Marcos 7

Ti nkehe nchekji̱ta̱ a̱sén chojni

(Mt. 15:1-20)

1A̱ndá iso ti sin fariseo la ko ti sin tjako ley kui̱xi̱n sin Jerusalén mé kóchjinehe sin Jesús. 2Ndá ti kꞌuíkon sin kixin iso ti sin kꞌuájiko chꞌin Jesús mé kꞌóntihya sin itja sin ti ó kjónie sin, la kjuankíxin kjonta sin. 3(Kixin ti sin fariseo la ko kaín ti sin judío mé chréhe̱ sin ti nkehe kꞌuékinkáchónki ti sin táda ósé kixin tꞌónti sin itja sin ndá inie sin, ti náhí, la niehña sin, 4Ti ó kja̱nxi̱n sin ndasin la tꞌónti sin itja sin ndá inie sin. La ko kja̱xin itsjé íso nkehe tinkáchónki sin, éxi tjo̱nimá sin ti vaso tꞌiyá sin nkehe la ko ti nchísén la ko ti ichi̱ chjáña nkehe inie sin la ko nchetjóá sin ti nkehe tꞌajuatákꞌá sin.) 5Mé xi̱kaha ti sin fariseo la ko ti sin tjako ley mé kjuanchankíhi sin ti chꞌin Jesús:

―¿Nkekuènté ti sin xriko̱a la nchexiteyáhya sin ti nkehe tinkáchónki ti sin táda? Kixin tꞌóntihya sin itja sin ti ó inie sin.

6 # Is. 29:13. *Ndá kjuáte̱he chꞌin Jesús ndáchro:

―Jahara nkojinxónhña tjénka̱yáxinra, ndoá tsíndáchro chꞌin Isaías ti ó tsíkjin chꞌan ósé ndáchro:

Ti chojni i, la irꞌua sin ó ndáchro kixin xraxinkakonxín sin ti janhan,

kjánchó ti a̱sén sin la ikjín tjejó.

7Kixin ó chónkó tjikosáyehe sin ti janhan,

kixin jehó tjako sin ti nkehe tsíkꞌe̱to̱an chojni ó.

8Kixin kui̱to̱héra ti nkehe tsíkꞌe̱to̱an Díos, ndá chréhéra ti nkehe tinkáchónki chojni, la tjo̱ne̱mára ti nchísén, la ko ti vaso tꞌeyara nkehe, la ko kja̱xin íso ti nkehe tinkachónkira.

9Kja̱xin ndáchro chꞌan:

―Jahara chréhéra ti nkehe kꞌuékjako chojni ó, la kui̱to̱héra ti nkehe tsíkꞌe̱to̱an Díos. 10#Ex. 20:12; Dt. 5:16; Ex. 21:17; Lv. 20:9.*Kixin tsíndáchro Moisés: “Tsochontehéra kjuasáye itꞌára la ko ìnára”, la kja̱xin ndáchro: “Ti nkojín nkexro tsꞌándaxínhi̱n itꞌé o̱ ìñé la itsꞌen.” 11A̱ndá jahara ndáchrora kixin ó ncho̱xon kixin ijnko nkexro tsochenka itꞌé la ko ìñé: “I xrokjuahya tsjinki̱tsani ti jaha kixin kaín ti nkehe chóntani mé kꞌóna corbán” (tíhi mé tꞌaxrjexín kixin kaín ti chi̱cha̱ko̱en sin chrókjuinki̱tsaxín sin la tsꞌáyéhe̱ Díos). 12Ndá tjájonra kjuachaxin kixin í tsicháxi̱nhña tsjinki̱tsa sin ti itꞌé sin la ko ti ìñé sin. 13La xi̱kaha ti̱to̱héra ti nkehe tsíkꞌe̱to̱an Díos éxi sínkíhya, la ókjé nkehe tinkachónkira, tinkákánkí íso chojni. La kja̱xin ichꞌera íso nkehe tóyóhe̱ tíha.

14Ndá kꞌuéye̱he̱ chꞌan kaín ti chojni tjejó ntiha, la ndáchro chꞌan:

―Tihínra kaínra ti nkehe tsondáxrja̱n la tiénxinra. 15Ti nkehe inie chojni la jehya ijie̱ tíha. Ti nkehe tꞌaxrjeníxin a̱sén chojni mé ijie̱ tíha la tsoníexín chojni. 16Ti tjinkáonra tsihínra la chrókuihínra jína.

17Ndá ti ó kuíto̱he chꞌan kaín ti sin tsíkóchjina, la kꞌuixenko chꞌan ti sin kꞌuájiko chꞌan ijnko nchia. Ndá kjuanchankíhi sin chꞌan nkehe tꞌaxrjexín ti nkehe kjuako chꞌan. 18Ndá ndáchro chꞌin Jesús:

―¿Á kja̱xinra tiénxinhñara ní? ¿Á noahñara kixin ti nkehe inieni la jehya ijie̱ 19kixin jehya a̱séni sátsji? Ti nkehe inieni la sátji nkaya tse̱eni la ko xíkꞌaxrjexín ti cuerpoéni ínaá.

Mé tꞌaxrjexín kixin kaín ti nkehe inieni la tjóá.

