San Lucas 7
7
Jesús binchexrueꞌen xi nchexree naa xi capitán romano
(Mt. 8:5-13)
1Are Jesús juexin ndache chujni kain jiꞌi, jeꞌe sakjan ngain rajna Capernaum. 2Nthi̱ꞌa̱ beꞌe naa xi capitán romano bechunda xa naa ni nchexree xa anto batjueꞌe xa, ko thi ncheꞌe xra mee undajideꞌen. 3Ko are xi capitán mee kuiꞌin xa ixin Jesús, jeꞌe xa ruaꞌan xa kanxion ni judío binthechunda juachaxin ngain ninguꞌe na̱ ixin binchetseꞌen na̱ ñao Jesús ixin rukji runchexrueꞌen ni nchexree xi capitán. 4Kain ni mee kunchieꞌen na̱ ngain Jesús ko kuexiꞌin na̱ binchetseꞌen na̱ ñao ko binthendachro na̱:
—Xi capitán jiꞌi jikininxin ixin suixin tsjengijna xa 5ixin jeꞌe xa anto thjuena ná xa jaꞌan ná xro judío ná ko binchechjianna ná xa naa ninguꞌna ná.
6Ko Jesús sakjui ngain na̱. Ko are uchiaon biji na̱ ngain nchianduꞌa xi capitán mee, jeꞌe xa kuetuꞌen xa kanxion xi jian dakao xa ixin ndachro xa ngain Jesús:
—Idikjiꞌa suixin, ixin xi capitán ndachro xa ixin jikininxinꞌa xa ixin suixin sixiꞌin nchianduꞌa xa. 7Mexinxin jeꞌe xa juiꞌa xa rujichuanxin xa ngatja nthiꞌá. Jeꞌe xa rinao xa jeꞌo diketuꞌan ixin ni nchexree xa tsuxrueꞌen. 8Ko jeꞌe xa ndachro xa: “Jaꞌan kai nuna thetuꞌan ko kai dithikaꞌon. Ko are thetuan naa xi soldaduna thji ko jeꞌe xa dithikaon xa ko thji xa. Ko ja̱ thetuan inaa xa ‘¡Xrakui!’, jeꞌe xa dithikaon xa ko thii xa. Ko ja̱ thetuan naa ni nchexrana: ‘¡Ncheꞌe jiꞌi!’, jeꞌe dithikaon ko ncheꞌe.”
9Ko are Jesús kuiꞌin juajnee xi capitán, jeꞌe kuiseꞌen, ko ngaria tsjeꞌe ngain kain chujni teruee ko ndachro ngain na̱:
—Ndua rundathjo ra, xruꞌin chujni Israel dikon ixin anto ruchunthia na inchin xi capitán jiꞌi.
10Ko are binthekjan xi bikao juajnee xi capitán ngain nchia, binthegikon xa ixin thi ncheꞌe xra beniꞌi undadikuxrueꞌen.
Jesús binchexechon naa xeꞌen nchri gaꞌan
11Kuthimejan, Jesús sakjui ngain naa rajna diꞌin Naín ko bikao chujni kuinchieꞌe ko icha chujni ruee. 12Ko are uchiaon rugigaꞌa na̱ rajna mee, jeꞌe bikon ixin tedikjabaa na̱ naa thi ndadigeꞌen, ko mee thi nakuaxinxon xeꞌen naa naniita dithuegaꞌan. Ko anto tsjé ni rajna tedikao na̱ naniita ixin tedikjabaa na̱ xeꞌen. 13Are Jesús bikon naniita, jeꞌe kuiakunueꞌe ko ndachro:
—Itsjangaꞌa.
14Kuthejan Jesús kunchieꞌen ko kathe thi jingaa xan, ko thi chujni tedikao xan tabinthengathjen na̱. Ko Jesús ndache xan ndadigeꞌen:
—Jaꞌan rindatjo jaꞌa: ¡Dingathjen!
15Ko xan ndadigeꞌen xendua xan ko bengaa xan chinthiꞌi xan ko kuexiꞌin nichja xan, ko jañaa Jesús bajon xan xii mee ngain janee xan. 16Are chujni bikon na̱ jiꞌi, kainxin na̱ anto xraon na̱ ko kuexiꞌin na̱ binchesayeꞌe na̱ Ndo Dio ko ndachro na̱:
—Naa chujni renthe dayee juajnee Ndo Dio kununxin ngayaa na̱.
Kai ndachro na̱:
—Ndo Dio ujuii ixin bikjengijna chujnii ndo.
17Ko nguixin nunthe Judea ko icha nunthe te ngandajin, kunuꞌe na̱ ixin keꞌe bincheꞌe Jesús.
