Lucas 23
23
Sákjuíko sin chꞌin Jesús nkayakon Pilato
(Mt. 27:1-2, 11-14; Mr. 15:1-5; Jn. 18:28-38)
1Ndá kaín sin kꞌuínkatjen sin ndá sákjuíko sin chꞌin Jesús nkayakon Pilato. 2A̱ndá ntiha kjuankíxin sin tꞌeka sin ijie̱ ti jehe chꞌan la ndáchro sin:
―Kꞌuítjani ti nkexro i tjachróe chojni chjaséni la ndáchro chꞌan kixin chrókjue̱nke̱ehyani ti gobierno romano, la ko kja̱xin ndáchro kixin jehe mé ti Cristo, la mé ijnko rey tíha ―ichro sin.
3A̱ndá Pilato kjuanchankíhi chꞌin Jesús ndáchro:
―¿Á jaha ti Rey tꞌe̱tue̱hen ti sin judío a ní? ―ichro Pilato.
Ndá chꞌin Jesús kjuáte̱he ndáchro chꞌan:
―Chaxín xi̱kaha ndáchrua jaha ―ichro chꞌin Jesús.
4A̱ndá Pilato ndáche ti sin ncha̱tꞌá tꞌe̱to̱an la ko ti chojni tsíki̱ka̱o sin:
―Tꞌitjáhya nijnko ijie̱ chónta ti nkexro i.
5A̱ndá jehe sin a̱ntsí itsen nixja sin ndáchro sin:
―Jehe chꞌan tjachróe chꞌan kaín chojni nonte Judea kixin ti nkehe tjako chꞌan. Kjuankíxin kjuako chꞌan nonte Galilea, a̱ndá ijie ó ikui chꞌan ntihi ―ichro sin.
Sákjuíko sin ti chꞌin Jesús nkayakon Herodes
6Ndá kuíhin Pilato xi̱kaha ndáchro sin ndá kjuanchankí chꞌan á ti nkexro i la á Galilea tsíkji̱xi̱n chꞌan. 7Landá kjuáte̱he sin kixin ntiha tsíkji̱xi̱n, ndá kꞌue̱to̱an Pilato kixin sátsjiko sin chꞌin Jesús ti itjen Herodes kixin jehe mé gobernador ti nonte Galilea la kja̱xin chꞌan itjen chjasin Jerusalén ti ña̱o a. 8A̱ndá Herodes kꞌuíkon kixin kjuíji chꞌin Jesús ndá imá kóchéhe̱ kixin ósé tjinkaon chrókꞌuikon chꞌan ti chꞌin Jesús kixin tsíkihin chronka chojni nkexrín tjako Jesús, ndá tjinkaon chrókꞌuikon ijnko kjuaxroan chrókjua̱ko̱xi̱n chꞌin Jesús. 9Nchónhña nkehe kjuanchankíhi Herodes ti nkexro Jesús, kjánchó chꞌin Jesús ninkehó kjuáte̱hya. 10Kja̱xin ntiha kꞌuejó ti sin ncha̱tꞌá tꞌe̱to̱an la ko ti sin maestro tjako ley landá nchónhña ijie̱ kꞌueka sin chꞌin Jesús kixin nínkakohen sin chꞌan.
11A̱ndá Herodes la ko ti sin soldado kuènté kjuankíxin sin kjuikosáyehya sin chꞌin Jesús la ko kjuanoá sin chꞌan, kjuínchekꞌinkáya sin chꞌan ika náxrjón tjete éxi tꞌinkáya ti sin rey. Landá tuénxín Herodes kꞌue̱to̱an kixin sátsjiko sin chꞌin Jesús ínaá ti itjen Pilato. 12A̱ndá ti ña̱o a Pilato la ko Herodes kjuankíxin sin tsꞌiton kícho sin kixin ti senó la kꞌuénínkakohen kícho sin.
