Lukas Uram 6

Er Yesus miliramnyi nang aryi sun Yahudi yala nang wa in uki tum si Sabat tum asi gandum du dakoka yibmai uram

6:1-5

1Sun Yahudi yala nang taruk louboka wa in kum uki si Sabat tum tentok aryi, Er Yesus bira gandum wa iamnyi kankan yibanmou. Ba, Er miliramnyi nang ara gandum du dakdobne ura, taruk aryi kala lokaboka yibde yibanmai. 2Sunci ato kunmai bok, Farisi nang ara Musa kerek sengna dirniliramnyi nang mikbaryi yandoka ato ebmai, “Sunda unatoa ati, Er Imtamnyi biryi Musa kerek sengna umbura aryi, ‘Wa in kum uki tum ara gandum du dakoka taruk aryi lokaboka yina ara mem!’ ebsou dinyi asi dakbisibmarum do? Nunda, ‘Taruk louboka bun tum asi, gandum du dakoka taruk aryi kala lokaboka yinmarum to ababyi, mem en dinyi dakbisibmarum,’ tenebmasib,” ebmai. 3Ato ebmai bok, Er Yesus biryi Er miliramnyi nang asi libdobmouci, sun Farisi nang asi ato ebmou. “Ni miliraning nang aryi kubmang dinyi ara mem ebsou dinyi kum dakbisibmang. Bok, minob talak aryi Daud ab er milibmai nang ab kwaning atanmou ba, iya mem eansou dinyi bok, dakbisibmou deyok asi kerek sekdeiamwe uram ara sunda diboka ton kum nungdendarur darib? 4Ara, Er Daud ab ersi milibmai nang ab kwaning atanmou ura, Daud biryi keis ol ai si Kemah Suci ai dam wengbindoka, akai wa in sienyi bisi roti kwaning molobdobmou ba, Er Imtamnyi biti boboka deirbaramnyi dinyi asi dobkarebmou. Ba, Daud er ton yibmou ura, er milibmai nang ton bokeibmou. A roti kwaning ara talyi nang ton kum dobde yiramnyi erda, Er Imtamnyi kan ninyi kan noutam kuboka antanirdeirin nang akikwe yiramnyi bok, dobkarebmou ba, yibmou. Ato kubmou ababyi Er Imtamnyi biryi Daud bisi yu ton kum bobmou,” ebmou. 5Ato ebmou cok, sun Farisi nang asi tubto ton ato ebmou, “Ni Ninyi Dasinyi kunun ara sun taruk louboka burandum tum ara, ‘Niryi, uki si Sabat tum aryi ato dinyi ara ur ukubdarur! Ba, ato dinyi ara ukuna mem!’ ebkwamatinyi ara kikiman. Ati, sunci nunsi yu bosina mem!” eboka Er Yesus biryi Er miliramnyi nang asi libdobmou.

Er Yesus biryi sun Yahudi yala nang wa in kum uki si Sabat tum aryi u yiramwe nang kwetebmou uram

