ગીતશાસ્ત્ર 119
119
પ્રભુના નિયમોનું મહિમાસ્તોત્ર
આલેફ
1સીધે માર્ગે
જનારાઓને તથા
યહોવાના નિયમ પ્રમાણે
ચાલનારાઓને ધન્ય છે.
2તેમનાં સાક્ષ્ય પાળનારાઓને ધન્ય છે;
તેઓ પૂર્ણ હ્રદયથી તેમને શોધે છે.
3તેઓ અન્યાય કરતા નથી;
તેઓ તેમના માર્ગમાં ચાલે છે.
4તમે તમારાં શાસનો ચોક્સાઈથી
પાળવાનું અમને ફરમાવ્યું છે.
5તમારા વિધિઓ પાળવાને માટે
મારા આચારવિચાર દઢ થાય
તો કેવું સારું!
6હું તમારી સર્વ આજ્ઞાઓનું સન્માન કરું,
તો પછી હું ફજેત થનાર નથી.
7તમારા અદલ ઇનસાફથી
હું માહિતગાર થઈશ,
ત્યારે હું શુદ્ધ અંત:કરણથી
તમારો આભાર માનીશ.
8હું તમારા વિધિઓ પાળીશ;
તમે મારો ત્યાગ કરશો નહિ.
તમારાં વચનો મેં મારા હૈયામાં રાખ્યાં છે.
બેથ
9જુવાન માણસ પોતાનો જીવનક્રમ
શાથી શુદ્ધ કરી શકે?
તમારા વચન પ્રમાણે [તેને વિષે]
સાવધ રહેવાથી.
10મેં મારા ખરા હ્રદયથી તમને શોધ્યા છે;
તમારી આજ્ઞાઓથી ચૂકીને
મને ભટકવા ન દો.
11હું તમારી વિરુદ્ધ પાપ ન કરું માટે
મેં તમારું વચન મારા હ્રદયમાં
રાખી મૂક્યું છે.
12હે યહોવા, તમે સ્તુત્ય છે;
તમારા વિધિઓ મને શીખવો.
13મારા હોઠોથી મેં તમારા મુખનાં
સર્વ ન્યાયવચનો વર્ણવ્યાં છે.
14તમારાં સાક્ષ્યોના માર્ગમાં
મને પુષ્કળ ધનદોલત જેટલો
આનંદ મળ્યો છે.
15હું તમારાં શાસનોનું મનન કરીશ;
અને તમારા માર્ગોને
માનપૂર્વક જોઈશ.
16તમારા વિધિઓ [પાળવા] માં
મને આનંદ થશે;
હું તમારું વચન વીસરીશ નહિ.
મને તમારાં વચનોની અદભુતા બતાવો
ગિમેલ
17આ તમારા સેવક સાથે ઉદારતાથી વર્તો,
જેથી હું જીવતો રહીને
તમારું વચન પાળું.
18તમારા નિયમશાસ્ત્રમાંની
આશ્ચર્યકારક વાતોનું
અવલોકન કરવા માટે
મારી આંખો ઉઘાડો.
19હું તો પૃથ્વી પર મુસાફર છું;
તમારી આજ્ઞાઓ
મારાથી ન સંતાડો
20તમારાં ન્યાયવચનોની અભિલાષા
રાખતાં રાખતાં
મારું હ્રદય સદા
આશાભંગ થઈ ગયું છે.
21તમે ગર્વિષ્ઠોને ધમકાવો છો;
તમારી આજ્ઞાઓને તજીને
ભટકનારાઓ પર શાપ આવે છે.
22મહેણાં તથા અપમાનને
મારાથી દૂર કરો
કેમ કે મેં તમારાં સાક્ષ્યો માન્યાં છે.
23સરદારો પણ પોતાના આસન પર
બેસીને મારી વિરુદ્ધ બોલતા હતા;
પણ તમારા સેવકે તો તમારા
વિધિઓનું મનન કર્યું છે.
24વળી તમારાં સાક્ષ્યોથી
મને હર્ષ થાય છે.
તેમ જ તેઓ મારા મંત્રીઓ પણ છે.
પ્રભુ-નિયમ પાળવાનો સંકલ્પ
દાલેથ
25મારો આત્મા ધૂળભેગો થઈ ગયો છે;
તમારા વચન પ્રમાણે મને જીવાડો.
