'Lu 6
6
Nyorsoa-a' :gwlee-we-eh-a' dhih
(Mt 12.1-8; Mk 2.23-28)
1Eh :korn-Nyorsoa-a' :gwlee-we-eh :due', :yee' :Yusu'-: 'dekorn: or-a'a: bo :na-nyor⧾-: an yi-dih 'de deh⧾-yor: an 'da-dih-a 'wii 'nyne-', 'de 'gle. :Yeh an zi-a, :yee' or-a'a: bo :na-nyor⧾ kplan deh⧾-yor: :dao', en-' :nee'. 'De an sun-ih dih 'kwa dih, an di-ih. 2'De :Falasi'i-nyor⧾-a' nyor⧾ :noo' dhele-or dih, on 'dae:, :Eh no 'de a no deh :eh se-a 'o :a-a'a: 'tele'-a' :gwie 'i :ne, 'do Nyorsoa-a' :gwlee-we-eh 'di :eh?
3'De :Yusu' 'dae:, Deh :Debe' no-a, ti 'moeh 'ye-a' or-: or-a'a: bo :na-nyor⧾ no, a :se-eh' zlo :e? 4Deh or no-a, eh-: :dhe dih. Or pa 'de Nyorsoa-a' 'gbu 'di, 'de or 'duo: 'bhlee: on po-a 'o Nyorsoa ybei', :eh :ne-a gban 'i, nyor 'plo-a' di-a, Nyorsoa-a' 'slaa: :za-nyor⧾ :due'-a di-a. 'De or di-eh, or 'nyi eh-a' :neheh' or-a'a: bo :na-nyor⧾ :ke.
5:Yee' or 'dae: :neheh' 'de on bo, 'Yu an 'da-dih-a Nyor-kpalu-a' 'yu, or no :Gwlor :baa' 'do Nyorsoa-a' :gwlee-we-eh 'dlu bo.
'Yu :or :korn-a son 'meh-a
(Mt 12.9-14; Mk 3.1-6)
6:Yee' 'do Nyorsoa-a' :gwlee-we-eh: :neheh' 'di, :Yusu' pa 'de 'di :gweh-dih-sla 'zorn, 'de or torne nyor⧾ deh. 'Do :wor or :yeh-dih: 'yu :due' :or :korn-a :dila-son 'meh-a. 7:Yee' nyor⧾ 'tele' :torne-nyor⧾-: 'dekorn: :Falasi'i-nyor⧾-: an pobo-or-: ya, on 'ye-eh' 'ye, :eh beh or mu 'yu :dao' 'puh-dih: 'do Nyorsoa-a' :gwlee-we-eh 'di-:, 'de on 'ye-or' 'tele' dih :kpon-dih: 'do deh-zon: :no-eh bo. 8Jorwor: or yubo: deh an na-dih-a :gwluhuh' dih 'weh. :Yee' or :wlu-' 'de 'yu :or :korn-a son 'meh-a bo, or 'dae:, 'Yle. :Nyna dih 'noror nyor⧾ ybei'. 'De 'yu :dao', or :sorn-', or :nyna dih 'do mor. 9:Yee' :Yusu' dhele-uh-: dih, or 'dae:, Eh :ne 'o :a-a'a: 'tele'-a' :gwie 'i 'weh, nyor 'ye nyor-' :za-dih:, 'do Nyorsoa-a' :gwlee-we-eh 'di :e? :Ae' nyor 'ye deh-zon no? Eh :nmor-: 'yi nyor 'ye nyor-a' :febeh' zelie: :e? :Ae' nyor 'ye nyor 'dba ke? 10:Yee' :yeh or pobo:-a an-a' klehkpeh ya, :yee' or :wlu-' 'de son-a' 'meheh'-nyor: :dao' bo, or 'dae:, Slo :an-a' son. 'De or slo-uh. :Yee' or-a' son 'bor-'.
11:Yeh on 'ye-eh, :yee' 'chehn 'dba-uh'. :Yee' on polo: dhih 'de on 'nyne-', deh on 'ye-a' :Yusu'-' :no-dih:.
:Yusu' gan or-a'a: dboo-nyor:⧾
(Mt 10.1-4; Mk 3.13-19)
12Eh :korn 'we-eh :due', :yee' :Yusu' 'wluh 'o :gwlor-', or mu 'de tluh ken, or 'ye 'de Nyorsoa bo :wlu. 'Do :wor or :ne, or :wlu 'de Nyorsoa bo :wluu:, 'de :wala: :wala: zorn zen. 13:Yeh zorn zen-a, :yee' or 'da nyor⧾ :an na-or bo. 'De or gan nyor⧾-a' :bhue: 'yor 'sororn', 'de on 'nyne-', mo-: or 'da-dih or-a'a: dboo-nyor⧾. 14An-a' 'nyne :wor :dhe dih. Samor' or 'dhu-dih:-a :Piteh'-nyne-: :Piteh'-a' dei' Andlu'-: 'Jeen-: :Jororn'-: Felor'-: :Batale'meor-: 15Matio'-: :Tormor'-: 'Ehfea-a' 'yu 'Jeen-: :korn Samor' an 'da-dih-a 'Bluhba-dlu-a' dhih :vorn-nyor-: 16'Jeen-a' 'yu :Juda'-: 'dekorn: :Juda' :Ehkeh'lior :or :za-dih:-a :Yusu'-a' ploo-nyor-'.
