مَرْکُسْ 12

بَلْندٛلْ رٜمٛوࢡٜ حَلُّࢡٜ

(مَتَّ 21‏:33‏-46؛ لُکَ 20‏:9‏-19)

1ندٜنْ عِيسَى ڢُطِّ وٛلْوَنْغٛ ࢡٜ بٜى بَلْندِ؞ عٛوِعِ‏: «غٛطّٛ جُبِ نغٜسَ عِنَبٛوجٜ، عٛحٛوِ کَ، عٛوَطِ ࢡِطِّرْدٜ عِنَبٛوجَمْ، عٛمَحِ سُودُ تٛوْندُ نغَمْ عَيْنٛووٛ نغٜسَ؞ ندٜنْ عٛحَلْڢِنِ کَ رٜمٛوࢡٜ، عٛدِلِّ جَحَانغَلْ#عٜسَايَ 5‏:1‏-2؞؞ 2ندٜ سَاعِ تٜࢡُغٛ عِنَبٛوجٜ وَطِ، عٛنٜلِ جَغِّيطٛ مَاکٛ حَا رٜمٛوࢡٜ غٛ نغَمْ عٛجَࢡَنَ مٛ غٜطَلْ مَاکٛ حَا عِنَبٛوجٜ؞ 3عَمَّا ࢡٜنَنغِ جَغِّيطٛ عٛو، ࢡٜݠِيِمٛ، ࢡٜندِيوِمٛ جُنغٛ سٛوکٛ؞ 4ندٜنْ جَوْمُ نغٜسَ نٜلِ جَغِّيطٛ مُوطُمْ ڢٜىٰرٜ؞ کَنغْکٛ بٛو رٜمٛوࢡٜ نَاوْنِمٛ حَا حٛورٜ، ࢡٜتٛسْکِمٛ؞ 5جَوْمُ نغٜسَ نٜلِ جَغِّيطٛ مُوطُمْ ڢٜىٰرٜ ڢَحِنْ، عَمَّا ࢡٜمبَرِمٛ؞ بَنَ نٛنْ ࢡٜمبَطِ طُوطْࢡٜ، ࢡٜݠِيِ وٛطْࢡٜ، ࢡٜمبَرِ وٛطْࢡٜ بٛو؞ 6لُتَّنِ جَوْمُ نغٜسَ ࢡِطّٛ غٛوتٛ تَنْ، غِطَاطٛ مَاکٛ؞ حَا رَغَرٜ مَنْ عٛنٜلِمٛ حَا رٜمٛوࢡٜ غٛ، عٛنُمِ‏: ࢡٜتٜدِّنَنْ ࢡِيَمْ کَمْ؞ 7عَمَّا رٜمٛوࢡٜ ࢡٜعٜ شَرْوٛوتِرِ، ࢡٜمبِعِ‏: ندَا کَنغْکٛ تَمِّ رٛنُغٛ؞ سٜيْ عٜنْ مبَرَ مٛ، ندٜنْ عٜنْ مَرْتَ ندٛنْنغُ مَاکٛ؞ 8ندٜنْ ࢡٜنَنغِ ࢡِطّٛ غٛ، ࢡٜمبَرِمٛ، ࢡٜنغُدِنِمٛ يَاسِ نغٜسَ؞»

9ندٜنْ عِيسَى تٛکِّ وِعُغٛ‏: «طُمٜ جَوْمُ نغٜسَ وَطَتَ؟ عٛوَرَنْ، عٛحَلْکَنْ رٜمٛوࢡٜ غٛ، عٛحٛکَّنْ نغٜسَ عِنَبٛوجٜ حَا وٛطْࢡٜ؞ 10وَلَا سٜکٛ عٛنْ نجَنغِ عَايَ کَعَ‏:

حَيْرٜ ندٜ مَحٛوࢡٜ نغُدِنِ،

لَاتِ حَيْرٜ تَلْکُمٛورٜ ࢡُرْندٜ سَمَنْ؞

11جَوْمِرَاوٛ وَطِ طُمْ،

طُمْ کَايٜىٰڢِ حَا غِتٜ مٜىٰطٜنْ#جَبُورَ 118‏:22‏-23؞؞»

12مَوْࢡٜ يَحُودُعٜنْ طَࢡِّ نَنغُغٛ عِيسَى، نغَمْ ࢡٜعَنْدِ عٛوٛلْوِ بَلْندٛلْ نغٛلْ دٛوْ مَࢡّٜ؞ عَمَّا ࢡٜکُلِ مٛوࢡْرٜ، نغَمْ مَاجُمْ ࢡٜعَشِّمٛ، ࢡٜندِلِّ؞

جٛمٛرْغٛلْ نغَمْ لَامِيطٛ

(مَتَّ 22‏:15‏-22؛ لُکَ 20‏:20‏-26)

