Lukas Uram 5

Er Yesus biryi Er milibkwamnyi nang yuma nabmou uram

5:1-11

1Uki tentok tum ara Er Yesus bira me kwan si Genesaret enung ba, ton si ara Galilea enung me katum dam tikmou. Asi, ninyi ilinto aryi, “Er Yesus biryi Er Imtamnyi Uram ton eterebsute,” tenen Er dam yandoka arubdongobmai. 2Arubdongobmai bok, Er Yesus biryi diramwe uca, me kwan iririkna dam asi co ngun-ngun bitinyi yandoka deibmaici, mekinaia don nang ara co ngun-ngun deici aryi yuryibindoka sun kwisib me ilingmai asi eibmou. 3Ura, Er Yesus biryi ninyi si Simon co ngun-ngun asi welebinmou ura, Simon bisi ato ebmou, “Co ngun-ngun mitikanun dokdonokdum ba, me iririkna dam akiryi ototo birur,” ebmou. Ba, Simon biryi Er Yesus ebmou to kuboka kunubmou. Ura, Er Yesus bira a co ngun-ngun dub bukoka ninyi ilinto asi Er Imtamnyi Uram eterebmou.

4Ninyi eterenmou ani, sirya eterebmou ura, tubto Simon bisi ato ebmou, “Kan kwisib me kwan umbura dongoboka mekinaia dobkwandim ati, co ngun-ngun, me dub noutam kobdob dokdonokdum,” ebmou. 5Uca, Simon biryi Er Yesus bisi ato ebmou, “Nun Eteresinanyi, arub inibmar lukunda nirya ara a dongordenmab uca, tentok sirik ababyi ton kum dobmab, ‘Ati, kitingtam ara wanok ton kum dobkwamab,’ tenebman. Bok, erda Kanci ebdim deyok aryi, dongobdenkwan,” ebmou. 6Ato ebmou ura, Simon ab er kwit yabwe ab aryi sun kwisib me kwan umbura donokmai ani, erertaleramnyi uca, mekinaia mitik kum dobmai aryi sun kwisib kwilikalibmou. 7Ba, sun kwit yabwe yuk co ngun-ngun dub bukmai nang asi, “Miliryasunung,” tenen ati, taruk kwayiboka nabmai. Ba, yanmai ura, a co ngun-ngun bitinyi nirya mekinaia doboka kibdongonmai uca, a co ngun-ngun bitinyi nirya langkarikmou ba, dakyururum eboka me wekmanto kubmai.

8Ato kubmou asi Simon Petrus biryi asing eibmou. Ura, Er Yesus boukwe dam kutam ikdongoburyandoka ngang dakdongobokaburyi, “Nai, nira malyi kun dinyi bonun cok kunun ati, nira Kanda ab tonkwa kubman kumnyi kunun ati bindobdum!” ebmou. 9Petrus biryi ato ebmou ara Petrus er ab tonkwa kunmai nang ab aryi mekinaia mitik kum dobmai ba, sun kanya ilil kubmou deyok ati ebmou. 10Ton neiktoto Zebedeus mabwe Yakobus ab Yohanes ab, Simon er kwit yabwe tonkwa kuroramnyi nang ababyi ilil kubmou. Asi, Er Yesus biryi Simon bisi ato ebmou, “Kanci mekinaia doramoumwe to kuboka ukuryok akiryi ninyi donanyi kibkwandim ati, kan ilil tenena mem!” ebmou. 11Ura, sunci a co ngun-ngun bitinyi me kwan katum dam bindoka deiblobmai. Ura, sunci utotoa nirya takloboka Er Yesus bisi milibmai.

Er Yesus biryi susa taleamunyi bisi kwetebmou uram

5:12-16

12Uki tentok tum aryi Er Yesus bira atei tentok bindoka kunmou. Akatei dam ara ninyi tentok susa taleamunyi kuramwe. Anyi biryi Er Yesus eibmou ura, Er Yesus boukwe dam kutam ikdongo buryandokaburyi, ngang dakdongoboka molobdobmou, “Nai, Kanci ni talebnou susa asi, ‘Akabsakdobte,’ tenebniminyi ura, ni talebnoua susa ara akabkaboknurum!” eboka molobdobmou. 13Ato eboka molobdobmou ba, Er Yesus taruk lakoka anyi deici deibdongobmou ura, ato ebmou, “Niryi kan talebkou susa ara, ‘Akabsakdobte,’ tenebmakin ati, akabsakdobkwamakir,” ebmou. Ba, Er Yesus biryi ato erdongou talak aryok anyi taleamwe susa akabsakdobmouci, a yiramwe dinyi ara kum dandobmou. 14Ato kubmou ura, Er Yesus biryi anyi bisi ato ebmou, “Kanci yuk nang asi talyi ebdongobde yibana mem. Eda, Musa kerek sekeibwe to kuboka, Er Imtamnyi kan ninyi kan noutam kuboka antanirdeirin nang dam asi, ‘Ni talebnou susa ara sirya akabsakdobmanir,’ eboka amurdarbirum. Ba, sunci kan talebkou susa asi diblilibdekingnyi ura, sunci kansi, ‘Diba kan talebkou susa ara sirya akabsakdobmakir,’ ebking ura, Er Imtamnyi biti kan susa talebkoua asi akabsakmakira dama boboka deirirbirum. Ba, kanda yuk nang ab tonkwa kubdobkwandum!” ebmou.

