لَاتَانٛوجِ 24
24
ࢡَنغَلْ إِسْحَاقَ بٜى رٜبٜکَّ
1إِبْرَاهِيمَ نَيْوِ مَسِنْ، دُوࢡِ مَاکٛ طُوطِ، جَوْمِرَاوٛ بَرْکِطِنّٛ مٛ ندٜرْ کٛو طُمٜ ڢُو؞ 2إِبْرَاهِيمَ وِعِ سُکَ مُمْ، ࢡُرْدُطٛ دُوࢡِ ندٜرْ سَارٜ، مٛ عٛحَلْڢِنِ مَرْدِ مَاکٛ ڢُو: «وَلِّنْ جُنغٛ مَ شَکَ دَوْطٜ عَمْ؞ 3حُنَنَمْ بٜى جَوْمِرَاوٛ، اَللَّه مٛ عَسَمَ عٜ لٜسْدِ، عَتٜعَنْتَا ࢡِطّٛ عَمْ دٜبّٛ شَکَ ࢡِࢡّٜ کَنَانِعٜنْ ࢡٜ نجٛوطِيمِ شَکَ مُوطُمْعٜنْ؞ 4عَمَّا عَيَحَنْ حَا لٜسْدِ عَمْ، حَا بَنْدِرَاࢡٜ عَمْ، نغَمْ عَتٜعَنَ ࢡِيَمْ إِسْحَاقَ دٜبّٛ؞» 5سُکَ غٛ جَابِمٛ: «تٜىٰمَ دٜبّٛ جَࢡَتَا تٛکَّاغٛ يَمْ حَا لٜسْدِ ندِعِ؞ تٛ نٛنْ کَمْ، مِيَحْرَ ࢡِطّٛ مَ حَا لٜسْدِ ندِ نغُرْتِيطَا نَ؟» 6إِبْرَاهِيمَ وِعِمٛ: «رٜىٰنْتَ يَحْرُغٛ ࢡِيَمْ حَا تٛنْ! 7اَللَّه جَوْمِرَاوٛ مٛ عَسَمَ، غُرْتِنْطٛ يَمْ سَارٜ بَابَ عَمْ عٜ لٜسْدِ يِمْࢡٜ عَمْ، عٛحُنَنِ يَمْ نٛ عٛحٛکَّنْ دَࢩْغٛلْ عَمْ لٜسْدِ ندِعِ؞ عٛنٜلَنْ مَلَاعِکَاجٛ مَاکٛ يٜىٰسٛ مَ، حَا تٛنْ عَتٜعَنْتَ ࢡِطّٛ عَمْ دٜبّٛ؞ 8تٛ دٜبّٛ جَࢡَايْ تٛکَّاغٛ مَ، عَ دِمْطِنَاطٛ دِغَ حُنَيٜىٰرٜ ندٜعٜ؞ عَمَّا عَيَحْرَتَا ࢡِطّٛ عَمْ حَا تٛنْ!» 9سُکَ غٛ وَلِّنِ جُنغٛ مُوطُمْ شَکَ دَوْطٜ جَاغٛرْطٛ مُمْ إِبْرَاهِيمَ، عٛحُنَنِمٛ دٛوْ حَالَ کَعَ؞
10ندٜنْ عٛحٛوعِ غٜىٰلٛوطِ سَݠّٛ شَکَ غٜىٰلٛوطِ جَاغٛرْطٛ مَاکٛ، عٛدِلِّ؞ عٛحٛوعِ بٛو مَرْطُمْ سَمَنْ کٛ جَاغٛرْطٛ مُمْ مَرِ حَا جُنغٛ؞ عٛيٜحِ مٜسٛݠٛتَمِيَ#24:10 مٜسٛݠٛتَمِيَ طُمْ لٜسْدِ حَکُّندٜ مَايٛ عٜڢْرَتِسْ عٜ مَايٛ تِغِرِسْ؞، حَا وُرٛ نَحٛرْ؞ 11عٛحٛڢْنِنِ غٜىٰلٛوطِ يَاسِ وُرٛ، کٛمْبِ ࢡُلْندُ؞ طُمْ کِيکِيطٜ، سَاعِ رٜوْࢡٜ نغُرْتٛتٛ ࢩٜطُغٛ ندِيَمْ؞ 12عٛتٛرِ: «يَا جَوْمِرَاوٛ، اَللَّه جَاغٛرْطٛ عَمْ إِبْرَاهِيمَ، مِڢٛتَّ بٜى کٛ طَࢡَّنْمِ حَنْدٜ عٜ وٛونَنَنْ جَاغٛرْطٛ عَمْ إِبْرَاهِيمَ بٛو؞ 13ندَا، مِطٛنْ دَرِ حَا کٛمْبِ ࢡُلْندُ؞ ࢡِࢡّٜ رٜوْࢡٜ يِمْࢡٜ وُرٛ نغٛعٛ نغُرْتٛتٛ نغَمْ ࢩٜطُغٛ ندِيَمْ؞ 14تٛ مِوِعِ ݠَاࢩٛ دٜبّٛ: وُرْ مبُلْکُ مَ حَا مِيَرَ، کَنغْکٛ بٛو تٛ عٛوِعِ: يَرْ، مِيَرْنَنْ غٜىٰلٛوطِ مَ بٛو – لَاتٛ مٛ شُࢡَنْطَ سُکَ مَ إِسْحَاقَ؞ بَنَ نٛنْ عَنْدِرَنْمِ عَوٛونَنِ جَاغٛرْطٛ عَمْ؞» 15دِغَ عٛتِمِّنَايْ وٛلْوُغٛ تَوٛنْ، ندَا رٜبٜکَّ، ࢡِي بٜتُعِيلَ، دَادَ بٜتُعِيلَ وٛنِ مِلْکَ دٜبّٛ نَحٛرْ، دٜىٰرْطِرَاوٛ إِبْرَاهِيمَ؞ عٛوُرْتِ بٜى مبُلْکُ دٛوْ بَلَوَلْ مَاکٛ؞ 16ࢡِطّٛ دٜبّٛ عٛو نغَرْنِيطٛ مَسِنْ، عٛ ݠَاࢩٛ مٛ غٛرْکٛ مٜىٰطَايْ عَنْدُغٛ؞ عٛجِݠِّ حَا وَاوْرُ، عٛحٜبِّنِ مبُلْکُ مَاکٛ، عٛوَعِّتِ؞ 17سُکَ إِبْرَاهِيمَ غٛ دٛغِّ، ڢٛتِّ بٜى مَاکٛ، وِعِمٛ: «عُسٜنِ! حٛکَّمْ ندِيَمْ سٜطَّ دِغَ مبُلْکُ مَ حَا مِيَرَ؞» 18عٛجَابِ: «يَرْ، نَيْوَ!» عٛيَاوْطِ جِݠِّنْغٛ مبُلْکُ دٛوْ جُنغٛ مَاکٛ، نغَمْ عٛيَرَ؞ 19ندٜ عٛسَڢْتِ يَرُغٛ، ݠَاࢩٛ وِعِ: «مِسَڢَنَنْ غٜىٰلٛوطِ مَ بٛو، طِ نجَرَ، حَا طِ طٛمْطِتَ؞» 20عٛيَاوْطِ، عٛرُڢِ ندِيَمْ مبُلْکُ ندٜرْ حٜىٰلٜىٰوٛ، عٛدٛغِّ کَدِبٛو، عٛيٜحِ حَا ࢡُلْندُ، عٛࢩٜطِ؞ عٛسَڢَنِ غٜىٰلٛوطِ مَاکٛ ڢُو؞ 21غٛرْکٛ عٛو لَارِمٛ؞ عٛجٜىٰطِ حَا عٛعَنْدَ تٛ جَوْمِرَاوٛ حُمْتَنِمٛ جَحَانغَلْ مَاکٛ مَلَّ حُمْتَنَايْ مٛ؞ 22ندٜ غٜىٰلٛوطِ شَڢْتِ يَرُغٛ، غٛرْکٛ غٛ حٛوعِ حَلَغَارٜ ندٜ کَنغّٜىٰرِ، عٛوَطِ بٛو جَوٜ کَنغّٜىٰرِ تٜدُّطٜ طِطِ حَا جُوطٜ مَاکٛ؞ 23عٛࢨَمِمٛ: «عُسٜنِ وِعَمْ، عَ ࢡِي مٛيٜ؟ وٛودِ ݠٜلّٜلْ ندٜرْ سَارٜ بَابَ مَ حَا مِنْ مبٜىٰرَ نَ؟» 24عٛجَابِمٛ: «مِ ࢡِي بٜتُعِيلَ ࢡِي نَحٛرْ مٛ دٜبّٛ مُمْ مِلْکَ دَࢩَنِ طُمْ؞» 25عٛوِعِ ڢَحِنْ: «حُطٛ عٜ ࢩَامْدُ طٛنْ طُوطُّمْ حَا عَمِنْ، ݠٜلّٜلْ وٜىٰرْنُغٛ بٛو طٛنْ؞» 26غٛرْکٛ عٛو تُرِ، سُجِدَنِ جَوْمِرَاوٛ؞ 27عٛوِعِ: «مِيٜتِّ جَوْمِرَاوٛ، اَللَّه جَاغٛرْطٛ عَمْ إِبْرَاهِيمَ، مٛ عِتَّنَايْ جَاغٛرْطٛ عَمْ مبٛوطٜىٰنغَ مُمْ عٜ غٛونغَاکُ مُمْ! عٛطٛوِ يَمْ بٛو دٛوْ لَاوٛلْ شِرْ حَا سَارٜ بَنْدِرَاࢡٜ جَاغٛرْطٛ عَمْ!»
28ݠَاࢩٛ دٜبّٛ غٛ دٛغِّ، عَنْدِنِ کُوجٜ طٜعٜ ڢُو يِمْࢡٜ وٛنْدُࢡٜ بٜى دَادَ مُمْ کٛ سَالِ؞ 29رٜبٜکَّ وٛودِ دٜىٰرْطِرَاوٛ غٛرْکٛ، بِعٜتٜىٰطٛ لَبَنْ؞ لَبَنْ وُرْتِ، دٛغِّ حَا غٛرْکٛ کٛمْبِ ࢡُلْندُ غٛ؞ 30عٛيِعِ حَلَغَارٜ حَا کِنٜ عٜ جَوٜ حَا جُوطٜ دٜىٰرْطِيکٛ دٜبّٛ، عٛنَنِ بٛو بٛلّٜ دٜىٰرْطِيکٛ رٜبٜکَّ، بِعْطٛ: «بَنَ نٛنْ غٛرْکٛ عٛو وٛلْوَنِ يَمْ»، عٛيٜحِ حَا غٛرْکٛ غٛ؞ غٛرْکٛ عٛو طٛنّٛ دَرِ کٛمْبِ غٜىٰلٛوطِ، غَلْ ࢡُلْندُ؞ 31لَبَنْ وِعِ: «وَرْ، عَنْ بَرْکِطِنَاطٛ جَوْمِرَاوٛ! نغَمْ طُمٜ ندَرٛتٛطَ يَاسِ؟ مِوٛعِّنِ سُودُ، وٛودِ ݠٜلّٜلْ نغَمْ غٜىٰلٛوطِ بٛو؞» 32غٛرْکٛ غٛ نَسْتِ سَارٜ، لَبَنْ رِڢْتِ غٜىٰلٛوطِ، عٛحٛکِّ طِ حُطٛ عٜ ࢩَامْدُ؞ عٛوَدِّ ندِيَمْ لٛوتِرْطَمْ کٛسْطٜ نغَمْ غٛرْکٛ غٛ عٜ وٛرْࢡٜ وٛنْدُࢡٜ بٜى مَاکٛ ڢُو؞ 33عٛجٛعِّنِ ࢩَامْدُ يٜىٰسٛ مَࢡّٜ، عَمَّا کَنغْکٛ عٛوِعِ: «مِࢩَامَتَا، سٜيْ تٛ مِيٜشِّ حَبَرُ عَمْ؞» لَبَنْ وِعِ: «وٛلْوُ!»