13ࢡٜنٜلِ ڢَرِسَعٜنْ وٛطْࢡٜ عٜ يِمْࢡٜ حِرُدُسْ حَا عِيسَى نغَمْ نَنغُغٛ مٛ ندٜرْ ࢨَمٛلْ تُوڢْنٛرْغٛلْ؞ 14ࢡٜنغَرِ، ࢡٜمبِعِمٛ‏: «مٛودِبّٛ، مِنْ عَنْدِ وَلَا کٛ يَالِ مَ بٜى غٛطّٛ، نغَمْ عَسٜنْدِندِرْتَا يِمْࢡٜ، عَمَّا عَطٛنْ عَنْدِنَ لَاوٛلْ اَللَّه بٜى غٛونغَ؞ يٜشُّ مِنْ، طُمْ کَاندُطُمْ حٛکُّغٛ لَامِيطٛ رٛمَ جٛمٛرْغٛلْ نَ؟ مِنْ ندٛکَّ نَ مَلَّ مِنْ شَلٛ حٛکُّغٛ؟» 15ندٜ عِيسَى عَنْدِ نَاڢِکَارٜ مَࢡّٜ، عٛجَابِ ࢡٜ‏: «کٛنِ عٛنْ تُوڢَنِ يَمْ تُوڢٛرْغٛلْ؟ نغَدَّنٜىٰطَمْ سُلٜيْرٜ حَا مِيِعَ؞» 16ࢡٜنغَدَّنِمٛ؞ عِيسَى ࢨَمِ ࢡٜ‏: «سُورَ مٛيْ عٜ عِنْدٜ مٛيْ دٛوْ مَارٜ؟» ࢡٜنجَابِمٛ‏: «کَيْسَرَ، لَامِيطٛ رٛمَ جٜيِ؞» 17ندٜنْ عِيسَى وِعِ ࢡٜ‏: «نجٛࢡٜ کَيْسَرَ، کٛ حَانَنِمٛ، ندٛکّٜ اَللَّه بٛو کٛ حَانَنِمٛ؞» جَاوَابُ مَاکٛ حَيْطِنِ ࢡٜ مَسِنْ؞

ࢨَمٛلْ دٛوْ عُمِّتِنٜىٰکِ مَايْࢡٜ

(مَتَّ 22‏:23‏-33؛ لُکَ 20‏:27‏-40)

18سَدُکِعٜنْ وِعَنْࢡٜ مَايْࢡٜ عُمِّتِتَّاکٛ نغَرِ حَا عِيسَى؞ ࢡٜࢨَمِمٛ ࢨَمٛلْ نغٛعٛلْ#کُوطٜ نٜلَاࢡٜ 23‏:8؞‏: 19«مٛودِبّٛ، مُوسَى وِنْدَنِ عٜنْ عُمْرٛورٜ ندٜعٜ‏: تٛ غٛطّٛ مَايِ، عَشِّ دٜبّٛ مٛ وَلَانٛ ࢡِنغٜلْ، سٜيْ دٜىٰرْطِيکٛ تٜعَ مٛ نغَمْ حَا ࢡٜکٜࢡَنَ مَايْطٛ دَࢩْغٛلْ#تٛوکْتَاکِ تَوْرٜىٰتَ 25‏:5؞؞ 20وٛودِنٛ دٜىٰرْطِرَاࢡٜ نجٛوٜىٰطِطٛ؞ عَرَنٛ تٜعِ دٜبّٛ، مَايِ، عَشَّايْ ࢡِکّٛيْ؞ 21طِطَࢡٛ تٜعِمٛ، مَايِ، کَنغْکٛ بٛو عٛعَشَّايْ ࢡِکّٛيْ، بَنَ نٛنْ بٛو تَتَࢡٛ؞ 22حَا نجٛوٜىٰطِطٛ تٜعْࢡٜ دٜبّٛ عٛو ڢُو مَايِ، ࢡٜعَشَّايْ ࢡِکّٛيْ؞ ࢡَاوٛ مَࢡّٜ دٜبّٛ بٛو مَايِ؞ 23ࢩَلَادٜ عُمِّتِنٜىٰکِ، تٛ مَايْࢡٜ عُمِّتَکٜ، دٜبّٛ مٛيْ عٛلَاتَنْتٛ شَکَ مَࢡّٜ کَدِ؟ نغَمْ ࢡٜ نجٛوٜىٰطِطٛ ڢُو ࢡٜتٜعِنٛ مٛ؞»

