Lucas 22
22
Ti kjuénka̱yáxin sin nkexrín tsꞌóñá sin chꞌin Jesús
(Mt. 26:1-5, 14-16; Mr. 14:1-2, 10-11; Jn. 11:45-53)
1 #
Ex. 12:1-27. *Ndá ó kuichjina ti kia inie sin ti nio̱tja̱ tjikohya ti nkehe tꞌánkíxin mé ti kia la nchekꞌin sin Pascua. 2Ndá ti ncha̱tꞌá tꞌe̱to̱an la ko ti sin tjako ley mé kjuénka̱yáxin sin nkexrín chrókꞌóñá sin chꞌin Jesús, kjánchó chráko̱nhe̱n sin ti chojni chjasin ntiha.
3A̱ndá ti Jínahña mé kꞌuíxehen a̱sén Judas Iscariote, ijnko ti teyó sin kꞌuájiko chꞌin Jesús. 4Ti nkexro í mé sákjuitsjehe ti sin ncha̱tꞌá tꞌe̱to̱an la ko ti sin tꞌe̱to̱an kuènté ni̱nko, la ikjo chꞌan sin nkexrín tsjajon chꞌan ti chꞌin Jesús. 5Ndá ti sin tꞌe̱to̱an la kóchéhe̱ sin la ndáchro sin kixin tsjajon sin itsjé chichaon. 6Ndá kjuáte̱he chꞌan ti nkehe ndáchro sin, ndá kjueyá chꞌan nkexrín tsjajon chꞌan ti chꞌin Jesús ti kohya chojni.
Ti kjuixixín kjonieko sin chꞌin Jesús
(Mt. 26:17-29; Mr. 14:12-25; Jn. 13:21-30; 1Co. 11:23-26)
7Ndá ikui ti ña̱o kia sinie sin ti nio̱tja̱ tjikohya ti nkehe tꞌánkíxin, ndá ticháxi̱n tꞌóñá sin ti kolélo sinie sin kuènté ti kia Pascua. 8Ndá chꞌin Jesús kꞌue̱tue̱hen chꞌin Pedro la ko Juan kixin sátsji sin sincheyaxín sin ti nkehe sinie sin ti kia Pascua. 9Ndá jehe sin kjuanchankí sin:
―¿Nketí tjinkaoan sincheyaxíxini? ―ichro sin.
10Ndá kjuáte̱he chꞌin Jesús ndáchro:
―Ti ó tsꞌixe̱hénra Jerusalén la tsoxétara ijnko chojnindoa yámá ijnko tóa tjiá ìnta̱. Chréhéra ti nkexro a ti nchia tsꞌixehen chꞌan. 11Ndá ndáchera ìnché ti nchia: “Ndáchro ti Maestro: ¿Nketí itjen ti cuarto tsjánjua kjuachaxin tso̱yaxíxin ti kia Pascua sinieko chꞌan ti sin teyó xriko chꞌan?” 12Ndá ti nkexro a la tsja̱kao̱hara ijnko cuarto ijié ti yaáxin piso la ntiha siín kaín ti nkehe tsicháxi̱n, la ntiha ncheyáxixínra ti sinieni tso̱jín ―ichro chꞌin Jesús.
13A̱ndá jehe sin la sákjuí sin la kꞌuitja sin kaín nkehe éxi tsíchronka chꞌin Jesús. Ndá ntiha kjuíncheyáxixín sin ti nkehe sinie sin ti kia Pascua.
14A̱ndá ikui ti hora, ndá chꞌin Jesús la ko ti sin kꞌuájiko chꞌan kjuíji sin ntiha la kꞌuejótja̱xi̱n sin ti itjen mesa. 15Ndá ndáchro chꞌin Jesús:
―Imá tjínka̱oan kixin chrókjonieni ti ña̱o Pascua i ti na̱xa̱ tsꞌénhña janhan. 16Ndáxrja̱n kixin í sinie̱hña xi̱kihi ti kia Pascua ínaá ti na̱xa̱ tsoxiteyáhya ti itsi ti kjuachaxin kuènté Díos.
