Kisah Para Rasul Uram 7

Er Stefanus biryi erdamnyi libdanmou cok, lak eterebmou uram

7:1-53

1Ura, Er Imtamnyi kan ninyi kan noutam kuboka antanirdeirin sienyi Imam Besar biryi er Stefanus bisi ato eboka asibmou. “A nang aryi tatab-tatab ebmakin malyi deyok ara kanci dib kubumwe do kum do?” eboka asibmou. 2Asibmou ba, er Stefanus biryi er baramnyi libdandoka ato ebmou, “Ni kwit yabwe ab ni nai yabwe ab, sunci ni ebkwinsin uram kekebnindarur. Nun abwe Abraham bira Haran mutuk bina kum kuramuryok, Mesopotamia mutuk tuba kuramwe bok, nun Nai Imtamnyi bira Er si weik enubnyi biryi Er baramnyi lak kibdandoka nun abwe ab ebdanmarei. 3Ebdanmarei ba, Er Imtamnyi biryi nun abwe bisi ato ebmou,

‘Abraham, kanda kan mutuk takloboka kan yala nang asi takbiminyi ura, yuk mutuk ara Niryi kansi eterebkwansin mutuk birum,’ ebmou. (Kejadian 12:1)

4Er Imtamnyi biryi ato eboka arukmou ba, er Abraham biryi sun Kasdim nang mutuk si Mesopotamia aryi anaboka Haran mutuk bina kuramwe. Bina kuramwe ani, nun abwe er nai dibmou ura, Er Imtamnyi biryi nun abwe bisi a mutuk ara nun ukuryok tuba kuramib mutuk bobinmou. 5Bobinmou bok, Er Imtamnyi biryi nun abwe bisi mitik mutuk mitik wa ababyi kum karebmou. Kum karebmou bok, Er Imtamnyi biryi nun abwe bisi ato ebdeibmou,

‘Aminda aryi kanci deibminyi mi aryi odei-odei binkwaming nang asi Niryi a mutuk karebkwan.’ (Kejadian 17:8)

Er Imtamnyi biryi ato ebdeibmou bok, nun abwe Abraham mi kumnyi tuba kuramwe. 6Ebmou cok, Er Imtamnyi biryi nun abwe bisi ato ebmou,

‘Kanci yaldakwandim nang ara yuk mutuk yuryibindoka tingyangana nang ato o kubkwaming. O mutuk tuba kubingiryok, sunda o mutuk nang asi arungna nang kubkwaming. Kubkwaming ba, kwalina empat ratus baryi bisibde bok, sun o mutuk nang aryi sunsi mambul weik kubdeibkwaming. 7A kan mabwe arukoka mambul weik kubdeibkwaming nang ara Nira Imtamnyi biryi dekoka mambul weik kubdeibkwan. A sirya ura, kan mabwe ara o mutuk aryi anaboka abingiryi, a mutuk yangnyi ura, Nira Imtamnyi si weik ebkwaning.’ (Kejadian 15:13-14)

8Er Imtamnyi biryi nun abwe Abraham bisi ato ebmou cok, Erci ersi ato ebdeibmou. ‘Sal nirya asi den bama sekwandarur. Ara, sunci, “Er Imtamnyi biryi nunsi Er mabwe kibmasir,” tenen den bama sekwandarur.’ Ato eboka Er Imtamnyi biryi nun abwe Abraham bisi ebdeibmou. Ato kuboka er Abraham biryi er mi Ishak deibmou. Deibmou ura, uki inbaryi kubmou ba, er Abraham biryi er Ishak bisi den bama sekmou. Kuramnyi ani, er Ishak biryi er mi Yakub deibmou. Kuramnyi ani, er Yakub biryi nun abwe kisok nang mabwe amolbaryi deibmou.

