ማርቆሴ 14

ኪሪስቶሴ ባይዛኒ ዓሶኮ ዎላ'' ዞርቲፆ

(ማቲ. 26፥1-5፤ ሉቃ. 22፥1-2፤ ዮሓ. 11፥45-53)

1ዓይሁዴ ዓሳ ዑሣ ዓኣዺፆንታ ላኣዳ ሙዒ ቦንቾ ኬሎ''ንታ ማሊ ቦንቻኒ ላምዖ ዓቢ ዓታዛ ቄኤሶኮ ሱኡጎና ዎጎ ኮሺ'' ዔራ ዓሳ ጌኔ ማሊሢና ዬሱሴ ዓርቂ ዎዾንዶ ጎይሢ ኮዔኔ። #ኬሲ. ማፃ 12፥1-7። 2ጋዓንቴ ዴራ'' ዑራ ዔቂሳንዳኔ ጌዒ፦ «ኑኡኒ ቦንቾ ኬሎ''ና ዬያ ማዻዓ» ዔያታ ጌዔኔ።

ሳውቃ ቲዦና ዬሱሴኮ ዑፆ ቲሽኬ ላኣሌሎ

(ማቲ. 26፥6-13፤ ዮሓ. 12፥1-8)

3ዬሱሴ ቢታኒያ ጎዖ ጉርዶይዳ ዑፃ ኬስካ ፑርቶ ዶርዓሢና ዓርቂንቴዖ ፖዔ፥ ሲሞኦኔ ጎዖሢ ማኣራ ዓኣዖ ካሣ ሙዓኒ ጊኢጊ ዴዒ ዓኣንቴ ፔቴ'' ላኣሊስኬና ሹቺ ቢልቃፄይዳ ናርዶሴ ጎዖያ ቦንቺንቴያ ሓሣ ሻንቾዛ ሚርጌ ሚኢሼ ዔካ፥ ሳውቃያ ዋኣሢ ማዔ ቲሺ ኩንሢ ዔኪ ሙካዖ ዬኖ ቢልቃፄሎ ዎዺ ሳውቃ ቲዤሎ ዬሱሴኮ ቶኦካ'' ዋሄኔ። #ሉቃ. 7፥37-38። 4ዬያ ዒዛ ማዻኣና ዒኢካ ዓኣ ዓሶይዳፓ ፔቴ'' ፔቴ'' ዓሳ ጎሪ''ንታዖ፦ «ሓይ ሳውቃ ቲዣ ጉሪ ዓታሢ ዓይጎሮዳይ? 5ሓያ ሳውቃ ቲዦ ፔቴ'' ዓሲ ፔቴ'' ሌዔ ማዾ ማዼም ዒንጎንዶ ሚኢሼይዳፓ ዑሣ ሻንቺ ዔኤቢ ባኣ፥ ዓሶ ማንቆም ዒንጎናቴ ዓይጌ ዓኣይ?» ጌዒ ላኣሌሎዋ ዔያታ ፓሴኔ።

6ዬሱሴ ማሓዖ፦ «ሓሹ''ዋቴ፤ ዒዞ ዒንሢ ዓይጎሮ ሜታሳይ? ዒዛ ታኣም ኮሺ ባኣዚ'' ማዼኔ፤ 7ማንቆ ዓሳ ቢያ ኬሊ'' ዒንሢና ዎላ'' ዓኣሢሮ ኮዔ ዎዴና ዔያቶ ዒንሢ ማኣዳ''ኒ ዳዳንዳዓኔ፤ ጋዓንቴ ታኣኒ ቢያ ኬሊ'' ዒንሢና ዎላ'' ሓይካቱዋሴ፤ #ላሚ. ዎማ 15፥11። 8ሓና ላኣሌላ ፔኤም ዳንዳዒንቴሢ ጉዴያ ማዼኔ፤ ዓሽካ ታኣኮ ዱኡኪንቱዋንቴ ቤርታሲ ሳውቃ ቲሺና ዒዛ ታኣኮ ዑፆ ቲሽኪ ዱኡፖም ጊኢጊሼኔ። 9ጎኔ ታ ዒንሢም ጋዓኔ፤ ዓጮ'' ቢያይዳ ሓይ ኮዦ ሓይሳ ኬኤዚንታ ዎዶ''ና ዓንካ ማዔቶዋ ሓይ ዒዛ ማዼ ባካ ዒዞ ጶቂሥሢ ማዒ ኬኤዚንታንዳኔ» ጌዔኔ።