6:6-11

6Sun Yahudi yala nang wa in kum uki si Sabat tum yuk tum aryi Er Yesus biryi Musa Uram eteren ai wengbindoka Er Imtamnyi Uram eterenmou. A eterenmou ba, kekenmai nang kankan ara siriktam taruk lamaamunyi tentok wengyanmouci, kekenmou. 7Ba, Musa kerek sengna etereramnyi nang ab Farisi nang ara Musa kerek sengna dirniliramnyi nang ab ara, “Er Yesus biryi u yiranci nang asi wa in kum uki tum bok kwetebci asi asing eibibyi ura, Ersi malyi kun dinyi ara ato ukubmar ebkwanub,” tenen ati diblilibmai. 8Ato teneboka diblilibmai bok, Er Yesus biryi sun tenebmai kanya ara bikmouci, siriktam taruk lamaamunyi bisi ato ebmou, “Bukalaboka, ninyi kankan asi tikokdum!” ebmou. Ba, anyi biryi bukaloboka ninyi kankan tikokmou. 9Ura, Er Yesus biryi sunsi ato ebmou. “Niryi sunsi ebkwinsin ara, ‘Dan dinyi asi wa in kum uki tum aryi ur ukubdarur!’ ebsou do? ‘Teleb kun dinyi asi do, malyi kun dinyi asi do?’ Niryi sunsi ebkwinsin ara, ‘Teleb kun dinyi ara wa in dinyi kuma,’ tenebman. Tonda, ninyi kanya lemna dinyi asi, ‘Ur ukubdarur!’ ebsou do? Ninyi kanya orminingni dinyi asi, ‘Ur ukubdarur,’ ebsou do? Niryi sunsi ebkwinsin ara, ‘Nira ninyi kanya lemna dinyi ara wa in dinyi kuma,’ tenebman,” ebmou. 10Ato ebmou ura, ninyi nirya asi dibkankanikdenmouci, taruk lamaamunyi bisi ato ebmou, “Kan taruk ninikokdum!” ebmou. Ba, anyi biryi er taruk ninikokmou uca, sirya kwetebmou. 11Ba, Musa kerek sengna uram etereramnyi nang ab, Farisi nang ab ara sun kanya dam aryi ato tenebmai. “Er Yesus biryi Musa kerek sengna umbura aryi, taruk louboka bun tum ara wa ina mem!” eboka kerek sekdeibwe dinyi asi wa in kum uki tum bok, u yin nang kweterur. “Ato kurur dinyi ara nunsi malyi kibsiniboka mem en dinyi dangbisirur,” tenebmai ura, yu mitik kum kubmou. Ba, “Er Yesus bisi una kuboka obkwayeb do?” eboka uram sisikmai.

Er Yesus biryi Ersi milinkwamnyi nang amolbaryi nang nabmou uram

6:12-16

12A talak ara Er Yesus bira mutuk kon welebindoka Er Imtamnyi bisi molorbinmou. Asi a inibmou lukunda nirya ara Er Nai Imtamnyi bisi molonmou. 13Ani, berekmou ura, Ersi miliramnyi nang nirya asi ato ebmou, “Ni dam yandarur!” eboka nabmou ba, Er dam binmai ura, Ersi milinkwamnyi nang ninyi amolbaryi wibmou. A nang ara, “Ninyi asi Teleb Uram deyok kouboka eterebkwandum nang,” eboka wibmou. 14A nang sun si ara Simon eramnyi asi Er Yesus biryi Petrus eboka si dobmounyi ab, Simon er weit Andreas ab, Yakobus ab, Yohanes ab, Filipus ab, Bartolomeus ab, 15Matius ab, Tomas ab, Alfeus mi Yakobus ab, “Sun Roma nang asi nun mutuk kuna nun li eboka yakdonokwayeb,” teneramunyi si Simon Zelot ab, 16Yakobus mi Yudas ab, Yudas Iskariot aminda Er Yesus kikibkwamunyi ab, ukuboka wibmou.

Er Yesus biryi ninyi etereboka u yiramwe nang asi ninyi ilinto kweteboka kibmou uram

6:17-19

17Er Yesus ab Er kwit yabwe ab mutuk kon dam aryi yuryandoka mutuk bakan ai asi wekmai. A mutuk bakan ara Er miliramnyi nang ababyi ilinto wekmai bok, asi yuk nang ababyi yanmaici, wekmai. A yandoka wekmai nang ara Yudea mutuk atei nang ab, Yerusalem mutuk atei nang ab, me katum dam kuramnyi atei si Tirus ab atei si Sidon nang ababyi ninyi ilinto yanmai. 18A yandobmai ara, “Er Yesus eterena asi ton kekebdobtibyi,” tenen ton yanmai ura, tonda u yiramwe nang ara, “U yisurur asi kwetebsute,” tenen yandobmai ura, sunsi kwetebmou. Ba, isa kanya wengdaramwe nang ara Erci isa kanya asi yakdonokoka sun kiribde yiramwe dinyi ara kwetebmou. 19Ba, Er Yesus nong umbura aryi ninyi kweten mikib anaboka ninyi ilinto asi kwetenmou deyok aryi, ninyi nirya aryi Er nong asi “Bol libdetibyi,” tenen ati ingkiringkiringmai.