17Ndá kuákja chꞌin Jesús ti nkehe tjiá ìnté ito uva ndá chjéhe chꞌan kjuasáya Díos la ndáchro chꞌan:
―Tákjára tíhi la itꞌira kaínra 18kixin janhan la í tsꞌihya ti ìnté to uva i hasta tsijia ti kjuachaxin tꞌe̱to̱axín Díos.
19Ndá kjuixin la kuákja chꞌan ti nio̱tja̱ ndá chjéhe chꞌan kjuasáya Díos, ndá kóchrítꞌo̱ chꞌan chjéhe chꞌan ti jehe sin la ndáchro chꞌan:
―Tíhi mé ti cuerpo kuénta̱na tsꞌenyákohe̱n ti jahara. Méxra̱ xi̱kaha ichꞌera xráxinkákonxínra ti janhan ―ichro chꞌin Jesús.
20 #
Jer. 31:31-34. *La kja̱xin ti ó kjuixin kjónie sin la kuákja chꞌan ti nkehe tjiá ìnté ito uva la ndáchro chꞌan:
―Ti nkehe tjetjiá ti vaso í mé chrónkaxín ti nkehe ni̱xin tso̱hen tsoxiteyá kixin ti ijni̱ kuénta̱na tsꞌitjí tso̱tjuáxin ti iji̱ára.
21 #
Sal. 41:9. *’Kjánchó ti nkexro sinchekjina mé itjen ti mé í kja̱xin. 22Chaxín ndáxrja̱n kixin ti Xje̱en Díos kꞌóna Chojni la itsꞌen éxi tjenixín ti xroon; kjánchó nóa ti chojni sinchekji ti jehe chꞌan kixin imá tsjasóte.
23A̱ndá jehe sin kjuankíxin tjanchankíhi kícho sin, ndáchro sin:
―¿Xá nkexro sinchekji ti jehe chꞌan?
Ti nkexro imá tꞌe̱to̱an
24 #
Mt. 18:1; Mr. 9:34; Lc. 9:46. *Ndá kja̱xin ikjo kícho sin kixin nkexro ti a̱ntsí tjetoan. 25Kjánchó chꞌin Jesús ndáchro:
―Ti sin rey kuènté ti nación la imá tꞌe̱tue̱hen sin ti chojni. La ti chojni tꞌítuehen la ndáchro sin kixin ti sin tꞌe̱to̱an la chojni chaxín ichꞌe ixra̱ jína. 26#Mt. 23:11; Mr. 9:35.#Mt. 20:25-27; Mr. 10:42-44.*A̱ndá jahara xi̱kahña chrókjui̱chꞌera. Ícha jína ti nkexro imá tjetoan la chrókꞌóna éxi ti nkexro tꞌítuehen, a̱ndá ti nkexro tꞌe̱to̱an mé chrókꞌóna éxi ti nkexro chꞌexón ixra̱. 27#Jn. 13:12-15.*¿Xá nkexro ti a̱ntsí tjetoan, á ti nkexro tjakꞌetja̱xi̱n ti itjen mesa sinie ní, o̱ ti nkexro tjajon ti nkehe sinie ti nkexro tjetja̱xi̱n? ¿Á jehya ti nkexro tjetja̱xi̱n ti itjen mesa, ti a̱ntsí tjetoan ní? A̱ndá janhan itjén ntihi éxi ijnko nkexro chꞌexón ixra̱.
28’La jahara nkochríxín kꞌuejontaxínra kꞌuíkonra kaín ti nkehe náxrjónhña kóna. 29Méxra̱ janhan tsjánjua kjuachaxin kixin tséto̱anra, éxi janhan kjuajon Tꞌaná kjuachaxin této̱an 30#Mt. 19:28.*kixin sintera la ko itsꞌira ti tsjakꞌe ti mesa kuénta̱na ti ó tséto̱an janhan nkaya nka̱jní la ko si̱nchekito̱exínra iji̱é kaín ti sin kꞌuaxrjeníxin ti teyó tribu kuènté Israel.
