Lucas 17

Ti nkehe tsꞌitsínkaxín chojni

(Mt. 18:6-7, 21-22; Mr. 9:42)

1Ndá chꞌin Jesús ndáche ti sin kꞌuájiko:

―Siín itsjé nkehe tsjasixín chojni ijie̱, kjánchó nóa ti nkexro sichꞌiyehe ijnko chojni kixin chrókjuasixín ijie̱ kixin imá tsjasóte. 2Ícha jína chrókjuincheteyá sin ijnko xro̱chre̱ la chrókuikjakánkí sin nda̱ñao kixin í chrókjuachròehya íjnko ti ixjan na̱xa̱ noehña. 3#Mt. 18:15.*Tóxakohanra kixin xi̱kahña chrókjuásinra ijie̱.

’Ti nkojín kichuara chrókjuitꞌahara nkojín ijie̱, la chrónixjehéra chróchenkara kixin jehya jína ti kjuitꞌahara chꞌan. A̱ndá ti chrókuitekaon ndá chrókjuinkí ti nkehe tjenka̱yáxin, la chrókꞌuitjáñahanra ti nkehe kjuitꞌahara chꞌan. 4Kjónté chrókjuásihanra chꞌan ijie̱ yato vece nkoko̱a ña̱o la ko yato vece chróndáchro kixin í xi̱kahña sichꞌe, la ticháxi̱n tsꞌitjáñahanra ti nkehe kjuitꞌahara chꞌan.

Tjinki̱tsani kixin a̱ntsí chrókuitekaoni

5Ijnko ña̱o la ti sin kꞌuájiko chꞌan la ndáchro sin:

―Tjinki̱tsani kixin a̱ntsí chrókuitekaoni ti jaha ―ichro sin.

6A̱ndá Ìnchéni ndáchro:

―Ti chrókuitekáonra ti janhan kjónté éxi jiéxin ti itje mostaza la jína chrókuétue̱hénra ti inta sicómoro kixin chrókꞌuaxrjenkíxin ti itjen la sáchrokjui chróxenkaxín nko̱siñe nda̱ñao, la ti inta la chrókjuinchexiteyá sáchrokjui.

Ti nkehe ticháxi̱n sichꞌe ti nkexro chꞌexín ixra̱

7’Ti nkojinra chróchontara ijnko nkexro tꞌahara ixra̱, ndá ti nkexro a chrókja̱nxi̱n no̱nta̱ara ti ó kjuixin kjuínchentá inche o̱ kꞌuayakohen ti iko kuèntára, la, ¿á chróndáchera chꞌan kixin senó chrókjuákꞌe chꞌan chrókjonie chꞌan ní? 8Kjá náhí. Kjá chrókuétue̱hénra chꞌan kixin senó chrókjuinchechján chꞌan ti nkehe sintera la ko chrókóyaxíhin kixin tsjajon ti nkehe sintera la ko chrókꞌuia. Ndá tsjixin, ndá jína tsjakꞌe ti nkexro a sinie la ko itsꞌi. 9La, ¿á chróchje̱héra chꞌan kjuasáya kixin kjuínchexiteyá chꞌan ti nkehe kꞌuétue̱hénra ní? Kjá náhí. 10Mé xi̱kaha jahara ti ó tsjixin si̱chꞌera kaín ti ixra̱ kꞌue̱to̱an Díos, la chróndáchrohyara kixin jína kjui̱chꞌera ixra̱ kixin jehó ti nkehe kꞌue̱to̱an chꞌan ó kjui̱nchexiteyára, ichrora.

Ite chojni chónta chinlepra kuito̱he jína

11Ndá sátsji chꞌin Jesús chjasin Jerusalén la kꞌuatsínka sin Samaria la ko Galilea. 12Ndá kjuíji sin ijnko chjasin intsí la xéta sin ite chojnindoa níhi chónta chinlepra, la ikjín kꞌuejó sin, 13la itsen kꞌuéya sin, ndáchro sin:

―Jesús, Maestro, ti̱konoéhéni kaíni.

14 # Lv. 14:1-32. *Ndá ti ó kꞌuíkon chꞌin Jesús, la ndáchro chꞌan:

―Sátsjira tjichréhéra ti sin ncha̱tꞌá tsꞌikon kixin ó kuito̱hara jína.

Ndá na̱xa̱ nti̱a ó tjejóya sin sákjuí sin la kuito̱he sin jína. 15Ndá ijnko nkexro a ti ó kꞌuíkon kixin ó kuito̱he jína la ikjan, la itsen chjéhe kjuasáya Díos. 16La kjuákꞌexín tochꞌin to̱té chꞌin Jesús la kꞌuisén hasta nkéhe̱ nonte ikja la kjuajon kjuasáya. Ti nkexro í mé chojni tsíkji̱xi̱n Samaria. 17A̱ndá chꞌin Jesús ndáchro:

―¿Á jehya ite chojni kuito̱he jína ní? ¿Ndá kjá ti ina sin? 18¿Á jehó ti nkexro tsíkji̱xi̱n ókjé chjasin ó ikjan chjéhe kjuasáya Díos ní?

