:Jororn' 19

1:Yee' Pale' no-eh', 'de or-a'a: sorye' bla :Yusu'. 2'De on gle 'wu⧾-a' 'gbeheh, :ka 'keen :gblaa' :ne-a, eh-: on 'dhu 'o or 'dlu. :Yee' on :pa-dih-or :gba 'vuu: :on :kpe-a gbor. 3'De on yi 'o or bo, an no, :Gwle 'kmo o, :Jueh'-nyor⧾-a' 'keen. 'De an po-or 'kpa⧾ 'yli.

4:Yee' Pale' 'si-: 'zorn :neheh' :dele' ka, 'de or :wlu 'de :Jueh'-nyor:⧾ :dao' bo, or 'dae:, A :gbee'e:. 'An ya-or 'de a bo 'zorn 'weh, 'de a 'ye-eh' yubo:, :ka 'on se-or deh-zon 'bhun 'ye, :eh 'ye-eh' no, 'de zabe 'ye-or' kpon. 5:Yee' :yeh :Yusu' :taa 'zorn 'si, :yee' 'wu⧾-gbla: on 'dhu-a 'o or 'dlu-: 'dekorn: :gba 'vuu: :dao'-: me-: :ne 'o or 'bhun. 'De Pale' 'dae: 'de on bo, A :gbee'e:. 'Yu a 'da-a, or-: :dhe dih.

6:Yeh Nyorsoa-a' 'slaa: :za-nyor:⧾ :klaba'⧾-: 'dekorn: Nyorsoa-a' 'sla-a' :poli'si-: on 'ye-or, :yee' an po 'geh⧾, an no, :Kor-dih-or 'o tu 'i o. :Kor-dih-or 'o tu 'i o.

Jorwor: Pale' 'da, A-a' 'jeh 'yor-eh 'duo-or', a 'ye-or' 'o tu 'i :kor-dih:. 'Mor :mloror', 'on :se-or' deh-zon 'bhun 'ye, :eh 'ye-eh' no, 'de zabe 'ye-or' kpon.

7'De on 'da, :A 'ble 'tele'. 'De :ka :a-a'a: 'tele' no-a mu-a', :yee' or :korn or 'ye 'meh. Deh no-eh, or 'da-dih or-a' 'jeh Nyorsoa-a' 'Yu.

8:Yeh Pale' 'worn-a deh :daa, :yee' :fano-a: no-or 'gabaa, eh :zi 'o ken dih. 9:Yee' or 'ya 'de or 'bli 'sla ya-: de. 'De or dhele: :Yusu' dih, or 'dae:, Dha :on 'wluh :eh?

Jorwor: :Yusu' :se-' :wlu. 10'De Pale' 'da, :On :se-' :wlu i :e? :On se-eh yubo:, :ka 'on 'ble-a 'kpih, 'on 'ye-a :on dih 'tali: :e, 'de mor 'on 'ble-a 'kpih, 'on 'ye-a 'o :on tu 'i :kor-dih: :e?

11'De :Yusu' 'da, :Mor eh 'dhu :an-a' 'kpih se 'de Nyorsoa bo 'wluh, :yee' :on se 'kpih 'ble :on 'ye 'on deh-' :no-dih:. :Yee' eh-a' dhih, nyor :or :za-a 'on 'kwla 'noror :on bo, or-a' deh-zon 'beh-: 'i, eh :zi 'o :an-a' neh-'.

12:Yeh Pale' 'worn-a deh :daa, :yee' or 'bhorn :ka or 'ye-a' no, 'de or 'ye-a' :Yusu' dih 'tali:, or 'ye-a' mu. Jorwor: :Jueh'-nyor⧾-a kpa 'geh⧾ :po-eh 'dlu bo, on 'dae:, :Mor eh 'dhu, :on 'tali: 'yu :daa dih, 'ye or 'ye mu, :yee' :on :to-dih-eh :a 'i, :ka :on se-a 'Wloon-nyor⧾-a' 'keen-' :ybeh. Deh no-eh, nyor :or 'da-dih-a or-a' 'jeh 'keen, :yee' or vorn 'Wloon-nyor⧾-a' 'keen bo.

