ગીતશાસ્ત્ર 39
39
દુ:ખીની કબૂલાત
મુખ્ય ગવૈયા યદૂથૂન માટે. દાઉદનું ગીત.
1મેં કહ્યું, “હું મારા માર્ગોને
સંભાળીશ કે,
હું મારી જીભે પાપ ન કરું.
દુષ્ટો મારી આગળ હોય ત્યાં સુધી
હું મારું મુખ લગામથી કબજે રાખીશ.”
2હું મૂંગો થઈને છાનો રહ્યો,
ખરું બોલવાથી પણ હું છાનો રહ્યો;
અને મારો શોક વધી ગયો.
3મારું હ્રદય મારામાં તપી ગયું;
મારા વિચારોનો અગ્નિ સળગી ઊઠયો.
તેથી હું મારી જીભે બોલ્યો,
4“હે યહોવા, મારો અંત [ક્યારે છે] ?
તથા મારા આયુષ્યનું માપ કેટલું છે,
તે મને જણાવો;
હું કેવો ક્ષણભંગુર છું
તે મને સમજાવો.”
5તમે મારા દિવસ મૂઠીભર કર્યા છે!
મારું આયુષ્ય તમારી આગળ
શૂન્ય જેવું છે;
ખરેખર, ઉચ્ચ સ્થિતિનું માણસ પણ
વ્યર્થ છે.
6નિશ્ચે દરેક માણસ આભાસરૂપે
હાલેચાલે છે;
નિશ્ચે તે મિથ્યા ગભરાય છે;
તે સંગ્રહ કરે છે,
અને તે કોણ ભોગવશે
એ તે જાણતો નથી.
7હવે, પ્રભુ, હું શાની વાટ જોઉં?
મારી આશા તમારા પર છે.
8મારા સર્વ અપરાધોથી
મારો છૂટકો કરો,
મૂર્ખો મારી મશ્કરી કરે,
એવું થવા ન દો.
9હું મૂંગો રહ્યો હતો,
મેં મારું મુખ ઉઘાડયું નહિ;
કેમ કે તમે જ એ કર્યું.
10તમારી [મોકલેલી] આફત
મારાથી દૂર કરો;
તમારા હાથના ધક્કાથી
મારો ક્ષય થાય છે.
11તમે માણસને તેના અન્યાયને કારણે
ઠપકાથી શિક્ષા કરો છો,
ત્યારે તમે તેની સુંદરતાનો પતંગિયાની
જેમ નાશ કરી દો છો;
નિશ્ચે દરેક માણસ વ્યર્થ છે. (સેલાહ)
12હે યહોવા, મારી પ્રાર્થના સાંભળો,
મારી અરજ પર કાન ધરો;
મારાં આંસુ જોઈને
ચૂપ બેસી ન રહો;
કેમ કે હું તમારી સાથે
પ્રવાસી તરીકે છું,
મારા સર્વ પિતૃઓની જેમ
હું પણ મુસાફર છું.
13હું અહીંથી જાઉં, અને હતો ન હતો થાઉં
તે પહેલાં તમારી કરડી નજર
મારા પરથી દૂર કરો કે, હું બળ પામું.
Currently Selected:
ગીતશાસ્ત્ર 39: GUJOVBSI
Highlight
Share
Copy
Want to have your highlights saved across all your devices? Sign up or sign in
Gujarati OV Reference Bible - પવિત્ર બાઇબલ
Copyright © Bible Society of India, 2016.
Used by permission. All rights reserved worldwide.