24عِيسَى جَابِ ࢡٜ‏: «عٛنْ طٛنْ مبٛوڢَ مَسِنْ‏! نغَمْ عٛنْ عَنْدَا دٜڢْتٜ شٜنِيطٜ، عٛنْ عَنْدَا بٛو بَاوْطٜ اَللَّه؞ 25نغَمْ تٛ مَايْࢡٜ عُمِّتَکٜ، وَلَا تٜىٰغَلْ ڢَحِنْ، ࢡٜلَاتٛتٛ بَنَ مَلَاعِکَعٜنْ حَا عَسَمَ؞ 26کٛ لَارَنِ حَالَ مَايْࢡٜ عٜ عُمِّتِنٜىٰکِ مَࢡّٜ، عٛنْ مٜىٰطَايْ جَنغُغٛ کٛ وِنْدَ ندٜرْ دٜڢْتٜرٜ مُوسَى دٛوْ حَالَ وُمْرٜ نَ؟ تٛنْ اَللَّه وِعِ مُوسَى‏: مِنْ وٛنِ اَللَّه إِبْرَاهِيمَ عٜ اَللَّه إِسْحَاقَ عٜ اَللَّه يَعْقُوبُ نَ#غُرْتَاکِ 3‏:6؞‏! 27اَللَّه عٛ اَللَّه يٜىٰطْࢡٜ، نَا عٛ اَللَّه مَايْࢡٜ؞ نغَمْ مَاجُمْ عٛنْ مبٛوڢِ مَسِنْ؞»

عُمْرٛورٜ ࢡُرْندٜ مَوْنُغٛ

(مَتَّ 22‏:34‏-40؛ لُکَ 10‏:25‏-28)

28غٛوتٛ ندٜرْ مٛودِࢡّٜ تَوْرٜىٰتَ نَنِ کُجّٛوتِرَلْ مَࢡّٜ، عٛنَنِ عِيسَى جَابِ سَدُکِعٜنْ بٛوطُّمْ، ندٜنْ عٛࢨَمِمٛ‏: «دٛوْ عُمْرٛوجٜ ڢُو، عُمْرٛورٜ ندٜيٜ ࢡُرِ مَوْنُغٛ؟» 29عِيسَى جَابِ‏: «ندَا عُمْرٛورٜ ࢡُرْندٜ مَوْنُغٛ‏: عٛنٛنْ إِسْرَاءِيلَعٜنْ، نَنٜ‏: اَللَّه جَوْمِرَاوٛ مٜىٰطٜنْ، عٛ غٛوتٛ؞ 30يِطْ جَوْمِرَاوٛ، اَللَّه مَاطَ بٜى ࢡٜرْندٜ مَ ڢُو، بٜى يٛنغْکِ مَ ڢُو، بٜى حَکِّيلٛ مَ ڢُو عٜ بٜى سٜمْبٜ مَ ڢُو#تٛوکْتَاکِ تَوْرٜىٰتَ 6‏:4‏-5؞؞ 31ندَا عُمْرٛورٜ طِطَوْرٜ‏: يِطْ کٜىٰدِّطِّرَاوٛ مَاطَ بَنَ حٛورٜ مَاطَ؞ وَلَا عُمْرٛورٜ ڢٜىٰرٜ ࢡُرِ طٜعٜ؞#ڢَرِلَّاجِ لٜوِعٜنْ 19‏:18؞» 32ندٜنْ مٛودِبّٛ تَوْرٜىٰتَ وِعِ عِيسَى‏: «بٛوطُّمْ مٛودِبّٛ؞ کٛ عَوِعِ، طُمْ غٛونغَ‏: جَوْمِرَاوٛ اَللَّه عٛ غٛوتٛ، وَلَا اَللَّه ڢٜىٰرٜ، سٜيْ کَنغْکٛ تَنْ#تٛوکْتَاکِ تَوْرٜىٰتَ 4‏:35؞؞ 33سٜيْ کٛو مٛيْ ڢُو يِطَ اَللَّه بٜى ࢡٜرْندٜ عٜ حَکِّيلٛ عٜ سٜمْبٜ مُمْ ڢُو، سٜيْ عٛيِطَ کٜىٰدِّطِّيکٛ بٛو بَنَ نٛ عٛيِطِرْتَ حٛورٜ مَاکٛ؞ طُمْ ࢡُرِ دٛکّٜ دَبَّاجِ غُلَاطِ عٜ لِيعَاطِ ڢُو#حٛسٜعَ 6‏:6؞؞» 34عِيسَى نَنِ عٛجَابِ بٛوطُّمْ بٜى حِکْمَ، ندٜنْ عٛوِعِمٛ‏: «عَدَايَاکِ لَامُ اَللَّه؞» ࢡَاوٛ مَاجُمْ کٛو مٛيْ حُلِ ࢨَمُغٛ مٛ ࢨَمْطٜ غٛطّٜ؞

