'Make 16

:Yusu'-a' 'meh :sorn-' :dhih

(Mt 28.1-8; Lu 24.1-12; Jn 20.1-10)

1:Yee' :yeh Nyorsoa-a' :gwlee-we-eh zi-a, :yee' :Mehle' :or 'wluh-a :Magala'-: :Salo'mi-: 'dekorn: :Mehle' :or 'wluh-a 'Jeen-: :yee' on dhen 'chlan :or po-a 'no 'jeh no, on 'ye-or' :Yusu'-a' 'ku 'dhu. 2'Doror'-dlu-a' :zai'-we-eh: an 'da-dih-a 'Sorle, 'do eh-a' zorn bo-mlai'-we-eh 'di, :yeh 'yluh-a 'wluh-a 'kwla, :yee' an mu 'de or-a' nma-dih-deh bo. 3:Yeh an mu-a, :yee' an polo dhih, an no, :Or mu sobu' :dao' klibo:, :or 'ye-uh' 'o nma-dih-deh worn 'i :za, 'do :a bo :eh? 4:Yeh on nyni-a 'o, 'de on pobo:-a 'o, :yee' on 'ye sobu' :kolu' :dao', on klibo-eh: 'for bo. 5:Yeh an pa-a 'de nma-dih-deh 'di, :yee' on 'ye 'yu :due', or-: :dhe dih 'do :dila bo ka, or-: pa :gba 'vuu-plu-'. :Yeh on 'ye-or, :yee' deh 'wla 'de on 'di dih.

6'De or :wlu 'de on bo, or 'dae:, A 'bor, :fano: :ple-eh. 'On yubo-eh' :Yusu' :or 'wluh-a 'Nazla, on :kor-dih:-a 'o tu 'i, or-: 'o, a 'bhorn 'kwla⧾-' dih. Or se :daa :ne, or :sorn-' 'weh. A pobo: :dha on 'pehn-dih-or dih :dee' ya. 7A mu, a 'ye :Piteh'-: 'dekorn: or 'bei' bo :na-nyor⧾-: :gwluhuh' zela: :ka or mu-a on ybei' 'de :Galali'i-bluhba ken, 'do :wor an mu-or 'ye-dih:, :ka or no-a eh-a' :za-a'.

8:Yeh on 'worn-ih'-a, :yee' on :za 'de nma-dih-deh worn 'i ple-a', 'de on mu. Deh on 'ye-a' no, on se-eh yubo:, 'de an-a' 'tiei-a tleh. 'De mor on :se 'de nyor-beh bo :wlu, deh no-eh, :fano 'yi-dih-uh-: dih.

:Yusu' 'wluh-dih: :Mehle' :or 'wluh-a :Magala' 'i

(Mt 28.9-10; Jn 20.11-18)

[ 9Ti :Yusu' :sorn-a-' 'do 'doror'-dlu-a' :zai'-we-eh an 'da-dih-a 'Sorle 'di, zorn bo-mlai', 'do :wor or 'wluh-dih: :Mehle' :or 'wluh-a :Magala' 'i, 'nynor or :za-a 'kwla 'ye-dih-deh⧾ :meheh' 'sorn 'de :dee'. 10:Yeh :Mehle' 'ye-or, :yee' or mu-', 'de or zela: nyor⧾ :ne :Yusu'-a na-a :dee' :gwluhuh', :an 'zlu-a, 'de :an 'vin-a. 11:Yeh on 'worn-ih'-a :ka :Yusu' :ne-a 'kmo, 'de :Mehle' 'ye-or, :yee' on :se-ih' dhih 'jeh-' po.

:Yusu' 'wluh-dih: nyor⧾ 'sororn' 'i

(Lu 24.13-35)

12:Yeh ti :zi-dih:-a 'o ken dih, :yee' :Yusu' 'wluh-dih: an-a' nyor⧾ 'sororn'-: 'i, 'de :ka :noror' 'di, ti an 'wluh-a 'o :gwlor-'. 13:Yeh on yubo-eh :ka eh 'dhu-a :Yusu'-', :yee' on mu-: de, 'de on zela: on 'bei' :yuh :sie:-a 'o :gwluhuh', jorwor: on 'bei' :dao', on :se-ih' dhih 'jeh-' po :ke.

:Yusu' 'wluh-dih: or-a'a: bo :na-nyor⧾ 'i

(Mt 28.16-20; Lu 24.36-49; Jn 20.19-23; Nd 1.6-8)

14:Yeh kpor 'pehn-a 'o dih, :yee' :Yusu' 'wluh-dih: or-a'a: bo :na-nyor⧾-a' :bhue: 'yor-eh :ne-a :due'-: 'i, ti an di-a deh. :Yee' or :wlu-' 'de on bo, deh no-eh, an-a' 'dlu⧾ :kmu-', 'de on :se-' nyor⧾ :on 'ye-or ti or :sorn-a-', an-a' wlu dhih 'jeh-' po. 15'De or :wlu 'de on bo, or 'dae:, A mu 'bluhba⧾-a' klehkpeh ken dih, a 'ye Nyorsoa-a' tubo-wlu:⧾ 'jeh po 'de :gwlor-nyor⧾-a' klehkpeh bo. 16Nyor :or po-ih-a dhih 'jeh-', 'de :or :po-a 'ni 'dlu, :yee' or mu 'puh-:, jorwor: nyor :or se-a dhih 'jeh-' po, :yee' or mu gbe :zie:. 17Nyor⧾ :on po-ih-a dhih 'jeh-', :yee' an mu 'kpih 'ble-: on 'ye nyor⧾ 'di dih 'ma-dih-deh⧾ no. An mu nyor⧾ 'kwla 'ye-dih-deh⧾ 'de :za, 'de 'an 'nyne 'di, :yee' an mu wlu⧾ :dele' :po. 18:Mor on kpon sehn dih, eh :se-uh' deh-' :no-dih: i. :Mor on di :nyor⧾ 'dba-deh, eh :se-uh' deh-' :no-dih: i :ke. An mu puhba-nyor⧾ son⧾ ken dih :tba, :yee' an mu 'puh-:.

:Yusu' mu 'de Nyorsoa 'bli yai'

(Lu 24.50-53; Nd 1.9-11)

19:Yeh :Gwlor :baa' :Yusu' gweh-a 'de an-a' bo :wlu-eh 'i, :yee' Nyorsoa 'duo-or' 'weh, 'de or kpa-or 'de or 'bli yai', 'de or :dhe dih 'do or-a' :dila-son bo. 20:Yeh or mu-a, :yee' or-a'a: bo :na-nyor⧾-a mu deh⧾-' dih, an po Nyorsoa-a' tubo-wlu⧾. :Yeh an po-ih-a, :yee' :Gwlor :baa' :yi-dih-uh-', 'de or :ne an no-dih :koan :dha :due'. Or :to-dih-eh nyor⧾ 'i :ka or-a' tubo-wlu:⧾ on po-a, en :se-a sih, 'do nyor⧾ 'di dih 'ma-dih-deh:⧾ an no-a, 'do en-' dha.]

Currently Selected:

'Make 16: TCHKR

Highlight

Copy