Kꞌue̱to̱an sin kixin itsꞌen chꞌin Jesús
(Mt. 27:15-26; Mr. 15:6-15; Jn. 18:39—19:16)
13Landá Pilato kꞌuéye̱he̱ ti ncha̱tꞌá tꞌe̱to̱an la ko ti sin gobernador la ko kaín chojni chjasin ntiha kixin tso̱nkotsé sin 14ndá ndáchro chꞌan:
―Jahara kjuíkoára ti nkexro i ntihi la ndáchrora kixin jehe chꞌan kjuínchekonínkakohen chꞌan chojni chjasin. A̱ndá ó kuihínra kixin janhan kjuánchánkíha̱ chꞌan itsjé nkehe, kjánchó kꞌuitjáhya ninkehó ti ijie̱ tꞌékara chꞌan. 15La ko kja̱xin Herodes kꞌuitjahya ti ijie̱ tꞌékara ti chꞌin Jesús ndá ichrꞌán chꞌan ntihi ínaá. Ndá ijie la ó kꞌuíkonra kixin ninkehó ijie̱ chóntahya ti nkexro i kixin chrókꞌuen. 16Si̱ntakjasóte chꞌan ndá tsjánjua kjuachaxin sátsji ―ichro Pilato.
17A̱ndá ti ña̱o kia a la ticháxi̱n kixin Pilato tsjajon kjuachaxin sátsji ijnko chojni tjechjina kixin xi̱kaha kuéhen sin ósé. 18Ndá kaín sin kjuankíxin sin kꞌóyako sin ndáchro sin:
―¡Ti nkexro la chrókꞌuen! ¡Chꞌin Barrabás mé tꞌa̱tjánta! ―ichro sin.
19A̱ndá ti Barrabás tsíkꞌikjehe̱ kixin jehe chꞌan la ko íso chojni kónínkakohen sin ti chjasin ntiha la ko tsíkꞌóñá chꞌan chojni. 20Landá Pilato tjinkaon chrókjuajon kjuachaxin sáchrokjui chꞌin Jesús. Mé xi̱kaha xíkjanchankíhi chꞌan ti chojni siín ntiha ínaá. 21Kjánchó jehe sin a̱ntsí itsen kꞌóyako sin, ndáchro sin:
―¡Tjakénka̱nira chꞌan ntacruz! ¡Tjakénka̱nira chꞌan ntacruz! ―ichro sin.
22Níxin xíkjanchankí Pilato ndáchro chꞌan:
―¿Xá nkehe nduáhya kjuíchꞌe ti nkexro i? Janhan la kꞌuitjáhya ninkehó ijie̱ chónta chꞌan chrókꞌuenxín chꞌan. Si̱ntakjasóte chꞌan landá chrꞌéxi̱n tsjánjua kjuachaxin sátsji chꞌan ―ichro Pilato.
23Kjánchó jehe sin a̱ntsí itsen kjuanchia sin, ndáchro sin kixin chrókjuakꞌenkáni chꞌin Jesús ntacruz. A̱ndá kꞌóyako sin la ko kꞌóyako ti sin ncha̱tꞌá tꞌe̱to̱an ndá kjuacha sin kjuanchia sin ti nkehe tso̱hen. 24A̱ndá Pilato kjuajon kjuachaxin xi̱kaha tso̱hen ti nkehe kjuanchia sin. 25A̱ndá kjuajon Pilato kjuachaxin sátsji Barrabás éxi kjuanchia sin, mé jehe chꞌan ti nkexro kꞌuikjehe̱ kixin kꞌuékje kjuanínkaon la ko kuékꞌóñá chojni. La kjuajon Pilato kjuachaxin kixin sátsjiko sin ti chꞌin Jesús sinchekjasóte sin éxi tjinkaon sin.
Kjuákꞌenkáni chꞌin Jesús ntacruz
(Mt. 27:32-44; Mr. 15:21-32; Jn. 19:17-27)
26Ndá ti ó sákjuíko sin chꞌin Jesús tsjakꞌenkáni chꞌan ntacruz, ndá itsé sin ijnko nkexro tsíkji̱xi̱n no̱nte̱e itꞌin Simón tsíkji̱xi̱n Cirene, la kjuínchekamá sin ti ntacruz tsjakꞌenkáni chꞌin Jesús la chréhe̱ chꞌan.