:Yusu' 'puh-dih: puhba-nyor:⧾
(Mt 4.23-25)
17:Yee' :Yusu'-: 'dekorn: or-a'a: bo :na-nyor⧾-: mo-: 'dhle tluh, 'de or :nyna dih 'do 'bluhba-a' :dha :or :tehn-dih:-a :gwluhuh'. 'Do :wor or-a'a: bo :na-nyor:⧾ :noo'-a' :dha :dhulu'-: 'dekorn: nyor⧾ :dhulu' :on 'wluh-a :Judi'a-bluhba-a' klehkpeh ken dih-: :Julu'slehn-: 'dekorn: 'Taya-gwlor-: 'Saedorn-gwlor-: :en :ne-a 'o yobo' worn 'i-:, 'do :wor on :ne. 18Nyor⧾ :doru' :dao', on yi-: 'de, on 'ye-or' :dou'⧾ bo :to, 'de on 'ye 'puh-dih-eh: 'do an-a' puhba-deh⧾ bo. :Yee' nyor⧾ :yuh 'kwla 'ye-dih-deh⧾-a 'beh-dih-a 'worn dih, mo-: 'puh-dih-eh: :ke. 19Nyor⧾ :dao', an-a' klehkpeh, an 'bhorn :ka on 'ye-a' no, 'de jorwor: on 'ye-or' dih 'tuh. Deh no-eh, 'kpih me-: 'wluh-or', me-: 'puh-dih nyor⧾-a' klehkpeh-a' puhba-deh⧾.
:Bhorlie'-: 'dekorn: 'chlo-:
(Mt 5.1-12)
20:Yee' :Yusu' pobo: 'de or-a'a: bo :na-nyor⧾ bo, 'de or 'dae:,
:Bhorlie' 'do a bo, a :mor :or se-a deh-a' :za-da 'ble.
Deh no-eh, a :mor Nyorsoa :korn wlu 'ken :naa.
21:Bhorlie' 'do a bo, a :mor 'moeh: no-a :naa.
Deh no-eh, a mu :dbo.
:Bhorlie' 'do a bo, a :mor :or 'vin-a :naa.
Deh no-eh, a mu 'keleh:.
22:Bhorlie' 'do a bo, :mor nyor⧾ :taa a 'nyeh, :mor on se a dih kpon, 'de :mor on :taa a 'jle-dih, 'de :mor nyor⧾ 'da a :mor 'kulu-nyor:⧾ 'o, 'do 'yu an 'da-dih-a Nyor-kpalu-a' 'yu-a' dhih bo. 23:Yee' a 'kpa 'mona-', a 'ye yaa'e dih mu, 'do 'we-eh: :dao' 'di. Deh no-eh, geli' :za-dih-deh: 'kawehn:, eh-: a 'ble, 'de Nyorsoa 'bli yai'. 'Ka-: 'o on :bai'-a' :bai' no 'do Nyorsoa-a' wele-eh: :po-nyor⧾ bo :dee' :ke.
24Jorwor: 'chlo 'do a bo, a :mor bhaan-nyor:⧾.
Deh no-eh, a 'ble a-a' ti 'jeh ne :weh.
25'Chlo 'do a bo, a :mor :or :korn-a 'kwli 'yi-a :naa.
Deh no-eh, 'moeh mu a :no.
'Chlo 'do a bo, a :mor :or 'keleh-a :naa.
Deh no-eh, a mu 'zlu-:, 'de a 'ye 'vin.
26'Chlo 'do a bo, :mor nyor⧾-a' klehkpeh :taa a dhih 'jeh 'bhun dih za-dih. Deh no-eh, 'ka-: 'o on :bai'-a' :bai' no sih 'tmo :wele-eh: :po-nyor⧾-a' dhih bo :po-eh :dee' :ke.