26મેં મારા માર્ગો પ્રગટ કર્યા, અને
તમે મને ઉત્તર આપ્યો;
મને તમારા વિધિઓ શીખવો.
27મને તમારાં શાસનોનો
માર્ગ સમજાવો;
જેથી હું તમારાં આશ્ચર્યકારક કૃત્યો
પર ધ્યાન રાખું.
28મારો જીવ શોકથી પીગળી જાય છે;
તમારા વચન પ્રમાણે
મને બળવાન કરો.
29અસત્યનો માર્ગ મારાથી દૂર કરો.
કૃપા કરીને તમારો નિયમ શીખવો.
30મેં સત્યનો માર્ગ પસંદ કર્યો છે;
મેં મારી નજરમાં તમારાં
ન્યાયવચનોને રાખ્યાં છે.
31હું તમારાં સાક્ષ્યોને વળગી
રહ્યો છું;
હે યહોવા, મને ફજેત ન કરો.
32હું તમારી આજ્ઞાઓના
માર્ગમાં દોડીશ,
કેમ કે તમે મારા હ્રદયને
પ્રફુલ્લિત કરો છો.
તમારા નિયમો શીખવો
હે
33હે યહોવા, તમારા વિધિઓનો
માર્ગ મને શીખવો;
હું છેક સુધી તે પ્રમાણે ચાલીશ.
34મને સમજણ આપો, એટલે
હું તમારો નિયમ પાળીશ.
હા, મારા ખરા હ્રદયથી તેને માનીશ.
35તમારી આજ્ઞાઓના માર્ગમાં
મને ચલાવો;
કેમ કે તેમાં હું સંતોષ પામું છું.
36લોભ તરફ નહિ,
પણ તમારાં સાક્ષ્યો તરફ
મારું મન વાળો.
37વ્યર્થતામાંથી મારી દષ્ટિ ફેરવો;
તમારા માર્ગ વિષે મને આતુર કરો.
38તમારો ભય ઉપજાવનારું
તમારું જે વચન છે
તે તમારા સેવકના લાભમાં દઢ કરો.
39જે અપમાનથી હું બીહું છું
તે મારાથી દૂર કરો;
કેમ કે તમારાં ન્યાયવચનો ઉત્તમ છે.
40હું તમારાં શાસનોની
અભિલાષા રાખું છું;
તમારા ન્યાયીપણાથી મને જીવાડો.
તમારાં વચનોમાં મને સંપૂર્ણ ભરોસો
વાવ.
41હે યહોવા, તમારા વચન પ્રમાણે તમારી
કૃપા મારા પર થાઓ,
અને મારું તારણ કરો.
42તેથી હું મારું અપમાન કરનારને
ઉત્તર આપી શકીશ;
કેમ કે મને તમારા
વચનનો ભરોસો છે.
43મારા મુખમાંથી સત્યવચનો કદી ન
લઈ લો;
કેમ કે હું તમારાં ન્યાયવચનોની
આશા રાખી રહ્યો છું.
44હું નિરંતર તમારો નિયમ
સદા સર્વદા પાળીશ.
45હું તમારાં શાસનોનો શોધનાર છું;
માટે હું નિરાંતે જીવીશ.
46વળી રાજાઓની આગળ હું તમારાં
સાક્ષ્યો કહી સંભળાવીશ,
અને [તેમાં] શરમાઈશ નહિ.
47તમારી આજ્ઞાઓમાં હું આનંદ પામીશ;
તેઓ પર મેં પ્રેમ કર્યો છે.
48તમારી આજ્ઞાઓ [પાળવા] પણ હું મારા
હાથ ઊંચા કરીશ,
તેમના પર મેં પ્રેમ કર્યો છે;
અને હું તમારા વિધિઓનું મનન કરીશ.
તમારાં વચન કેવાં દિલાસાદાયક!
ઝ
49તમારા જે વચનથી
મને આશા ઊપજી છે,
તે વચન તમારા
સેવકને માટે સંભારો.
50મારા દુ:ખમાં મને દિલાસો મળ્યો છે કે,
તમારા વચને મને જીવાડ્યો છે.
51ગર્વિષ્ઠોએ મારો બહુ
તિરસ્કાર કર્યો છે,
તોપણ હું તમારા નિયમથી પાછો
હઠ્યો નથી.
52હે યહોવા, પુરાતન કાળથી તમારાં જે
ન્યાયવચનો છે તેમને મેં સંભાર્યાં;
ને મને દિલાસો મળ્યો છે.