ዪሁዳ ዬሱሴ ጌሺሢና ዓኣሢ ዒንጋኒ ዓሶና ዎላ'' ጊኢጌሢ

(ማቲ. 26፥14-16፤ ሉቃ. 22፥3-6)

10ታጶ ላምዓሢዳፓ ፔቴ'' ዓስቆሮንቶ ዪሁዳ ጎዖሢ ዬሱሴ ጌሺሢና ዓኣሢ ዒንጋኒ ቄኤሶኮ ሱኡጎ ኮራ ዓኣዼኔ። 11ዔያታ ዒዛኮ ጎዳ ሻንቾሮ ሙኪፆ ዔራዖ ኮሺ'' ዎዛዺ ሚኢሼ ዒዛም ዒንጋኒ ዎላ'' ጌስቲ ጊኢጌኔ። ዬካፓ ዒዚ ዬሱሴ ዓኣሢ ዒንጋኒ ዒዛም ጊኢጋንዳ ጎይሢ ኮዔኔ።

ዬሱሴ ዑሣ ዓኣዺፆ ኬሎ'' ካዎ ዳኪንቴዞንሢና ዎላ'' ሙዔሢ

(ማቲ. 26፥17-25፤ ሉቃ. 22፥7-14፤ 22፥21-23፤ ዮሓ. 13፥21-30)

12ዬሱሴኮ ጊንፆ ሓንታዞንሢ ዓይሁዴ ዓሳ ዑሣ ዓኣዺፆ ቦንቾ ኬሎ'' ማራቶ ሹኪ ላኣዶዋ ሙዒ ቦንቻ ኬሎ''ኮ ዓይፆይዳ ዒዛ ኮራ ሙካዖ፦ «ዑሣ ዓኣዺፆ ኬሎ'' ማሊ ሙዎ ካዋሢ ሙዓኒ ዎካ ዓኣዺ ጊኢጊሻንዳጉዲ ኔኤኒ ኮዓይ?» ጌዒ ዖኦጬኔ።

13ዒዚያ ዒዛኮ ጊንፆ ሓንታዞንሢዳፓ ላምዖንሢም ሂዚ ጌዒ ዳኬኔ፦ «ሴኬ ካታሞ ዴንዱዋቴ፤ ዒኢካ ዒንሢ ዋኣሢ ጉሲ ኬዴ ዓሲ ዴንቃንዳኔ፤ ዬያ ዓሢኮ ጊንፆ ዓኣዹዋቴ፤ 14ዒዚ ዴንዲ ጌላ ኬኤፆማ ጌሊጋፓ ማኣሮኮ ዓዳሢ ኮራ ‹ዔርዛሢ፡ ታኣኮ ጊንፆ ሓንታዞንሢና ዎላ'' ታኣኒ ዑሣ ዓኣዺፆ ኬሎ'' ሙዖ ሙዓንዳ ኬኤፃ ዎካዳይ?› ጋዓኔ፥ ጎዑዋቴ። 15ዒዚያ ኩቦ ጋራ ዓኣ ሂኢሢ ጊኢጊንቴ ዳልጎ ቤዞ ዒንሢም ዻውዋንዳኔ፤ ዒኢካ ኑም ጊኢጊሹዋቴ።»

16ላምዖ ጊንፆ ሓንታዞንሢ ኬስኪ ካታሞ ዴንዲ ዬሱሴ ጌዔማጉዲ ቤዞዋ ዴንቂ ዑሣ ዓኣዺፆ ኬሎ'' ካዋሢ ሙዓኒ ዒኢካ ጊኢጊሼኔ።

17ሳዓ ዓማዛ ዬሱሴ ታጶ ላምዖንሢና ዎላ'' ሙኬኔ፤ 18ካሦ ሺኢሺ ዔያታ ሙዓኣና ዬሱሴ፦ «ጎኔ ታኣኒ ዒንሢም ጋዓኔ፤ ሓሢ ታኣና ዎላ'' ካሦ ሙዓያ ዒንሢዳፓ ፔቴ''ይ፥ ታና ዓኣሢ ዒንጋንዳኔ» ጌዔኔ። #ዓይኑ. 41፥9።

