Lucas 16

Éxi ti nkexro kjuíchꞌehya ixra̱ jína

1Kja̱xin ndáche chꞌin Jesús ti sin kꞌuájiko:

―Kjuákꞌe ijnko lamo rico mé kóchónta ijnko nkexro chꞌexín ixra̱ chjéhe kjuachaxin kixin tsꞌe̱to̱an kaín ti ixra̱ tso̱hen. Ndá ikui ijnko chojni chenka ti lamo: “Ti nkexro tꞌe̱to̱an la nchexéhén chꞌan ti chi̱cha̱ko̱an.” 2Ndá ti lamo kꞌuéye̱he̱ ti nkexro chꞌexín ixra̱ la ndáche: “¿Á chaxín ichꞌe éxi kui̱ha̱n chrónka sin ní? Ijie tsjánjua kuentá ti ixra̱ kjui̱chꞌe kixin í si̱chꞌehya ixra̱ tséto̱an ntihi”, ichro ti lamo. 3A̱ndá ti nkexro tꞌe̱to̱an tóhen ixra̱ la kjuénka̱yáxin: “¿Nkehe chrókjui̱tꞌa ijie kixin ti lamo la í tsjajonhña ixra̱ si̱tꞌa? Janhan la xitjahya si̱tꞌa ixra̱ no̱nte̱e chojni la ko tósuàna chrókjuanchakꞌa nkehe. 4Ó nona nkehe si̱tꞌa kixin tsochonta nkexro tsjajon kjuachaxin tsjakꞌé ndo̱e ti í tsochontahya ixra̱ si̱tꞌa.” 5Ndá kꞌuéye̱he̱ chꞌan nkojnko ti sin síkéhe ti làmoé chꞌan. Ndá ti nkexro sa̱o ikui la kjuanchankí ti nkexro tꞌe̱to̱an: “¿Nkekja̱ín sikéhé lamoéni?” 6A̱ndá ti chojni la ndáchro: “Síkáni ijnko ciento ntabarril aceite.” A̱ndá ti nkexro tꞌe̱to̱an la ndáchro: “Ntihi itjen ti xroon sínixín kixin síkán. Tjoka tjakꞌe nonte la téni̱xian kixin cincuenta ó síkán.” 7Ndá chrꞌéxi̱n kjuanchankíhi chꞌan íjnko nkexro: “A̱ndá jaha, ¿nkekja̱ín síká?” Ndá ti nkexro la ndáchro: “Ijnko ciento medida noatrigo.” Ndá ndáchro ti nkexro tꞌe̱to̱an: “Ti xi̱kaha la ntihi itjen ti xroon tjenixín ti síkán. Ijie la téni̱xian kixin ochenta ó síkán.” 8A̱ndá ti lamo kjuátso̱an kixin kjónté jehya ixra̱ jína kjuíchꞌe ti nkexro a la nohe nkehe kjuíchꞌe, kixin a̱ntsí nohe nkexrín nixje̱he̱ íso chojni kjónté kjuíchꞌia. Mé xi̱kaha ti sin chonhña Díos la a̱ntsí nohe sin nixje̱he̱ sin íso chojni, ke ti nkexro ixri ti tꞌinkaséña; noehña sin nkexrín tsonixje̱he̱ sin íso chojni ti nkehe jína.

9’Janhan la tétua̱hanra kixin chrókuichánxi̱hanra ti chichaon siín chjasintajni kixin tsjínki̱tsara chojni kixin ndá itsjora sin jína, kjónté kanhñó jína ti chichaon. A̱ndá ti ó tsjeje̱ kaín ti chichaon, ndá Díos tjen nkaya nka̱jní tsꞌáyàhara chꞌan nkochríxín.

10’Ti nkexro jína kꞌuayakohen ti nkehe chónta, kjónté tsjéhya, la kja̱xin chrókjuacha chrókꞌuayakohen ti nkehe itsjé chróchónta. A̱ndá ti nkexro kjuachahya kꞌuayakohen ti nkehe tsjéhya chónta la kja̱xin chrókjuachahya chrókꞌuayakohen ti nkehe itsjé chróchónta. 11Mé xi̱kaha ti xitjahya tsꞌayakohénra ti chichaon kuènté chjasintajni, ¿la nkexrín chrókꞌuayéhéra ti nkehe tjete kuènté nkaya nka̱jní? 12Mé xi̱kaha ti kjuáchahyara kꞌuayakohénra ti chichaon kuènté ókjé nkexro, ¿la nkexro chrótjáhara ti nkehe chaxín tjete chróchontara?

13 # Mt. 6:24. *’Nijnko nkexro xitjahya sichꞌehe ixra̱ yaá lamo kixin ijnko la tso̱nínkakohen la ti íjnko la tso̱tjue̱he, o̱ ijnko la tsitekakohen, la ti íjnko la tsitekakuenhña. Méxra̱ xitjahya sichꞌehe sin ixra̱ Díos ti tjinkaon sin tsochónta sin itsjé chichaon.

14A̱ndá ti ó kuíhin kaín tíhi ti sin fariseo imá tóxríhi̱n chichaon, ndá kjuanoá sin chꞌin Jesús. 15A̱ndá chꞌin Jesús ndáchro:

―Jahara jehó tjáko̱xinra kixin chojni jínara nkayakon chojni ó. Kjánchó Díos la chóxin a̱sánra. Kixin ti nkehe imá tóxríhi̱n chojni sichꞌe la Díos la tóxrìe̱nhña.