27Kja̱xin nchónhña chojnindoa la ko nchónhña chojnichjin chréhe̱ sin tsjánkàma̱ sin chꞌan. 28Ndá chꞌin Jesús nkátjíá komá ti jehe sin kixin tsjánka sin la ndáchro:
―Jahara chojnichjin chjasin Jerusalén, chrótsja̱nkama̱hñara ti janhan. Chrotsja̱nkara kixin ti nkehe tso̱hanra jahara la ko xja̱anra 29kixin itsi ijnko ña̱o tsondáchrora kixin náxrjón chéhe̱ ti sin chóntahya ixjan la ko ti sin kjuínchekokjíehya xjan la ko ti sin kjuínchekakíhya ixjan. 30#Os. 10:8; Ap. 6:16.*Ndá tsjankíxin chojni tsondáche sin ti ijna̱ kixin tsoxratja ti jehe sin la ko tsondáche sin itjo kixin tsja̱vá ti jehe sin. 31A̱ndá ti xi̱kaha chꞌehe sin ti inta yoa la, ¿nkehe kaá chrókjuíchꞌehe sin ti inta tsíxámá?
32Kja̱xin sákjuíko sin yaá chojni tsíkjasin ijie̱ kixin tsꞌóñáko sin ti chꞌin Jesús. 33Ndá ti ó kjuíji sin ti ijna̱ itꞌin Hueso Ikja Chojni, la ntiha kjuákꞌenkáni sin chꞌin Jesús ti ntacruz la ko kja̱xin ti yaá chojni chónta ijie̱, ijnko la itja chꞌan chjina la íjnko la itja chꞌan ikjon. 34#Sal. 22:18.*Ndá ti ó kjuixin kjuákꞌenkáni chꞌan ntacruz, la ndáchro chꞌan:
―Itꞌéni, tónínkákuénhña sin kixin noehña sin nkehe ti ichꞌe sin.
Ndá ti sin soldado la kꞌóxika̱ye̱he sin ti iké chꞌin Jesús, kjuíchꞌexín sin suerte kixin tso̱nohe sin nkexro tsákja. 35#Sal. 22:7.*Ndá kaín chojni tjejótsjehe sin ti nkehe kóhen la ko ti sin tꞌe̱to̱an la kjuanoá sin chꞌin Jesús ndáchro sin:
―Kjuínchekaá chꞌan ókjé chojni, a̱ndá ijie sinchekaá chꞌan a̱sén chꞌan ti chaxín jehe chꞌan ti Cristo, ti nkexro tsíkjeyá Díos.
36 #
Sal. 69:21. *La kja̱xin ti sin soldado kjuanoá sin chꞌin Jesús la kóchjinako sin xranvino náxrjónhña chjéhe sin chꞌan chrókꞌui chꞌan, 37la ndáchro sin:
―Ti chaxín jaha ti rey kuènté ti sin judío la jahuá nchekaá a̱sán.
38Kja̱xin ikja ti ntacruz mé kjuákꞌenkáni sin ijnko nta tsíkji̱nxi̱n sin ngiva griego la ko latín la ko hebreo ndáchro:
“Tíhi mé Rey kuènté ti sin judío.”
39Kja̱xin ijnko ti sin chónta ijie̱ tjenkáni ntacruz la kꞌuándaxíhi̱n chꞌin Jesús, ndáchro chꞌan:
―Ti chaxín jaha ti Cristo, la jahuá tjinkájña a̱sán, ndá tsjixin ndá tjínkajñani.
40Kjánchó ti íjnko nkexro la kꞌue̱tue̱hen ti nkexro kꞌuándaxín kixin tsotání, la ndáchro:
―Ndáchrohya xi̱kaha. ¿Á chrakuenhña Díos kixin xi̱kaha ichrua kixin jeheni la ti ijie̱ kuènténi tjejótjasótexíni? 41Jeheni ncho̱xon ti tjejótjasóteni tjejótje̱nka̱ni ti ijie̱ kjuasini. A̱ndá ti nkexro i ninkehó nkehe jínahña kjuíchꞌehya, la koí tjetjasóte.