53જે ભૂંડાઓ તમારા નિયમને તજે છે.
તેઓને જોઈને
મને ઝનૂન ચઢી આવે છે.
54તમારા વિધિઓ આ મારી
જીવનયાત્રામાં મારાં ગીત થયાં છે.
55હે યહોવા, મેં રાત્રે તમારા નામનું
સ્મરણ કર્યું છે,
અને તમારો નિયમ પાળ્યો છે.
56મેં તમારાં શાસનો પાળ્યાં છે,
તેથી મને એમ જ થાય છે.
પ્રભુનાં વચનો પર ભક્તિભાવ
ખેથ
57હે યહોવા, તમે મારો વારસો છો;
હું તમારાં વચનો પાળીશ,
એમ મેં કહ્યું છે.
58મેં મારા ખરા હ્રદયથી તમારી કૃપાની
માગણી કરી;
તમારા વચન પ્રમાણે
મારા પર દયા કરો.
59મેં મારી ચાલ વિષે વિચાર કર્યો છે,
અને તમારાં સાક્ષ્યો તરફ
હું વળ્યો છું.
60મેં તમારી આજ્ઞાઓ પાળવાને
ઉતાવળ કરી છે,
અને વાર લગાડી નથી.
61દુષ્ટોનાં બંધનોએ મને ઘેરી લીધો છે:
પણ હું તમારા નિયમને
વીસરી ગયો નથી.
62તમારાં અદલ ન્યાયવચનોને લીધે
હું તમારો આભાર માનવાને
મધરાતે ઊઠીશ.
63જે કોઈ તમારાં શાસનો પાળનારા
તમારા ભક્તો છે,
તે સર્વનો હું સોબતી છું.
64હે યહોવા,
તમારી કૃપાથી પૃથ્વી ભરપૂર છે;
મને તમારા વિધિઓ શીખવો.
તમારાં વચન કેવાં અમૂલ્ય!
ટેથ
65હે યહોવા, તમારા વચન પ્રમાણે
તમે તમારા સેવકને માટે
સારું જ કર્યું છે.
66મને સારો વિવેક તથા ડહાપણ શીખવો;
કેમ કે મેં તમારી આજ્ઞાઓ પર
વિશ્વાસ રાખ્યો છે.
67દુ:ખી થયા પહેલાં
હું આડે રસ્તે ગયો હતો;
પણ હમણાં હું તમારું વચન પાળું છું.
68તમે ઉત્તમ છો અને ઉત્તમ જ કરો છો;
તમારા વિધિઓ મને શીખવો.
69ગર્વિષ્ઠોએ મારા પર આળ મૂક્યું છે;
પણ હું મારા ખરા હ્રદયથી
તમારાં શાસનો પાળીશ.
70તેઓનું અંત:કરણ સ્થૂળ છે;
પણ હું તમારા નિયમમાં
આનંદ માનું છું
71હું દુ:ખી થયો હતો
તે મને ગુણકારક થઈ પડ્યું છે;
કેમ કે હું તમારા વિધિઓ શીખ્યો.
72હજારો સોનારૂપા કરતાં
તમારા મુખનો નિયમ મારે માટે
વધારે મૂલ્યવાન છે.
પ્રભુનો નિયમ ન્યાયી છે
યોદ
73તમારા હાથોએ મને ઘડ્યો તથા
બનાવ્યો છે;
તમારી આજ્ઞાઓ શીખવાને માટે
મને સમજણ આપો.
74તમારાથી બીનારા
મને જોઈને આનંદ પામશે;
કેમ કે મેં તમારી વાતની
આશા રાખી છે.
75હે યહોવા, તમારાં ન્યાયવચનો
અદલ છે,
અને વિશ્વાસુપણાને તમે મને દુ:ખી
કર્યો છે, એમ હું જાણું છું.
76તમારા સેવકને આપેલા તમારા વચન
પ્રમાણે
તમારી કૃપાથી મને દિલાસો મળો.
77હું જીવતો રહું માટે તમારી દયા મારી
પાસે આવવા દો;
કેમ કે તમારો નિયમ એ જ
મારો આનંદ છે.
78ગર્વિષ્ઠો ફજેત થાઓ; કેમ કે તેઓએ
વિનાકારણ મારી સાથે કપટ કર્યું છે;
પણ હું તમારાં શાસનોનું
મનન કરીશ.