9Er Yakub biryi nun abwe kisok nang asi deibmou ura, sun kanya aryi sun weit Yusuf bisi yu weik kuramwe. Kuramwe uca, sunci sun weit asi taleboka ninyi ati dekmai ura, Mesir mutuk bobinmai. Bobinmai bok, Er Imtamnyi biryi miliboka er Yusuf ab tonkwa kurandei. 10Kurandei ba, sun ninyi aryi er Yusuf bisi mambul kurdeiriramnyi bok, Er Imtamnyi biryi ersi tuba-tuba lebnin baramwe. Ura, Er Imtamnyi biryi er Yusuf bisi miliramwe ati, sun Mesir nang weik sienyi si Firaun biryi erti, ‘Anyi bira diboka bingnanyi bica, ni kanya teleb kurdeirinanyi,’ tenebmou. Tenebmou ati, er Firaun biryi er Yusuf bisi tikeibmou. Ara, er Firaun biryi er Yusuf bisi, ‘Kanci ni si deib aryi sun Mesir nang asi kalikoka arukdum,’ eboka erci er Yusuf bisi tikeibmou. Tikeibmou cok, er Firaun biryi er Yusuf bisi ato ebtabakmou, ‘Kanci ni ai arungna nang nirya kalikoka arukdum,’ ebmou. 11Kuramnyi ani, kwaning weik atabkalibmou. Ara, Mesir mutuk nirya ab nun mutuk Kanaan ababyi kwaning weik ataramwe uca, ninyi nirya mambul weik kuramnyi. Nun abwe kisok nang ara Kanaan mutuk kuramnyi bok, yina ababyi kum danaramwe. 12Kum danaramwe bok, ninyi aryi er Yakub bisi ato ebmai, ‘Mutuk Mesir aryi gandum du tuba kubmar,’ ebmai. Kekebmou ba, er Yakub biryi nun abwe kisok asi, ‘Ni mabwe o, sunci anaboka Mesir mutuk bimunyi ura, gandum du deksindarur,’ ebmou. Ura, nun abwe kisok nang anaboka Mesir mutuk gandum du dengbinmai ani, tamuryanmai. 13Ani, liki bitinyi dinyi dengbinmai ura, er Yusuf biryi er du weit yabwe asi, ‘Nira Yusuf,’ eboka er baramnyi lak kibdanmou. Ura, sun Mesir nang weik sienyi Firaun bibabyi er Yusuf yala bikmou. 14Er Yusuf bira erdamnyi lak kibdanmou ura, erci, ‘Ni nai Yakub bisi bimunyi ura, er ab er mabwe silib nirya ab ara ninyi tujuh puluh lima baryi nirya ni dam yanung,’ ebmou. 15Ebmou ura, er Yakub ab er mabwe silib ab Kanaan mutuk aryi kuboka Mesir mutuk yuryibina kuramnyi. Kuramnyi ani, er Yakub sirya dibmou. Ura, er mabwe nun abwe kisok nang ababyi Mesir mutuk kuramnyi ani, dibmai. 16Er Yakub sirya dibmou ura, er tukwi ara Kanaan mutuk bobindoka Sikhem atei dam asi keil umbura dongobmai. A dongobmai keil dam ara minob ura nun abwe Abraham biryi dekamwe. Ara, erci sun Sikhem atei kuramnyi Hemor mabwe asi dengna weik dinyi si perak kareboka a keil dam minob dekamwe.

17Nun abwe kisok nang dibmai ura, kuramnyi ani, Er Imtamnyi biryi, ‘Niryi er Abraham bisi diboka ebdeianse to, Niryi er yaldakamwe nang asi mutuk Kanaan karebkwan,’ tenebmou. Tenebmou cok, Erci a dinyi kunubkwamwe talak dam kubmou bok, sun Israel yala nang Mesir mutuk tuba kuramiryok, mi yaldakoka baramnyi uca, ninyi mitik kum kuramnyi. 18Kuramnyi ani, ninyi tentoknyi bira er Yusuf biti walwalnyi bisi tikeibmai ura, erci sun Mesir nang asi kalikoka arungnamwe. 19A weik sienyi bira amuma eramuryok, nun abwe yabwe asi malyi kubdeibmou. Ara, erci ato eboka arukmou, ‘Sun ukuryok deirin mabwe dibkwaming ati, bai donokdarur,’ eboka arukmou. 20A kuramnyi talak aryi, er Musa bisi deibmarei. Er Musa bira nong urasin iya teleb mi kuamwe. Kuramwe bok, er nai ab er kwin ab ersi bai kum donokmarei. Eda, wala winiryi bisiamwe bok, er nai er kwin ab tonkwa kuramiryok, sunci er Musa bisi mum diniboka kalingnandei. 21Kalingnandei ani, sun mi asi baitam deirirbinmarei. Deirirbinmarei ura, sun Mesir nang weik sienyi er nebnyi aryi a mi eibmou. Eibmou ura, erci er Musa bisi er mi kibdobmou. 22Kibdobmou ura, er Musa nebmou ura, sun Mesir nang aryi sun bikdob dinyi nirya er Musa bisi etereramnyi. Er Musa bira uram sisingna bingnamunyi ton ukuna deyoknyi kuramwe.