42Ndá ndáchro chꞌan:
―Jesús, xráxinkaoan ti janhan ti ó tsꞌayéhé kjuachaxin tséto̱an.
43Ndá kjuáte̱he chꞌin Jesús, ndáchro:
―Chaxín ndáxrja̱n kixin ndesi ijie jaí tsꞌejóko kíchóni nkaya nka̱jní.
Ndá ó ikꞌuén Jesús
(Mt. 27:45-56; Mr. 15:33-41; Jn. 19:28-30)
44 #
Ex. 26:31-33. *Ndá ó chjina chonkíxin la kꞌuixitie kuenté chjasintajni hasta las tres kójín. 45Ikꞌuén ña̱o, la ti ika tjenkákuèxín nkaxehen ni̱nko la kꞌuichje nko̱siñe. 46#Sal. 31:5.*Ndá chꞌin Jesús itsen ndáchro:
―Itꞌéni, tꞌayéhé ti a̱séni.
Xi̱kaha ichro chꞌan ndá ikꞌuén chꞌan.
47Ndá ti ó kꞌuíkon ti capitán romano kaín tíha la chjéhe chꞌan kjuasáya Díos, ndáchro chꞌan:
―Chaxín, ti nkexro í la ninkehó ijie̱ chóntahya.
48Ndá kaín ti chojni tsíkónkotsé ntiha kꞌuíkon kaín ti nkehe kóhen la sákjuixin sin ntiha, chrakon sin tinkákjate sin ntakuin sin kixin xi̱kaha kóhen. 49#Lc. 8:2, 3.*Ndá kaín ti sin chóxin Jesús la ko ti sin chjin nkáchréhe̱ sin chꞌan kjui̱xi̱n sin Galilea la ikjín tjejó sin tjejótsjehe sin ti nkehe kóhen.
Xravá chꞌin Jesús
(Mt. 27:57-61; Mr. 15:42-47; Jn. 19:38-42)
50A̱ndá ntiha itjen ijnko nkexro itꞌin José, tsikji̱xi̱n Arimatea nonte kuènté Judea. Kja̱xin chꞌan ijnko ti sin imá tꞌe̱to̱an kuènté ti sin judío, jína chꞌan. 51Jehe chꞌan kja̱xin tjechóhen chꞌan itsi ti kjuachaxin kuènté Díos. La kóxríe̱nhña chꞌan nkexrín kjuíchꞌe ti sin íso tꞌe̱to̱an. 52La sákjuitsjehe chꞌan Pilato la kjuanchia chꞌan ti cuerpo kuènté Jesús, ndá Pilato kjuajon kjuachaxin. 53Ndá sákjuí sin la kuakjijinxi̱n sin ti cuerpo kuènté chꞌin Jesús ti ntacruz, ndá kjuínchekꞌísímá sin ijnko ika, ndá kjuákꞌe sin chꞌan ijnko tòye̱ xráxín tsíkjichꞌéna chꞌin José, jehó itjo̱ la ko na̱xa̱ ninkexró tsíxraváhya. 54Kaín tíha kóhen ti ña̱o tóyaxíhin sin kixin ó tsoxrankíxin ti ña̱o to̱kꞌéhe sin la kohya kjuachaxin tso̱hen ninkehó ixra̱.
55A̱ndá ti chojnichjin nkáchréhe̱ kjuikoxín Jesús ndesi Galilea la kja̱xin sákjuí sin ti tóye̱ la kꞌuíkon sin nketí kjuákꞌe sin ti cuerpo kuènté chꞌan. 56#Ex. 20:10; Dt. 5:14.*Ndá ti ó ikjan sin ti nchia tjejó sin la kóyaxíhin sin kjueyá sin xro̱a̱n xraxé náxrjón itsa nto̱e Jesús kixin xi̱kaha kꞌuékinkáchónki ti sin judío. A̱ndá ko̱kꞌéhe sin ti ña̱o sabado éxi tꞌe̱to̱an ti ley.
Currently Selected:
Lucas 23: poeNTplus
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