Kanya kilkil kun uram ab mambul kanya bon uram ab

6:20-26

20Mutuk kon dam aryi, Er Yesus biryi Er miliramnyi nang asi dibdenmouci, ato ebmou, “Sun bona ton kum boramunyi nang ababyi Er Imtamnyi bira ninyi leboka kalingdur Weik Sienyi kurur dam kun nang kibdeibsou deyok aryi, sunsi Er Imtamnyi biryi kisal dangdur nang esunung. 21Ba, sun ukuryok talak kwaning ataransir nang ababyi aminda ara Er Imtamnyi biryi boubdeibkwansir deyok aryi, sunsi Er Imtamnyi biryi kisal dangdur nang esunung. Ba, sun ukuryok talak mambul aryi engen kanya boramunyi nang ababyi aminda ara Er Imtamnyi biryi kanya kilkil kun dinyi karebsici ba, si kiribkwandum deyok aryi, sunda Er Imtamnyi biryi kisal dangdur nang esunung. 22Ba, Ni Ninyi Dasinyi deyok ati, sunsi mar iboka baitam yakdonokoka, kulaboka sun si asi malyi kimdansingnyi ababyi, Er Imtamnyi biryi sunsi kisal dangdur nang esunung. 23Ato kuransingnyi talak ara kanya karyi asa ab teleb kanya boboka kurandarur, aminda ara iya teleb dengna dobdobkwandum. Ati, neiktoto kuboka minob Er Imtamnyi Uram ebdeibmaci to lak etereramnyi nang, asi sun abwe yabwe aryi oramnyi nang ara dengna weik dinyi sirya dobdobyi. 24Bok, sun bona mitik kum boramunyi nang ara sun mining bona aryi kanya teleb kimdeirisurur deyok aryi, Er Imtamnyi biryi wenebkwansir. 25Ba, sun ukuryok talak kwaning yiramunyi nang ara Er Imtamnyi biryi wenebkwansir deyok aryi, aminda kwaning atabkwansir. Ba, sun ukuryok talak aryi akwi tubde kuramunyi nang ara Er Imtamnyi biryi wenebkwansir deyok aryi, aminda mambul kanya boboka engebkwandum. 26Ba, sun yuk nang aryi uram kisal dangnansingnyi nang ara Er Imtamnyi biryi sunsi wenebkwansir. Ba, minob sun abwe yabwe ababyi tola ati ato eramnyi, ‘Nira, Er Imtamnyi Uram ebdeibmaca bobananyi kunun,’ erdaramnyi nang asi uram kisal dangnamnyi,” ebmou.