A :ybeh nyor⧾ :on 'nyeh-a a-uh'
(Mt 5.38-48; 7.12a)
27:Yee' :Yusu'-a kpa or-a' wlu 'dlu bo :chio'lo:, or 'dae:, Jorwor: 'an zela a :gwluhuh', a :mor :or 'worn-a 'an wlu, a :ybeh nyor⧾ :on 'nyeh-a a-uh'. 'De mor a no deh⧾ 'jeh ne, 'do :yuh :an ple-a a-a' 'ye-a' bo. 28Nyor⧾ :on po-a a 'chlo bo, a po-uh :bhorlie' bo. :Yee' a :wlu 'de Nyorsoa bo, 'do :yuh :on no-a a dhih-', an-a' dhih bo. 29:Mor nyor tba :an-a' :gea 'kpa, :yee' :to 'o 'for-a' 'sororn' nor :ke. :Mor nyor 'duo: :an-a'a: 'korlor-', :yee' :an-a' :kmu-dih:-' 'wla :yor :ne-a 'de or 'zorn ken dih :ke. 30:Mor nyor :zlor deh 'de :on bo, :yee' 'nyi-eh or. :Yee' :mor nyor kpa :an-a'a: :kororn-deh, :yee' :an-a' dhele:-' eh-a' dhih dih :neheh'. 31Deh a 'bhorn-a nyor⧾ 'ye-a' no 'do a bo, eh-a' 'jeh :dao', eh-: a 'ye no 'do nyor⧾ bo :ke.
32:Mor eh 'dhu, a :ybeh nyor⧾ :on :ybeh-a a-uh', :yee' geli' :za-dih-deh-a' :yeheh a mu 'ye-: 'de Nyorsoa bo :eh? Deh no-eh, deh⧾-zon:⧾ :no-nyor:⧾ :sloror'-a' 'jeh, on :ybeh :yuh :on :ybeh-uh-a 'weh :ke. 33:Yee' :mor eh 'dhu, a no deh⧾ 'jeh 'do :yuh :on no-a deh⧾ 'jeh 'do a bo, :yee' geli' :za-dih-deh-a' :yeheh a mu 'o 'ye-: 'de Nyorsoa bo :eh? Deh no-eh, deh⧾-zon:⧾ :no-nyor:⧾ :sloror'-a' 'jeh, an no-ih' :ke. 34:Yee' :mor eh 'dhu, nyor⧾ a dhe-eh :gwlii', :mor a 'nyi-a deh, :an mu-eh a de 'nyi-:, 'de a 'ye on :due' deh 'nyi, :yee' geli' :za-dih-deh-a' :yeheh a mu 'o 'ye-: 'de Nyorsoa bo :eh? Deh⧾-zon:⧾ :no-nyor:⧾ :sloror'-a' 'jeh, an 'nyi on 'bei' deh⧾-zon:⧾ :no-nyor⧾ deh 'weh :ke. Deh no-eh, on dhe-eh :gwlii', an mu eh-a' klehkpeh de 'ye-:. 35Jorwor: a :ybeh nyor⧾ :on 'nyeh-a a-uh'. A no deh⧾ 'jeh 'do on bo. A 'nyi-uh deh⧾, 'de a-a' :dhe-eh' :gwlii', :eh :mor a mu-ih de 'ye-:, 'de on 'kwa. :Mor a no deh⧾-a' klehkpeh :daa, :yee' a mu geli' :za-dih-deh: :kolu' 'ye-:. :Yee' a mu 'nynuu :no, 'do 'yi 'beh-Nyorsoa bo. Deh no-eh, or-a' :porluh :nmor-: 'yi 'do nyor⧾, :an-a' po-a or-a' 'zio-: 'dekorn: deh⧾-zon:⧾ :no-nyor⧾-: bo. 36'Do eh-a' dha, a :mor :mloror', a :korn a 'ye nyor⧾-a' :wehlih 'ye, :ka a :Baa' Nyorsoa-a no-a :ke.
A-a' :chehn-' a 'bei'-a' zabe 'i 'suh
(Mt 7.1-5)
37:Yee' a-a' :chehn-' a 'bei'-a' zabe 'i 'suh, :yee' Nyorsoa :se-' a-a' zabe :zi i :ke. A-a' :kpon-dih:-' a 'bei' zabe, :yee' Nyorsoa :se-' a zabe :kpon-dih: i :ke. A 'ma-dih: deh⧾-zon:⧾ a 'bei'-a no-a a 'bhun, en-' dhih bo. :Yee' Nyorsoa-a mu a-a' deh⧾-zon⧾-a' dhih bo 'ma-dih: :ke. 38A 'nyi a 'bei' deh. :Yee' Nyorsoa-a mu a deh⧾ 'nyi-: :ke. 'Nyii'-deh: Nyorsoa-a mu-a a 'nyi-:, eh mu :dbo-dih-eh: deh 'jeh neh, 'de eh 'ye dih 'nyeh-eh:, eh 'ye deh 'yi, eh 'ye 'zorn 'wla :bhla :bhla, 'de eh 'ye 'de a 'kwa :po-eh:. Deh no-eh, :ka a no-a a 'bei'-a' ne-a' :dbo-dih-eh, 'ka-: Nyorsoa-a mu a-a' ne-a' :dbo-dih-eh :no :ke.