34عٛوِعِ: «مِ کُووَنٛووٛ إِبْرَاهِيمَ؞ 35جَوْمِرَاوٛ بَرْکِطِنِ جَاغٛرْطٛ عَمْ، حَا عٛرِسْکِ مَسِنْ؞ عٛحٛکِّمٛ دَمّٛوجِ عٜ نَعِ عٜ شَرْدِ عٜ کَنغّٜىٰرِ عٜ مَشُّࢡٜ عٜ حٛرْࢡٜ عٜ غٜىٰلٛوطِ عٜ بَمْطٜ؞ 36سَارَةُ، دٜبّٛ جَاغٛرْطٛ عَمْ، ندٜرْ نَيٜىٰوُ مُوطُمْ، عٛدَࢩَنِ جَاغٛرْطٛ عَمْ ࢡِطّٛ غٛرْکٛ؞ جَاغٛرْطٛ عَمْ بٛو حٛکِّ ࢡِيِيکٛ مَرْدِ مُمْ ڢُو؞ 37عٛحُنِّ يَمْ، عٛوِعِ: تَا تٜعَنْ ࢡِطّٛ عَمْ دٜبّٛ شَکَ ࢡِࢡّٜ کَنَانِعٜنْ ࢡٜ نجٛوطِيمِ ندٜرْ لٜسْدِ مُوطُمْعٜنْ؞ 38عَمَّا يَحْ حَا سَارٜ بَابَ عَمْ عٜ لٜࢩٛلْ عَمْ، نغَمْ تٜعَنَ ࢡِطّٛ عَمْ دٜبّٛ؞ 39مِوِعِ جَاغٛرْطٛ عَمْ: تٜىٰمَ دٜبّٛ عٛو جَࢡَتَا تٛکَّاغٛ يَمْ؞ 40عٛجَابِ يَمْ: جَوْمِرَاوٛ مٛ مِطٛوْتَنِ طُمْ ڢٛرٛيْ، نٜلَنْ مَلَاعِکَاجٛ مُمْ بٜى مَاطَ؞ عٛحُمْتَنْتٜ جَحَانغَلْ مَ، نغَمْ عَتٜعَنَ ࢡِطّٛ عَمْ دٜبّٛ مٛ لٜࢩٛلْ عَمْ دِغَ سَارٜ بَابَ عَمْ؞ 41تٛ عَيٛتَّکٜ لٜࢩٛلْ عَمْ، عَرِمْطِ عٜ حُنَيٜىٰرٜ ندٜعٜ؞ کٛو تٛ ࢡٜندٛکَّايْ مَ ݠَاࢩٛ دٜبّٛ بٛو، عَرِمْطِ عٜ حُنَيٜىٰرٜ ندٜعٜ؞
42«حَنْدٜ کَدِ مِوَرِ حَا ࢡُلْندُ ندُعُ، مِوِعِ: يَا جَوْمِرَاوٛ، اَللَّه جَاغٛرْطٛ عَمْ إِبْرَاهِيمَ، حُمْتَنَمْ جَحَانغَلْ عَمْ نغَلْ مبَطَنْمِ حَنْدٜ؞ 43ندَا، مِطٛنْ دَرِ حَا کٛمْبِ ࢡُلْندُ؞ ݠَاࢩٛ دٜبّٛ غُرْتٛتٛوطٛ ࢩٜطُغٛ، مٛ مِوِعَتَ طُمْ: عُسٜنِ حٛکَّمْ ندِيَمْ سٜطَّ دِغَ مبُلْکُ مَ حَا مِيَرَ، 44کَنغْکٛ بٛو تٛ عٛوِعِ يَمْ: يَرْ، مِسَڢَنَنْ غٜىٰلٛوطِ مَ بٛو، – لَاتٛ دٜبّٛ مٛ شُࢡَنْطَ ࢡِي جَاغٛرْطٛ عَمْ؞ 45دِغَ مِتِمِّنَايْ وٛلْوُغٛ ندٜرْ ࢡٜرْندٜ عَمْ تَوٛنْ، ندَا رٜبٜکَّ وُرْتِ بٜى مبُلْکُ دٛوْ بَلَوَلْ مُوطُمْ؞ عٛجِݠِّ حَا وَاوْرُ، عٛࢩٜطِ؞ مِوِعِمٛ: حٛکَّمْ مِيَرَ! 