مَرْکُسْ 11

عِيسَى نَسْتِ عُرُسَلِيمَ

(مَتَّ 21‏:1‏-11؛ لُکَ 19‏:28‏-40؛ يُحَنَّ 12‏:12‏-19)

1ندٜ ࢡٜࢡَدِتِ عُرُسَلِيمَ، غَلْ وَکٜىٰرٜ غُرٜ بَيْتِڢَاجِ عٜ بَيْتَنِيَ، کٛمْبِ حٛوسٜىٰرٜ جَيْتُنْجٜ، عِيسَى نٜلِ ݠُکَرَعٜنْ مُوطُمْ طِطٛ، 2عٛوِعِ ࢡٜ‏: «نجٜحٜ وُرٛ وٛنْنغٛ يٜىٰسٛ مٛوطٛنْ؞ تٛ عٛنْ نَسْتِ نغٛ، عٛنْ تَوَنْ وَمْندٜ مٛلْدٜ حَࢡَّاندٜ ندٜ غٛطّٛ مٜىٰطَايْ وَعَّاغٛ؞ ݠِيسْتٜ ندٜ، نغَدّٜ؞ 3تٛ غٛطّٛ ࢨَمِ عٛنْ‏: کٛنِ ݠِيسْتٛتٛنْ ندٜ؟ نجَابٜ مٛ‏: جَوْمِرَاوٛ وٛودِ حَاجٜ مَارٜ، عٛلٛرْنَنْ ندٜ لَوْ؞»

4ندٜنْ ࢡٜندِلِّ، ࢡٜتَوِ مٛلْدٜ حَا لَاوٛلْ، ندٜ طٛنْ حَࢡِّ حَا يٛلْندٜ غٛطّٛ، ࢡٜݠِيسْتِ ندٜ؞ 5وٛطْࢡٜ دَرِيࢡٜ تٛنْ ࢨَمِ ࢡٜ‏: «طُمٜ مبَطٛتٛنْ طٛ؟ نغَمْ طُمٜ ݠِيسْتٛتٛنْ مٛلْدٜ ندٜ؟»

6ࢡٜنجَابِ بَنَ عِيسَى وِعْنٛ ࢡٜ، ندٜنْ يِمْࢡٜ مَنْ عَشِّ ࢡٜ؞ 7ࢡٜنغَدَّنِ عِيسَى مٛلْدٜ، ࢡٜندَطِّ لِمْشٜ مَࢡّٜ دٛوْ مَارٜ، عِيسَى وَعِّ ندٜ؞ 8يِمْࢡٜ طُوطْࢡٜ مبٜعِّتِ لِمْشٜ مُوطُمْعٜنْ دٛوْ لَاوٛلْ، وٛطْࢡٜ عِتِّ حَاکٛوجِ حَا غٜسٜ، شَࢡِّ طِ دٛوْ لَاوٛلْ؞ 9يِمْࢡٜ عَرْدِيࢡٜ عِيسَى عٜ تٛکِّيࢡٜ ࢡَاوٛ ڢُو کٛولِ، مبِعِ‏: «حٛسَنَّ، بَرْکَ لَاتَنٛ غَرَنْطٛ بٜى عِنْدٜ جَوْمِرَاوٛ#جَبُورَ 118‏:26؞؞ 10اَللَّه بَرْکِطِنَ لَامُ نغَرَنْنغُ، نغُ بَابَ مٜىٰطٜنْ دَاوُدَ‏! حٛسَنَّ، تٜدُّنغَلْ لَاتَنٛ اَللَّه حَا عَسَمَ‏!»

11عِيسَى نَسْتِ عُرُسَلِيمَ؞ عٛنَسْتِ حَيْکَلِيرُ بٛو، عٛتِمِّنِ لَارُغٛ کٛ وٛنِ ندٜرْ مَارُ ڢُو، ندٜ حِيرِ، عٛدِلِّ بَيْتَنِيَ بٜى ݠُکَرَعٜنْ مَاکٛ سَݠّٛ عٜ طِطٛ؞

عِيسَى نَالِ عِبِّ

(مَتَّ 21‏:18‏-19)