20Ndá ndáchro chꞌin Jesús:

―Ti nkehe tꞌaxrjeníxin a̱sén chojni, tíha ti ijie̱. 21Kixin nkaya a̱sén chojni mé tꞌaxrjexín ti nkehe jínahña tjenka̱yáxin sin, ti tja̱che̱he̱ kícho sin, la ko ti tjinkaon sin tsochónta sin íjnko chojnichjin, jehya ichjién sin, la ko ti tꞌóñá kícho sin, 22ti tseé sin, ti tjakꞌe a̱sén sin ti nkehe chónta íjnko chojni, ti nkehe jínahña chꞌehé sin kícho sin, ti kjuachꞌia, ti nkehe jínahña tjenka̱yáxin sin, ti chji̱no̱xíhin sin, ti kjuachꞌia, ti kjuahnke, la ko ti chóntahya sin kjuaxrexinkaon jína. 23Kaín ti nkehe jínahña tꞌaxrjeníxin a̱sén chojni, mé tíha ti tjasixín sin ijie̱.

Kjuínchekito̱he jína xje̱en ijnko tjan tsikji̱xi̱n ókjé

(Mt. 15:21-28)

24A̱ndá chꞌin Jesús sákjuixin ntiha, la sákjuí chꞌan nó chjasin Tiro la ko Sidón. Ndá kꞌuíxehen chꞌan ijnko nchia kixin tjinkakonhña chꞌan tso̱nohe chojni kixin ntiha itjen chꞌan, kjánchó xitjahya kjuákꞌemá chꞌan. 25Kixin ìñé ijnko tjarisoá chónta ncha̱kuén jínahña mé kuíhin tjan kixin chꞌin Jesús itjen ntiha, ndá tuénxín ikui tjan, kjuákꞌexín tjan tochꞌin tjan ti itjen to̱té chꞌin Jesús. 26La jehe tjan tsíkji̱xi̱n tjan ikjín, chjasén tjan mé Sirofenicia. La jehe tjan ikui tjan chrónoéhe̱ tjan chꞌin Jesús kixin chrókuakitsje chꞌan ti ncha̱kuén jínahña chónta ti xje̱en tjan.

27Kjánchó chꞌin Jesús, ndáchro:

―Tito̱hé senó sinie ti ixjan, kixin jehya jína chrókuakítsja̱ha̱ xjan ti nio̱tja̱ ndá chrótja̱ha̱ ti koni̱a̱ chrókjonie va.

28Ndá jehe tjan kjuáte̱he tjan, ndáchro tjan:

―Chaxín, kjánchó ti koni̱a̱ tjejó chrínkí ti mesa la inie va to̱tꞌo̱ ti nkehe tꞌóxènjin ti chájan.

29Ndá chꞌin Jesús ndáchro:

―Chaxín ndoá ndáchrua. Sátjia kixin ti ncha̱kuén jínahña la ó kjuixin kꞌuaxrjexín ti xja̱an ―ichro chꞌan.

30Ndá ti ó kjuíji tjan ndo̱e tjan, la kꞌuíkon tjan kixin ti xje̱en tjan la ó jína itjen tjan tjetsínkatákꞌá tjan ti cama kixin ó tsíkꞌaxrje ti ncha̱kuén jínahña.

Kuito̱he jína ijnko nkexro tienhña la ko nixjahya

31Ndá chꞌin Jesús kꞌuaxrjexín ti chjasin Tiro la kꞌuatsínka chꞌan ti chjasin Sidón la ko kꞌuatsínka chꞌan Decápolis la kjuíji chꞌan ti nda̱ñao Galilea. 32Ndá kjui̱ka̱o sin ijnko nkexro tienhña la ko nixjahya. Ndá chrónoéhe̱ sin chꞌin Jesús kixin tsjakꞌetja itja ikja ti nkexro a kixin tsito̱he jína. 33Ndá chꞌin Jesús kꞌuaxrjentáko chꞌan jehó ti nkexro tienhña. La ndedo itja chꞌan chrꞌáxehen chꞌan ndatsjon ti nkexro a. La ko ti ndedo itja chꞌan kui̱ki̱te chꞌan nda̱té chꞌan ndá kjuínchekákóxi̱n chꞌan ñejen ti nkexro a. 34Ndá konta chꞌan nka̱jní la kꞌuáváxin chꞌan, la ndáchro:

―Efatá ―mé tíha tꞌaxrjexín: ¡Xitja̱há!

35Ndá tuénxín xitje̱he̱ ndatsjon ti nkexro a, la ko kuito̱he jína ti ñejen chꞌan, ndá jína nixja chꞌan. 36Ndá kꞌue̱to̱an chꞌin Jesús kixin tsochenkahya sin ninkexró, la kjónté xi̱kaha kꞌue̱to̱an chꞌan, la ándo̱sén sin, ícha xrichronka sin. 37La imá chrakon kaín ti chojni, la ndáchro sin:

―Kaín ti nkehe tja̱ko̱xi̱n chꞌan la jína. Ti chojni tienhña la tihin la ko ti chojni nixjahya la nixja.

Currently Selected:

Marcos 7: poeNTplus

Highlight

Copy