13:Yeh Pale' 'worn-a deh on :za-a-', :yee' or 'si-dih: :Yusu'-: 'zorn, 'do :dha on no-a, 'de an 'da-dih-a 'Soba ken. ('De :Hiblu'-wlu 'di, an 'da-dih 'o :Gaba'ta:.) 'Do :wor Pale' :dhe dih, 'de zabe: :zi :kpala' 'di. 14:Yee' eh no 'yluh-gbao', 'de eh :sie: 'o 'we-eh :due', eh 'ye 'Meh-a' :bla-dih: 'dlu dih-gor-a' ti no, 'de Pale' :wlu 'de on bo, or 'dae:, A :gbee'e:. A-a'a: 'keen :wor :dhe dih.

15:Yee' an po 'geh⧾, an no, 'Dba-or o. 'Dba-or o. :Kor-dih-or 'o tu 'i o.

'De Pale' 'da, A 'bhorn 'on 'ye a-a'a: 'keen 'dba :e?

:Yee' Nyorsoa-a' 'slaa: :za-nyor:⧾ :klaba'⧾ 'da, :A se 'keen 'ble o. 'Wloon-nyor⧾-a' 'keen :due', or-: 'dhu :a-a'a: 'keen-' o.

16:Yee' Pale' za-or-: 'kwla, 'de on bo, or 'ye 'o tu 'i :kor-dih-eh:.

On :kor-dih: 'o :Yusu' tu 'i

(Mt 27.32-44; Mk 15.21-32; Lu 23.26-43)

:Yee' on kpa :Yusu' 'weh. 17'De or 'ble or-a' 'jeh 'yor-eh-a'a: 'klorse tu, or za-uh 'o :gwlor-', or kpa-uh 'o, :dha an 'da-dih-a, Nyor-dlu-kpaa'-tluh ken. ('De :Hiblu'-wlu 'di, an 'da-dih 'o :Gorgor'ta:.) 18'Do :wor on :kor-dih-or 'o tu 'i. :Yee' nyor⧾ 'sororn', mo-: :ne or :kor-dih-eh: 'o tu 'i :dha :due'. :Due' :ne 'de or-a' :dila bo, 'de :due' :ne 'de or-a' kona bo. 'De :Yusu' :ne 'o an-a' gwea. 19'De Pale' zela: nyor⧾ :gwluhuh', on 'ye 'chlee'-deh⧾ 'chle, 'de on 'ye-ih' 'o 'klorse tu 'i po, :en no-a, :Yusu' :or 'wluh-a 'Nazla. :Jueh'-nyor⧾-a' 'keen. 20'Chlee'-deh:⧾ :dao', en 'chle-eh:-' 'de :Hiblu'-wlu 'di-: 'de 'Wloon-nyor⧾-a' wlu 'di-: 'dekorn: 'Glii-nyor⧾-a' wlu 'di-:. :Yee' :Jueh'-nyor:⧾ :dhulu', mo-: :an zlo-ih. Deh no-eh, 'do :dha :Yusu' :kor-dih-eh: 'o tu 'i, 'do 'koan'-dih: 'o :Julu'slehn-: dih. 21:Yeh Nyorsoa-a' 'slaa: :za-nyor:⧾ :klaba'⧾ zlo-a 'chlee'-deh:⧾ :dao', :yee' on :wlu-' 'de Pale' bo, on 'dae:, :An-a' :no-', :Jueh'-nyor⧾-a' 'keen :oo'. Jorwor: deh :on 'ye-a' 'chle, eh-: 'dhu, :on 'da, 'Yu :daa, or 'dae:, or-: :Jueh'-nyor⧾-a' 'keen :oo'.

22:Yeh on 'da :ao', :yee' Pale' 'da, Deh 'on 'chle-a, 'on 'chle-eh' :weh.

