Marcos 8

Ti noó mil chojni kjónie

(Mt. 15:32-39)

1Ndá ijnko ña̱o nchónhña chojni kꞌuixikóchjina la chóntahya sin nkehe sinie sin. Ndá chꞌin Jesús kꞌuéye̱he̱ chꞌan ti sin kꞌuájiko chꞌan, la ndáchro chꞌan:

2―Imá ti̱konóa̱ha̱ kaín ti sin i kixin ó iní ña̱o tjejóki̱a̱n sin la kohya nkehe sinie sin. 3La tjinka̱konhña tsétua̱ha̱n sin sátsji sin ndo̱e sin ti na̱xa̱ kjoniehña sin, ti náhí la nti̱a ó tsꞌaniatéxin sin kjinta kixin iso sin la imá ikjín tsíkji̱xi̱n sin.

4Ndá kjuáte̱he ti sin kꞌuájiko chꞌan, ndáchro sin:

―¿Nkexrín chrókónoxín nkehe chrókjonie kaín sin kixin kohya nkehe ti tjejóni?

5Ndá ndáchro chꞌin Jesús:

―¿Nkekja̱ín nio̱tja̱ chontara?

Ndá jehe sin ndáchro sin:

―Yato nio̱tja̱ ó chóntani.

6A̱ndá chꞌin Jesús ndáche kaín sin kixin tsꞌejótja̱xi̱n sin. Ndá kuákja chꞌan ti yato nio̱tja̱ la chjéhe chꞌan kjuasáya Díos ndá kóchrítꞌo̱ chꞌan. La chjéhe chꞌan ti sin kꞌuájiko chꞌan kixin tsꞌóxika sin, tsákja kaín ti sin tjejó ntiha. 7La kja̱xin chónta sin iso koche ntsíntsí, la chjéhe chꞌan kjuasáya Díos la kꞌue̱to̱an chꞌan tsꞌóxika sin ti koche a. 8Ndá kaín chojni kjónie sin la kókje̱he sin. Ndá ti ó kjuixin la xrenájín yato ntaxra ti nkehe to̱tꞌo̱ tsíxehe̱. 9Ti chojni kjónie mé chjina noó mil, ndá chꞌin Jesús nixje̱he̱ chꞌan sin ndá sákjuí sin. 10Ndá kjuixin la kꞌui̱tótjenka̱o chꞌan ti sin kꞌuájiko chꞌan ijnko ntabarco, la sákjuí sin Dalmanuta.

Ti sin fariseo tjanchia sin ijnko kjuaxroan ijié

(Mt. 16:1-4; Lc. 12:54-56)

11 # Mt. 12:38; Lc. 11:16. *Ndá ikui iso ti sin fariseo la jie̱he nixje̱he̱ sin chꞌin Jesús la kjuanchia sin kixin chrókjua̱ko̱xi̱n chꞌan ijnko kjuaxroan ijié kuènté nkaya nka̱jní ndá tsitekaon sin kja̱xin sin. 12#Mt. 12:39; Lc. 11:29.*A̱ndá chꞌin Jesús mé kꞌuáváxin chꞌan, la ndáchro chꞌan:

―¿Nkekuènté kixin ti chojni i la tjanchia sin ijnko kjuaxroan ijié? Chaxín ndáxrja̱n kixin ninkehó kjuaxroan tsjáko̱xi̱nhña ntihi ―ichro chꞌan.

13Ndá kuíto̱he chꞌan ti sin a, la kꞌui̱tꞌótjen chꞌan ti ntabarco a ínaá, la sákjuí chꞌan ti íjnko tóhe nda̱ñao.