12جَنغٛ مَاجُمْ ندٜ ࢡٜنغُرْتِ بَيْتَنِيَ، عِيسَى مَاتِ دٛلٛ؞ 13عٛعٜىٰوِ عِبِّ بٜى حَاکٛوجِ طُوطِّ، عٛيٜحِ نغَمْ عٛلَارَ تٜىٰمَ عِبّٜ طٛنْ حَا مَاکِ؞ عَمَّا ندٜ عٛيٜحِ لٜسْ مَاکِ، عٛتَوِ سٜيْ حَاکٛوجِ تَنْ، نغَمْ نَا طُمْ سَاعِ عِبّٜ؞ 14ندٜنْ عِيسَى وِعِ عِبِّ‏: «تَا غٛطّٛ مٜىٰتَ ࢩَامُغٛ عِبّٜ حَا مَاطَ‏!» ݠُکَرَعٜنْ مَاکٛ نَنِ؞

عِيسَى ندٜرْ حَيْکَلِيرُ

(مَتَّ 21‏:12‏-17؛ لُکَ 19‏:45‏-48؛ يُحَنَّ 2‏:13‏-22)

15ندٜ ࢡٜنجٛتِّ عُرُسَلِيمَ، عِيسَى نَسْتِ حَيْکَلِيرُ؞ عٛڢُطِّ ڢَارْتُغٛ سٛورّٛوࢡٜ عٜ سٛودٛوࢡٜ ندٜرْ حَيْکَلِيرُ؞ عٛحِݠِّ تَابٜ سَنْجٛوࢡٜ شٜىٰدٜ عٜ کٛرٛمْجٜ سٛورّٛوࢡٜ ݠٛولِ؞ 16عٛعَشَّايْ کٛو غٛوتٛ سَالٛ ندٜرْ حَيْکَلِيرُ بٜى دٛنغَلْ؞ 17ندٜنْ عٛعٜکِّتِنِ يِمْࢡٜ، عٛوِعِ‏: «ندَا کٛ وِنْدَ ندٜرْ دٜڢْتٜرٜ سٜنِيندٜ‏: سُودُ عَمْ وِعٜتٜ سُودُ وَطُغٛ دٛعَ نغَمْ عُمَّاتٛوجٜ ڢُو؞ عَمَّا عٛنٛنْ عٛنْ نغَرْتِرِ ندُ لٛوٛلْ ڢَسٛوࢡٜ#عٜسَايَ 56‏:7؛ يٜرٜمِيَ 7‏:11؞؞»

18مَوْࢡٜ لِمَنْعٜنْ عٜ مٛودِࢡّٜ تَوْرٜىٰتَ نَنِ حَالَ مَنْ، ࢡٜݠُطِّ تٜڢُغٛ دَبَرٜ مبَرُغٛ عِيسَى، عَمَّا ࢡٜطٛنْ کُلَ مٛ نغَمْ مٛوࢡْرٜ ڢُو حَيْطِنِ عٜکِّتِنٛلْ مَاکٛ؞

19ندٜ حِيرِ، عِيسَى عٜ ݠُکَرَعٜنْ مُوطُمْ نغُرْتِ بٜرْنِوٛلْ؞

عِيسَى عٜ عِبِّ جٛورْکِ

(مَتَّ 21‏:20‏-22)