19ዔያታ ዬኖ ጌኤዞና ዖያዖ፦ «ጎኔ ታናቱዋሴ፤ ኔ ታናኬ ጋዓ?» ጌዒ ጌዒ ፔቴ'' ፔቴ''ሢ ዒዛ ዖኦጬኔ።

20ዬሱሴ ማሓዖ፦ «ዬይ ዓሢ ሓሢ ታኣና ዎላ'' ሃኖ ጎንጋ ኩጮ ዳካያ፥ ዒንሢ ታጶ ላምዓሢዳፓ ፔቴ''ሢኬ፤ 21ዓሲኮ ናዓሢ ቤርታዺ ዒዛ ዛሎ'' ፃኣፒንቴ ጎይፆና ሓይቂሢ ዓታዓኬ፤ ጋዓንቴ ዓሲኮ ናዓሢ ጌሺሢና ዓኣሢ ዒንጋ ዬያ ዓሢም ባዴዔ፤ ዬይ ዓሢ ቤርታዺ ሾይንቲባኣቴ ቃራታዖኬ» ጌዔኔ።

ጎዳኮ ማዾ'' ካዋሢ

(ማቲ. 26፥26-30፤ ሉቃ. 22፥14-20፤ 1ቆሮ. 11፥23-25)

22ዔያታ ሙዖይዳ ዓኣንቴ ዬሱሴ ካሣ ዔካዖ ጋላቲ ቡንፂጋፓ ዒዛኮ ጊንፆ ሓንታ ናኣቶ''ም፦ «ሓኣዛጉዋቴ፥ ሓይ ታናኬ» ጌዒ ዒንጌኔ።

23ሓሣ ዑሽኮ ባኮዋ ዔካዖ ጋላቲ ዔያቶም ዒንጌኔ፤ ቢያሢ ዑሽኮ ባኮይዳፓ ዑሽኬኔ። 24ዒማ''ና ዒዚ ዔያቶም፦ «ሓይ ታኣኮ ሚርጌ ዓሶም ላኣሊንታንዳ ጫኣቁሞ ሱጉፆኬ፤ #ኬሲ. ማፃ 24፥8፤ ዔር. 31፥31-34። 25ጎኔ ታ ዒንሢም ጋዓኔ፤ ፆኦሲ ካኣቱሞይዳ ዓኮ ታኣኒ ዑሽካንዳያ ሄላ''ንዳኣና ሓኖ ዎይኖ ዑዦ ላሚ ታኣኒ ዑሽካዓኬ» ጌዔኔ።

26ዬካፓ ዔያታ ፆኦሲ ቦንቾም ማዓ ዓይኑሞ ዓይናዻዖ ሪሚቲ ዹካ ዓኣዻኒ ኬስኬኔ።

ጴፂሮሴ ዒዛ ዔሩዋሴ ጋዓንዳኔ ጌዒ ዬሱሴ ኬኤዜሢ

(ማቲ. 26፥31-35፤ ሉቃ. 22፥31-34፤ ዮሓ. 13፥36-38)

27ዬሱሴ ዒዛኮ ጊንፆ ሓንታ ናኣቶ''ም፦ « ‹ሄንቃሢ ታኣኒ ዎዻንዳኔ፤ ማራታኣ ዣኣላንዳኔ› ጌይንቲ ፃኣፒንቴሢጉዲ ታ ዒንሢኮ ዹቆ ማዔም ዒንሢ ቢያ ታና ሓሻ''ንዳኔ፤ #ዛካ. 13፥7። 28ጋዓንቴ ሓይባ''ፓ ታኣኒ ዔቄስካፓ ጌሊላ ጎዖ ዓጮ'' ቢሪ ታ ዒንሢ ዓኣዻንዳኔ» ጌዔኔ። #ማቲ. 28፥16።

