Rom 4

Uure Oto I Aehotalana Taꞌe Hiiwalaimolinge Mola Ni E Neꞌie Taꞌa-taꞌa Tala Takoie Oodataꞌinge

1?Haꞌalaa e ue aana tohungana oto weuwemami mo Jiu, a Ebraham? 2Mala uri a God ko unue uri a Ebraham e neꞌi iinoni oodotaꞌi i tehulaꞌana mo esunge diana e asuiꞌi, nge a Ebraham e toꞌo aana mei ola ni toohaꞌinie haahie. !Taꞌe haꞌike! E saꞌa toohaꞌinie ike i maana God 3aana mo Uusu-uusu Maaꞌi e unue uuri, A Ebraham e hiiwalaimoli aana God, na aena urinena nge e neꞌi iinoni oodotaꞌi i maana a God. Jenesis 15:6 Oto kolu leesie uri oodotaꞌinge mei niinge a God, na nga mei ola mola hunie mwala ke tarie aana asunge ikire haꞌike.

4Ne ke haꞌamalaa aana mwane nge ko esu huni toꞌoha. Maholo a mwaena ko esu mango, nge poro paine ingeie ke si waaie haahie nga taa e asuie ngeena. Na waaite nge a mwaena ko terie, e kaꞌa hele aana ike mala uri nga niinge mola mwaakule hunie, taꞌe ko hele mei toꞌoha mola haahie nga taa e asuie ni ngeena. 5Nge e urine loꞌu aana iiꞌonga mala iinoni oodotaꞌi i maana God, aana mei olana e kaꞌa neꞌie ike mei ola nge mwala kire sai terie aana asunge diana ikire, taꞌe mei niinge a God mola hunie mo iini kire hiiwalaimoli aana. Na maꞌalana ikire nga mo iinoni aaela oto uri taa, taꞌe aana hiiwalaimolinge ikire mone, nge a God ko niie oodotaꞌinge ingeie hunire. 6Taꞌa-taꞌa mei ola ngeena a Deved Inemauri e ere i sulie kaꞌu noꞌone. Aana e ere i sulie haꞌadianaꞌanga a God hunie mwala maholo e niie oodotaꞌinge ingeie hunire, maꞌalana kire kaꞌa asuie ike nga mei ola hunie kire ke malisine haꞌadianaꞌanga ngeena. 7Aana a Deved e teꞌuri,

Mwala nge a God e saeꞌaasie oto mo takalonga ikire,

na e haꞌamangoa oto mo oorahaꞌaanga ikire,

kire kei ilenimwaꞌe oto liutaa.

8 Na iinoni nge a God e pulongosie oto mo roroꞌanga ingeie,

kei tohungei ilenimwaꞌe. Sam 32:1-2

9?Oto e ue aana tolahai ilenimwaꞌenga ngeena? ?Uri ilenimwaꞌenga ngeena mei ola mola hunire mo iini nge kire hele aana torihesiꞌonga? !Haꞌike! Taꞌe mei ola oto hunie ahutana mwala, maꞌalana kire hele aana torihesiꞌonga wa haꞌike. Kolu sai ere urine aana kolu leesie oto Uusu-uusu Maaꞌi nge e unue uuri, A Ebraham e hiiwalaimoli aana God, na aena urinena nge e neꞌie iinoni oodotaꞌi i maana a God. Jenesis 15:6 10?Na maholo uri taa ni a God e ere urine? ?Uri a God e ere urine oto wau i naꞌona a Ebraham e hele aana torihesiꞌonga, wa taane mai purine e torihesiꞌo? A God e ere urine maholo a Ebraham e kaꞌa hele aana ue torihesiꞌonga. 11Iau, maholo na a Ebraham e kaꞌa hele aana ue torihesiꞌonga, e hiiwalaimoli oto aana God, nge a God e si niie oodotaꞌinge ingeie maraana hunie. Na aana mo helisi loꞌu mei puri, nge a Ebraham e si hele aana loꞌu torihesiꞌonga mala haꞌa-ara aana uri a God e unue oto uri ingeie nga iinoni oodotaꞌi. Aena urinena nge a Ebraham domana oto tohungei aamana ahutana mwala kire hiiwalaimoli aana God, na aena hiiwalaimolinge ikire, nge kire neꞌi iinoni oodotaꞌi i maana God maꞌalana kire kaꞌa hele aana ike torihesiꞌonga. 12A Ebraham ingeie oto tohungei aamameelu mo iini nge melu hele aana oto torihesiꞌonga na melu hiiwalaimoli noꞌone aana God aana taꞌa-taꞌa hiiwalaimolinge nge e toꞌo aana maholo na e kaꞌa hele aana ue torihesiꞌonga.