20جَنغٛ مَنْ ڢَجِرِ، ندٜ ࢡٜطٛنْ شَالٛ، ࢡٜنغِعِ عِبِّ غٛ، کِ يٛورِ بٜى طَطِ مَاکِ ڢُو؞ 21ݠِيٜرْ سِڢْتٛرِ، وِعِ عِيسَى‏: «مٛودِبّٛ، ندَا عِبِّ کِ عَنَالِ غٛ؞ کِ يٛورِ؞» 22ندٜنْ عِيسَى جَابِ ݠُکَرَعٜنْ مُوطُمْ‏: «نُطِّنٜ اَللَّه؞ 23غٛونغَ مِطٛنْ وِعَ عٛنْ، تٛ غٛطّٛ وِعِ حٛوسٜىٰرٜ ندٜعٜ‏: سٛوتَّ دِغَ طٛ، يٛلَّ ندٜرْ مبٜىٰلَ، تٛ عٛسٜکَايْ ندٜرْ ࢡٜرْندٜ مَاکٛ سَمْ، عَمَّا عٛنُطِّنِ کٛ عٛوِعِ لَاتٛ، طُمْ لَاتَنْتٛ مٛ ڢَکَتْ#مَتَّ 17‏:20؛ 1 کٛرِنْتُعٜنْ 13‏:2؞؞» 24نغَمْ مَاجُمْ مِطٛنْ وِعَ عٛنْ‏: ندٜ عٛنْ تٛرٛتٛ حُوندٜ ڢُو، نُطِّنٜ عٛنْ کٜࢡِ ندٜ عٜ عٛنْ کٜࢡَنْ ندٜ؞ 25يَاکٜ عٛنْ ندَرَکٜ نغَمْ وَطُغٛ دٛعَ، تٛ وٛودِ حُوندٜ حَکُّندٜ مٛوطٛنْ بٜى غٛطّٛ، نجَاڢٜ مٛ، نغَمْ حَا بَابِرَاوٛ مٛوطٛنْ غٛنْطٛ حَا عَسَمَ بٛو يَاڢَنٛ عٛنْ عَيْبٜىٰجِ مٛوطٛنْ؞ 26‏[‏عَمَّا تٛ عٛنْ نجَاڢَاکِ وٛطْࢡٜ، ندٜنْ کَمْ بَابِرَاوٛ مٛوطٛنْ غٛنْطٛ حَا عَسَمَ بٛو يَاڢَنْتَاکٛ عٛنْ عَيْبٜىٰجِ مٛوطٛنْ#مَتَّ 6‏:14‏-15؞؞]‏

تٛيْ بَاوْطٜ عِيسَى عِوِ؟

(مَتَّ 21‏:23‏-27؛ لُکَ 20‏:1‏-8)

27ࢡٜلٛرْتِ حَا عُرُسَلِيمَ؞ يَاکٜ عِيسَى طٛنْ وَانْشَ ندٜرْ حَيْکَلِيرُ، مَوْࢡٜ لِمَنْعٜنْ عٜ مٛودِࢡّٜ تَوْرٜىٰتَ عٜ ندٛتِّعٜنْ دَوْرٛوࢡٜ نغَرِ حَا مَاکٛ؞ 28ࢡٜࢨَمِمٛ‏: «بٜى دُنغَيٜىٰرٜ مٛيْ عَوَارَتَ کُوجٜ طٜعٜ؟ مٛيْ دُنغَنِ مَ وَطُغٛ بَنَ نِي؟» 29عِيسَى جَابِ ࢡٜ‏: «مِنْ بٛو مِࢨَمَنْ عٛنْ حُوندٜ وٛورٜ؞ تٛ عٛنْ نجَابَکٜ يَمْ، ندٜنْ کَمْ مِنْ بٛو مِجَابٛتٛ عٛنْ بٜى دُنغَيٜىٰرٜ مٛيْ کُووْرَنْمِ کُوجٜ طٜعٜ؞ 30مٛيْ دُنغَنِ يُحَنَّ وَطَنْغٛ يِمْࢡٜ بَݠْتِسْمَ؟ اَللَّه نَا مَلَّ يِمْࢡٜ؟ نجَابٜ؞» 31ندٜنْ ࢡٜشَرْوٛوتِرِ، ࢡٜمبِعِ‏: «تٛ عٜنْ نجَابَکٜ‏: اَللَّه، عٛࢨَمَنْ عٜنْ‏: کٛنِ عٛنْ نُطِّنَايْ مٛ؟ 32حَا عٜنْ نجَابٛ طُمْ يِمْࢡٜ … » ندَا ࢡٜطٛنْ کُلَ عُمَّاتٛورٜ نغَمْ يِمْࢡٜ ڢُو ندَارِ يُحَنَّ عٛ اَلنَّبِيجٛ ڢَکَتْ؞ 33ندٜنْ ࢡٜنجَابِ عِيسَى‏: «مِنْ عَنْدَا؞» عِيسَى وِعِ‏: «مِنْ بٛو مِوِعَتَا عٛنْ بٜى دُنغَيٜىٰرٜ مٛيْ مبَطَنْمِ کُوجٜ طٜعٜ؞»

Currently Selected:

مَرْکُسْ 11: داَ

Highlight

Copy