29ጴፂሮሴ፦ «ሜሌ'' ዓሳ ኔ ዛሎ''ና ዹቂንቴታቶዋ ታኣኒ ማሊ ዹቂንታዓኬ» ጌዔኔ።

30ዬሱሴ፦ «ታኣኒ ኔኤም ጎኔ ጋዓኔ፤ ሓኖ'' ዒባኒ ኮይዳ ላሚ ቂኢቁዋንቴ ኔኤኒ ታና ሓይሢ ማይንቲ ‹ታ ዒዛ ዔሩዋሴ› ጋዓንዳኔ» ጌዔኔ።

31ጴፂሮሴ ጋዓንቴ፦ «ሓይቂ ሓይቆቴያ ታኣኒ ኔኤና ሓይቃንዳኣፓዓቴም ማሊ ‹ታ ኔና ዔሩዋሴ› ጋዓዓኬ» ጌዒ ጌዒ ዶዲሺ ኬኤዛኣና ሓንጎ ዓቴ'' ጊንፆ ሓንታዞንሢያ ያዒ ጌዔኔ።

ዬሱሴ ጌኤቴሴማኔ ጎዖ ቤዛ ሺኢቄ ሺኢጲፆ

(ማቲ. 26፥36-46፤ ሉቃ. 22፥39-46)

32ዬማፓ ጌኤቴሴማኔ ጎዖያ፥ ቱኮ''ና ሚሢ ሚርጌ ዓኣ ቤሲ ዔያታ ዓኣዻዖ ዬሱሴ ፔኤኮ ጊንፆ ሓንታ ናኣቶ''ም፦ «ታኣኒ ሺኢቃኣና ዒንሢ ሃካ ዴዑዋቴ» ጌዔስካፓ፥ 33ዒዛና ዎላ'' ጴፂሮሴንታ ያይቆኦቤንታ ሓሣ ዮሓኒሴንታ ዔኪ ዓኣዻዖ ዒኢካ ዒዚ ኮሺ'' ማሊ ዖዪሢ ዓርቄኔ። 34ዔያቶ ኮራ ዒዚ፦ «ሼምፓሢ ታኣኮ ሚርጌ ዖዪ ሓይቃኒ ዑኬኔ፤ ዒንሢ ሓይማካ ዴዒ ዶዲ ካፑዋቴ» ጌዔኔ።

35ዒዚ ዔያቶይዳፓ ዻካ'' ሓኪ ዓኣዻዖ ባሊቶና ሳዓ ሎኦሚ ዳንዳዒንታያ ማዔቶ ዬና ፑርቶ ሜቶ ዎዴላ ዒዛ ሄሉ''ዋጉዲ፥ 36ሂዚ ጌዒ ሺኢቄኔ፦ «ዓዳሢዮ! ቢያ ባኣዚ'' ኔኤም ዳንዳዒንታያታሢሮ ሃኖ'' ታኣኒ ዔካኒ ጊኢጌ ሜቶ'' ታጊዳፓ ሓኪሴ፤ ጋዓንቴ ኔ ማሊፆጉዲ ማዓንዳኣፓዓቴም ታ ማሊፆጉዲ ማዖፓ።»

37ዬካፓ ሓይሦ ዒዛኮ ጊንፆ ሃንታዞንሢ ኮራ ማዒ ሙካዖ ዔያታ ጊንዒ ዓኣንቴ ዴንቂ ጴፂሮሴ ኮራ፦ «ሲሞኦኔ! ኔኤኒ ጊንዒዳ? ዻካ'' ዎዴታዖ ጴጪ ዶዲ ዴዓኒ ኔኤኒ ዳንዳዒባኣዓዳ?» ጌዔኔ። 38ሄሊ''ሳዖ ቢያሢም፦ «ዒንሢ ዻቢሳኒ ጌሾ ባኣዚ''ዳ ዒንሢ ጌሉዋጉዲ ጴጪ ሺኢቁዋቴ፤ ዓሲኮ ዓያና ጊኢጌያኬ፤ ጋዓንቴ ዓሽኪ ላቤያኬ» ጌዔኔ።