23:Yeh sorye' :kor-dih-or 'o tu 'i, :yee' on 'duo: or-a'a: paa-tiei-' on za-or dih 'weh, 'de on gble-ih', on za-ih 'dlu⧾-kpor⧾ :nyieh-'. 'De an-a' nyor :due'-a kpa :due', 'de :noror'-a kpa :due'. Deh :due' :eh :sie:-a 'o dih, eh-: 'dhu, or-a'a: 'wla, :or :dba-eh, 'de :or se-a 'i 'dhu-dih-eh:. 24'De on 'da, :A-a' :chlan-or'. A 'nyi, :a vorn :nobo, nyor :or mu-eh :kpa, :a 'ye-or' 'ye. Deh :daa, an no-a, eh :no-eh:-', 'de Nyorsoa-a' 'chlee-deh-a' wlu 'ye dhih 'jeh-' 'kpa, :eh no-a,

On gble 'an-a: paa-tiei 'weh, 'de an-a' 'jeh 'nyne-',

'de on vorn :nobo, 'do 'an-a: 'wla-a' dhih bo.

:Yee' deh :daa, eh-: sorye' :dao', on no.

25'Klorse :tu on :kor-dih:-a 'o :Yusu' 'i, 'do on 'bhun, 'do :wor :Yusu' 'de-: or 'de-a' dei'-nynor-kpao'-: :Kleo'pa-a'a: 'nynor :Mehle'-: 'dekorn: :Mehle' :or 'wluh-a :gwlor an 'da-dih-a :Magala'-: on :nyna dih. 26:Yeh :Yusu' 'ye-a or 'de-: 'dekorn: or-a'a: bo :na-nyor⧾-a' nyor :due' or :ybeh-a 'gabaa-: 'de on :nyna-a 'o dih, :yee' or :wlu-' 'de or 'de bo, or 'dae:, 'On-de:, 'duo: 'yu :daa, or 'ye :an-a'a: nyor-kpalu-yu no.

27'De or :wlu 'de or-a'a: bo :na-yu: :dao' bo :ke, or 'dae:, :On 'de :wor :dhe dih. :Eh 'wluh-a 'o ti :dao' 'di, :yee' bo :na-yu: :dao', or 'duo: :Yusu' 'de-' 'weh, 'de or kpa-or 'de or 'bli 'gbu.

:Yusu' 'meh-', 'do tu 'i

(Mt 27.45-56; Mk 15.33-41; Lu 23.44-49)

28:Yee' :Yusu' yubo-eh' :ka deh⧾-a' klehkpeh, en :jla-' 'dlu-' 'do :dha 'o. :Yee' :ka deh Nyorsoa-a' 'chlee-deh :za-a-', eh 'ye-a' dhih 'jeh-' 'kpa, :yee' or 'dae:, 'Ni 'na-ton-a: no 'on.

29:Yeh or 'da :ao', :yee' :yabo' :or 'yi-a 'dli-' :pa-nomor 'di, :or :dhe-a 'o dih, or-: on po :fuu'u bo, on 'dhu-uh 'o tu an 'da-dih-a 'hesor 'i, 'de on 'tuh-uh 'o :Yusu' worn 'i. 30:Yeh on 'tuh-uh-a 'o or worn 'i, 'de or 'na-or, :yee' or 'dae:, Deh⧾-a' klehkpeh :jla-'.

:Yee' or bla 'dlu glu, 'de or chehn :febeh' 'i.

On tba :Yusu' 'di 'gben-'

