:Jororn' 20

:Yusu'-a' 'meh :sorn-' :dhih

(Mt 28.1-8; Mk 16.1-8; Lu 24.1-12)

1:Yee' 'doror'-dlu-a' :zai'-we-eh: an 'da-dih-a 'Sorle, 'do eh-a' dholo-zorn-mlai' 'di, :yee' :Mehle' :or 'wluh-a :Magala', or mu 'de :Yusu'-a' nma-dih-deh bo. :Yeh or nyni-a 'o eh bo, :yee' or 'ye-eh' :ka sobu' 'wluh-a 'o eh worn 'i. 2:Yeh or 'ye-eh, :yee' or kpa ple-a' 'de Samor' :Piteh'-: 'dekorn: :Yusu'-a'a: bo :na-nyor⧾-a' nyor :due' or :ybeh-a bo, 'de or zela-uh :gwluhuh', or 'dae:, On :za 'de :Gwlor :baa'-a' 'ku 'de nma-dih-deh 'di 'weh o. 'De :dha on 'dhu-uh-a, :a se 'o yubo: o.

3:Yeh on 'worn-ih'-a, :yee' :Piteh'-: 'dekorn: bo :na-yu: :dao'-: :yee' on mu 'de nma-dih-deh bo 'weh. 4'De an-a' klehkpeh, an ple. :Yee' bo :na-yu: :dao', or zi :Piteh'-: dih, or nyni 'o nma-dih-deh bo :zai'. 5:Yeh or nyni-a 'o eh bo, :yee' or 'jli-: dih, 'de or pobo: 'de eh 'di, or 'ye 'nena-ylii: :dao', :en 'pehn-a dih 'de mor. Jorwor: or :se 'de eh 'di pa. 6:Yee' Samor' :Piteh' :or :sie:-a de, or 'si-: dih, 'de or pa 'de nma-dih-deh 'di, 'de or 'ye 'nena-ylii: :dao' :ke, 7'dekorn: 'yli-eh: :yeh on bhian-dih:-a :Yusu'-a' 'dlu kle-' dih. Eh :ne 'nena-ylii se :dha :due' :ne. Eh polo-eh: 'i, 'de eh 'pehn 'dor. 8:Yee' :Yusu'-a'a: bo :na-yu: :dao', :or nyni-a 'o nma-dih-deh bo :zai', or pa 'de eh 'di 'weh :ke. 'De or 'ye 'ylii: :dao', :en :ne-a 'de. :Yeh or 'ye-ih'-a, :yee' or po-eh-' dhih 'jeh, :ka :Yusu' :sorn-a-'. ( 9Jorwor: deh Nyorsoa-a' 'chlee-deh :za-a-', :eh no-a, or :korn or 'ye 'de nma-dih-deh 'di 'wluh :gbor :gbor, :yee' on 'see-eh dih 'worn 'gboror:.) 10:Yeh eh no :ao', :yee' :Yusu'-a'a: bo :na-nyor:⧾ :dao', on mu on 'bli deh⧾-' dih.

:Yusu' 'wluh-dih: :Mehle' :or 'wluh-a :Magala' 'i

(Mt 28.9-10; Mk 16.9-11)

11:Yeh :Yusu'-a'a: bo :na-nyor⧾ 'sororn' :dao', on mu-a, :yee' :Mehle' :sie: 'o nma-dih-deh worn 'i 'weh, 'de or :nyna 'o dih, or 'vin. :Ka or 'vin-a, 'ka-: or bla 'yli-eh dih 'de eh 'di. 12'De or 'ye 'enjor-nyor⧾ 'sororn', :on pa-a 'tiei-plu⧾-'. 'De on :dhe 'o :dha :Yusu'-a' 'ku 'pehn-a dih :dee' dih. :Due' :ne 'de 'dlu bo, 'de :due' :ne 'noror buh⧾ bo. 13:Yeh on 'ye-a :Mehle', :yee' on dhele-or-: dih, on 'dae:, 'Nynor, :eh 'vin-dih: :on :eh?