Haiholotaꞌinge A God Ola Nana Kira Hiiwalaimoli

13A God e haiholotaꞌinie hunie a Ebraham na mo weuwana mai puri uri kei niie walumalau nada. Taꞌe e kaꞌa asuie ike leune urine i tehulaꞌana a Ebraham e lulu i sulie mo Haꞌatolanga. !Haꞌike! Taꞌe e asuie mola aena aana a Ebraham e toꞌo aana oodotaꞌinge nge niilana ko lae hunie mo iini kire hiiwalaimoli aana God. 14Mala uri a God ke niie mei heiholotaꞌinge ngeena mola hunie mwala nge kire ko lulu i sulie mo Haꞌatolanga, haꞌalaa hiiwalaimolinge aana a God ngeena mei ola mwaakule mola eena. Na mala uri ke urine oto, haꞌalaa haiholotaꞌinge ngeena e neꞌi ola mwaakule noꞌone. 15Iau, mala ko urine, e neꞌi ola mwaakule mola ni ngeena, aena aana mo Haꞌatolanga ko si da a God ko haataꞌinie saewasunge ingeie, aana mwala ko deu huꞌisie mo Haꞌatolanga ngeena mola tarau. Taꞌe mala uri nga mo Haꞌatolanga ke suꞌuri iiꞌo loꞌu, haꞌalaa nga iini hunie ke dau huꞌisie haꞌatolanga haꞌike noꞌone.

16Aena mei olana nge haiholotaꞌinge ngeena mei ola mola i sulie hiiwalaimolinge. A God e asuie oto urine, uri hunie haiholotaꞌinge ngeena ke neꞌi niinge oto mola mwaakule, na e sai hule aana ahutana mo weuwana Ebraham mai puri. E kaꞌa ola ike mola ikire mwala ko lulu i sulie mo Haꞌatolanga a Mosis, taꞌe e neꞌie oto mei ola hunie ahutana mwala e hiiwalaimoli aana God mala a Ebraham e hiiwalaimoli aana. Aana ingeie oto weuwana ahutaka nge kie hiiwalaimoli aana a God, 17mala a God e unue i sulie a Ebraham i laona mo Uusu-uusu Maaꞌi uuri, Nou lio hilisiꞌo oto hunie o ke neꞌi aamana mo komu ni iinoni oto hunge. Jenesis 17:5 Oto i sulie haiholotaꞌinge ingeie mone, a God e lio saie oto a Ebraham mala weuwaka. Na a Ebraham e hiiwalaimoli aana haiholotaꞌinge a God, aena aana ingeie oto God nge e sai niie maurihe hunie mo iini e mae oto, na e sai haꞌaholaa loꞌu taꞌena nga ola haalu nge kire kaꞌa iiꞌo ue mai laona walumalau. 18A Ebraham e lae mola peꞌi hiiwalaimoli aana a God na peꞌie norutoꞌonga aana huni esuie nga taa e haiholotaꞌinie, maꞌalana mei olana ke lio aasa loꞌu hunie ke oa. Aena mei olana, nge a God e lio hilisie a Ebraham hunie ke neꞌie aamana mo komu ni iinoni hunge oto mala mo Uusu-uusu Maaꞌi e unue uuri, Mwala aana komu ni iinoni iꞌoe kire kei hunge mala heeꞌune salo. Jenesis 15:5 19A Ebraham karaꞌinie oto tangalai helisi kei ehu aana na sapena kaꞌa aꞌailaꞌa oto. Na a Sera huꞌe ingeie, e amara mola. Maꞌalana e urine oto mola, a Ebraham e kaꞌa mamaelaꞌa ike aana hiiwalaimolinge ingeie. 20Maholo ko loꞌongaꞌinie haiholotaꞌinge a God, e kaꞌa neꞌisae rue-ruaꞌa ike loꞌu aana, taꞌe ko si hiiwalaimoli ngei-ngedi mola peꞌie paalahelana a God. 21Aana e sai diana aana mola uri a God kei haꞌa-oaie haiholotaꞌinge ingeie. 22Aena urinena nge e neꞌie iinoni oodotaꞌi i maana a God. Jenesis 15:6 23Na mei wala uuri, “e neꞌie iinoni oodotaꞌi i maana a God” e kaꞌa loꞌongaꞌinie ike mola taꞌe a Ebraham maraana, 24taꞌe walaimolinge aana e aaluhikie noꞌone. Aana mei wala ienini ko peꞌikie, mo iini kie hiiwalaimoli aana God nge e taꞌelaꞌinie a Jisas Aalaha ikie mwaanie maenga, hunie kie ke sai diana aana uri ikie noꞌone kie sai neꞌie iinoni oodotaꞌi i maana God i tehulaꞌana hiiwalaimolinge ikie. 25Iau, a God e niie mai a Jisas uri hunie ke mae honotana mo oorahaꞌaanga ikie, oto e taꞌe aalihoꞌi aana loꞌu uri hunie kie ke neꞌie iinoni oodotaꞌi i maana.

Currently Selected:

Rom 4: apbNT

Highlight

Copy