Ti ley la ko ti kjuachaxin tꞌe̱to̱axín Díos

16 # Mt. 11:12, 13. *’Ti na̱xa̱ kjuankíxinhña kjuako chꞌin Juan la kꞌuékjako sin ti ley tsíkꞌe̱to̱an Moisés la ko ti nkehe tsíkjin ti sin kꞌuéchronka itén Díos ósé. A̱ndá ikui Juan la kjuako chꞌan ti itan jína chronka ti kjuachaxin tꞌe̱to̱axín Díos. Ndá kaín chojni imá tjinkaon sin chrókjuacha sin chrókꞌuejó sin ti itjen Díos tꞌe̱to̱an.

17 # Mt. 5:18. *’A̱ntsí xra̱hya chrókꞌuitjáña ti nkehe siín nka̱jní la ko chjasintajni, ke chróxiteyáhya ti itén Díos, kjónté ijnko nkehe intsí.

Chrokjuáke̱ehya kícho chojni

(Mt. 19:1-12; Mr. 10:1-12)

18 # Mt. 5:32; 1Co. 7:10, 11. *’Kaín ti nkexro tsjáke̱he̱ ichjién ndá tsákja íjnko chojnichjin la ó kjuasin ijie̱. La ko ti nkexro tsákja ijnko chojnichjin tsíkꞌitsínkehe la kja̱xin tjasin ijie̱.

Ti nkexro rico la ko Lázaro

19’Kjuákꞌe ijnko nkexro imá rico, kuékꞌitsá ika náxrjón kjátse tié, tjete sínkí la ko kaín ña̱o kꞌuékjasin kia. 20Ndá ti ndója ndo̱e ti nkexro a la kꞌuékjakꞌetja̱xi̱n ijnko chojni nóa itꞌin Lázaro la tjanchakꞌá, la kꞌuéníhi tsíchrꞌenka nto̱e. 21La imá tjinkaon chꞌan chrókjonie ti to̱tꞌo̱ nkehe xèjinkíxin ti mesa kuènté ti nkexro rico. La ti koni̱a̱ la tóchjina va la tja̱má va ti to̱sóa chónta ti nkexro a. 22Ndá ijnko ña̱o la ikꞌuén ti nkexro nóa. La sákjui̱ko ti sin ángel ti nketí náxrjón itjen chꞌin Abraham. La kja̱xin ikꞌuén ti nkexro rico la sákjuikja̱vá sin. 23Ndá ti ó itjen chꞌan ti sátji ti sin tsíkꞌen tsjasóte, ndá konta chꞌan noi la ikjín kꞌuíkonxín chꞌan kixin náxrjón ti itjen chꞌin Abraham la ntiha itjen ti chꞌin Lázaro. 24Ndá itsen kꞌuéya ti nkexro kꞌuérico, ndáchro: “Itꞌéni Abraham, ti̱konoéhéni la tétue̱hén Lázaro kixin sinchekjata kohe#16:24 kohe punta, la punta de su dedo ti ndedo itja ntsí ìnta̱ ndá tsjakꞌetja ñe̱je̱n kixin tso̱xrue̱he kixin í tjinahña#16:24 tjinahña no aguanto sóa ntihi.” 25Kjánchó Abraham ndáchro: “Xje̱eni, xráxinkaoan kixin ti kjuákꞌe chjasintajni la ó kꞌuayéhé itsjé nkehe náxrjón. Ndá Lázaro kꞌuáyéhe̱ ti nkehe náxrjónhña, ndá ijie la kjuaxróxin itjen chꞌan ntihi, a̱ndá jaha la tjetjasótíá méhe̱. 26La kja̱xin itjen ijnko tsa̱ka imá jié ti nko̱siñe la xitjahya tsꞌátòye̱ ti sin tjejó ntihi tsjiji sin ti itjen la ko kja̱xin ti sin siín méhe̱ la xitjahya itsji sin ntihi.” 27Ndá ti nkexro rico la ndáchro: “Xrja̱noáhá Itꞌéni Abraham kixin chróchrꞌán chꞌin Lázaro sátsji ndo̱e Tꞌaná 28kixin ntiha chonta inꞌó kíchina, la chróchenka chꞌan sin kixin chrókuihya sin ntihi kixin chrókjuasótehya sin kixin ntihi la imá náxrjónhña.” 29Kjánchó chꞌin Abraham ndáchro: “Ó chónta sin ti nkehe tsíkjin Moisés la ko ti sin kꞌuéchronka itén Díos ósé. Chrokuihin sin ti nkehe tsíndáchro ti sin a”, ichro chꞌin Abraham. 30Ndá ti nkexro rico la ndáchro: “Náhí, Itꞌéni Abraham. Ti tsochrꞌan ijnko chojni tsíkꞌen la tsitekaon sin la tsíto̱he sin ti iji̱é sin.” 31Ndá ndáchro chꞌin Abraham: “Ti titekakonhña sin ti nkehe tsíndáchro Moisés la ko ti nkehe tsíndáchro ti sin tsíchronka itén Díos ósé, la tsitekakonhña sin kjónté chróxechón ijnko chojni tsíkꞌen chrókjuichronka ti itan”, ichro chꞌin Abraham.

Currently Selected:

Lucas 16: poeNTplus

Highlight

Copy