79તમારા ભક્તો, એટલે જેઓ તમારાં
સાક્ષ્યો જાણે છે,
તેઓ મારા તરફ વળો.
80મારું હ્રદય તમારા વિધિઓ
વિષે પૂર્ણ થાય કે,
મારે લજવાવું ન પડે.
બચાવ માટે પ્રાર્થના
કાફ
81તમારા તારણને માટે
મારો જીવ મૂંઝાય છે;
પણ હું તમારા વચનની
આશા રાખું છું.
82“તમે મને ક્યારે દિલાસો આપશો?”
એમ કહેતાં મારી આંખો તમારા
વચનને માટે નિસ્તેજ થઈ જાય છે.
83વળી હું ધુમાડામાં રહેલી
મશકના જેવો થઈ ગયો છું;
તોપણ હું તમારા વિધિઓને
વીસરતો નથી.
84તમારા સેવકના દિવસ કેટલા છે?
તમે સતાવનારાનો
ન્યાય ક્યારે કરશો?
85જે ગર્વિષ્ઠો તમારા નિયમાનુસાર
વર્તતા નથી,
તેઓએ મારે માટે ખાડા ખોદ્યા છે.
86તેઓ મને વિનાકારણ સતાવે છે;
તમે મને સહાય કરો;
તમારી સર્વ આજ્ઞાઓ વિશ્વાસયોગ્ય છે.
87પૃથ્વી પરથી તેઓએ લગભગ
મારો નાશ કર્યો હતો;
તોપણ મેં તમારાં શાસનોનો
ત્યાગ કર્યો નહિ.
88તમારી કૃપા પ્રમાણે મને જીવાડો;
એટલે હું તમારા મુખની
શિખામણ પાળીશ.
પ્રભુના નિયમનું વિશ્વાસુપણું
લામેદ
89હે યહોવા, તમારું વચન
આકાશમાં સદા સ્થિર છે.
90પેઢી દરપેઢી તમારું વિશ્વાસુપણું
કાયમ રહે છે;
તમે પૃથ્વીને સ્થાપી છે,
અને તે નીભી રહે છે.
91આજ સુધી તેઓ તમારાં ન્યાયવચન
પ્રમાણે નીભી રહેલાં છે;
કેમ કે તેઓ સર્વ તમારા સેવકો છે.
92જો તમારા નિયમમાં મેં આનંદ
માન્યો ન હોત,
તો હું મારા દુ:ખમાં નાશ પામત.
93હું તમારાં શાસનોને કદી વીસરીશ નહિ;
કેમ કે તમે તેઓથી
મને જીવાડ્યો છે.
94હું તમારો છું, મને બચાવો;
કેમ કે મેં તમારાં શાસનો શોધ્યાં છે.
95દુષ્ટો મારો નાશ કરવાનો લાગ
જોઈ રહ્યા છે;
પણ હું તમારાં સાક્ષ્યો
ધ્યાનમાં રાખીશ.
96મેં સર્વ સંપૂર્ણતાની સીમા તો જોઈ છે;
પણ તમારી આજ્ઞાની સીમા જ નથી.
પ્રભુના નિયમ માટેનો પ્રેમ
મેમ
97હું તમારા નિયમ પર
કેટલો બધો પ્રેમ રાખું છું!
આખો દિવસ તેનું જ મનન કરું છું.
98તમારી આજ્ઞાઓ મારા શત્રુઓના
કરતાં મને બુદ્ધિમાન કરે છે;
કેમ કે તેઓ સદા મારી પાસે છે.
99મારા સર્વ શિક્ષકો કરતાં
હું વધુ સમજું છું;
કેમ કે હું તમારાં સાક્ષ્યોનું
ધ્યાન ધરું છું.
100વૃદ્ધોના કરતાં હું વિશેષ જાણું છું,
કેમ કે મેં તમારાં શાસનો પાળ્યાં છે.
101હું તમારું વચન પાળું
માટે મેં મારા પગ સર્વ ભૂંડા
માર્ગથી પાછા હઠાવ્યા છે.
102હું તમારાં ન્યાયવચનોથી
ખસી ગયો નથી;
કેમ કે તમે મને શિક્ષણ આપ્યું છે.
103મારી રુચિને તમારાં વચન કેવાં
મીઠાં લાગે છે!
તેઓ મારા મુખને મધના કરતાં
વધુ મીઠાં છે!
104તમારાં શાસનોથી
મને સમજણ મળે છે;
માટે હું હરેક જૂઠા માર્ગને
ધિક્કારું છું.
તમારા નિયમમાં જીવનપ્રકાશ છે
નુન
105મારા પગોને માટે તમારું
વચન દીવારૂપ છે;
તે મારા માર્ગને માટે
અજવાળારૂપ છે.
106હું તમારાં યથાર્થ ન્યાયશાસનો પાળીશ
એવી પ્રતિજ્ઞા મેં કરી હતી,
અને તે પાળી પણ છે.
107હું દુ:ખમાં બહુ દબાઈ ગયો છું;
હે યહોવા, તમારા વચન પ્રમાણે
મને જીવાડો.
108હે યહોવા, મારા મુખનાં રાજીખુશીથી
આપેલાં અર્પણ સ્વીકારો;
અને તમારાં ન્યાયવચનો મને શીખવો.
109મારો જીવ સદા મારી મુઠ્ઠીમાં છે;
તોપણ હું તમારા નિયમને
વીસરતો નથી.
110દુષ્ટોએ મારે માટે પાશ નાખ્યો છે;
તોપણ હું તમારાં શાસનો
મૂકીને ભમી ગયો નથી.
111મેં તમારાં સાક્ષ્યોને મારો
સદાકાળનો વારસો માન્યાં છે;
કેમ કે તેઓ મારા
હ્રદયનો આનંદ છે.
112તમારા વિધિઓ છેવટ સુધી
સદા પાળવાને
મેં મારા હ્રદયને વાળ્યું છે.
તમારા નિયમમાં જ મારી સહીસલામતી
સામેખ
113હું બે મોઢાંવાળાઓને ધિક્કારું છું;
પણ હું તમારા નિયમ પર
પ્રેમ રાખું છું.
114તમે મારી ઓથ તથા ઢાલ છો;
હું તમારા વચનની આશા રાખું છું.
115અરે ભૂંડું કરનારા,
તમે મારી પાસેથી ખસી જાઓ કે,
હું મારા ઈશ્વરની આજ્ઞાઓ પાળું.
116હું જીવું માટે તમારા વચન પ્રમાણે
મને આધાર આપો.
મારી આશા વિષે
મને ફજેત કરશો નહિ.
117તમે મારા સહાયકારી થાઓ.
એટલે હું સલામત રહીશ,
અને હું નિત્ય તમારા વિધિઓ
પર લક્ષ આપીશ.
118તમારા વિધિઓથી સર્વ ભમી જનારાને
તમે હલકા ગણ્યા છે;
કેમ કે તેઓનો ઢોંગ ફોકટ છે.
119કચરાની જેમ તમે પૃથ્વીના
સર્વ દુષ્ટોને બાતલ કરો છે;
માટે હું તમારાં સાક્ષ્યો પર
પ્રેમ રાખું છું.
120તમારા ભયથી હું કાપું છું;
અને હું તમારાં ન્યાયવચનથી ડરું છું.
પ્રભુનો નિયમ ભક્તનો પરમાનંદ
હાયિન
121મેં ન્યાય તથા અદલ ઇનસાફ કર્યો છે;
મારા પર જુલમ કરનારાના હાથમાં
મને ન સોંપો.
122તમારા સેવકના કલ્યાણને માટે
તેના જામીન થાઓ;
ગર્વિષ્ઠોને મારા પર જુલમ કરવા ન દો.
123તમારા તારણની ને તમારા પવિત્ર
વચનની રાહ જોતાં જોતાં
મારી આંખો નિસ્તેજ થાય છે.
124તમારી કૃપા પ્રમાણે
તમારા સેવકની સાથે વર્તજો,
તમારા વિધિઓ મને શીખવજો.
125હું તમારો સેવક છું. મને બુદ્ધિ આપો;
જેથી હું તમારાં સાક્ષ્યો સમજું.
126હવે યહોવાને કામ કરવાનો
સમય આવ્યો છે;
કેમ કે તેઓએ તમારો નિયમ
તોડ્યો છે.
127તેથી હું સોના કરતાં, ચોખ્ખા સોના
કરતાં પણ
તમારી આજ્ઞાઓ પર
વધારે પ્રેમ રાખું છું.
128તમારાં શાસનો પ્રમાણે હું મારી
સર્વ વર્તણૂક યથાર્થ રાખું છું;
હું દરેક જૂઠા માર્ગને ધિક્કારું છું.