39ሓሣ ጊንሣ ዓኣዺ ቤርታ ዒዚ ሺኢቄሢ ጎይፆ ላሚ ዒማ ጌዒ ሺኢቄኔ። 40ዬካፓ ዒዚ ማዒ ሙካንቴ ጊንዓሢ ዔያቶ ሚርጌና ባሼሢሮ ጊንዒ ዓኣንቴ ዴንቄኔ፤ ዔያታ ዒዛም ማሂ ኬኤዛኒያ ዳንዳዓባኣሴ።

41ሓይሣሲ ዔያቶ ኮራ ማዒ ሙካዖ ሂዚ ጌዔኔ፦ «ሓሢ ሄላ''ንዳኣና ዒንሢ ላሂ ሓውሺሢዳዳ? ማይ ዓካሪ ጊዴኔ፤ ዎዳ''ኣ ሄሌ''ኔ፤ ሓይሾ ዓሲኮ ናዓሢ ጎሞ ዓሶ ኩጫ ጌሺሢና ዓኣሢ ዒንጊንታንዳኔ። 42ሂዮ ማይ ዔቁዋቴ ኑኡኒ ዓኣዾም! ታና ጌሺሢና ዓኣሢ ዒንጋሢ ሓይሾ ሙኬኔ» ጌዔኔ።

ዬሱሴ ሞርኮ ኩጫ ዓርቂንቴሢ

(ማቲ. 26፥47-56፤ ሉቃ. 22፥47-53፤ ዮሓ. 18፥3-12)

43ዬሱሴ ሂዚ ጌዒ ኬኤዛ ጎይሣ ዓኣንቴ ዒዛኮ ጊንፆ ሓንታ ታጶ ላምዓሢዳፓ ፔቴ'' ዪሁዳ ጎዖሢ ሙኬኔ፤ ዒዛና ዎላ'' ዓፓሮና ኮኦሎ''ና ዓርቄ ሚርጌ ዓሲ ዓኣኔ፤ ዬያታ ዳኪንቴሢ ቄኤሶኮ ሱኡጎና ሙሴ ዔርዜ ዎጎ ዔርዛ ዓሶንታ ጪሞንታይዳፓኬ። 44ጌሺፆና ዓኣሢ ዒንጋ ዪሁዳ ዓሶም፦ «ዒንሢ ዓርቃንዳሢ ዎያዳይ ጌዔቶ ‹ኮሺዳ?› ጌዒ ታኣኒ ሄርቃንዳሢኬ፤ ዒዛ ዛጊ ዓርቂ ዔኪ ዓኣዹዋቴ» ጌዒ ዔያታ ዔራንዳጉዲ ቤርታዺ ኬኤዜኔ።

45ዪሁዳ ሙሙካዖ ዬሱሴ ኮራ ዶጪ፦ «ዔርዛሢዮ!» ጌዒ ሄርቄኔ። 46ዬማፓ ዓሳ ዬሱሴ ቶሊ''ንዱዋ ጎይሢ ዓርቄኔ። 47ዬማና ዒኢካ ዔቂ ዓኣ ዬሱሴኮ ጊንፆ ሓንታዞንሢዳፓ ፔቴ''ስኬይ ጬንቻ ቱጊ ቄኤሶ ሱኡጋሢ ዓይላ''ሢኮ ዋዮ ቆፂ'' ቲቄኔ። 48ዬሱሴያ ዔያቶም ሂዚ ጌዔኔ፦ «ጬንቻና ኮኦሎ''ና ዒንሢ ዔኪ ሙኬሢ ሱላጉዲ ታና ዓርቃኒዳ? 49ቢያ ኬሊ'' ጌኤዦ ማኣሮይዳ ታኣኒ ዔርዚ ዔርዚ ናንጋኣና ዒንሢ ታና ዓርቂባኣሴ፤ ጋዓንቴ ሓይ ማዔሢ ፃኣፒንቴሢ ኩማንዳጉዲኬ።» #ሉቃ. 19፥47፤ 21፥37።

50ዬማፓ ዒዛኮ ጊንፆ ሓንታ ናኣታ'' ቢያ ዒዛ ሃሺ'' ፑኒንቴኔ።

51ዒማ''ና ሜሌ'' ባኣዚ'' ዑፃ ባኣያ ፓሎ ዓፒላ ማኣዔ ዼጌስኬይ ሌሊ ዬሱሴኮ ጊንፆ ጊንፆ ዓኣዻንቴ ዓሳ ዬያ ዼጌሢ ዓርቃዛ፥ 52ዬኖ ፓሎ ዓፒሌሎ ኬኤሪ፥ ዑሢ ጉሪ ጳሽኪ ቶሌ''ኔ።