اَلْمَسِيحُ عٜ دَاوُدَ

(مَتَّ 22‏:41‏-46؛ لُکَ 20‏:41‏-44)

35ندٜ عِيسَى طٛنْ عٜکِّتِنَ ندٜرْ حَيْکَلِيرُ، عٛوَطِ ࢨَمٛلْ نغٛعٛلْ‏: «نٛيْ مٛودِࢡّٜ مبِعْرَتَ اَلْمَسِيحُ وٛنِ ࢡِي دَاوُدَ؟ 36نغَمْ رُوحُ شٜنِيطٛ طٛوِ دَاوُدَ، عٛوِعِ بٜى حٛورٜ مَاکٛ‏:

جَوْمِرَاوٛ وٛلْوَنِ جَوْمَمْ‏:

جٛوطَ حَا ࢩَامٛ عَمْ،

حَا تٛ مِوَلِّنِ کٛنّٜعٜنْ مَاطَ لٜسْ کٛسْطٜ مَ؞

37دَاوُدَ بٜى حٛورٜ مُوطُمْ عٜوْنِمٛ جَوْمِرَاوٛ، کَدِ نٛيْ اَلْمَسِيحُ لَاتٛرِ ࢡِي دَاوُدَ؟» مٛوࢡْرٜ طُوطْندٜ حٜطِتِ حَالَ عِيسَى بٜى سٜيٛ؞

عِيسَى رٜىٰنْتِنِ مٛوࢡْرٜ دٛوْ مٛودِࢡّٜ تَوْرٜىٰتَ

(مَتَّ 23‏:1‏-36؛ لُکَ 20‏:45‏-47)

38ندَا کٛ عٛطٛنْ عٜکِّتِنَ کٛو مٛيْ‏: «ندٜىٰنْتٜ عٜ مٛودِࢡّٜ تَوْرٜىٰتَ، يِطْࢡٜ وَانْشُغٛ بٜى نغَݠَلٜىٰجِ جُوطِّ، ࢡٜنغِطِ يِمْࢡٜ کٛوڢْنَ ࢡٜ حَا لُوࢡٜ؞ 39ندٜرْ شُوطِ دٜوَلْ يَحُودُعٜنْ، ࢡٜنغِطِ جٛوطَاغٛ حَا جٛولٜ تٜدُّطٜ عٜ تٛ ࢡٜعٜوْنَکٜ ࢡٜ نغَمْ ࢩَامْدُ بٛو ࢡٜطَࢡِّتَنْ جٛولٜ شَمْطِنَاطٜ؞ 40ࢡٜطٛنْ نجَࢡْتَ مَرْلٜ رٜوْࢡٜ يُرُمْࢡٜ، ࢡٜطٛنْ نجُوتِنَ دٛعَارٜ نغَمْ يِمْࢡٜ نغِعَ ࢡٜ؞ ࢡٜکٜࢡَنْ کِيتَ نَاوْکَ مَسِنْ؞»

دٛکَّلْ دٜبّٛ جُرُمْطٛ

(لُکَ 21‏:1‏-4)

41ندٜنْ عِيسَى جٛوطِ بَنغٜ بَاتِرْطُمْ شٜىٰدٜ ندٜرْ حَيْکَلِيرُ؞ عٛحَکِّلَنِ يِمْࢡٜ وَاتَنْࢡٜ شٜىٰدٜ ندٜرْ بَاتِرْطُمْ شٜىٰدٜ مَنْ؞ رِسْکُࢡٜ طُوطْࢡٜ ندٛکِّ شٜىٰدٜ طُوطّٜ؞ 42دٜبّٛ جُرُمْطٛ تَلَکَاجٛ بٛو وَرِ، وَاتِ عَنِينِ طِطِ، وَاتٛ شٜىٰدٜ سٜطَّ نٛنْ؞ 43عِيسَى عٜوْنِ ݠُکَرَعٜنْ مُوطُمْ، وِعِ ࢡٜ‏: «غٛونغَ مِطٛنْ وِعَ عٛنْ، دٜبّٛ جُرُمْطٛ تَلَکَاجٛ عٛو وَاتِ ندٜرْ بَاتِرْطُمْ شٜىٰدٜ کٛ ࢡُرِ يِمْࢡٜ وٛطْࢡٜ ڢُو؞ 44نغَمْ کَمْࢡٜ ࢡٜندٛکِّ سٜطَّ دِغَ طُوطٜىٰنغَ جَوْدِ مَࢡّٜ، عَمَّا دٜبّٛ عٛو، کٛو ندٜ عٛ لَاڢُطٛ، عٛحٛکِّ کٛ عٛمَرِ نغَمْ نغُورٜ مَاکٛ ڢُو؞»

Currently Selected:

مَرْکُسْ 12: داَ

Highlight

Copy