પ્રભુનો નિયમ પાળવાની તમન્ના
પે
129તમારાં સાક્ષ્યો આશ્ચર્યકારક છે;
માટે મારો જીવ તેમને પાળે છે.
130તમારાં વચનોનો ખુલાસો પ્રકાશ
આપે છે
તે ભોળાને સમજણ આપે છે.
131હું મારું મોં ઉઘાડીને તલપી રહ્યો;
કેમ કે હું તમારી આજ્ઞાઓની
અભિલાષા રાખતો હતો.
132જેમ તમારા નામ પર પ્રેમ રાખનારાની
સાથે તમે વર્તો છો,
તેમ તમે મારા તરફ ફરીને
મારા પર દયા કરો.
133તમારા વચન પ્રમાણે મારી પાસે
ડગલાં ભરાવો;
અને કોઈ પણ અન્યાયને
મારા પર ધણીપણું કરવા ન દો.
134માણસના જુલમમાંથી
મારો ઉદ્ધાર કરો;
એટલે હું તમારાં શાસનો પાળીશ.
135તમારા સેવક પર તમારા મુખનો
પ્રકાશ પાડો;
અને તમારા વિધિઓ મને શીખવો.
136તમારો નિયમ તેઓ પાળતા નથી,
તેથી મારી આંખોમાંથી
ચોધાર આંસુઓ વહે છે.
તમારો નિયમ તદ્દન ન્યાયી છે
સાદે
137હે યહોવા, તમે ન્યાયી છો,
તમારાં ન્યાયવચનો યથાર્થ છે.
138ન્યાયીપણાથી તથા પૂરેપૂરા
વિશ્વાસુપણાથી
તમે તમારાં સાક્ષ્યો ફરમાવ્યાં છે.
139મારા શત્રુઓ તમારાં વચન
વીસરી ગયા છે,
તેથી મારા જુસ્સાએ
મને ક્ષીણ કરી નાખ્યો છે.
140તમારું વચન તદ્દન નિર્મળ છે;
માટે તમારો સેવક
તેના પર પ્રેમ રાખે છે.
141હું નાનો તથા ધિક્કારાયેલો છું;
તોપણ હું તમારાં શાસનો
ભૂલી જતો નથી.
142તમારું ન્યાયીપણું તો અનંતકાળ
ટકનારું ન્યાયીપણું છે,
અને તમારો નિયમ સત્ય છે.
143શોક તથા દુ:ખ
મારા પર આવી પડ્યાં છે;
તોપણ તમારી આજ્ઞાઓ
મારો આનંદ છે.
144તમારાં સાક્ષ્યો સદાકાળ ન્યાયયુક્ત છે;
મને સમજણ આપો,
એટલે હું જીવતો રહીશ.
પ્રભુ, મારો હાથ પકડો
કોફ
145મેં ખરા હ્રદયથી વિનંતી કરી છે;
હે યહોવા, મને ઉત્તર આપો;
હું તમારા વિધિઓ પાળીશ.
146મેં તમને વિનંતી કરી છે;
મને બચાવો;
એટલે હું તમારાં સાક્ષ્યો પાળીશ.
147પ્રભાત થયા પહેલાં મેં અરજ કરી;
મેં તમારી વાતની આશા રાખી.
148તમારા વચનનું મનન કરવા માટે
મારી આંખો રાતના છેલ્લા પહોર
અગાઉ ઊઘડી ગઈ હતી.
149તમારી કૃપા પ્રમાણે
મારી વાણી સાંભળો;
હે યહોવા, તમારાં ન્યાયવચનો
પ્રમાણે મને જીવાડો.
150જેઓ દુષ્ટ ભાવથી મારી પાછળ
લાગેલા છે
તેઓ મારી પાસે આવે છે;
તેઓ તમારા નિયમથી દૂર છે.
151હે યહોવા, તમે પાસે છો;
અને તમારી સર્વ
આજ્ઞાઓ સત્ય છે.
152મેં પૂર્વે તમારાં સાક્ષ્યોથી
જાણ્યું છે કે,
તમે તેઓને સર્વકાળને માટે
સ્થાપ્યાં છે.
સહાય માટે પ્રાર્થના
રેશ
153મારી વિપત્તિ સામું જુઓ,
અને મને બચાવો;
કેમ કે હું તમારો નિયમ વીસરતો નથી.