ዬሱሴ ዓይሁዶኮ ዎይሣ ዓሶ ቡኪንቶ ቤርቶ ሺኢኬሢ

(ማቲ. 26፥57-68፤ ሉቃ. 22፥54-55፤ 22፥63-71፤ ዮሓ. 18፥13-14፤ 18፥19-24)

53ዬሱሴ ዔያታ ቄኤሶኮ ቢያ ዑፃሢ ማኣሪ ዔኪ ዓኣዼኔ፤ ዒኢካ ቄኤሶኮ ሱኡጎና ጪሞና ሓሣ ሙሴ ዔርዜ ዎጎ ዔርዛ ዓሳ ቢያ ቡኪንቴኔ። 54ጴፂሮሴያ ቄኤሶኮ ቢያ ዑፃሢ ዲሮ ጋሮ ሄላ''ንዳኣና ሓኬ ሓኬ ዬሱሴኮ ጊንፆ ዓኣዻዖ ዒኢካ ዲሮ ጋሮ ካፓ ዓሶና ዎላ'' ዴዒ ታሚ ካሽታኔ። 55ቄኤሶኮ ሱኡጎና ዓይሁዶኮ ቡኪንቶ ቢታ'' ቢያ ዬሱሴ ሓይቃንዳጉዲ ዎጊሳንዳ ማርካ ኮዔኔ፤ ጋዓንቴ ዔያታ ዴንቂባኣሴ። 56ሚርጌሢ ሉኡቂ ማርካቴንቴ ዔያታ ኬኤዜ ጌኤዛ ፔቴ'' ማዒባኣሴ።

57ፔቴ'' ፔቴ'' ዓሳ ዔቃዖ ሂዚ ጌዒ ሉኡቂ ማርካቴኔ፦ 58« ‹ታኣኒ ሓያ ዓሲ ኩቻ ማዦና ጌኤዦ ማኣሮ ሻሂ፥ ሓይሦ ኬሊ''ዳ ሜሌ'' ዓሲ ኩቻ ማዢንቲባኣያ ማዣንዳኔ› ዒ ጋዓንቴ ኑኡኒ ዋይዜኔ።» #ዮሓ. 2፥19። 59ያዒ ዔያታ ጌዔንቴያ ማርካታ ዔያቶኮ ዎላ'' ካኣሚባኣሴ።

60ቄኤሶኮ ቢያ ዑፃሢ ዔያቶ ባኣካ'' ዔቃዖ ዬሱሴ ኮራ፦ «ፔቴ'' ባኣዚ''ታዖ ማሂ ኔ ኬኤዙዋዓዳ? ሓይ ዓሳ ኔጊዳ ጋዓ ባካ ዓይጎዳዖ?» ጌዒ ዖኦጬኔ።

61ዬሱሴ ጋዓንቴ ዚቲ ጌዔያፓዓቴም ፔቴ'' ባኣዚ''ታዖ ማሂ ኬኤዚባኣያ ማዓዛ ቄኤሶኮ ቢያ ዑፃሢ ዬሱሴ ኮራ ላሚ፦ «ዓንጂንቴ ፆኦሲኮ ናኣዚ'' ሜሲሔ ኔናዳ?» ጌዒ ዖኦጬኔ።

62ዬሱሴያ ማሓዖ፦ «ሂዮ ታናኬ፤ ዓሲኮ ናዓሢ ዼኤፖ ፆኦሲኮ ሚዛቆ ዛላ'' ዴዒ ዓኣንቴ ሓሣ ጫሪንጮ ሻኣሮና ማዒ ሙካንቴ ዒንሢ ዛጋንዳኔ» ጌዔኔ። #ዳኣኔ. 7፥13።