'De :Mehle' 'da, On kpa 'an-a: :Gwlor :baa'-a' 'ku 'weh. 'De :dha on 'dhu-uh-a, 'on se 'o yubo:.

14:Yeh or :za-a deh :daa-', :yee' or 'bili:-'-: dih, 'de or 'ye :Yusu', or :nyna dih. Jorwor: or se-or 'i yubo:. 15'De :Yusu' dhele-or dih, or 'dae:, 'Nynor, :eh 'vin-dih: :on :eh? Deh 'i-deh-nyor: 'o, :an 'bhorn 'kwla⧾-' dih :eh?

:Yeh or 'da :ao', :yee' :mor :Mehle' :taa 'ye :dee', :yee' or 'da 'yu :or no-a :koan 'de 'dhuu'-deh:⧾ :dao' 'nyne-', or-: 'o :dee'. 'De :Mehle' :wlu 'de or bo, or 'dae:, Nyor :klaba', :mor eh 'dhu, :on mor-', 'de :on 'ye-or' kpa, :yee' :torne: 'on :dha :on 'dhu-or, 'de 'on 'ye-or' 'duo:, 'on 'ye-or' kpa.

16:Yeh or 'da :ao', :yee' :Yusu' :wlu-' 'de or bo, or 'dae:, :Mehle'.

:Yeh or 'da-a or-a' 'nyne, :yee' :Mehle' 'bili:-'-: dih 'de or bo, 'de or 'wor, 'de :Hiblu'-wlu 'di, or 'dae:, :Wlabo'ni:, :eh :bleh-dih:-a 'i, Nyor⧾ deh :torne-nyor:.

17:Yeh or 'da :ao', :yee' :Yusu' :wlu-' 'de or bo, or 'dae:, :An-a' :kpon-' 'on dih. Deh no-eh, 'on 'see 'de 'On-ba bo de mu. Jorwor: mu, :on 'ye 'an-a: bo :na-nyor⧾ :gwluhuh' zela:, :ka 'an mu-a 'de 'On-ba-: a :Baa'-: 'dekorn: 'an Nyorsoa-: a-a' Nyorsoa-: bo yai' :mu.

18:Yeh :Yusu' :za-a deh :daa-' 'de or bo, :yee' :Mehle' :or 'wluh-a :Magala', or mu 'de :Yusu'-a'a: bo :na-nyor⧾ bo, or 'ye-uh :gwluhuh' zela: :ka or 'ye-a :Gwlor :baa'. 'De or zela-uh deh⧾-a' klehkpeh :Yusu' :za-a-' 'de or bo :gwluhuh' :ke.

:Yusu' 'wluh-dih: or-a'a: bo :na-nyor⧾ 'i

(Mt 28.16-20; Mk 16.14-18; Lu 24.36-49)

19:Yee' eh no 'doror'-dlu: :dao', an-a' :zai'-we-eh-a' 'gwie-yluh bo, 'do :wor :Yusu'-a'a: bo :na-nyor:⧾ :dao', on 'kpa-dih: :dha :due', 'de on 'gba :kpaa'. Deh no-eh, an ple :Jueh'-nyor⧾-a' 'yli 'weh. :Yeh on :ne-a 'de 'gbu, :yee' :Yusu' 'wluh-dih-uh-: 'i, 'de or :nyna 'o on 'nyne-' dih, or 'dae:, :Porluh-a' dih 'pehn-eh: 'do a bo. 20:Yeh or 'da :ao', :yee' or :to 'o or-a' :kola⧾-: 'dekorn: 'do or 'gben-'-: on 'ye-ih' 'ye. :Yee' 'mona 'yi-dih-uh-: dih. Deh no-eh, on 'ye an-a'a: :Gwlor :baa' 'weh. 21:Yee' :Yusu' :wlu-' 'de on bo :dele' ka, or 'dae:, :Porluh-a' dih 'pehn-eh: 'do a bo. :Ka 'On-ba no-a, 'de or dbo-a 'on, 'ka-: 'o, 'an no :ke, 'de 'an dbo a-uh. 22:Yeh or gweh-a deh :daa, eh-a' :za-a' 'i, :yee' or po-uh :pobor' ya, or 'dae:, A 'ye Gban 'i :ne :Zulu o. 23:Mor eh 'dhu, nyor-beh no deh-zon, 'de a 'ye eh-a' dhih bo 'ma-dih:, :yee' Nyorsoa-a mu eh-a' dhih bo 'ma-dih: :ke. :Mor a se eh-a' dhih bo 'ma-dih:, :yee' Nyorsoa :se-' eh-a' dhih bo 'ma-dih: i :ke.