Chujni ruaꞌan Juan
(Mt. 11:2-19)
18Juan, thi banchegithe chujni, kunuꞌe kain thi bancheꞌe Jesús ixin kuekiin chujni bakao jeꞌe. Mexinxin jeꞌe ruaꞌan chujnii, 19ixin kjui na̱ ngain Jesús ixin biganchiangiꞌi na̱:
—¿Andua jaꞌa thi Cristo, thi tsii, o ruchuan ná inaa thi tsii?
20Ko chujni ruaꞌan Juan binthekunchieꞌen na̱ ngain Jesús ko ndachro na̱:
—Juan ruaꞌan ná ixin sanchiangi ná ngajin suixin, ¿a ndua suixin thi Cristo thi tsii o ruchuan ná inaa?
21Ko are xra tate na̱ nthi̱ꞌa̱ Jesús binchexrueꞌen anto tsjé chujni binthechunda jejee chin ko thi anto bakiin na̱, binchexrueꞌen ni binthechunda espíritu jianꞌa ko chjee kon tsjé chujni dikonꞌa. 22Kuthimejan Jesús ndachro ngain chujni ruaꞌan Juan:
—Thji ra ko dindache ra Juan thi jaꞌa ra bikon ra ko thi jaꞌa ra kuiꞌin ra. Ko thekiꞌin ra ixin chujni dikonꞌa, jai unchao dikon na̱, thi chujni rengo, jai unchao chrji na̱, thi chujni binthechunda chin lepra, jai ixruꞌin chin chunda na̱, thi chujni thinꞌa, jai unchao thiꞌin na̱, thi chujni ndabeꞌen, jai xechon na̱, thi chujni nua ngain espiritue, jai ukuiꞌin na̱ ixin Ndo Dio sinchekjan na̱ inaa chujni narua. 23Ndo Dio sinchenchaon thi chujni thinthueꞌa thi chunthia ngajin.
24Ko are sabinthekji chujni ruaꞌan Juan, Jesús kuexiꞌin ndache chujni bithuꞌe nthi̱ꞌa̱ ixin Juan, ko ndachro:
—Are kjui ra ngagaꞌa jna thi xruꞌin chujni te ixin rugitsjeꞌe ra Juan, ¿keꞌe xraxaon ra rugikon ra ngain jeꞌe? ¿Axraxaon ra ixin juaxraxauen rukji inchin naa nthaxiji nchengithjen chrintho? 25Ja̱ jeꞌa jamee, ¿keꞌe xraxaon ra rugikon ra? ¿A naa xii jingaa luntho anto renthe? ¡Naꞌi, jeꞌa jamee! Jaꞌa ra chunxin ra ixin thi chujni tengaa luntho renthe, chujni mee te nchianduꞌa rey, chujni mee teꞌa ngagaꞌa jna. 26Mexinxin, ¿keꞌe chujni xraxaon ra rugikon ra? ¿A naa chujni dayee juajnee Ndo Dio? ¡Jaan ndua, ko xii mee icha renthe ke naa chujni dayee juajnee Ndo Dio! 27Ko thi jitaxin ngain Xruen Ndo Dio banichja ixin Juan, ko ndachro:
Icha saꞌo ke jaꞌa, jaꞌan ruruaꞌan naa thi sikao juajnana,
ixin jeꞌe sinchechjian nthiꞌá ixin siꞌi jaꞌa.
28Jaꞌan rindathjo ra xruꞌin inaa thi dayee juajnee Ndo Dio icha renthe juii ke Juan, thi nchegithe chujni; aro maski jamee, thi chujni icha rentheꞌa ngain thi thetuꞌan Ndo Dio, chujni mee thi icha renthe ke Juan.
29Are kuiꞌin na̱ jiꞌi, kain chujni ko kain xi thjejo tumii César batsuan na̱ ixin Ndo Dio jian ncheꞌe ndo jie̱ ko bigithe na̱ ixin Juan. 30Aro xi fariseo ko xi tjaago ley chroꞌa xa ixin Juan runchegithe xa; binaoꞌa xa thi jian runcheꞌe Ndo Dio ngain xa. 31Ko Jesús ndachro:
—¿Keꞌe sinthakininxin chujni ngain nchaꞌon teꞌi? ¿Kexreen dichjexin choo juaxraxauen na̱? 32Juaxraxauen na̱ te inchin juaxraxauen xan nchinnchinchjan tsuntaon ngain ndaasin, ko tuyauthe choo xan ko ndachro xan: “Jaꞌan ná binthachjian ná soon kunixin naa nthaxro aro jaꞌa ra theꞌa ra, mexinxin jaꞌan ná tsje ná naa soon thiaꞌo juachjaon aro jaꞌa ra tsjangaꞌa ra.” 33Ixin Juan, thi nchegithe chujni, juii ko bineꞌa jian ko biꞌa vino, ko jaꞌa ra ndachro ra ixin jeꞌe chunda naa espíritu jianꞌa. 34Kuthimejan juiꞌi jaꞌan, thi Xii juixin ngajni, ko jine ko diꞌi vino, aro jaꞌa ra ndachro ra ixin jaꞌan anto jine ko diꞌi ko jian dakjiꞌan kain xi thjejo tumii César ko kain chujni ncheꞌe jianꞌa. 35Aro juaxraxauen Ndo Dio xraago ngain chujnii ndo.