15Bok, Er Yesus deyok ati, a mutuk me um dam nirya ebdanin yibinmai. Ba, ninyi ilinto aryi, “Er Yesus biryi Er Imtamnyi Uram ton eterebsute asi kekebtibyi,” tenen nang ton yangaramyi ura, tonda Er Yesus biryi, “U yisurur asi kwetebsute,” tenen nang ton Er dam yangaramnyi. 16Bok, Er Yesus bira ninyi kun kum dikum bindoka Er Nai Imtamnyi bisi molorbinman ani, yandoka eterebde kweteramwe.

Er Yesus biryi yan deneamunyi bisi kwetebmou deyok

5:17-26

17Uki tentok tum aryi Er Yesus biryi ninyi eterenmou kankan ara Farisi nang ara Musa kerek sengna dirniliramnyi nang ab, “Ukubdarur-ukubdarur,” en uram etereramnyi nang ab ninyi mikbaryi wengyanmaici, kekenmai. A yanmai nang ara Galilea mutuk atei nang ab Yudea mutuk atei nang ab Yerusalem mutuk atei nang ab yanmai. Asi, Er Yesus bira Er Imtamnyi mikib aryi u yiramwe nang asi kwetenmou. 18Ura, ninyi mikbaryi nang aryi yan deneamunyi bisi co maloua caboka boyanmaici, “Anyi boboka Er Yesus urasin dam asi deirbinkwayeb,” tenebmai. 19Bok, ninyi ilinto aryi bisik libmai deyok aryi, co maloua kibmaning boboka wengbinman kum ba, sunci ai aruma dub boboka welebmai. Welebinmai ura, sunci ai aruma dangdeiboka anyi co maloua kibmaning ninyi ilinto kankan dobkwetebmai ba, Er Yesus boukwe dam maryurbinmou.

20Ba, Er Yesus biryi a nang aryi, “Nun kwit Er Yesus dam bobibyi ura, diba kwetebkwamar,” tenebmai dinyi eibmou ura, Erci anyi bisi, “Se Ni kwit, Niryi kan malyi kun dinyi sirya kilibmakin,” ebmou.

21Bok, Musa kerek sengna etereramnyi nang ab Farisi nang ara Musa kerek sengna dirniliramnyi nang ab aryi sun kanyatam aryi, “Se, anyi bira Er Imtamnyi si asi co kwemtangninto ebmar aryok. Nun tukwetam nang ara ninyi malyi kun dinyi kilibmanto nang ton kum kunub, erda Er Imtamnyi tentok asi ninyi malyi kun dinyi kilisururnyi kurur bok, ato ebmara,” tenebmai. 22Ato tenebmai bok, Er Yesus biryi sunci tenebmai kanya bikmouci, sunsi ato ebmou, “Sunci, sun kanya dam ara una tenebmarum do? 23Dan dinyi asi ebtinyi asi malyi tenebdate do? ‘Kan malyi kun dinyi sirya kilibmakin,’ en dinyi kum, ‘Bukalaboka yibarorum,’ en dinyi asi teleb tenebmarum do? Ni kanya tenebman ara, ‘A dinyi nirya ara ikin neiktoto dinyi,’ asi ebman. 24A ebman ara Niryi teneboka ebmasin, ‘Tukwetam ara Ni Ninyi Dasinyi bira malyi kun dinyi kilin mikib bobse ati, sun dam lak kibkun ba, diboka bikwandarur,’ tenen ebmasin,” ebmou. Ura, a yan deneamunyi bisi ato ebmou, “Niryi ebmakina, ur tikokminyi ura, kan man amsuna bobdobminci, kan ai bindobdum,” ebmou. 25Ura, a ebmou akiryok anyi biryi sun urasin dam tikalabokaburyi, er man amsuna bobdobmou ura, Er Imtamnyi bisi kiboka si weik erebnin mot sebnin ani, er ai bindobmou. 26Ura, Er Yesus eterenmou ai umbura wekmai ninyi nirya sun ilil mitik kum kubmou ba, “Arub ara, ‘Se, nai e!’ tenen dinyi asing eibmab,” ebmai cok, Er Imtamnyi bisi si weik ereboka mot sebmai.

Lewi bira, “Roma weik sienyi Kaisar biti pajak dengna karebdarur,” eboka molorlikniramunyi biryi Er Yesus milibmou uram

5:27-32

27Er Yesus biryi yan deneamunyi bisi sirya kwetebmou ura, anaboka binmou. Banmouci, diramwe uca, “Roma weik sienyi Kaisar biti pajak dengna karebdarur,” enanyi si Lewi bira er wa in ai bukmou asi asing eibmou. Ura, Er Yesus biryi anyi bisi ato ebmou, “Kanda Ni milibnurum!” ebmou. 28Ba, Lewi biryi utotoa nirya deibloboka Er Yesus bisi milirbinmou.