63ዒማ''ና ቄኤሶኮ ቢያ ዑፃሢ ዻጋዺ ፔኤኮ ዓፒሎ ዳርዛዖ፦ «ሜሌ'' ማርካ ኑም ማይ ዓይጎ ኮይሳይ? 64ሓያ ዋይዙዋቴ፤ ፆኦሲ ዒዚ ጫሽካንቴ ዒንሢ ዋይዜኔ፤ ዓካሪ ሓይ ዒንሢም ዓይጎ ማላይ?» ጋዓዛ፥ ቢያሢ ፔቴ'' ዑኡሲና፦ «ሓይቢ ዒዛም ኮይሳኔ!» ጌዒ ዎጌኔ። #ሌዊ. ዓኬ 24፥16።

65ፔቴ'' ፔቴ'' ዓሳ ዒዛይዳ ጩቲ'' ጩቲ'' ዓኣፓ ዒዛኮ ዛጉዋጉዲ ቱርጫና ቱኪ''፦ «ሂንዳ ኔኤኒ ፆኦሲ ማሊሢ ኬኤዛያታቴ ኔና ዖኦኒ ዱሌ''ቶዋ ዔሬ» ጌዒ ጌዒ ዔያታ ዒዛ ኩቺ ሙሊ ዱሌ''ኔ። ሓንጎ ዲሮ ጋሮ ካፓ ዓሳ ሓሣ ዒዛ ባዒ ባዒ ዔኪ ዓኣዼኔ።

ጴፂሮሴኮ ዬሱሴ ታኣኒ ዔሩዋሴ ጌይፆ

(ማቲ. 26፥69-75፤ ሉቃ. 22፥56-62፤ ዮሓ. 18፥15-18፤ 18፥25-27)

66ጴፂሮሴ ቄኤሶኮ ቢያ ዑፃሢ ማኣሮኮ ዾኦሌ'' ዲሮ ጋራ ዓኣንቴ ቄኤሶኮ ቢያ ዑፃሢም ዓይሢንቲ ማዻ ፔቴ'' ዉዱሮ ናይስኬና ሙካዖ፥ 67ጴፂሮሴ ዒኢካ ታሚ ካሽታንቴ ዴንቂ ኮሺ'' ዛጋዖ፦ «ኔኤኒያ ናዚሬቶ ዓሢ ዬሱሴና ዎላ'' ዓኣያቲ» ጌዔኔ።

68ዒዚ ጋዓንቴ፦ «ታኣኒ ዔሩዋሴ፤ ኔኤኒ ጋዓ ባካ ታኣም ዔርቱዋሴ» ጌዔኔ። ዬማ ዒዚ ጌዒ ካሮ'' ባንሢ ኬኬስካኣና ኮይዳ ቂኢቄኔ።

69ዉዱሮ ናዔላ ጴፂሮሴ ዛጋዖ ዒኢካ ዔቂ ዓኣ ዓሶም፦ «ሓይያ ዔያቶ ባኣካ'' ዓኣያኬ» ጌዒ ላሚ ኬኤዚሢ ዓርቄኔ። 70ዒዚ ጋዓንቴ ሓሣ ጊንሣ «ታ ዒዛ ዔሩዋሴ» ጌዔኔ።

ዻካ'' ናጋጉዲ ጋዓዖ ዒኢካ ዔቂ ዓኣ ዓሳ ጴፂሮሴ ኮራ፦ «ኔኤኒ ጌሊላ ዓሲታሢሮ ጎኔ ኔ ዔያቶ ባኣካ'' ዓኣያኬ» ጌዔኔ።

71ዒዚ ጋዓንቴ፦ «ዒንሢ ዬያ ጋዓ ዓሢ ታኣኒ ዔሩዋሴ፤ ታና ባይዞም» ጌዒ ፔና ጋዳንቂ ጫኣቂሢ ዓርቄኔ።

72ዬማፓ ኔጉዋዖ ኮይዳ ላሚሣ ቂኢቃዛ ጴፂሮሴም፦ «ኮይዳ ላሚ ቂኢቁዋንቴ ሓይሢ ማይንቲ ኔኤኒ ታና ‹ዔሩዋሴ› ጋዓንዳኔ» ጌዒ ዬሱሴ ኬኤዜ ቃኣላ'' ጶቃዛ ዒናፓ ዖዪ ዬኤኬኔ።

Currently Selected:

ማርቆሴ 14: MNT

Highlight

Copy