39:Yee' :Yusu' po 'dlan 'de on bo, or 'dae:, 'Doror'-nyor 'beh-dih: or 'ye 'doror'-nyor :na-dih: :e? :Mor or no-eh, :yee' an-a' klehkpeh :se 'de 'bie' 'di 'kpa-: i :e? 40Nyor :or 'chean'-a deh, or se 'i 'beh, or se 'o nyor :or torne-or deh-' :zi. Jorwor: nyor :or 'chean'-a deh⧾-a' klehkpeh or :korn or 'ye-ih 'chean', :yee' or mu nyor :or torne-or deh :gweh.
41:Eh no 'de :an 'ye :gbehne-eh-yu :due' :ne-a 'de :an-a' 'de-di' 'yli-e :eh? Jorwor: tu 'kplo :yor :or :ne-a 'de :an-a' 'jeh 'yor-eh 'yli-e, :an-a' 'ye-or' :e? 42:Yee' :kaa :on 'beh-dih: :on 'ye 'de or bo :wlu-eh no :eh? :On 'ye :ao', 'An 'de-di', 'yle, 'on 'ye :gbehne-eh 'de :on 'yli-e-' :za, :mor :on :se-' tu 'kplo :or :ne-a 'de :an-a' 'jeh 'yli-e 'ye. :Mor nyor⧾-a' 'yli 'ye-nyor: :daa, :za 'de tu 'kplo :dao' 'de :an-a' 'jeh-a' 'yli-e :zai', :yee' :an mu dih 'ye-: deh 'jeh, 'de :on 'ye :gbehne-eh-yu: :eh :ne-a 'de :on 'be 'yli :za.
Tu-: 'dekorn: an-a' 'bi-:
(Mt 7.16-20; 12.33-35)
43:Yee' eh se tu 'jeh no :korn, :on 'ye-a' 'bi-zon⧾ :tlo. 'De mor eh se tu-zon :korn, :on 'ye-a' 'bi 'jeh ne :tlo. 44Tu-a' 'bi, me-: nyor⧾-a yubo-dih tu. 'Wu⧾-kwla :se-' gwehn :tlo i. 'De dlan :se-' 'nyoeh' :tlo i. 45Nyor 'jeh nor dhe deh⧾ 'jeh dih, 'do or-a' :porluh ken, 'do :wor or za deh⧾ 'jeh. 'De 'kulu-nyor dhe deh⧾-zon⧾ dih, 'do or-a' :porluh ken, 'do :wor or za deh⧾-zon⧾. Deh no-eh, deh⧾ :en 'yi-a 'o 'do nyor⧾-a' :porluh⧾ ken, me-: an-a' worn⧾-' za-'.
'Gbu⧾ :po-nyor⧾ 'sororn'
(Mt 7.24-27)
46:Yee' :Yusu' :wlu-' 'de nyor⧾ bo, or 'dae:, :Eh :korn dhih a 'da-dih 'on, :Gwlor :baa', :gwlor :baa', 'de a-a' 'worn, a-a' no deh 'an zela a :gwluhuh' :eh? 47Nyor⧾-a' klehkpeh :on yi-a 'de 'on bo, 'de :on 'worn-a 'an wlu, 'de :on 'chean'-a deh⧾ 'an za-a-', en-' no-a', :yee' 'an mu-eh a :torne: deh on gweh-a. 48On gweh nyor :or po-a 'gbu, 'de :or 'blu-a glu, :or :tehn-dih:-a 'bie' 'di, 'de :or po-a or-a'a: 'gbu glu, 'do 'soba ken. :Yee' ti 'ni 'yi-a, 'de eh bla-a 'gbu 'i, :yee' eh se 'beh-dih: eh 'ye-uh' 'i gbua:. Deh no-eh, on :po-eh:-' deh 'jeh neh. 49Jorwor: nyor :or 'worn-a 'an wlu, 'de :or se-a deh⧾ 'an za-a-', en-' no-a' 'chean', :yee' or gweh nyor :or po-a 'gbu, :or se-a glu 'blu deh 'jeh neh. :Yee' :yeh 'ni bla-a 'gbu :dao' 'i, :yee' 'do :dha :due' :dao', on blu-'. :Yee' on :gba ya klehkpeh.
Currently Selected:
'Lu 6: TCHKR
Highlight
Share
Copy
Want to have your highlights saved across all your devices? Sign up or sign in
The New Testament in Tchien Krahn published as KUO :DELE' © The Bible Society in Liberia, 1995.