154મારી હિમાયત કરો અને મને છોડાવો;
તમારા વચન પ્રમાણે મને જીવાડો.
155દુષ્ટોથી તારણ વેગળું રહે છે;
કેમ કે તેઓ તમારા વિધિઓ
શોધતા નથી.
156હે યહોવા, તમારી કરુણા મહાન છે;
તમારાં ન્યાયવચનો પ્રમાણે
મને જીવાડો.
157મને સતાવનારા તથા
મારા શત્રુઓ ઘણા છે;
તોપણ હું તમારાં સાક્ષ્યોથી
પાછો હઠી ગયો નથી.
158મેં વિશ્વાસઘાતીઓને જોયા
ત્યારે મેં તેઓને ધિક્કાર્યા,
કેમ કે તેઓ તમારાં વચન પાળતાં નથી.
159હું તમારાં શાસનો પર કેટલો બધો પ્રેમ
રાખું છું તે તમે ધ્યાનમાં લેજો;
હે યહોવા, તમારી કૃપા પ્રમાણે
મને જીવાડો.
160તમારું વચન અથથી તે ઇતિ સુધી
સત્ય છે;
તમારાં સર્વ ન્યાયવચનો સદાકાળ
[ટકનારાં છે].
પ્રભુનાં વચનોમાં ભક્ત રાજીરાજી
શીન
161સરદારોએ વિનાકારણ
મને સતાવ્યો છે;
પણ મારું હ્રદય તમારાં વચનનું
ભય રાખે છે.
162મોટી લૂંટ મેળવનારની જેમ
તમારા વચનથી મને આનંદ થાય છે.
163અસત્ય ઉપર હું દ્વેષ રાખું છું
અને તેનાથી કંટાળું છું;
પણ તમારા નિયમ ઉપર
હું પ્રેમ રાખું છું.
164તમારાં યથાર્થ ન્યાયવચનોને લીધે
હું રોજ સાત વાર
તમારી સ્તુતિ કરું છું.
165તમારા નિયમ પર પ્રેમ રાખનારાને
બહુ શાંતિ મળે છે.
તેઓને ઠોકર ખાવાનું
કંઈ કારણ નથી.
166હે યહોવા, મેં તમારા તારણની
આશા રાખી છે,
કેમ કે મેં તમારી આજ્ઞાઓ પાળી છે.
167મારા આત્માએ
તમારાં સાક્ષ્યો પાળ્યાં છે;
તેમના પર હું ઘણો જ પ્રેમ રાખું છું.
168મેં તમારાં શાસનો તથા સાક્ષ્યો
પાળ્યાં છે
કેમ કે મારી બધી ચાલચલગત
તમને વિદિત છે.
મારો પોકાર તમને પહોંચો
તાવ
169હે યહોવા, મારા પોકારને
તમારી પાસે આવવા દો;
તમારા વચન પ્રમાણે
મને સમજણ આપો.
170મારી પ્રાર્થનાને તમારી સમક્ષ
આવવા દો;
તમારા વચન પ્રમાણે મને છોડાવો.
171મારા હોઠો તમારી સ્તુતિ ઉચ્ચારો;
કેમ કે તમે મને તમારા
વિધિઓ શીખવો છો.
172મારી જીભ તમારા વચન વિષે
ગાયન કરો;
કેમ કે તમારી સર્વ આજ્ઞાઓ ન્યાયી છે.
173તમારો હાથ મને સહાય કરવા
તૈયાર થાઓ;
કેમ કે મેં તમારાં શાસન
પસંદ કર્યાં છે.
174હે યહોવા, હું તમારા તારણને માટે
અભિલાષી છું;
તમારો નિયમ મારો આનંદ છે.
175મારા આત્માને જીવાડો,
એટલે તે તમારી સ્તુતિ કરશે;
તમારાં ન્યાયવચનો મને સહાય કરો.
176હું ભૂલા પડેલા મેંઢાની જેમ ભટક્યો
છું; તમારા સેવકને શોધી કાઢો;
કેમ કે હું તમારી આજ્ઞાઓ
વીસરી જતો નથી.
Currently Selected:
ગીતશાસ્ત્ર 119: GUJOVBSI
Highlight
Share
Copy
Want to have your highlights saved across all your devices? Sign up or sign in
Gujarati OV Reference Bible - પવિત્ર બાઇબલ
Copyright © Bible Society of India, 2016.
Used by permission. All rights reserved worldwide.
