Salmow 51
51
SALM 51.
Miserere mei, Deus.
1Bydh grassyes orthiv, A Dhuw, herwydh dha dregeredh : herwydh dha druedh meur defend dhe-ves ow hammweythresoww.
2Golgh vy yn tien a'm anewnder : ha glanha vy dhiworth ow fegh.
3Rag my a aswonn ow hammwriansow : ha prest a-dheragov yma ow fegh.
4Er dha bynn jy, ty dha honan, y peghis vy ha gul an drogober ma y'th wolok : rag may fes justifiys y'th lavar, ha divlam y'th vreus.
5Otta, yn kammweyth y feuv vy dineythys : hag yn pegh y'm omdhuk ow mamm.
6Otta, hwansek osta dhe wirder y'n rannow a-bervedh : hag yn-dann gel ty a dhysk dhymm furneth.
7Purha vy gans hyssop ha glan vydhav : golgh vy, ha my a vydh gwynna es ergh.
8Gwra dhymm klewes lowena ha heudhder : may lowenhaho an eskern a vrewsys.
9Kudh dha fas rag ow feghosow : ha defend dhe-ves oll ow hammweythresow.
10Gwra kolonn lan ragov, A Dhuw : ha daswra ynnov vy spyrys len.
11Na dowl vy dhe-ves a'th fas : ha na gemmer a-dhiworthiv dha Spyrys sans.
12Daskorr dhymm lowena dha selwyans : ha menten vy gans dha Spyrys hel.
13Ena y tyskav dha fordhow dhe'n dhrogoberoryon : ha peghadoryon a dhehwel dhis.
14Gwra ow delivra dhiworth kabel-goes, A Dhuw, ty Dhuw ow selwyans : ha'm taves a gan yn lowen a'th ewnder.
15A Arloedh, igor ow diwweus : ha'm ganow a dhiskwa dha wormola.
16Nyns osta hwansek dhe sakrifis, poken my a'n rosa dhis : ny gemmerydh plesour yn offrynnow leskys.
17Sakrifisow Duw yw spyrys trogh : kolonn drogh ha keudhesik, A Dhuw, ny dhispresydh.
18Gwra da yn dha favour orth Sion : drehav fosow Yerusalem.
19Ena ty a' fydh delit yn sakrifisow ewnder, offrynnow leskys ha kowlleskys : ena yth offrynnons lodhnow war dha alter.
Currently Selected:
Salmow 51: ASK
Highlight
Share
Copy
Want to have your highlights saved across all your devices? Sign up or sign in
© Kesva an Taves Kernewek 1997, 2019
© Cornish Language Board 1997, 2019