:Yusu' 'wluh-dih: :Tormor' 'i

24Ti :Yusu' 'wluh-dih:-a or-a'a: bo :na-nyor⧾ 'i, :yee' :Tormor' :or no-a or-a'a: bo :na-nyor:⧾ :on :korn-a :bhue: 'yor :ne-a 'sororn', an-a' nyor :due', an 'da-dih-a 'Gba-yu, :yee' or se 'o 'si. 25:Yeh on 'ye-or, :yee' on zela-or-: :gwluhuh', :ka on 'ye-a :Gwlor :baa'.

:Yeh on zela-or :gwluhuh', :yee' or :wlu-' 'de on bo, or 'dae:, 'On :se-eh' dhih 'jeh-' :po i, :mor eh 'dhu 'on 'ye 'tulu-a' 'gor, 'de or 'kwa. 'De mor :mor 'on po 'de 'an :jii-eh 'do :dha 'tulu-a' 'gor :ne-a, 'de 'on 'ye 'o or 'gben-' dih 'tuh, 'de jorwor: 'on 'ye-eh' dhih 'jeh-' po.

26:Yeh 'doror'-dlu :due' zi-a, :yee' :Yusu'-a'a: bo :na-nyor⧾ :gweh-dih: 'de 'gbu 'di :neheh'. :Yee' :Tormor' :ne 'de on 'klu-' 'weh. Keen' :mloror' :kpaa' 'gba-eh:-', jorwor: :yeh an mu-a 'ye-:, :yee' :Yusu' :nyna dih 'de on 'nyne-', or 'dae:, :Porluh-a' dih 'pehn-eh: 'do a bo. 27:Yee' or :wlu-' 'de :Tormor' bo, or 'dae:, :Tormor', :gbee'e:. 'Noror 'on 'kwa :wor :dhe dih. 'Kpa 'o :an-a' :jii-eh, :on 'ye 'o dih 'tuh. Slo son, :on 'ye 'o 'do 'on 'gben-' dih 'tuh. :An-a' :porluh 'bor dhobo-eh. Po-eh dhih 'jeh-'.

28:Yeh :Yusu' 'da :ao', :yee' :Tormor' :wlu-' 'de or bo, or 'dae:, 'An :Gwlor :baa'. 'An Nyorsoa.

29:Yeh or 'da :ao', :yee' :Yusu' 'da, :Tormor', deh :on 'ye-a 'on :naa, eh-: no-eh, 'de :on po-eh dhih 'jeh-' :e? :Bhorlie' 'do nyor⧾ :dao' bo, :on se-a 'on 'ye, 'de :on po-eh dhih 'jeh-'.

Deh :korn-a dhih :Jororn' 'chle-a 'chlee-deh: :daa

30:Yee' nyor⧾ 'yi :to-dih-deh:⧾ :dhulu' :nee', me-: :Yusu' no, 'do or-a'a: bo :na-nyor⧾ ybei'. Jorwor: en :se-' 'chle-eh: 'noror 'chlee-deh: :daa 'di. 31Jorwor: :yih :daa, en 'chle-eh:-', 'de a 'ye-eh' dhih 'jeh-' po, :ka :Yusu' 'dhu-a Nyorsoa-a' 'Yu or 'tan-a-'. 'De :mor eh 'dhu, a po or-a' dhih dhih 'jeh-', :yee' a mu 'kmo :sie: :febeh' 'ye-:.

Currently Selected:

:Jororn' 20: TCHKR

Highlight

Copy