Chꞌin Pedro sinchemá kixin chóxin chꞌin Jesús
(Mt. 26:31-35; Mr. 14:27-31; Jn. 13:36-38)
31Ndá ndáchro Ìnchéni:
―Simón, Simón, chrókónoha kixin ti Jínahña kjuanchia kixin chrókꞌótsjéyehe ti jahara éxi noatrigo. 32Kjánchó janhan xrja̱noáhá Tꞌaná kixin chrókui̱toéhya ti titekaoan ti janhan. A̱ndá jaha, kjónté tsjásian ijie̱, ndá tsokjan la tsinki̱tsa ti sin kichuara kixin jína tsꞌejó sin ―ichro chꞌin Jesús.
33A̱ndá chꞌin Pedro ndáchro:
―Ìnchéni, ti ticháxi̱n sátsjini tsjakꞌechjinakoni ti jaha la sátsjini, la jehya jehó ti tsjakꞌechjina ó kja̱xin tsꞌenkoni ti jaha.
34A̱ndá kjuáte̱he chꞌin Jesús ndáchro:
―Pedro, ndáxrja̱n kixin ijie na̱xa̱ tsjehya kochi̱ntóla la jaha si̱nchemá iní vece kixin choxián ti janhan.
Kuichjina ti hora tsjasóte chꞌin Jesús
35 #
Mt. 10:9, 10; Mr. 6:8, 9; Lc. 9:3; 10:4. *Ndá chꞌin Jesús kjuanchankí ndáchro:
―Ti ó kuétua̱hanra sákjuíra kjuíkoáhyara kabolsa la ko kjuíkoáhyara ti nkehe tꞌinka chichaon la ko kjuíkoáhyara to̱ka̱te̱ la, ¿á kꞌuitjáña ichrén nkehe ní?
Ndá kjuáte̱he sin ndáchro sin:
―Náhí. Ninkehó nkehe.
36Ndá ndáchro chꞌin Jesús:
―A̱ndá ijie la ti nkexro chónta kabolsa la tsákja la ko kja̱xin ti nkehe tꞌinka chichaon la ko ti nkexro chóntahya espada la chrókjuinchekji ti ika tꞌitsáte ndá chrókꞌue̱naxín ijnko chika. 37#Is. 53:12.*Chaxín ndáxrja̱n kixin ticháxi̱n tsoxiteyá tso̱na kaín ti nkehe éxi tjenixín ti xroon itén Díos ndáchro: “Éxi ijnko chojni kjuasin ijie̱ mé xi̱kaha tsꞌikon sin ti nkexro a.” Mé xi̱kaha kaín nkehe chronka xroon itén Díos la ticháxi̱n tso̱na, mé ticháxi̱n tsoxiteyá kaín tíha ―ichro chꞌin Jesús.
38Ndá jehe sin ndáchro sin:
―Ìnchéni, ntihi tjejó yaá espada.
Ndá chꞌin Jesús ndáchro:
―Táhó ó ncho̱xon.
Chꞌin Jesús nixje̱xín Díos ti Huerto Getsemaní
(Mt. 26:36-46; Mr. 14:32-42)
39Ndá chꞌin Jesús sákjuixin chꞌan Jerusalén la sákjui̱ chꞌan ti ijna̱ Olivo éxi kuéhen kꞌuékjichꞌe chꞌan la koí ti sin kꞌuájiko chꞌan tinkáchréhe̱ sin. 40Ndá ti ó kjuíji sin ntiha la ndáchro chꞌin Jesús:
―Nixjehéra Díos kixin tsjinki̱tsa ti jahara kixin tsjásinhñara ijie̱.
41Ndá chꞌin Jesús kꞌuaxrjenta, sákjuí éxi kjínxi̱n itꞌeni jnko ixro̱. Ndá kjuákꞌexín chꞌan tochꞌin chꞌan la nixje̱he̱ chꞌan Díos 42la ndáchro chꞌan:
―Itꞌéni, ti tjinkaoni kixin chrókjuìin ti nkehe náxrjónhña tso̱heni, kjánchó jehya éxi jeheni tjinkaoni chrókóheni. Náhí. Éxi tjinkaoan tso̱hen ―ichro chꞌin Jesús.