19A̱ndá ndáche chꞌin Jesús ti nkexro a:

―Tꞌínkatjen sátjia, kixin ti kuitekaoan Díos la kuito̱ha jína.

Itsi ti kjuachaxin tꞌe̱to̱axín Díos

(Mt. 24:23-28, 36-41)

20A̱ndá ti sin fariseo mé kjuanchankíhi sin chꞌin Jesús kixin nkesá itsi ti kjuachaxin kuènté Díos. Ndá chꞌin Jesús ndáchro:

―Ti ó itsi ti kjuachaxin kuènté Díos la xitjahya tsꞌikon chojni. 21Xitjahya tsondáchro chojni: “Ntihi itjen”, o̱ “Ntiha itjen”; kixin ti kjuachaxin kuènté Díos la itjen nko̱siñe ti tjejora.

22Ndá chꞌin Jesús ndáche ti sin kꞌuájiko:

―Itsi ti ña̱o tsotjinkáonra tsꞌikonra ti ña̱o itsi ti Xje̱en Díos kꞌóna Chojni, kjánchó tsꞌikonhñara. 23Tsondáchro sin kixin ntihi itjen chꞌan, o̱ ntiha itjen, kjánchó sáchrókjuihyara la ko chróchréhyara sin. 24Kixin éxi tꞌikonra tjónkíxín tꞌinkaséñaxín kuenté nka̱jní mé xi̱kaha tso̱hen ti ó tsokjan ti Xje̱en Díos kꞌóna Chojni. 25Kjánchó ticháxi̱n sa̱o tsjasóte chꞌan nchónhña la ko tsitekakuenhña ti sin tjejó ijie ti jehe chꞌan. 26#Gn. 6:5-8.*Éxi kóhen ti ña̱o kjuákꞌe Noé mé xi̱kaha tso̱hen ti ó tsokjan ti Xje̱en Díos kꞌóna Chojni. 27#Gn. 7:6-24.*Ti chojni la inie sin la ko itꞌi sin la ko sítóte̱he sin la ko kjuajon sin kjuachaxin kóte̱he̱ ti xje̱en sin. Hasta ti ña̱o kꞌuíxehen Noé ti ntabarco ndá kꞌuaniá ichrin, ndá ti sin kuíto̱he ndója la kaín sin kꞌuitjáña sin. 28#Gn. 18:20—19:25.*Kja̱xin xi̱kaha kóhen ti kjuákꞌe Lot inie sin la ko itꞌi sin la ko kuékꞌe̱na sin nkehe la ko nchekji sin la ko tꞌe̱nka̱ sin no̱nte̱e sin la ko chꞌéna sin nchia. 29Kjánchó ti ña̱o kꞌuaxrjexín Lot ti chjasin Sodoma, la nka̱jní kui̱xi̱n xrohi la ko azufre, kꞌuénxin kaín ti sin kꞌuejó ntiha. 30Mé xi̱kaha tso̱hen ti ña̱o itsi ti Xje̱en Díos kꞌóna Chojni.

31 # Mt. 24:17, 18; Mr. 13:15, 16. *’A̱ndá ti ña̱o a la ti nkexro tjejó chritaón nchia, ndá chónta ichrén nkehe tjete ti nkaxehen nchia la í chrókꞌuinkaji̱nhña chrókuákja. A̱ndá ti nkojín nkexro tjejó no̱nte̱e la í chrókjanhña sin ndo̱e sin. 32#Gn. 19:26.*Xráxinkaonra nkehe kóhen ichjién Lot. 33#Mt. 10:39; 16:25; Mr. 8:35; Lc. 9:24; Jn. 12:25.*Ti nkexro tjinkaon kixin kohya nkehe chrókóhen mé tsꞌitjáña. A̱ndá ti nkexro chrókjuinchekꞌitjáñaxín a̱sén kixin chróchronka itén Díos mé tsaá. 34Chaxín ndáxrja̱n kixin ti ó tie nkoko̱a tꞌejójua yaá chojni la ijnko la sátsji̱ la ti íjnko la tsito̱he. 35Yaá chojnichjin nkoko̱a tjejótꞌo sin, ijnko la sátsji̱ la ijnko tsito̱he. 36Yaá chojni tjejóchꞌe sin ixra̱ no̱nte̱e sin, ijnko la sátsji̱ a̱ndá ijnko la tsito̱he ―ichro chꞌin Jesús.

37Ndá ti ó kuíhin sin tíha la kjuanchankíhi sin chꞌin Jesús:

―¿Xá nketí tso̱hen tíhi, Ìnchéni? ―ichro sin.

A̱ndá chꞌin Jesús kjuáte̱he ndáchro:

―Ti itjen ti iko tsíkꞌen la ntiha tso̱nkotsé ti konte̱xrje̱n ―ichro chꞌin Jesús.

Currently Selected:

Lucas 17: poeNTplus

Highlight

Copy