23Ura, kwalina empat puluh baryi sirya bisibmou ura, er Musa biryi er kanya dam aryi, ‘Ni yala nang ara sun Israel yala nang asi dirbinkun,’ tenebmou. 24Dirbinmou ura, Mesir nang tentok aryi Israel yala nang tentok asi malyi kuboka obmou asi erci asing eibmou. Asing eibmou ba, er Musa biryi lebmou cok, er Mesirnyi bira mambul kubdeibmunyi bisi dekmouci, dib obmou. 25Ura, Musa er kanya dam aryi, ‘Er Imtamnyi biryi ni biriman aryi sun Israel yala nang lebkwande ati, ni kwit yabwe bikwaning.’ Ato tenebmou bok, sun Israel yala nang aryi a dinyi bingna kum kubmai. 26Mabmai ani, berekwe ura, er kwit yabwe Israel yala nang bitinyi ordanmarei asi asing eibmou. Asing eibmou ba, er Musa biryi, ‘Antanibdeibkun,’ teneboka ato ebmou, ‘Ni kwit yabwe, sun nang susuk ordana mem se!’ 27Ebmou ba, er kwit bisi malyi kubdeibmunyi biryi,

‘Se, unanyi biryi kansi nun sienyi ab wise uram esin deyoknyi ab tikeibmakir do?’ eboka er Musa bisi dokdonokmou.

28Ebmou cok, erci, ‘Kan ambutum aryi Mesir nang obmoumwe to, ukuryok nisi, “Obkun,” tenebmanirim do?’ ebmou. (Keluaran 2:14)

29Ebmou ba, er Musa ilil kuboka bindobmou. Ara, mutuk si Midian bina tingyangananyi kuramwe. Kuramuryok, ner doboka ani, erci mi bitinyi deibmou.

30Ura, kwalina empat puluh baryi sirya bisibmou ani, er Musa Sinai mutuk kon dam ninyi kum kuramnyi mutuk kunmou. Kunmou ba, Er Imtamnyi Uram eryuryangananyi biryi er baramnyi lak kibdandoka er Musa ab ebdanmarei. Ara, tiling co dam ara uk anmou dam aryi Erci Er baramnyi lak kibdanmou. 31Er Musa biryi asing eibmou cok, ‘Nai e, diblilibtinyi,’ teneboka damtoto yanmou ba, Er Imtamnyi biryi ersi ato ebmou.

32‘Nira Imtamnyi bira kan abwe yabwe Abraham ab, Ishak ab, Yakub ab aryi moloraneinyi kunun,’ ebmou.

Er Musa biryi a uram kekebmou ura, ilil weik kuboka er asing dina ilil kubmou. 33Ilil kubmou bok, Er Imtamnyi biryi ersi ato ebmou,

‘Kan tikmarim ai ara mem ai kubmar ati, kan yan karuk lobdeibdum ati ebman,’ ebmou. (Keluaran 3:5-6)

34Ebmou cok, Er Imtamnyi biryi er Musa bisi ato ebmou,

‘Ni mabwe Israel yala nang ara Mesir mutuk kuraming bok, ninyi aryi sunsi malyi kurdeiriraming asi Niryi diboka asing eiriranse. Tonda, sunci, “Nun kanya mambul weik,” en uram asi Niryi kekeranse. Ati, Niryi, “Ni mabwe asi lebkwansin,” tenen yuryanman. Ati, ukuryok kekebnurum, Niryi kansi Mesir mutuk bokdonokwinkin ati ebman,’ ebmou. (Keluaran 3:7-8)

35Ato eboka Er Imtamnyi biryi er Musa bisi bokdonokmou. Ara, sun Israel yala nang aryi ersi,

‘Unanyi biryi kansi sienyi ab uram wise en deyoknyi tikeibmakir do?’ eamnyi. (Keluaran 2:14)

Ato eboka dokdonokamnyi bok, Er Imtamnyi biryi ersi sienyi ab ninyi lemsinanyi ab tikeiboka bokdonokmou. Ara, Er Imtamnyi biryi Er uram eryuryangananyi bira tiling co aryi kuboka lak kibdamunyi biriman aryi er Musa bisi tikeiboka bokdonokmou. 36Ura, anyi Musa biryi mutuk Mesir bindoka sun Israel yala nang asi lebmouci, mutuk Mesir aryi kuboka bobinmou. Ara, mutuk Mesir dam aryi ilil tenen dinyi kiknibokaburyi, me kwan si Bi me kwan dam aryi ilil tenen dinyi kiknibokaburyi, tonda ilim mutuk ara ninyi kum kuraming mutuk dam aryi ilil tenen dinyi kikniramwe. Ara, kwalina empat puluh baryi asi ninyi kum kuraming mutuk aryi kuramnyi ba, er Musa biryi ilil tenen dinyi kikniboka sunsi bobinmou.

