36‏-44)

32«عَمَّا وَلَا مٛ عَنْدِ ࢩَلَادٜ مَاجُمْ کٛو سَاعَ مَاجُمْ، مَلَاعِکَعٜنْ عَنْدَا، کٛو ࢡِطّٛ بٛو عَنْدَا، سٜيْ بَابِرَاوٛ تَنْ عَنْدِ#مَتَّ 24‏:36؞؞ 33کَکِّلٜ‏! عَيْنٜ‏! نغَمْ عٛنْ عَنْدَا ندٜيْ سَاعِ مَاجُمْ لَاتٛتٛ؞ 34طُمْ لَاتٛتٛ بَنَ تٛ غٛطّٛ دِلِّ جَحَانغَلْ، عَشِّ سَارٜ مُمْ، حَلْڢِتِنِ حُووٛوࢡٜ مُوطُمْ غٛوتٛ غٛوتٛ ڢُو کُوغَلْ مُوطُمْ، عُمْرِ عَيْنٛووٛ سَارٜ عٛعَيْنَ#لُکَ 12‏:36‏-38؞؞ 35نغَمْ مَاجُمْ عَيْنٜ، ندٜ نِي عٛنْ عَنْدَا ندٜيْ جَوْمُ سَارٜ وَرْتَتَ، کِيکِيطٜ مَلَّ شَکَ جٜمَّ مَلَّ بٛو بَࢡّٛلْ، کٛو ڢَجِرِ؞ 36تٛ عٛوَرْتِ بٜى جُحُکِ، تَا عٛتَوْتَ عٛنْ طٛنْ طَانِ؞ 37کٛ مِوِعِ عٛنْ، مِطٛنْ وِعَ طُمْ يِمْࢡٜ ڢُو‏: عَيْنٜ‏!»

Currently Selected:

مَرْکُسْ 13: داَ

Highlight

Copy