San Marcos 3

Naa xii dixemadoꞌo naa raa

(Mt. 12:9-14; Lc. 6:6-11)

1Jesús bixiꞌin niꞌngo inaa, ko nthi̱ꞌa̱ tajii naa xii ndadixemadoꞌo naa raa xa. 2Ko nthi̱ꞌa̱ kanxion xi fariseo jeꞌo tetsjeꞌe xa ako sinchexrueꞌen thi niꞌi ngain thi nchaꞌon nchejugaꞌa ni, ko jañaa nchao rukjangiꞌi xa Jesús. 3Kuthimejan Jesús ndachro ngain thi xii dixemadoꞌo raa:

—Dingathjen ko dariꞌi ngusine.

4Kuthimejan Jesús banchiangiꞌi ni binthe nthi̱ꞌa̱ ko ndachro:

—¿Keꞌe jikininxin sincheꞌe ni ngain nchaꞌon nchejugaꞌa ni? ¿A sincheꞌe ni thi jian o thi jianꞌa? ¿A tsjengijna ni chujni, o nasuenxon ni na̱?

Aro kain na̱ tenkua na̱. 5Kuthimejan Jesús guñao tsjeꞌe xi fariseo te nthi̱ꞌa̱ ko kai tabechiin ixin atho cha thinxin xa. Ko ndachro Jesús ngain thi beniꞌi:

—Thinxe raa.

Ko thi xii kuinxe raa ko kuxrueꞌen ra. 6Kuthimejan kain xi fariseo sakjui xa ko kuexiꞌin xa kjuao xa chujni bakao Herodes ixin kexreen sincheꞌe na̱ ixin nasuenxon na̱ Jesús.

Anto tsjé chujni xrathe ngandeꞌe jinda

7Kuthimejan Jesús ko ni kuinchieꞌe sakjui na̱ ngandeꞌe jinda ko tsjé chujni Galilea ruee. 8Ko are kuiꞌin na̱ kain thi bincheꞌe Jesús, tsjé chujni juixin Judea, Jerusalén, ni nunthe Idumea ko icha chujni juixin tuenxin nda Jordán, ko icha chujni juixin rajna Tiro ko Sidón. 9Ko ixin anto tsjé chujni baruee, mexinxin Jesús ndache chujni bakao ixin urugechunda na̱ naa ntha barko ko jañaa rukuntheduꞌa na̱ ngaka jeꞌe. 10Ko ixin anto tsjé chujni ubinchexrueꞌen, mexinxin kain ni beniꞌi binao na̱ ruxrataꞌa na̱ ngain ixin rukathe na̱ ko rukuxrueꞌen na̱. 11Ko chujni bechunda espíritu jianꞌa are bagikon Jesús, espíritu teꞌi baganka chujni ko banchenichja na̱ suji ko bandachro:

—¡Jaꞌa thi Xeꞌen Ndo Dio!

12Aro Jesús baketuꞌen ixin runthendachroꞌa kensen jeꞌe.

Jesús kuinchieꞌe thi theyoo apóstol

(Mt. 10:1-4; Lc. 6:12-16)

13Kuthimejan Jesús kuanito naa jna, ko baye̱e chujni jeꞌe juinao ko xrathe na̱ ngain jeꞌe. 14Ko jeꞌe kuinchieꞌe theyoo chujni ixin ruginthe na̱ ngain, ko ni teꞌi binchegiꞌin na̱ apóstol ixin ruruaꞌan na̱ ko tsjaago na̱ juajnee Ndo Dio. 15Ko jeꞌe chjee na̱ juachaxin santsje na̱ espíritu jianꞌa jixiꞌin chujni. 16Ko ni theyoo teꞌi biꞌin na̱ Simón, thi kai Jesús banchegiꞌin Pedro; 17Jacobo ko xan choo xan biꞌin Juan, ko yui xan teꞌi xeꞌen Zebedeo, thi kai Jesús banchegiꞌin xan Boanerges, ko jiꞌi ruchro xeꞌen thi dathe; 18kai Andrés, Felipe, Bartolomé, Mateo, Tomás, ko inaa thi biꞌin Jacobo xeꞌen Alfeo, Tadeo, Simón thi Cananeo, jiꞌi kjui naa thi baketukaꞌo chujni romano, 19ko Judas Iscariote, thi ndachro kexreen rutse na̱ Jesús.

Jesús ko Beelzebú

(Mt. 12:22-32; Lc. 11:14-23; 12:10)

Kuthimejan Jesús sakjui ngain naa nchia, jeꞌe ko ni bakao, 20ko kjan xrathe tsjé chujni ko chroꞌa juine jeꞌe ko kain ni kuinchieꞌe. 21Ko are kunuꞌe ni nduꞌa Jesús ixin keꞌe bancheꞌe, kjui na̱ ixin sarugikao na̱ jeꞌe ixin xraxaon na̱ ixin ndaxenga.

22Aro kanxion xi tjaago ley juixin rajna Jerusalén ndachro xa:

—Xii jiꞌi jixiꞌin xa Beelzebú, thi thetuꞌan kain espíritu jianꞌa. Ko jeꞌe xa nchao dantsje xa espíritu jianꞌa kunixin juachaxiin Beelzebú.

23Kuthimejan Jesús baye̱e kain chujni mee ko kjuaago kunixin thi bakuꞌen ko ndachro:

—¿Kexreen jeꞌo nchiijin sengi nchiijin? 24Ja̱ ni rajna thetukaꞌo choo na̱, rajna mee tuin ndaruxanthe rajna. 25Ko ja̱ ngain naa nchia atho theto na̱, kai tuin ndaruchjekee na̱. 26Ko jañaa kai ja̱ nchiijin jeꞌo tseto, kai seꞌa tsunchrjeꞌen, ko tuin ndasitjaan.

27’Xruꞌin chujni nchao sixiꞌin nchianduꞌa naa xii anto tsanga ixin tsemeꞌe na̱ kain thi chunda xa, ja̱ tsiaꞌa na̱ xa saꞌo. Kuthimejan nchao sasikao na̱ kain thi jixiꞌin nchianduꞌa xa.

28’Ndua thi rundathjo ra, kain chujni sitjañeꞌe kain thi jianꞌa ncheꞌe na̱ ko kain thi jianꞌa nichja na̱, 29aro thi runichja jianꞌa ixin Espíritu Santo, chujni mee xruꞌin nchaꞌon sitjañeꞌe na̱, ko kainxin nchaꞌon seka na̱ thi jianꞌa nichja na̱.

30Jañaa ndachro Jesús ngain na̱ ixin ndachro na̱ ixin Jesús bechunda espíritu jianꞌa.

Janee ko xan choo Jesús

(Mt. 12:46-50; Lc. 8:19-21)

31Kuthimejan biji janee ko xan choo Jesús ko chroꞌa bixiꞌin na̱ nchia. Ko bithuꞌe na̱ nduja ko kuetuꞌan na̱ rukii Jesús ngain na̱. 32Ko kain chujni tate ngaka Jesús ndachro na̱:

—Janaa ko xan choo nduja te na̱ ko rinao na̱ runichjaꞌa na̱.

33Ko Jesús ndachro:

—¿Kensen janana, ko kensen xan chian?

34Kuthimejan Jesús tsjeꞌe kain ni tendajin jeꞌe ko ndachro:

—Kain chujni te nthiꞌi, ni mee janana ko xan chian, 35ixin kain chujni ncheꞌe thi rinao Ndo Dio, ni mee xichian, nchrichian ko janana.

Currently Selected:

San Marcos 3: plsNT

Highlight

Copy