Ti nkehe tꞌánkíxin nio̱tja̱ kuènté sin fariseo

(Mt. 16:5-12)

14Ndá ti sin kꞌuájiko chꞌin Jesús la tsíkꞌitjáñehen sin tsíkjikohya sin nkehe sinie sin. Jehó nkoko̱a nio̱tja̱ ó chónta sin nkaxehen ti ntabarco. 15#Lc. 12:1.*Ndá chꞌin Jesús kꞌue̱to̱an ndáchro:

―Tsjehéra jína la chji̱ñéhña chrókuitekáonra ti nkehe nchekꞌánkíxin nio̱tja̱ ti sin fariseo la ko ti nkehe tꞌánkíxin nio̱tja̱ kuènté ti chꞌin Herodes.

16Ndá ti sin kꞌuájiko chꞌan mé ikjo kícho sin:

―¿Á xi̱kaha ichro chꞌan kixin tsíkjikohyani nio̱tja̱?

17Ndá kónohe chꞌin Jesús nkehe ikjo sin kícho sin la ndáchro:

―¿Nkekuènté itjóra kixin chontahyara nio̱tja̱? ¿Á na̱xa̱ tiénxinhñara la ko noahñara ní? ¿Á kaínhña a̱sánra tinkachónkira Díos ní? 18#Jer. 5:21; Ez. 12:2; Mr. 4:12.*¿Á tꞌíkonxínhñara ikonra la ko á tiénxinhñara ndátsjonra?, la ko, ¿á xráxinkákonhñara ní? 19Ti ó kóchrítꞌua̱ ti inꞌó nio̱tja̱ kjónie inꞌó mil chojni la, ¿nkekja̱ín ntaxra kjuénájinra ti to̱tꞌo̱ nio̱tja̱ tsíxehe̱?

Ndá jehe sin, ndáchro sin:

―Teyó ntaxra.

20La ndáchro chꞌin Jesús:

―Ndá ti kóchrítꞌua̱ yato nio̱tja̱ kjónie noó mil chojni la, ¿nkekja̱ín ntaxra kjuénájinra ti to̱tꞌo̱ nio̱tja̱ tsíxehe̱?

Ndá ndáchro sin:

―Yato ntaxra.

21Ndá ndáchro chꞌan:

―¿Ndá nkexrín na̱xa̱ tiénxinhñara?

Chjasin Betsaida kuito̱he jína ijnko nkexro tꞌikonhña

22A̱ndá chrꞌéxi̱n kjuíji sin chjasin Betsaida, la kjui̱ka̱o sin ijnko nkexro tꞌikonhña. La chrónoéhe̱ sin chꞌin Jesús kixin chrókjuinchekito̱he chꞌan jína ti nkexro a. 23Ndá chꞌin Jesús mé itsé chꞌan itja ti nkexro tꞌikonhña, la kꞌuaxrjentáko chꞌan ikon chjasin. Ndá kjuíncheka chꞌan nda̱té chꞌan ikon ti nkexro a la ko kjuakꞌetja tja chꞌan, ndá kjuanchankí chꞌan:

―¿Á ó tꞌíkuan ní?

24Ndá ti nkexro tꞌikonhña la ndáchro:

―Tꞌíkua̱n ti chojni a éxi inta yoa, kjánchó itji sin ―ichro chꞌan.

25Ndá xíkjakꞌetja chꞌan itja chꞌan ínaá ikon ti nkexro a. Ndá ti nkexro a kꞌuíkon jína la kaín ti chojni tjejó ikjín la jína kꞌuíkon chꞌan. 26Ndá kꞌue̱tue̱hen chꞌin Jesús ti nkexro kuékꞌikonhña kixin sátsji ndo̱e, la ndáchro chꞌan:

―Tꞌixe̱nhña ti chjasin la ko ninkexró chenkahya tíhi ―ichro chꞌan.

Pedro chrónka kixin Jesús mé ti Cristo

(Mt. 16:13-20; Lc. 9:18-21)

27A̱ndá chꞌin Jesús la ko ti sin kꞌuájiko chꞌan mé sákjuí sin iso chjasin intsí kuènté Cesarea nonte Filipo. Ndá ti tjejóya sin nti̱a la kjuanchankí chꞌin Jesús ndáchro:

―¿Nkechro chojni kixin nkexro ti janhan?

