Kisah Para Rasul Uram 6

Sun utotoa kum nang asi bongkaren nang tabaryi asi tikeibmai uram

6:1-7

1A talak aryi ninyi ilinto Er Imtamnyi bisi dib teneboka tuba tabangyangaramnyi. Tuba tabangyangaramnyi ba, sun Yunani uram eramnyi nang aryi sun kwit yabwe Ibrani uram eramnyi nang asi kerebmai. Ara, sunci, “Kwaning bulubmunci, sun utotoa kum nang asi bokmunyi ba, sunci nun Yunani nang kankan kuboka sulyi nerabwe asi bongbisirandum se,” ebmai. 2Ato eboka kerenmai bok, sun Teleb Uram eteren deyok nang amolbaryi aryi sun Er Imtamnyi bisi dib tenen nang nirya asi, “Buluryandarur,” eboka nabmai. Nabmai ura, sunci sun bulubmai nang asi ato ebmai, “Nun kwit yabwe, nunda kwaning bokeibibiryok, Er Imtamnyi Uram eterena asi taklobibyei. A dinyi ara kikib kum. 3A deyok aryi, nun kwit yabwe, sunci teneiboka sun kankan aryi ninyi tabaryi wibdeibdarur. Ara, ninyi aryi kisal dangdoraming Er Imtamnyi Kanya Roh Kudus langkirur nang ab diboka bingnaming nang asi wibdeibdarur. A wibdeibkwandum nang ara kwaning bongkaren nang asi tikeibkwamib. 4A tabaryi nang ara sun bona bon kum nang asi kwaning bokeibkwaming bok, nunda tanglona kum uca Er Imtamnyi bisi molobibiryok, Er Imtamnyi Uram eterebkwamib,” ebmai. 5Sun amolbaryi nang aryi ato ebmai ura, sun bulubmai nang nirya aryi, “Teleb,” ebmai ura, sunci ninyi tabaryi wibdeibmai. A wibdeibmai nang ara Stefanus bira iya dib teneramunyi tonda, Er Imtamnyi Kanya Roh Kudus langkiramunyi ab, tonda Filipus ab, Prokhorus ab, Nikanor ab, Timon ab, Parmenas ab, ton Nikolaus ab kubmai. Er Nikolaus bira Antiokhia atei yangaramunyi kuboka Yahudi yalanyi kum kuramwe bok, erci sun Yahudi yala nang miliboka Er Imtamnyi bisi moloramunyi kuramwe. 6Sun bulubmai nang aryi a ninyi tabaryi asi wibdeibmaici, sun Teleb Uram deyok kouboka eteren nang urasintam boyanmai. Boyanmai ura, sunci Er Imtamnyi bisi molobmaici, “A nang asi tikeibkwayeb,” tenen sun taruk sun deici tam deibmai.

7A talak aryi ninyi ilinto tabakoka Er Imtamnyi Uram kekebkalibmai. Uca, sun Yerusalem atei kuboka dib tenen nang ara tuba-tuba tabangyangaramnyi. A tabangyangaramnyi nang kankan ara Er Imtamnyi kan ninyi kan noutam kuboka antanirdeirin nang yubwa weik kuramiryok, sunci Er Yesus uram Teleb Uram dib teneramnyi.

Er Stefanus bisi talebmai ura, talyi ati tatab-tatab ebmai uram

6:8-15

8Er Stefanus bira Er Imtamnyi biryi kisal dangdoramunyi kuramwe ba, Er Imtamnyi mikib er dam langkiramwe. Langkiramwe ba, er Stefanus biryi sun ninyi kankan aryi ilil weik tenen dinyi ab Er Imtamnyi mikib weiktoto lak kurdeirin dinyi ab kikniramwe. 9Kikniramwe bok, Yahudi yala nang mikbaryi aryi, “Ato dinyi nun li,” tenen er Stefanus ab lulubdanmai. A lulubdanmai nang kankan ara sun “Ur kubdobtibyi,” tenen nang ab, ton sun Kirene atei aryi yangaramnyi nang ab, ton sun Aleksandria atei aryi yangaramnyi nang ab, ton sun Asia mutuk aryi yangaramnyi nang ab kubmai. A nang nirya aryi er Stefanus ab lulubdanmai. 10Lulubdanmai cok, sunci er Stefanus bira diboka bingnamunyi ton, Er Imtamnyi Kanya Roh Kudus aryi eterena ermururamunyi bisi bita kum ebkateibmai. 11Bita kum ebkateibmai cok, sunci ninyi ton nang asi, “Ato-ato eboka nungkarendarur,” ebmai. Ura, a nang aryi tola ati ato ebmai, “Anyi Stefanus bira er Musa biti malyi uram ebmou asi kekebmoubwe. Tonda, anyi biryi ina ngilikoka Er Imtamnyi si asi yan yanibmou asi, ton kekebmoubwe,” ebmai. 12Ato ebmai uca, sun Yahudi yala nang ab, sun Yahudi nang sien nang ab, ton er Musa biryi kerek sekamwe uram etereramnyi nang ab nirya ara sun kanya dam aryi er Stefanus bisi yu kubmou. Ura, sunci er Stefanus bisi talebmai ura, sun Yahudi yala nang uram sengkwetena nang dam bobinmai. 13Bobinmai ura, sunci tola uram nungkaren nang ton bobinmai. A nang aryi tatab-tatab eboka er Stefanus biti ato ebmai, “Anyi tanglona kum malyi uram erande. Ara, akai ara Er Imtamnyi si weik eboka moloramib ai ati malyi uram erandiryok, er Musa biryi ebdeiansou uram ababyi malyi erande. 14Nun kekebmoubwe ba, anyi biryi ato ebmou, ‘Akai ara Er Yesus bira Nazaret ateinyi biryi dakokabdiryi, Erci er Musa biryi ebdeiansou uram nirya dangubkwande,’ ebmou,” ebmai. 15Ebmai ba, sun Yahudi yala nang asi uram sengkwetena nang aryi er Stefanus bisi liliboka dinmai bok, er urasin ara Er Imtamnyi Uram eryuryangananyi urasin ato milil weik kubmou asi asing eibmai.

Currently Selected:

Kisah Para Rasul Uram 6: MTG

Highlight

Copy