37Anyi Musa biryi sun Israel yala nang asi ato ebmou,

‘Er Imtamnyi biryi Er uram ebdeibmaca bobananyi bisi sunti tikeibkwansir. Ara, sun kwit yabwe kankan aryi kuboka ni tonyi bisi tikeibkwansir,’ ebmou. (Ulangan 18:15)

38Anyi Musa bira Er Imtamnyi kan sun ilim mutuk aryi bulubmai nang kan kuboka ninyi bun kuramwe. Ara, Er Imtamnyi Uram eryuryangananyi bira mutuk kon Sinai aryi kuboka ersi uram ebdeibmou ura, er Musa biryi er uram nun abwe yabwe asi ebmurubmou. Anyi Musa bisi Er Imtamnyi Uram kam kurdeirin uram ebdeibmou.

39Ebdeibmou bok, nun abwe yabwe aryi er Musa bisi kum kekeramiryok, sunci sun kanya dam aryi, ‘Mesir mutuk tamuboka bitibyi,’ teneramnyi. 40Ato teneramiryok, sunci er Harun bisi ato ebmai,

‘Kanci nunsi menekoka bobinkwansing molon dinyi kiknibdeibsurum. Anyi Musa bira nunsi mutuk Mesir aryi kuboka boyanansunyi bisi una kubmar do? nun walwal,’ ebmai. (Keluaran 32:1,23)

41Ato ebmai talak aryi sunci sapi mi asi kikniboka sun dama deiboka kwemdeina molobmai. Sirya kiknibmai ura, sun kanya kilkil kubmou. 42Kubmou bok, Er Imtamnyi biryi, ‘Ni li,’ teneboka sunsi taklobmou. Taklobmou cok, Er Imtamnyi biryi, ‘Sun kanya aryi kwemdeina molobkwaming,’ teneramwe ba, sun Israel yala nang aryi sun imtam aryi kuboka kurya ati, ‘Nun kwemdeina molon dinyi,’ tenen moloramnyi. Ara, sun Er Imtamnyi Uram ebdeibmaci to lak etereramnyi nang aryi kerek sengna umbura sekmai to, kuramwe. Er Imtamnyi biryi ato ebmou,

‘Sun Israel yala nang se, sunda kwalina empat puluh baryi asi ilim mutuk aryi kurandau bok, domba ton sapi ton asi oboka dama deiriranindau bok, Nisi dama kum deiriranindau.

43Keis ol ai molon ai borandau bok, Ni molon ai asi kum borandau, erda kwemdeina si Molokh molon ai borandau. Tonda, kurya kwemdeina si Refan borandau sun kiknin dinyi asi molobkwamib tenen borandau. A deyok aryi, Niryi sunsi dam kum mutuk si Babel deici tam yakdonokwansin,’ ebmou. (Amos 5:25-27)

44Ato eboka Er Imtamnyi Uram ermururamnyi nang aryi kerek sengna umbura sekmai. Keis ol ai si Kemah Suci ai ara Er Imtamnyi biryi Er baramnyi lak kimdaramwe ai ara nun abwe yabwe aryi dobmai. Ara, ilim mutuk kuramnyi bok, Er Imtamnyi biryi er Musa bisi kiklina etereboka, ‘A asing eibmarim kiklina ato kiknibdarur,’ ebdeibmou ura, nun abwe yabwe aryi Er Imtamnyi biryi Er baramnyi lak kimdaramwe aling ai asi dobmai. 45Akaling ai ara nun abwe yabwe asi sun abwe yabwe aryi kuboka dobdobmai ura, Kanaan mutuk boyanmai. Ara, er Yosua biryi sunsi menengnamwe bok, Er Imtamnyi biryi sun yuk yala nang asi yangdonongnamwe bok, Kanaan mutuk wengbinmai ba, akaling ai bowengyanmai. Bowengyanmai ani, er sienyi Daud kalingnamwe ba, akaling ai ara Er Imtamnyi biryi Er baramnyi lak kimdaramwe ai tuba kuamwe. 46Anyi Daud bira Er Imtamnyi biryi, ‘Ni kanya teleb kurdeirinanyi,’ teneramunyi kuramwe. Kuramuryok, erci, ‘Er Imtamnyi bira nun abwe Yakub moloramunyi bisi molon ai dobtinyi,’ tenebmou. 47Teneramwe ura, er mi Salomo biryi Er Imtamnyi bisi molon ai dobmou.