46لَوْ عٛجِݠِّنِ مبُلْکُ دِغَ بَلَوَلْ مَاکٛ، عٛوِعِ: يَرْ، مِيَرْنَنْ غٜىٰلٛوطِ مَ بٛو؞ مِيَرِ، ندٜنْ عٛيَرْنِ غٜىٰلٛوطِ عَمْ؞ 47مِࢨَمِمٛ: عَ ࢡِي مٛيٜ؟ عٛجَابِ: مِ ࢡِي بٜتُعِيلَ ࢡِي نَحٛرْ بٜى دٜبّٛ مُمْ مِلْکَ؞ ندٜنْ مِوَطِ حَلَغَارٜ حَا کِنٜ مَاکٛ عٜ جَوٜ حَا جُوطٜ مَاکٛ؞ 48مِتُرِ، مِسُجِدَنِ جَوْمِرَاوٛ؞ مِيٜتِّ جَوْمِرَاوٛ، اَللَّه جَاغٛرْطٛ عَمْ إِبْرَاهِيمَ، مٛ طٛوِ يَمْ دٛوْ لَاوٛلْ ݠٛتُّنغٛلْ، حَا مِحٛوعَنَ جَاغٛرْطٛ عَمْ ࢡِي دٜىٰرْطِيکٛ؞ 49جٛنْتَ کَمْ، تٛ عٛنْ نغِطِ وَنغِنْغٛ مبٛوطٜىٰنغَ عٜ غٛونغَاکُ حَا جَاغٛرْطٛ عَمْ، عَنْدِنٜىٰطَمْ! تٛ نَا نٛنْ، مِوَيْلِتِتّٛ غَلْ ࢩَامٛ مَلَّ نَنٛ؞»
50لَبَنْ عٜ بٜتُعِيلَ نجَابِ: «مِنْ مبَاوَتَا وِعُغٛ مَ عٛوحٛ مَلَّ عَاعَ، نغَمْ حَالَ کَعَ عِوِ حَا جَوْمِرَاوٛ؞ 51ندَا، رٜبٜکَّ يٜىٰسٛ مَ، حٛوعُ مٛ، يَحْ جَمْ، عٛلَاتٛ دٜبّٛ ࢡِي جَاغٛرْطٛ مَ بَنَ جَوْمِرَاوٛ وِعِ؞» 52ندٜ سُکَ إِبْرَاهِيمَ نَنِ بٛلّٜ مَࢡّٜ، عٛسُجِدَنِ جَوْمِرَاوٛ؞ 53ندٜنْ عٛوُرْتِنِ کُوجٜ: شَرْدِ عٜ کَنغّٜىٰرِ عٜ لِمْشٜ، عٛحٛکِّ طٜ رٜبٜکَّ؞ عٛحٛکِّ دٜىٰرْطِيکٛ عٜ دَادَ مَاکٛ بٛو کُوجٜ مَرْطٜ سَمَنْ؞
54ࢡَاوٛ مَاجُمْ ࢡٜࢩَامِ، ࢡٜنجَرِ، کَنغْکٛ عٜ وٛرْࢡٜ وٛنْدُࢡٜ بٜى مَاکٛ، ندٜنْ ࢡٜمبَالِ؞ ڢَجِرِ، ندٜ وٜىٰتِ، عٛوِعِ: «عَشّٜىٰطَمْ مِلٛرْتٛ حَا جَاغٛرْطٛ عَمْ؞» 55دٜىٰرْطِرَاوٛ رٜبٜکَّ عٜ دَادَ مُمْ مبِعِ: «عَشُّ ݠَاࢩٛ دٜبّٛ جٛوطٛ حَا عَمِنْ ࢩَلْطٜ سٜطَّ، کٛو سَݠّٛ، ندٜنْ عٛدِلُّمَ؞» 56عَمَّا عٛوِعِ ࢡٜ: «تَا نٜىٰࢡْنَنٜىٰطَمْ! نغَمْ جَوْمِرَاوٛ حُمْتَنِ يَمْ جَحَانغَلْ عَمْ؞ عَشّٜىٰطَمْ، مِحٛوتَ حَا جَاغٛرْطٛ عَمْ؞» 57ࢡٜمبِعِ: «عٜوْنٜنْ مَ ݠَاࢩٛ دٜبّٛ، ࢨَمٜنْ مٛ؞» 58ࢡٜعٜوْنِ رٜبٜکَّ، ࢡٜࢨَمِمٛ: «عَيِطِ دِلِّدِدْغٛ بٜى غٛرْکٛ عٛو نَ؟» عٛجَابِ: «عٛوحٛ؞» 59ࢡٜعَشِّ رٜبٜکَّ عٜ مُسِنِنّٛوطٛ طُمْ دِلِّدَ بٜى سُکَ إِبْرَاهِيمَ غٛ عٜ وٛرْࢡٜ مُوطُمْ؞ 60ࢡٜمبَرْکِطِنِ رٜبٜکَّ بٜى وِعْغٛ: «عَنْ، دٜىٰرْطِرَاوٛ عَمِنْ، لَاتَ دَادَ يِمْࢡٜ عُجِنٜىٰجٜ طُوطّٜ! دَࢩْغٛلْ مَ مَرَ بٜرْنِيجِ کٛنّٜعٜنْ مُوطُمْ!» 61ندٜنْ رٜبٜکَّ عٜ حٛرْࢡٜ مُوطُمْ عُمِّ، ࢡٜمبَعِّ غٜىٰلٛوطِ، ࢡٜتٛکِّ غٛرْکٛ عٛو؞ عٛحٛوعِ رٜبٜکَّ، عٛدِلِّ؞
62إِسْحَاقَ وَرْتِنٛ دِغَ ࢡُلْندُ وِعٜتٜىٰندُ بٜىٰرْ-لَحَيْ-رٛيْ#24:62 لَارْ 16:14؞، نغَمْ عٛجٛوطِ حَا لٜسْدِ ڢٛمْبِنَ؞ 63عٛوُرْتِ عَسِرِيرٜ وٛطْندٜ وَانْشٛيَاغٛ ندٜرْ غٜسٜ؞ عٛࢡَنغْتِ غِتٜ، عٛيِعِ غٜىٰلٛوطِ طٛنْ نغَرَ؞ 64رٜبٜکَّ بٛو ࢡَنغْتِ غِتٜ مُوطُمْ، يِعِ إِسْحَاقَ؞ عٛجِݠِّ نغٜىٰلٛوبَ، 65عٛࢨَمِ سُکَ غٛ: «مٛيْ ندٜرْ نغٜسَ حَا تٛ غَرَنْطٛ ڢٛتُّغٛ بٜى مٜىٰطٜنْ عٛو؟» عٛجَابِ: «طُمْ جَوْمَمْ؞» رٜبٜکَّ حٛوعِ سُدَّارٜ، سُدِّ حٛورٜ مُمْ؞ 66سُکَ عَنْدِنِ إِسْحَاقَ کُوجٜ طٜ عٛوَطْنٛ ڢُو؞ 67إِسْحَاقَ يَحْرِ رٜبٜکَّ ندٜرْ سُودُ دَادَ مُوطُمْ سَارَةُ؞ عٛحٛوعِ رٜبٜکَّ، لَاتِ دٜبّٛ مَاکٛ، عٛيِطِمٛ؞ بَنَ نِي إِسْحَاقَ دٜعِّتِرِ دٛوْ مَايْدٜ دَادَ مُوطُمْ؞
Currently Selected:
لَاتَانٛوجِ 24: داَ
Highlight
Share
Copy
Want to have your highlights saved across all your devices? Sign up or sign in
Fulfulde Bible Ajamiya © Bible Society of Cameroon, 2016.