Jesús kjui ngain nchianduꞌa xi fariseo diꞌin Simón
36Naa xi fariseo ndache Jesús ixin rujine ngain nchianduꞌa xa, ko Jesús kjui nchianduꞌa xa ko beꞌe chrikee nthanchaon. 37Ko ngain rajna mee beꞌe naa nchrii bancheꞌe nchra jianꞌa, ko are kunuꞌe nchra ixin Jesús kjui bine ngain nchianduꞌa xi fariseo mee, jeꞌe nchra kjui nchra kunixin naa xruxrao marmol jichre ndaxrajni. 38Ko tabeꞌe nchra chrika ruthee Jesús ko tsjanga nchra, ko ndakon nchra binthjithe ruthee ko xrajaa nchra binchexemanxin nchra ruthe ko kuetuxin nchra ko kuinga nchra ndaxrajni. 39Are xi fariseo diꞌin Simón bikon xa jiꞌi, jeꞌe xa xraxaon xa: “Ja̱ xii jiꞌi rukji naa thi dayee juajnee Ndo Dio, jeꞌe xa rukunuꞌe xa kensen jikathe xa, ko keꞌe xree nchrii yaa, ko ixin nchrii jiꞌi naa nchrii ncheꞌe jianꞌa.” 40Kuthimejan Jesús ndachro ngain xi fariseo:
—Simón, jaꞌan chunda naa thi rundathjo jaꞌa.
Xi fariseo mee ndachro:
—Ndachjejin na, suixin ke tjaago.
41Jesús ndachro:
—Beꞌe yoo thi xii binthekjen tumi ngain naa thi bakjadua tumi. Ko naa xii mee beka rioꞌo jino̱ tumi, ko thi inaa beka noo tumi. 42Aro ixin xruꞌin tumi binthechunda kayui thi xii mee, jeꞌe thi kjuadua tumi binchetjañeꞌe thi binthekjen tumi. Jai ndachjejin na jaꞌa, ¿kexeꞌe thi xii icha sinao jeꞌe thi bajon tumi mee?
43Simón mee ndachro ngain Jesús:
—Jaꞌan xraxaꞌon ke thi xii icha tsjé bitjañeꞌe.
Jesús ndachro:
—Ndua thi ndachro.
44Kuthimejan Jesús tsjeꞌe ngain nchrii mee ko ndachro ngain Simón:
—¿A dikon jaꞌa nchrii jiꞌi? Jaꞌan bixiꞌin nchiandui, ko jaꞌa chjanaꞌa jinda kjuenxin ruthena; aro nchrii jiꞌi kjuenna nchra ruthena kunixin ndakon nchra, ko xrajaa nchra binchexemanxin nchra ruthena. 45Jaꞌa kuetuxinꞌa na are bixiꞌin ko chjaꞌa juajna, aro jeꞌe nchra bixiꞌon nchra nchia ko tandaꞌa nchra ixin thetuxin nchra ruthena. 46Jaꞌa kuingaꞌa aceite ngataꞌa jana, aro jeꞌe nchra kuinthjithe nchra ndaxrajni ruthena. 47Mexinxin jaꞌan ndathjo ixin thi anto thjue na nchra, tjaago ixin thi anto tsjé jianꞌa bincheꞌe nchra, ubitjañeꞌe nchra, aro thi chujni tsjéꞌa bitjañeꞌe, kai nchion tjaago ixin thjuena.
48Kuthimejan ndachro Jesús ngain thi nchrii mee:
—Kain thi jianꞌa bincheꞌe ubindatjañaꞌa.
49Ko kain chujni te nthi̱ꞌa̱ kuexiꞌin na̱ ndache choo na̱:
—¿Kensen xii jiꞌi ixin nchao nchetjañeꞌe xa chujni thi jianꞌa ncheꞌe na̱?
50Aro Jesús ndachro ngain thi nchrii:
—Ko jaꞌa ixin chunthia na kjan inaa chujni narua, mexinxin sathji ko chrjuin tsunuꞌe ansean.
Currently Selected:
San Lucas 7: plsNT
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.