28 # Mr. 6:14, 15; Lc. 9:7, 8. *Ndá ndáchro sin:

―Iso sin ndáchro kixin jaha mé Juan Bautista, íso sin la ndáchro kixin jaha mé Elías. A̱ndá íso sin mé ndáchro kixin jaha mé ijnko ti sin kꞌuéchronka itén Díos ósé.

29 # Jn. 6:68, 69. *Ndá kjuanchankí chꞌan, ndáchro chꞌan:

―A̱ndá jahara nkechrora, ¿nkexro ti janhan?

Ndá kjuáte̱he chꞌin Pedro, ndáchro:

―Jaha mé ti Cristo.

30Kjánchó chꞌin Jesús kꞌue̱to̱an chꞌan kixin tsochenkahya sin ninkexroé nkexro ti jehe chꞌan.

Chꞌin Jesús chrónka kixin itsꞌen

(Mt. 16:21-28; Lc. 9:22-27)

31Ndá kjuankíxin kjuako chꞌin Jesús kixin ti Xje̱en Díos kꞌóna Chojni la ticháxi̱n tsjasóte la ko kaín ti sin táda tꞌe̱to̱an ni̱nko la ko ti sin tꞌe̱to̱an kuènté ti sin ncha̱tꞌá la ko ti sin tjako ley mé tsotjinkakonhña sin ti jehe chꞌan. La tsꞌóñá sin ti jehe chꞌan, kjánchó níxin ña̱o la tsoxechón chꞌan ínaá. 32Mé kaín tíha chrónka chꞌan, ndá chꞌin Pedro kuakitsjenta ti chꞌin Jesús la tjinkaon chrókjuenduéhe kixin xi̱kaha ichro chꞌan. 33Ndá kuinkátjíá chꞌin Jesús, komá ti teyó sin. Ndá kjuenduéhe ti chꞌin Pedro, ndáchro:

―¡Sátjixian ntihi, Satanás! Jaha la tjenka̱yáxinhña ti nkehe tjinkaon Díos. Jehó tjénka̱yáxian éxi tjenka̱yáxin chojni ó.

34 # Mt. 10:38; Lc. 14:27. *Ndá kꞌuéye̱he̱ chꞌan ti sin kjueyá chꞌan la ko ti sin tsíkóchjina. Ndá ndáchro chꞌan:

―Ti nkojinra tjinkáonra tsochrehéra ti janhan la ticháxi̱n tsi̱to̱héra kaín ti nkehe tjaké a̱sánra, ndá tsamára ti ntacruz kuèntára, la chréhéra ti janhan. 35#Mt. 10:39; Lc. 17:33; Jn. 12:25.*Kixin kaín ti nkexro tjinkaon sinchekaá a̱sén la tsꞌitjáña. A̱ndá ti nkexro sinchekꞌitjáñaxín a̱sén kixin tinkáchónki ti janhan la ko ti itan tsjajon kjuachón, mé tsaá sin. 36¿Nke tso̱hen chrókjuacha ijnko chojni chróchónta kaín ti nkehe siín chjasintajni, ndá chrókjuinchekꞌitjáña sin ti kjuachón? 37O̱, ¿nkehe chrókjuajon chojni ndá chróchónta ti kjuachón? 38Ti nkojín nkexro tso̱suéhe̱ tinkáchónki ti janhan la ko ti itan kuénta̱na nkayakon ti chojni chónta ijie̱, la kja̱xin ti Xje̱en Díos kꞌóna Chojni mé tso̱suéhe̱ chꞌan tsondáchro chꞌan kixin chóxin chꞌan ti jehe sin ti ó tsokjan chꞌan tsi̱ka̱o chꞌan ti kjuachaxin ijié kuènté Itꞌé chꞌan la ko ti sin ángel.

Currently Selected:

Marcos 8: poeNTplus

Highlight

Copy