48Dobmou bok, ninyi aryi kiknin ai ara Er Imtamnyi bun sokon kum kurur ati ebman. Er Imtamnyi Uram ebdeibmaca bobananyi biryi a deyok ati ato eteresurur. 49Er Imtamnyi biryi ato ebmar,

‘Im dangna ara Ni bunun sokon kurur. Tukwe dangna ara Ni yan deirin sokon kurur. Ati, unato ai dobmamunyi ura, Nisi kikib kubte do? Isin sebkwan ati, unato ai Nisi kikib kubte do? A dinyi nirya ara Niryok kiknibmase ati ebman.’ (Yesaya 66:1-2)

Ato eboka Er Imtamnyi biryi eteresurur,” ebmou. 50Ebmou cok, er Stefanus biryi er kekenmai nang ara sun Yahudi yala nang asi uram sengkwetena nang asi ato ebmou.

51“Sun Er Imtamnyi Uram kekena, ‘Nun li,’ tenen nang se. Sunci Er Imtamnyi Kanya Roh Kudus asi iya dongdonongdarur. Sun abwe yabwe kuramnyi to, sunbabyi neiktoto kundarur. 52Sun abwe yabwe aryi sun Er Imtamnyi Uram ebdeibmaci to lak etereramnyi nang nirya ati, ‘Obtibyi,’ tenen domyangaramnyi. Tonda, sun, ‘Er Iya Telebnyi yankwande,’ eramnyi nang asi oramnyi. Ura, ukuryok ara sunci Er yankwamwe Iya Telebnyi bisi kikibmandauci, ninyi on nang kibmandau. 53Sunda Er Imtamnyi ebdeibsou uram eryuryangan nang biriman aryi dobdobmandau bok, sunci a uram asi kekena kum kurandum,” Stefanus biryi ebmou.

Er Stefanus bisi keil aryi yongobdongobmai uram

7:54–8:1a

54Er Stefanus biryi ato ebmou bok, sun Yahudi yala nang uram sengkwetena nang ara sun kanya yu weik kubmou. 55Yu weik kubmou bok, er Stefanus bira Er Imtamnyi Kanya Roh Kudus langkibmounyi biryi imtam dibwelebmou. Dibwelebmou cok, erci Er Imtamnyi milil ab Er imtam welebinmounyi Yesus bira Er Imtamnyi siriktam tikmounyi ab asi asing eibmou. 56Asing eibmou ba, erci ato ebmou, “Nai e, imtam umbura dinyi asing eibman. Ninyi Daunyi bisi asing eibman. Erda Er Imtamnyi siriktam tingdur ati ebman,” ebmou. 57Er Stefanus biryi ato ebmou bok, sun Israel yala nang asi uram sengkwetena nang aryi, “A uram kekena nun li,” tenen uram weik doboka sun o kinikmai. Ura, sun nirya aryi er Stefanus dam cung binmai. 58Ura, sunci ersi taleboka ai aryi kuboka yakdonokmai cok, keil aryi yongobdongobnin banmai. Sun tatab-tatab ebmai nang aryi er Stefanus bisi keil aryi kum yongobdongobnin banmai cok, sunci sun alib ongon aling kwiribloboka kamnyi tentok si Saulus bisi, “Nun alib ongon aling asi kaliksurum,” eboka deiblobmai. 59Ura, sunci er Stefanus bisi keil aryi yongobdongobmai bok, er Stefanus biryi naboka, “Yesus ni Du, ni dibkun ati, Kanci ni kanya dobnurum!” ebmou. 60Ebmou cok, er Stefanus biryi er kutam ikoka uram weikanun eboka, “Nai o, a nang ara nisi malyi kuboka obmaning bok, Kanci sun malyi kun dinyi kilibdum.” Ato eboka er Stefanus dibmou.

Currently Selected:

Kisah Para Rasul Uram 7: MTG

Highlight

Copy