Er Yesus biryi, “Sun mar iransingnyi nang asi boukwe kibdarur,” ebmasou uram

6:27-36

27Er Yesus biryi Er kwit yabwe asi eterenmouci, ato ebmou, “Sun, Ni enman uram kekenmarum nang ara Niryi sunsi ebkwinsin, sun mar iransingnyi nang asi boukwe kibdarur ba, sunsi yu kanya boransingnyi nang ara teleb kibdeibdarur; 28Ba, sunsi subsingnyi nang ati, sunci kisal dangna dinyi molobmilibdarur. Ba, sunsi ina ngiliksingnyi nang ati, Er Imtamnyi bisi molobmilibdarur. 29Unanyi biryi sunsi dinatam katum boksingyi ura, ‘Sunbabyi boktibyi,’ tenen kum erda dinatam katum kiknibdeibkwandarur. Ba, unanyi biryi sun mo kaluna ongon aling dobdobingnyi ura, sun ongon aling sirik ababyi dobdobkwanung. 30Ba, unanyi biryi sunsi utotoa molobsingnyi ura, ur karebdarur. Tonda, yuk nang aryi sun dinyi asi dobdobmangnyi ura, ‘Tamubkarebnurum!’ ena mem! 31Niryi sunsi ebkwinsin ara sunci yuk nang asi, ‘Ukubdeibsiting,’ teneramunyi ura, sunbabyi yuk nang ati ukubdeibdarur. 32Tonda, sunsi boukwe kimdansingnyi nang akikwe, sunbabyi tamuboka boukwe kimdamunyi ura, aminda Er Imtamnyi biryi dengna kum karebkwansir. Ato kun dinyi ara malyi dinyi ilinto kuramingnyi nang ababyi sunti boukwe kimnamingnyi nang akikwe tamuboka boukwe kimnung. 33Ara, ato deyok ati ebmasin, sunsi teleb kimnansingnyi nang akikwe sunbabyi teleb kimnamunyi ura, a kuramunyi dinyi dengna ara Er Imtamnyi biryi kum karebkwansir. Ato kun dinyi ara malyi kun dinyi kuramingnyi nang ababyi ukunung. 34Tonda sunci yuk nang asi aminda ara, ‘Erbabyi tubto dekeibkwanir,’ tenen nang akikwe utotoa, ‘Ur tiya ati bobmarum!’ ena mem! Ato kuramunyi ura, aminda ara Er Imtamnyi biryi sunsi kum dekeibkwansir. Ato kun dinyi ara malyi kun dinyi ilinto kuramingnyi nang ababyi, sunci yuk nang asi sun bona, ‘Tiya ati bobmarum,’ ebmangnyi uca, tamurkaren dengna ara mitik kum tamurkarenung. 35Sunda ato kunung bok, sunda sun mar iransingnyi nang asi boukwe kibmun cok, teleb kibdarur! Tonda yuk nang aryi sun dinyi tiya bobkwamangnyi ura, ur karebdarur! Karebmunyi ura, ‘Aminda dekeibkwansing,’ tenena mem. Dengna weikto dinyi ara aminda aryi dobdobmunci, Er Imtamnyi Erebdobnyi mabwe nermabwe kibkwansir. Ati, sunbabyi neiktoto Er Imtamnyi biryi, ‘Ni Nai,’ eboka kirona bingna kum nang ab yu kanya akwe bon nang ab asi teleb kimdeirirurnyi kurur to kubdarur. 36Sun Nai Imtamnyi bira namin kanya borur to, sunbabyi namin kanya akwe bobdarur!” eboka eterebmou.