29Ura, uki tentok tum aryi Lewi biryi Er Yesus biti weik kwalina kwalibmou ba, “Roma weik sienyi Kaisar biti pajak dengna karebdarur,” eramnyi nang yubwa tentok ab yuk talyi nang ab kuboka Er Yesus ab tonkwa a kwalina yibmai. 30Ba, Musa kerek sengna etereramnyi nang ab Farisi nang ara Musa kerek sengna dirniliramnyi nang ab ara yu wekmou. Ba, Er Yesus miliramnyi nang asi ato ebmai, “Sun unatoa ati, ‘Roma weik sienyi Kaisar biti pajak dengna karebdarur,’ eboka molormilinung nang ab malyi kun dinyi kunung nang ab tonkwa yina yibmarum do? Sunci a ukubmarum dinyi ara nunda teleb kum tenebmasib!” eboka kerebmai.

31Asi, Er Yesus biryi sunsi ato ebmou, “Nong kib nang aryi, ‘Ninyi kwetenanyi biryi ni ton kwetebnute,’ kum teneraming erda, u yin nang aryi, ‘Ninyi kwetenanyi biryi ni ton kwetebnute,’ teneraming. 32Ato neiktoto, Ni tukwetam yuryase ara sun Farisi nang aryi, ‘Nira teleb akwe kunun,’ teneboka kundarur nang ati kum namyase. Bok erda sun, ‘ “Roma weik sienyi Kaisar biti pajak dengna karebdarur,” eboka molormilinung ato nang ab malyi kun dinyi kuraming ato nang, ati sun malyi kun dinyi taklobtingci, Er Imtamnyi tam asi urasin deibting,’ tenen namyase,” ebmou.

Yina si teboka bun deyok

5:33-39

33Er Yesus biryi sirya ebmou ura, Farisi nang aryi Er Yesus bisi ato eboka asibmai, “Yohanes bisi miliramnyi nang ara, ‘Er Imtamnyi bisi kanya teleb kibdeibkwayeb,’ teneboka yina si teboka buramiryi, Er Imtamnyi bisi moloramnyi. Ba, tonda Farisi nang Musa kerek sengna dirnilinung nang asi milinung nang ababyi ato kunung. Bok, Kan milikunung nang ara sunda unatoa ati, ato kum kunungci, kwaning yiboka me yiboka kimnung do?” eboka asibmai. 34Uca, Er Yesus biryi kemdeirin uram aryi sunsi ato ebmou, “Ner te murumna tum ara ner dobkwamatunyi biryi deibaribdobting nang asi, yina si teboka bukdarur eraming do? Ato ton kum enung, erda sun kanya kilkil aryi yina yiraming. 35Bok, Nira ner donanyi bitonyi tuba kuranyi talak ara Ni miliraning nang sun kanya kilkil aryi yina yiramingnyi ani, aminda tentok berekwande uki tum ara Ni sun kankan aryi dobobde biningnyi ura, sunci mambul kanya boboka yina si teboka bukwaming,” ebmou.

36A sirya ebmou ura, Er Yesus biryi, “Niryi etereran Teleb Uram ab minob sun Musa kerek sengna etereraming nang ab Farisi nang aryi etereraming dinyi ab neika tabtabukman kum,” teneboka bikting, tenebmouci, kemdeirina winiryi doboka eterebmou. Ara, ato, “Minob ongoramibyi aling kwilikci ura, ukuryok dekmabyi aling bilul aryi kwiliktaleboka minob ongon aling asi kum deneramib. Ato kubtibyi ura, ukuryok dekdobmatibyi ongon aling ababyi kwiliksiniboktibyi, tonda ukuryok dekmatibyi ongon aling bilul ara minob ongorantibyi ongon aling kikiman kum kubte. 37Ato neiktoto kuboka ninyi tentok aryi co anggur du yung asi uruboka minob kiramingnyi bisam kala aling umbura ururdongoraming do? Ato kubting ura, a co anggur du yung ikin ab mikib aryi akaling bung deboka kwilikte. Ura, co anggur du yung me nirya diksakdobte. 38Ati, bisam kala aling bung deboka kwiliksakcei tenebingnyi ura, ukuryok urubmangnyi co anggur du yung ara ukuryok wibmangnyi bisam kala aling asi kirdongoraming. Ba, co yung mikib aryi bung deboka kum kwilingsangnande. 39Ba, ninyi tentok aryi minob uruboka diamingnyi co anggur du yung me yibmarinyi biryi tubto, ‘Ukuryok urubmangnyi dinyi yibtinyi,’ kum tenerur. Ato kuboka yibte ura, ‘Minob uruboka kibdeianting co anggur yung me ara me mikib teleb yibman ba, ukuryok co anggur yung me ara mitang tuba kubmar bok, asi yibman,’ ebte” eboka Er Yesus biryi kebdeiboka eterebmou.

Currently Selected:

Lukas Uram 5: MTG

Highlight

Copy