43Ndá xrína̱hña ikui ijnko ángel kui̱xi̱n nkaya nka̱jní kixin tsjinki̱tsa ti jehe chꞌan. 44Ndá imá kꞌuává chꞌan, la a̱ntsí nixje̱he̱ chꞌan Díos, ndá kꞌuíxin chꞌan nda̱chjin éxi ijni̱ kꞌuitjí nonte.
45Ndá kjuixin nixje̱he̱ chꞌan Díos ndá kꞌuínkatjen chꞌan la sákjuí chꞌan ti tjejó ti sin kꞌuájiko chꞌan, ndá kꞌuíkon kixin ó tjejójua sin, kixin imá tꞌává sin. 46Ndá chꞌin Jesús ndáchro:
―¿Nkekuènté tjejochri̱nra? Tꞌàyara. Nixjehéra Díos kixin tsjínki̱tsa ti jahara kixin tsjachròehyara ti Jínahña.
Itsé sin chꞌin Jesús
(Mt. 26:47-56; Mr. 14:43-50; Jn. 18:2-11)
47Ndá na̱xa̱ tjenixja chꞌin Jesús la ikui nchónhña chojni yámá chika, la ti nkexro itꞌin Judas, ijnko ti teyóxin sin kꞌuájiko chꞌin Jesús, mé tjetaón nti̱a kui, ndá kóchjinehe chꞌin Jesús kixin tsochjéhe jnko kochíto. 48A̱ndá chꞌin Jesús ndáchro:
―Judas, ¿á ijnko kochíto ó si̱nchekjixián ti Xje̱en Díos kꞌóna Chojni?
49Ndá ti sin tjejóko chꞌin Jesús ti ó kꞌuíkon sin kixin xi̱kaha kóhen la kjuanchankí sin:
―Ìnchéni, ¿á tsjajo̱nkoxini espada ní?
50Ndá ijnko ti sin a, la kjuíncheníhi ijnko ti nkexro chꞌehe ixra̱ ti ncha̱tꞌá tꞌe̱to̱an, kóchríjin chꞌan ti ndatsjon chjina.#22:50 chjina derecha, oreja derecha
51Kjánchó chꞌin Jesús ndáchro:
―Táhó, ti̱to̱héra ti nkexro.
Ndá itsé chꞌan ndatsjon ti nkexro a, la kjuínchekito̱he chꞌan jína. 52Ndá tuénxín nixje̱he̱ chꞌin Jesús ti sin ncha̱tꞌá tꞌe̱to̱an la ko ti sin tꞌe̱to̱an kuènté ni̱nko la ko ti sin táda tꞌe̱to̱an tsíki sátsjiko ti jehe chꞌan, ndáchro chꞌan:
―¿Nkekuènté kꞌuinkakoara espada la ko inta éxi chrótse̱ra ijnko xíche̱e? 53#Lc. 19:47; 21:37.*Kaín ña̱o kjuakꞌé ti tjejora kjuáko̱xián ti ni̱nko la tse̱hyara ti janhan. A̱ndá ijie ti hora kuèntára kixin ti kjuachaxin kuènté sítie kjuacha kꞌue̱tue̱hen a̱sánra ―ichro chꞌin Jesús.
Chꞌin Pedro kjuínchemá kixin ndáchro kixin chónhña Jesús
(Mt. 26:57-58, 69-75; Mr. 14:53-54, 66-72; Jn. 18:12-18, 25-27)
54Ndá itsé sin ti chꞌin Jesús kjuínchenteto sin la sákjuíko sin chꞌan ndo̱e ti ncha̱tꞌá tꞌe̱to̱an. A̱ndá chꞌin Pedro mé ikjín tinkáchrèxin chꞌan. 55A̱ndá ti nda̱sin ntiha mé kjuaka sin xrohi chjixro̱exín#22:55 chjixro̱exín calentarse en el fuego sin. A̱ndá chꞌin Pedro kja̱xin kjuákꞌentaxín ti tjejó sin. 56Ndá ijnko chojnichjin chꞌexín ixra̱ kꞌuíkon tjan kixin koí chꞌin Pedro tjechíxro̱he ntiha ndá komá tjan la ndáchro tjan:
―Kja̱xin ti nkexro i xriko ti chꞌin Jesús.