Yuk nang asi wenen uram

6:37-42

37Er Yesus biryi Er kwit yabwe asi, yuk nang asi wenen deyok ati, eterenmouci, ato ebmou. “Er Imtamnyi biryi sunbabyi aminda wenebsicei ati, sunci yuk nang asi, ‘Tatab-tatab eboka wenebtibyi,’ tenena mem! Tonda, Er Imtamnyi biryi sunbabyi ikin weik dinyi takubdeibsicei ati, sunci yuk nang asi ikin weik dinyi takurdeina mem! Er Imtamnyi biryi sun malyi kun dinyi kilibkwansir ati, sunci yuk nang malyi kun dinyi luba kibkwandarur! 38Tonda Er Imtamnyi biryi sunsi, ‘Weikto tabakdongoboka karebkwan,’ tenen sirya kiknibdeibwe. Ati, yina ton kum deibdobmangnyi nang asi gandum du kwaning karebkwamamunyi ura, weikto langkarikoka dibkwetebci bok, karebkwandarur! Ba, langkarikoka dingsangmaci dinyi ara Er Imtamnyi biryi sun dinyi kibdeibkwansir. Ara, sunbabyi wiboka kareamunyi to kuboka karebkwansir,” ebmou. 39Ebmou ura, yuk kemdeirin uram ton doboka sunsi eterebmou, “Asing kuante nang bitinyi sun mamun talebdandoka yibitiring do? Ato kum kubtiring. Ato kubtiring ura, sun bitinyi nirya kot dam saktiring. 40Ninyi eterenanyi biryi etererante mi ara etererantunyi eitam sokon kum bukte bok, erda eterenanyi biryi etereraunte mi sirya sekdobte ura, er etererantunyi buraunte sokon neiktoto buktiring,” eboka eterebmou. 41Tonda Er Yesus biryi malyi kun dinyi ati, co kikliboka eterebmou ara ato. “Sun unatoa ati, sun baramnang asing ara ilila co bubum dakdoba wekmasici bok, a dinyi kum bikdanmamun cok, sun kwit yabwe asing co sungsunga wekmaci asi, ‘Dobkabokwankin,’ endarur do? 42Una kuboka sun kwit yabwe asi, ‘Ni kwit e, kan asing co sungsunga wekmakir ati, dobkabokwankin,’ endarur do? Sun baramnyi asing ara ilila co bubum wekmasici dinyi ara kum eibdanmamuncok asi ato endarur do? Sunda, kanyatam ara yu kanya bomamun cok, Er Imtamnyi Uram diboka kunun nang ato kimdandarur nang se. Sun baramnyi ilila co bubum dakdoba sun asing umbura aryi dobkabokmun cok, asi sun kwit yabwe asing co sungsunga wekmaci dinyi lak eiboka dobkabokwandarur. Ara, ato ati ebmasin, sun weiktoto malyi kun dinyi kuramunyi nang aryi, sun kwit yabwe yuk nang malyi kun dinyi kubmangnyi nang ati, ‘Wenebkwayeb,’ tenena mem,” ebmou.

Co nong ab du ab uram

6:43-45

43Er Yesus biryi eterenmouci, ton ato eboka eterebmou, “Co yala teleb ara du teleb akwe mourande ba, co yala malyi ara du malyi akwe mourande. 44Co du mouranci co ara yalyi aryi bingnaming. Kirikna yok deici aryi co kwarang du ton kum murur, ton kirikna tiling aryi co anggur du mouanci asi ton kum dangnung. 45Ninyi uram sisingnung ara kanya aryi teneiboka uram sisingnaming. A deyok aryi, du teleb mourande co ato nang ara kanya teleb aryi er kanya dam ara uram teleb akwe anarande. Ba, du malyi mourande co ato nang ara kanya malyi aryi er kanya dam ara uram malyi akwe anarande,” eboka eterebmou.

Er Yesus biryi Er Imtamnyi Uram kekeboka kununa ati ai dona kikliboka eterebmou uram

6:46-49

46Uki tentok tum aryi Er Yesus biryi er eterenmou uram kekenmai nang asi ato ebmou, “Ni uram enun ara kum kunundarurcok, unatoa ati, ‘Se, Nai Arungdeirisurumnyi, Nai Arungdeirisurumnyi,’ enindarur do? 47Ni dam yandoka Ni uram kekeboka kunubtunyi bira unato nang kiklibtinyi do? Yo teleb, Niryi kiklina uram ton ebkwisin. 48Ara, ninyi tentok aryi, Ni uram kekeboka kunurandinyi bira ai abyokomna diboka katabum eboka iki dorandanyi kiklibkun. Ai abyokomna diboka ikanci aryi, mo yeinya kiboka me onmaci tum ababyi akai ara kum dalungnande. Ni uram kekeboka kunurandinyi bira erda atonyi kurandiryi. 49Ba, Ni uram kekeboka kum kunurandinyi bira ai abyokomna diboka katabum eboka ikoka dona kum dorandanyi kiklibkun. Ai abyokomna diboka kum ikoka doanci aryi, mo yeinya kimaci tum ara me onmariryi, akai nirya dalukoka bobarande. Ni uram kekerandiryok kum kunurandinyi bira erda atonyi kurandiryi,” eboka kebdei eterebmou.

Currently Selected:

Lukas Uram 6: MTG

Highlight

Copy