31:Yee' :Jueh'-nyor⧾-a' nyor⧾ :na-dih-nyor⧾ bale: Pale' 'weh, or 'ye-uh' 'tele' 'nyi, on 'ye nyor⧾ :on :kor-dih-eh 'o tu 'i, an-a' buh⧾ dih jela:, 'de on 'ye 'dhobo: on 'ye 'meh, 'de on 'ye-uh 'o tu 'i :za. Deh :korn-a dhih, an 'bhorn-a on 'ye-a' deh :daa no, eh-: 'dhu, eh no Nyorsoa-a' :gwlee-we-eh-a' 'tiei-a' 'kpa :po-zorn:, 'de on :se-' 'bhorn Nyorsoa-a' :gwlee-we-eh 'ye 'o nyor⧾ :dao' tu 'i :yeh-dih:. Deh no-eh, :gwlee-we-eh: :dao', :eh yi-a 'de, eh 'kpa deh ken 'gabaa. 32'De sorye' mu, on jela: :tehn 'i nor-a' buh⧾ dih :or :ne :Yusu' :kor-dih-eh: 'o 'klorse tu 'i :dha :due'. 'Ka-: on no 'sororn' nor-a' dhih :ke. 33Jorwor: :yeh on :yeh-dih:-a :Yusu' ken, 'de on 'ye-or, :ka or 'meh-a, :yee' on :se-' or-a' buh⧾ dih jela:. 34Jorwor: sorye'-yu :due', or-: 'duo: 'di-', 'de or tba-eh 'o or 'gben-', :yee' 'do :dha :due' :dao', nyomor-: 'dekorn: 'ni-: me-: 'wluh 'o or gben bo, :en 'si 'zorn. 35Nyor :or 'ye-a deh :daa eh-a' dha, or zela-eh ken dih 'weh, 'de deh or zela:-a ken dih, eh no dhih 'jeh. Or-a' 'jeh yubo-eh', :ka or za-a dhih-a' 'yor-eh-'. Eh-: :korn dhih, or zela-eh ken dih, a 'ye-eh' dhih 'jeh-' po. 36Deh⧾ :daa, en :no-eh:-', 'de deh Nyorsoa-a' 'chlee-deh :za-a-', eh 'ye dhih 'jeh-' 'kpa, :eh no-a, Or-a' 'kpa :due'-beh :se-' :jla i. 37:Yee' eh za-eh' 'weh, 'de Nyorsoa-a' 'chlee-deh 'di :neheh', eh 'da, Nyor on tba-a 'di 'gben-', or-: an mu ya pobo:.

:Yusu'-a' dih nma-dih-eh:

(Mt 27.57-61; Mk 15.42-47; Lu 23.50-56)

38:Yeh deh⧾ :daa, en zi-a, :yee' 'Joseh: :or 'wluh-a :gwlor an 'da-dih-a Amati'a 'di, or-: dhele: Pale' dih, or 'ye :Yusu'-a' 'ku kpa. 'Joseh-a' 'jeh :dao', or no :Yusu'-a'a: bo :na-nyor:. Jorwor: or-a' :nyeh 'i, deh no-eh, or ple :Jueh'-nyor⧾-a' 'yli 'weh. :Yeh or dhele:-a Pale' dih, :yee' Pale' 'nyi-or :Yusu'-a' 'ku 'weh, 'de or kpa-uh. 39'Nekodi'ma: :or mu-a 'de :Yusu' bo 'gwie-we-eh :due', or-: zi 'o 'Joseh klei' :ke. 'De or :ya 'de 'mina-: 'dekorn: 'alo-: :en zian-dih:-a, 'de nyor⧾-a po-dih-ih-a 'ku 'kpa, 'de on :sor po-a 'no. Deh⧾-a' 'jeh :dao', en-' kwa :ku-eh gweh :koo-blor 'i. 40:Yee' nyor⧾ 'sororn' :dao', on 'duo: :Yusu'-a' 'ku-' 'weh, 'de on po-or deh⧾ :dao' :en po-a 'no 'jeh kle-' dih, 'de on bhian-dih-or 'nena-ylii kle-' dih. 'Ka-: 'o, :Jueh'-nyor⧾-a no nyor dih nma-dih-eh, 'de on 'bli. 41:Yee' 'do :dha on :kor-dih:-a 'o :Yusu' tu 'i, :yee' 'dhuu'-deh⧾-a' gba-dih-gba :ne 'o, 'do :wor nma-dih-deh: :dele' :ne, on no-a 'de 'soba 'di, :eh on 'see-a nyor 'di dih nma-dih :zai'. 42:Yee' :ka eh no-a Nyorsoa-a' :gwlee-we-eh-a' 'tiei-a' 'kpa :po-zorn, 'de nma-dih-deh: :dao', eh 'koan'-dih:-a 'o dih, eh-: no-eh, 'de on nma-dih: :Yusu' dih 'do mor.

Currently Selected:

:Jororn' 19: TCHKR

Highlight

Copy