57Ndá chꞌin Pedro kjuínchemá ndáchro:
―¿Nkekuènté xi̱kaha ichrua? Ni chónhña ti nkexro a.
58A̱ndá ntsíkoá chrꞌéxi̱n mé ikui íjnko chojni kꞌuíkon ti chꞌin Pedro la ndáchro:
―Kja̱xin jaha xriko̱a ti nkexro a.
Ndá chꞌin Pedro ndáchro:
―Náhí, xríki̱a̱nhña chꞌan.
59Ndá éxi ijnko hora chrꞌéxi̱n íjnko nkexro chenka ti sin tjejó ntiha:
―Ti nkexro i la kjá chaxín xriko ti chꞌin Jesús kixin tsíkji̱xi̱n chꞌan Galilea.
60Ndá chꞌin Pedro ndáchro:
―Nónahña nkehe ti ndáchrua.
Ndá na̱xa̱ tjenixja chꞌan la itsje jnko kochi̱ntóla. 61Ndá Ìnchéni kuinkátjíá komá ti chꞌin Pedro. Ndá jehe chꞌan xráxinkaon kixin chrónka Ìnchéni: “Ti na̱xa̱ tsotsjehya kochi̱ntóla la si̱nchemána iní vece.” 62Ndá sákjuí chꞌan ndója, la tsjánka chꞌan kixin imá tꞌává chꞌan.
Kjuanoá sin chꞌin Jesús
(Mt. 26:67-68; Mr. 14:65)
63Ti sin sákjuíko chꞌin Jesús la kjuanoá sin chꞌan la ko kjuate sin chꞌan 64la kꞌuekjèxin sin ika ti ikon chꞌan ndá kjuate sin chꞌan la kjuanchankíhi sin chꞌan:
―Tónoha nkexro kjuatia ijie.
65La ko íso nkehe ndáchro sin kꞌuándaxíhi̱n sin chꞌan.
Chꞌin Jesús kjuákꞌe nkayakon ti sin tꞌe̱to̱an
(Mt. 26:59-66; Mr. 14:55-64; Jn. 18:19-24)
66Ndá ti ó kꞌuínkaséña la kónkotsé kaín ti sin táda tꞌe̱tue̱hen ti sin judío, la ko ti ncha̱tꞌá tꞌe̱to̱an, la ko ti sin tjako ley la sákjuíko sin chꞌin Jesús nkayakon ti sin tꞌe̱to̱an. Ndá ntiha kjuanchankíhi sin chꞌan:
67―Chro̱nka, ¿á jaha ti Cristo ní?
Ndá chꞌin Jesús kjuáte̱he:
―Ti tsondáxrja̱n kixin chaxín janhan la tsitekákonhñara. 68A̱ndá ti chrókjuanchankíhara ichrén nkehe la chrókjuáte̱ehyara la ko chrókꞌuatjántahyara ti janhan. 69A̱ndá ijie ti Xje̱en Díos kꞌóna Chojni mé tsjakꞌetja̱xi̱n chꞌan ti itja chjina kuènté Díos chónta kaín kjuachaxin.
70Ndá tuénxín kaín kꞌóyako sin kjuanchankíhi sin:
―¿Á chaxín jaha ti Xje̱en Díos ní?
Ndá chꞌin Jesús ndáchro:
―Ó jahara ndáchrora kixin janhan tíha.
71Ndá ikjo sin kícho sin ndáchro sin:
―¿Nke tso̱hen na̱xa̱ chróchronka íso chojni? Kaíni kuíhini ti nkehe kꞌuaxrjexín irꞌua chꞌan ―ichro sin.
Currently Selected:
Lucas 22: poeNTplus
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
